Read Silimo Markus 3 Bible Online

Markus 3 - Silimo bible

Markus 3

¹Pobuk e, at Yesus o is aphwami Yahudi aʼge seʼban ogumu eba ʼgwegei. ʼGwegei ʼgal e, o eba ap mesik eʼgik il pema ʼgorlo aʼge welaga.

²Asogo oruakma ʼgwegeimu re, is ap pema enede en e, disogo epegesa, “Yogodak e, agauwa sabit aʼge Allah paget weat oruakhwe, at en ap ai heleʼgua ya? Erlak a. Heleʼgiso holuk e, Hat wiak tigen, oluk, wene ebam pouwok o,” oluk enil en wogu legesa.

³Asogo enil en wogukhwe, at Yesus en e, ap eʼgik il ʼgorlo aʼge ano disogo moʼgulesi, “Hebe inotluk e, ʼburl ya suk o,” oluk moʼgulesimu,

⁴inlai lagama re, aphwami ebano en disogo moʼgulentesi, “Agauwa sabit aʼge pam Allah paget weat welat e, aphwami obabonobu a? Wiagabonobo a. Ye, delonobu a? Waronobu a,” oluk moʼgulentesimu re, eniak erlak mo egesa.

⁵Mo egesema re, at Yesus il yerentil lagarik ede en e, “Enebabut lagorak yema re!” oluk olot het agalat enebe ede en e, ap ano disogo moʼgulesi, “Heʼgik ʼbelinghemen o,” oluk moʼgulesimu re, eʼgik ʼbelinghesi ʼgal arat op aga.

⁶Eʼgik asogo heleʼgegeimu re, is ap Farisi aʼge ebano libegesarik perleneat Herodes osi eneʼbek legesarik e, “Yesus ʼgesogo wotul,” oluk enemin obok ʼbaligisa.

⁷Asogo tigisarik e, pobuk, at Yesus osi iak wogu legesa aʼge ebano enemin e, ik Galilea omugwe ano esaʼgoma legesa. Legesema re, aphwami en e, “Yesus disogo tago, asogo tago,” oluk obok ogukhwe, is aphwami o Galilea doʼgo aʼge enebe esanat enesaʼgo holholuk eneʼberlik eneʼberlik lagaimu, is aphwami o Yudea doʼgo aʼge emin, o Yerusalem aʼge emin, o Idumea doʼgo aʼge emin, o ik Yordan iak etle akhit aʼge emin, o Tirus Sidon aʼge emin, Yesus eʼbek odoktigisa.

⁹Asogo odoktigisema re, enebe aʼbigat ou obabenebisokhwe re, is ou enebam aʼge ʼberlek en, aphwami pema hial-hial Yesus ano eneʼgik tenakpouwogoluk eʼbek ʼgwigisa ai paget, at Yesus en e, at osi iak wogu legesa aʼge ebano disogo moʼgulentesi, “Aphwami aʼbigatma re, an neragam oʼgwe ʼbun-ʼbun uano oluk e, ik so wei aʼge mesik noboluk welemis o,” oluk moʼgulentesi.

¹¹Ou asogo obabenebasukhwe, is muʼgat enebabut wiak aʼge aphwami onogola ʼgoluk welegesa aʼge en Yesus ebe enil holuk e, onorogole sogup ʼbou til legesarik e, eniak loksogo moʼgulugulat, disogo ogu legesa, “Allah omlogo re, harat o,” oluk moʼgulogu legesa.

¹²Asogo moʼgulegisa aʼgeat de, at Yesus en disogo egei, “An Allah omlogo, oluk nobok modok moʼgulentagup o,” oluk iak ningsogoat wene yagentesi.

¹³Asogo wene yagontoluk eʼberlik e, at Yesus ebe dom pam ligaga. Ligagarik e, “Ap enebe eria neʼbek wemak,” oluk ede epesi aʼge nak worlentesimu, eʼbek legesema re,

¹⁴enebe 12 eriano edigenebasulat e, disogo moʼgulentesi, “His an nemin modok modok wolomultik en e, op wene moʼgulontogulat, muʼgat enebabut wiak aʼge aphwami onogola ʼgoluk oruakma, an nanni wokhentaikmu henokho lebikpogulat, til denaga lorogup en perakhenebaik o,” oluk edigenebesi.

