Read Silimo Matius 3 Bible Online

Matius 3 - Silimo bible

Matius 3

¹Asogo tigisa ai pam en e, at Yohanes ap ik olomu ʼbelabenebise laga aʼge ano, o Yudea leimu aphwami erlakma eba wagarik e, wene moʼgulentasulat, disogo ese laga,

²“ʼGain ʼbogorl pam aʼge eragam nonobouwa ano yogodak arat nonobouwa. Holuk e, di wiak yu wiak togu legep aʼge ukpoluk henebabut heberlemis o,” oluk moʼgulentasu laga.

³Ai ese laga ai re, at Yesaya Allah iak moʼgulentasu laga aʼge ano en moʼgulentasulat e, “Ap mesik o leimu aphwami erlakma eba iak ngai eselat, Eiga! Nonue ʼgain Onuk Logo aʼge wemaʼgwe, ebela opsogo yorogulat, ʼgorlo ʼgelaʼge takholuk e, hegitsogo yorogulat, togu lemis a, oluk worlentasu o,” [5] oluk Yesaya en ese laga ano hegitsogoat Yohanes ebe waga ai o.

⁴Wagarik, leimu aphwami erlakma ebano welat, wam unta wam asu aʼge ikho osum ʼbuktagalat, agap noʼgorlak poluk opsogo heliʼgogo ʼbagaluk wantagalat, taga laga. Asogo tagalat e, osoʼboru senarl aʼge nasulat, ʼgin aʼbosu eʼgelema aʼge nasulat, taga laga.

⁵Asogo tagalat oruakma re, is aphwami o kota Yerusalem en, o propinsi Yudea en, ik Yordan esaʼgoʼgwe eba ʼberlek en, enebe aʼbigat eragam odoktu egesa.

⁶Odoktu egesarik e, di wiak yu wiak togu legesa aʼge ebano ʼbaksogo ukpogwiam e, ik Yordan olomu ʼbelabenebise laga.

⁷Asogo tago oruakma, is ap Farisi aʼge pema ebano emin, ap Saduki aʼge pema ebano emin, enebe aʼbigat ik olomu ʼbelabonobuagoluk e, at eʼbek wagaiam e, disogo moʼgulentasu laga, “His ʼgosu en dogoʼgwe aʼge yema logwe! His e, Allah olot het aʼbik om aʼge ano henebam pasuam e, hweiye elit lo oluk e, sa en moʼgulhentesimu no? Mia o.

⁸Holuk e, henede eberak poluk, wiak togu legep aʼge ukpoluk e, henebabut heberloroguptik tugulom aʼgeat hegitsogo nak togu lemis o.

⁹Ye, an en e, at Allah en Abraham eiyagai ʼgelaʼge emagoluk helep yu aʼge ogo elit walhoat o, oluk moʼgulhentegis ai en, his honogola en e, Abraham ai nis nenaik, oluk honogola epagup o.

¹⁰E edip loʼbok eʼgen op aʼge egesiso erlak holuk, mukho odoukmu hwikhaigoluk ʼbesie e emeʼgen pam pangtak modok oruak o,” oluk moʼgulentesi.

¹¹Asogo moʼgulentesirik mesik disogo moʼgulentesi, “His wiak togu legep aʼge ukpoluk henebabut demat heberlagai holuk, an nebe malik wei aʼge nanni erlak aʼge en de, we ik olomu ʼbelaphenebise legi o. Aʼge re, at ʼgain anni aʼbik aʼge pobuk wema o. At ebe ʼgain anni aʼbik ai en, an nebe wei aʼge en oyuk owi hettak aʼge woluk lo miayat o. At en ik olomu ʼbelaphonobu ʼgelaʼge, Allah Arogun emin, odouk magale emin, henebam ʼbelakpouwa o.

¹²Gandum eʼgen degelu ebele paget wabun pam pusogo hwikhai louwa aʼge, at eiye aʼge eʼgikmu tenakho oruak ai. Degelu hegit lau wagoam e, eʼgen op on holuk, degelogo pasumu ebale opma ebano pasulat, owiʼga wiak on holuk degelogo odouk nekhi oso erlakma ebano hwikhasulat, tua o,” oluk moʼgulentesi.

¹³Yohanes en wene ano moʼgulentasu oruakma, at Yesus ik olomu ʼbelabuagoluk o Galilea en Yohanes ik Yordan esaʼgoma oruakma eʼbek lagama re,

¹⁴at Yohanes en e, “An en ik olomu ʼbelaphobu re, mia o. Hat en an ik olomu ʼbelapnobu aʼgeat de, an neʼbek wegen yema re!” oluk moʼgulesi.

¹⁵Asogo moʼgulesimu, at Yesus en e, “Erlak o. An ʼbelapnobuat o. At Allah en di paget yu paget asogo tuagoluk epasu hegitsogoat taknobo yo,” oluk egeimu re, “I o,” oluk,

¹⁶ik olomu ʼbelakpesimu re, peiyalogo ineik ʼgalma re, ʼbogorl hialogo Allah Arogun sue ʼberl ʼgelaʼge ebam duk laʼbu agoma il yethesi.

¹⁷Duk laʼbu agoma re, Allah iak ʼbogorl pam en, “Nomlogo nede o. At ebaget nogola nagai hasu legi o,” oluk ʼbogorl pam en iak ʼbelakpobu aga.