Read Silimo Matius 6 Bible Online

Matius 6 - Silimo bible

Matius 6

¹Asogo moʼgulentesirik e, mesik disogo moʼgulentesi, “Allah en, Disogo togu lomup, oluk egeimu, his en hegitsogo togu legep aʼge ai, aphwami en enil hontogu lemagoluk selakma togup o. Enil hontogu lemagoluk togup holuk e, henaik ʼbogorl pam aʼge en oʼgo wokhontouwa modok erlak o. His henede eberit!

²His logon henaʼge oruak aʼge en, is enaʼge erlak aʼge lerontouwogoluk holuk e, An disogo taga legi, oluk heniak amitmit supsogo togu lorogup o. Is pema enede ʼbiren welat enagap pam nak op ʼgelaʼge welat, o seʼban ogumu ʼgwi lagalat emin, ebela pam lagalat emin, is pema en, Is op o, oluk erligonobuagoluk togwi ai re, his asogo togu lorogup o. Is ai oʼgo horlo ʼgelaʼge re, we, erligonobogwi aiat o.

³Holuk e, his henaʼge aphwami enaʼge erlak aʼge wogontouwogoluk holuk e, An disogo wogentaik, oluk, henarilak honorokhwi emin, is pema emin, modok moʼgulentagup o.

⁴Hisakhoat wogentagupmu re, henaik Allah ʼbogorl pam aʼge en aphwami hisakho togwi aʼge il yerentasu ai en oʼgo wokhontouwa o,” oluk moʼgulentesi.

⁵Asogo moʼgulentesirik e, mesik disogo moʼgulentesi, “Holuk e, his seʼban ogulat, aphwami pema enagap pam nak op ʼgelaʼge welat enede ʼbiren aʼge en e, Seʼban ese legi ai aphwami en pobirak nobuak, oluk Allah owi werikmu ʼgugulat e, enebe inotluk seʼban ogulat, ebela adugalma inotluk seʼban ogulat, ogwi ai ʼgelaʼge re, ogu lorogup o. Is ai oʼgo horlo ʼgelaʼge re, we erligonobogwi aiat o, oluk demat moʼgulhentegis o.

⁶Aʼgeat de, his seʼban uogoluk holuk e, honowi pam ʼgoduk lasogo ʼgoluk, henaik Allah ʼbogorl pam aʼge ebe enil hogwi erlak aʼge ano en wokhontouwagoluk ʼgonu moʼgulogu lemis o. His en hisakho ʼgonu moʼgulorogup aʼge ai, at il hisogo aʼge hasumu re, wokhontouwayat o.

⁷Holuk e, his en seʼban ogulat, is aphwami oʼborlma aʼge en ogwi ʼgelaʼge ogu lorogup o. Is ai seʼban ogulat, onogola en e, Seʼban yat wiak ese legi ai en e, nenaik ʼbogorl pam aʼge esaʼgo holua o, oluk, litluk-latluk ogwi aʼge ai.

⁸His e, is enebabut wagup o. Henaik Allah ʼbogorl pam aʼge ai owan ʼgonu moʼgulom erlak oruakhwe, his henagai aʼge ai, at pageat aluk oruak o.

⁹Holuk e, his en seʼban ogulat, disogo ogu lomup o, Nenaik ʼbogorl pam aʼge huʼgwarek honuk logo pogu lemagoluk, taknenebi suk o. Nis nenebe hat heragam welemagoluk nenebi suk o. Is ʼbogorl pam hat hogola epasu legen aʼge hegitsogo togwi ʼgelaʼge, nis ʼgwiangma asogoat togu lemagoluk, taknenebi suk o.

¹¹Nis nonsoʼboru yogodak no aʼge elitsogoat woknenta suk o.

¹²Aphwami en nis wiagapnenebegesa aʼge, nis en erlagapsogo ukpege ai ʼgelaʼge, nis wiak tige aʼge hat en erlagapsogo ukpemen o.

