Read Silimo Matius 28 Bible Online

Matius 28 - Silimo bible

Matius 28

¹Asogo tigisarik agauwa sabit aʼge pam Allah paget weat welegesarik en, hubet oʼgwe hari Minggu pam, mo ʼgerat pou wagokhwe, at hwe Maria owi Magdala aʼge ano emin, hwe Maria agaikhen ano emin, Yesus werak pegesema enil ʼgwelakhouwogoluk wegesa.

²Wagaihwe erianoat, mouk lok aʼge erlang-perlang hasukhwe malaikat Allah ʼbogorl pam en yoʼgo ʼbelagonobou ago aʼge mesik ʼbu agarik, ʼgoduk helep aʼge dopnosogo larigisa aʼge ano erlebilogo poluk e, ebam huraga.

³At malaikat ano orogole re, obinal ʼgelaʼge tagalat e, osum ʼbuktak aʼge orogole ʼgut modok amulit yebekhesi.

⁴Asogo tegeimu, is ap ʼgagalak welegesa aʼge ebano onogorlok en onuak lup ʼbo pogulat e, aphwami werak aʼge ʼgelaʼge enanni modok erlak agalat, takpegesa.

⁵Ye, at malaikat ano en e, is hwami ebano moʼgulentasulat e, “Honogorlok hagup o. His e, Yesus e pam edikpoluk werigisa aʼge ano henil houwogoluk heratogu legep ai, an naluk o.

⁶Aʼge re, ebe yema erlak o. At en moʼgulhentesi ʼgelaʼge, Allah en elalugap pesimu oruak o. At welagama ebale nak yema henil ʼgwelakhau manis o.

⁷ʼGwelakholuk e, Yesus ano waragama Allah en elalugaptegeimu o, oluk, at osi iak wogu legesa aʼge ebano perleneat moʼgulentai lu o. Ye, his o Galilea owan lo erlak oruakhwe, at naduk louwarik oruakma henil hai lagup ani o. Holuk e, niak moʼgulhentegis ai eberak welemis o,” oluk moʼgulentesimu,

⁸is hwami ebano owikmu eba en lagalat onogorlok aʼbik hegesa aʼgeat de, pobuk onogola enagai aʼbik hil hilat, at osi iak wogu legesa aʼge ebano eneʼbek pungtagat moʼgulentai legesa.

⁹Moʼgulontouwogoluk lagaimu ebela pam ebano at Yesus emin sarlok tigisarik e, disogo moʼgulentesi, “Norokhwi o!” oluk moʼgulentesimu, is hwami ebano horok-horok legesarik e, oyuk eneʼgik tenak pogulat e, hau wusogo ondogorlu pam huregesarik erliktigisa.

¹⁰Erliktigisema, at Yesus en e, “Honogorlok hagup o. An nosi ebano o Galilea ligemagoluk, moʼgulentai lu o. Eba ligemarik enil niouwa o,” oluk moʼgulentesi.

¹¹Asogo moʼgulentesimu, is hwami eriano owan lagaihwe, is ap ʼgagalak welegesa aʼge ebano pema o kotama ʼgwigisarik e, wene ʼberlegat aga aʼge ebano, “Disogo aga o,” oluk, is ap Allah eiye aʼge onuelak ʼgaindek ebano en modok ʼbeling-ʼbelangsogo moʼgulentigisa.

¹²Asogo moʼgulentigisema re, is emin, is ap enarluedek ebano emin, enemin enebe odoktak poluk wene ʼbil-ʼbal e, is ap tentara aʼge ebano uang perak aʼge aʼbigat wogontugulat e,

¹³disogo moʼgulentigisa, “His en e, Hubaʼgo nis nogogukhwe, at Yesus iak wogu legesa aʼge ebano wegesarik Yesus werak hisatluk libegesema o, oluk moʼgulontogu lomup o.

¹⁴Wene aga aʼge ai paget e, at gubernur esaʼgo holua holuk e, his wene henebam emano oluk, nis en e, at ogola ʼgagaluok o,” oluk egesema re,

¹⁵is ap tentara aʼge uang ebano hwerlegesarik e, is ap ebano en egesa hegitsogoat tigisa. Wene asogo sagarak pegesema re, is aphwami Yahudi aʼge en e, yogodak hwerli ogo ogwiat oruak o.

¹⁶At Yesus en osi iak wogu legesa aʼge enebe 11 ebano moʼgulentasulat e, “O Galilea laguptik dom ai pam ligoroguptik wolomup o,” oluk, wene weragenebesi hegitsogoat legesarik ligegesa.

¹⁷Ligegesarik oruakma at Yesus ebe enil hegesarik e, hau wusogo ondogorlu pam hweriogo welat erliktugukhweat de, is pema akhit nak e, “At ebeat a? Ye, at e, puk a,” oluk epegesa.

¹⁸Asogo opogukhwe, at Yesus ebe eneragam wagarik e, disogo moʼgulentesi, “Allah en ʼbogorl pam aʼge emin, ʼgwiangma aʼge emin, ʼberlegat e, an eiye taknebesimu o.

¹⁹Holuk e, di aphwami yu aphwami enaʼgul onuk loʼbok ʼberlegat an nosi emagoluk, naik Allah onuk pam, omlogo an nonuk pam, Arogun onuk pam, nononuk ʼbalogo ik olomu ʼbelabonobogulat, an en wene henesaʼgo weregis aʼge ai ʼberlegat is aphwami en hegitsogo togu lemagoluk moʼgulontogulat, til laga lomup o. Yethemit! His asogo tagenebil lagaimu re, an nebe henemin modok oruakma en, hwerli o ologun pam en nak ema o,” oluk moʼgulentesi.