¹³Wiak tuagoluk nenede ʼgagalu ago holuk, eba enat, uknonobo pukmu en ʼbekhirat woknonoboluk lasu lemen o. [Nenaik ʼGain Honuk Logo harat welat, di aʼge yu aʼge tu nakma re, harat erlikhobogwi modok wolomul o. Demat emak o, u ʼgelaʼge, Amin,] oluk seʼban asogo ogu lomup o.

¹⁴Aphwami en his wiagaphenebigisa aʼge, his en erlagapsogo ukpegep holuk, henaik Allah ʼbogorl pam aʼge en his wiak tigep aʼge ai erlagapsogo ukpouwayat o.

¹⁵Aʼgeat de, is pema en his wiagaphenebigisa aʼge, his en erlagapsogo ukpogwi erlak holuk e, henaik ʼbogorl pam aʼge en his wiak tigep aʼge erlagapsogo ukpouwa erlagat o,” oluk moʼgulentesi.

¹⁶Asogo moʼgulentesirik e, mesik disogo moʼgulentesi, “His soʼboru noʼgwi erlak welat seʼbanat ogwi modok wolomogoluk holuk e, is aphwami pema enagap pam nak op ʼgelaʼge welat, enede ʼbiren aʼge en, Aphwami pema en enagat pobi nonobuak, oluk onorogole ou wokho welagai ʼgelaʼge, wolom puk o. Is ai oʼgo horlo ʼgelaʼge re, we, aphwami en enagat yerontogwi aiat o, oluk, demat moʼgulhentegis o.

¹⁷Aʼge re, his nak e, soʼboru noʼgwi erlak seʼbanat ogu lomogoluk holuk e, aphwami en enagat pobi honobuano. Henaik Allah aphwami en enil hogwi erlak aʼge ano ematek en enagat pobi honobuagoluk, ʼgume wusogo re, henasu pelogo welat, seʼbanat ogulom o. Asogo hisakho togup holuk e, henaik Allah aphwami en enil hogwi erlak aʼge ai il hontoluk e, oʼgo wokhontouwa o,” oluk moʼgulentesi.

¹⁹Asogo moʼgulentesirik e, mesik disogo moʼgulentesi, “Aphwami en di aʼge yu aʼge ʼgwiangma yema odoksogo pogwiam e, elaluk aʼge en ʼbaliselat, morlil tagalat, ap enil ʼberege wiak aʼge en yogorlia wa ʼgugulat, tugumu yema re, di aʼge yu aʼge odoksogo po re, erlak o.

²⁰Aʼgeat de, ʼbogorl pam eba nak e, elaluk aʼge en ʼbaliselat, morlil tagalat, ap enil ʼberege wiak aʼge en yogorlia wa ʼgugulat, togwi modok erlak o. Holuk e, ʼbogorl pam ebayat op aʼge re, odoksogo pagathwerlailo yo.

²¹His henaʼge henede hwedik aʼge odoksogo oruakma re, henede ebayat welema ani o,” oluk moʼgulentesi.

²²Asogo moʼgulentesirik e, mesik disogo moʼgulentesi, “Henebe o dakharak esaga ʼgwielak ʼgelaʼge re, henil aiat oruak o. Holuk e, henil op holuk, henebe ebesik ai re, modok dakharagat wolorogup o.

²³Aʼgeat de, henil wiak holuk e, henebe ebesigat o hiktak ʼgelaʼge wolorogup o. Aʼge re, honogola o dakharak ʼgelaʼge ai hik oso holuk e, eige! Modok ebenagaikmu modok hiktak welegep o,” oluk moʼgulentesi.

²⁴Asogo moʼgulentesirik e, mesik disogo moʼgulentesi, “Ai ʼgelaʼge re, ap mesigat aʼge en ap ʼgain enebe ʼbiren eneragam welat eniabuk tugulom modok mia o. Asogo welema holuk e, eneragam aʼge ai en, Naik op on yu nede. Ye, mesik e, wiakma re, nebit, oluk eselat e, ede hwedik aʼge ai eʼbirek nak loʼboksogo welat e, mesik ebit on ano re, apserisogo wolom o. Ai ʼgelaʼge, his en e, Allah eragam aʼge welat, uang eragam aʼge wolom mia o.

²⁵An en asogo moʼgulhentegis ai en, his honogola en e, Nenelaluk wolomogoluk e, soʼboru emin, ik emin, ʼgeba aʼge nul. Nenebe sum ʼgeba aʼge ʼbuktul, oluk henede perik welat wenemennei yat horok eberogupno oluk moʼgulhentegis o. Noʼgwi aʼge ai re, logo no? Henelaluk welegep ai nak e, logo yo. Sum ʼbuktogwi aʼge ai logo no? Henebe ai nak e, logo yo.

²⁶Sue ʼbogorl oʼgwe darak noso aʼge ai henil yethogulat honogola eberit o. Is sue ai di aʼge yu aʼge owi yorogulat, eʼgen egesisoam ʼbalogo ebale pogumu ebano pogulat, togwi erlak aʼgeat de, henaik ʼbogorl pam aʼge en onsoʼboru wogentasu o. Aʼge re, Allah en is sue ai ede hwedigabenebasu no? Erlak o. His henebe aiat ede hwedigaphenebasulat e, honsoʼboru wokhontouwa erlak no? Wokhontouwayat o.

²⁷Ye, his pema honogola opogulat e, An nebe wareik eria hegit e, lebeksogo warom erlakma en, il mesik emin ogo nelaluk welle e, oluk, wenemennei yat horok eberogup ai pam, logon emin helaluk wolom no? Mia o.

²⁸His e, sum henagap pam ʼbuktu aʼge ai paget no oluk henede perik togu legep. Eʼgen ʼgut lek sing lek o lei oʼgwe egesiso ano pobi tit o. Eʼgen ai owan igoluk e, set hoporak til lagalat, herle tualogo sum ʼgelaʼge egesogulat, togwi modok erlak o.

²⁹Aʼgeat de, at ap ʼgain Salomo welat alli aʼge wogoma erliktogu legesa ai mia epegi. Eʼgen ai nak e, il amulit op modok ai hemit!

³⁰Eʼgela herleʼgela o lei oʼgwe welago aʼge ai re, yogodak ʼgelaʼge op wolotluk en, loruk oʼgwe re, odoukmu narlik pogwi aʼgeat de, Allah en onosum ʼbuktak onobo ʼgelaʼge op aʼge heliʼgogo enebasu ai hegitsogo, his henebe henebaget, opsogo ʼbuktak honobouwa erlak no? ʼBuktak honobouwayat o. Henede Allah ebam heʼberik po puk yu re!

³¹Holuk e, his henede perik wenemennei yat horok eberugulat, Nonsoʼboru emin, nenegeik emin, no aʼge nul. Nonosum no aʼge ʼbuktul, ogu legep ai re, modok u puk o.

³²Asogo togwi ai ʼberlegat e, is aphwami oʼborlma aʼge en ai aʼge logo poluk heratil noʼgwi aʼgeat de, his yu nak e, di aʼge yu aʼge erlak en henerlagaik ʼgelaʼge welegep ai en, at henaik Allah ʼbogorl pam aʼge en aluk modok oruak o.

³³Holuk e, henaik Allah en eragam welat tugulom ai paget emin, at en, Disogo tip, asogo tip, oluk moʼgulhentasuam tugulom aʼge ai paget emin, logo pogu lorogup holuk, di aʼge yu aʼge ai pamat ebam louksogo wokhontouwayat o.

³⁴Holuk e, his e, tono paget henede perik welat wenemennei yat horok eberogup o. Yogodak wiak ago aʼge oruak aʼgeat de, tono wiak om aʼge eberogup erlak ani o,” oluk moʼgulentesi.