¹⁶Enebe 12 edigenebesi aʼge ebano, ononuk e, yu: Simon onuk mesik e, Petrus tualegei aʼge ano emin,

¹⁷Zebedeus eiyagai Yakobus ot Yohanes eʼbirek ononuk nis neniak pam orlolu iak oso oluk u ʼgelaʼge, is eniak pam Boanerges tualenebegei aʼge emin,

¹⁸Andreas emin, Filipus emin, Bartolomeus emin, Matius emin, Tomas emin, Alfeus omlogo Yakobus emin, Tadeus emin, Simon, “O Kanaan yema nonowirak aʼge nak wolomok o,” oluk ese laga aʼge ano emin,

¹⁹Yudas Iskariot Yesus woruagoluk pobuk yoʼgo laga aʼge ano emin, enebe eriayat edigenebesi.

²⁰Asogo edigonoboluk togolik owi pam ʼbu agoma re, aphwami esanat pobuk eʼbek odoktu egesema re, Yesus osi emin onsoʼboru noʼgosogo no ʼgelaʼgeat aga.

²¹Asogo agama, aphwami nin pema en e, “At ede ʼbal agarik oruak o,” ogwiam, at Yesus osi enesaʼgo hweligisarik e, at ebe wouwogoluk wegesa.

²²Is wagaihwe, is ap Allah iak pelal wogo eiye aʼge o Yerusalem en orlu egesarik e, disogo egesa, “Beelzebul muʼgat enebabut wiak aʼge onue ʼgain ano Yesus ebam louk egeimu oruak o. Asogo oruakma no oluk e, at anni pam muʼgat at osi ʼgelaʼge enebabut wiak aʼge aphwami onogola ʼgoluk oruakma henokho lebigenebasu o,” oluk egesa.

²³Asogo egesema, at Yesus en aphwami esan ebano worlontoluk e, wene ebam elitsogo re, disogo moʼgulentesi, “Iblis aphwami onogola ʼgwiselat e, uʼgwarek en elit henokho lebikpo no? Modok mia o.

²⁴Ye, ap ʼgain onuk logo aʼge mesigat aʼge osi eragam tenentarok welago aʼge emin is-is hwerlirak poluk enemin il ʼbelak welema holuk, mesikmu welat enanni welegesa ʼgelaʼge welema erlak o. Enanni erlak ema o.

²⁵Ye, ap mesik eiyagai enemin hwerlirak poluk enemin il ʼbelak welema holuk e, ap mesigat eiyagai enemin welat op welegesa ʼgelaʼge welema erlak o. Wiagat ema o.

²⁶Ai ʼgelaʼge re, at Iblis uʼgwarek osi muʼgat enebabut wiak aʼge enemin hwerlirak poluk enemin wiak elepma re, we welagai ʼgelaʼge enannisogo wellep erlak o. Arat erlak elep o.

²⁷Ye, ap mesik anni aʼbik aʼge eʼgik herle wusogo po erlakma en e, owi pam aʼge di aʼge yu aʼge yogorlia wa ʼgu mia o. At e, at eʼgik herle wusogo poluk nak e, elirat wa ʼgwilo yo,” oluk moʼgulontoluk eʼberlik wene disogo moʼgulentesi,

²⁸“An niak demat moʼgulhentaik o. Aphwami en di wiak yu wiak togwi aʼge emin, onogola en mi-miarak onobogulat, eniak pam en onobok wiaksogo ʼbalogwi aʼge emin, at Allah en elit erlagapsogo ukpo aʼgeat de,

²⁹Allah Arogun ai onogola en mi-miarak pogulat obok wiak ʼbalogwi holuk e, erlagapsogo ukpo mia o. We, wiak tua ai paget wene enebam mun-mun welema o,” oluk moʼgulentesi.

³⁰Wene asogo moʼgulentesi ai re, is en e, “Yesus muʼgat ebabut wiak aʼge ogola ʼgwegeitik oruak,” oluk egesema en de, moʼgulentesi o.

³¹Wene asogo moʼgulentesirik oruakma, at Yesus ia emin, osi emin, wegesarik odipmu edik welat, Yesus liplaumagoluk aphwami enebam wene wusogo ʼgwelabenebigisa.

³²ʼGwelabenebigisema re, is aphwami aʼbik Yesus eragam hweriogo welegesa aʼge en disogo moʼgulegisa, “Yesus, yethemen! Hat hia emin, hosi emin, palo hebil wegesarik odipmu oruak o,” oluk moʼgulegisa.

³³Asogo moʼgulegisema at Yesus en e, “An nia nosi ai salak no,” oluk moʼgulentesirik e,

³⁴aphwami at eragam, hweriogo welegesa aʼge ebano il yerentil lagarik e, disogo moʼgulentesi, “An nia nosilak e, his yuat o.

³⁵Sa en, at Allah ede epasu aʼge hegitsogo tiso holuk e, at ai an not, nerei, nia, oruak o,” oluk moʼgulentesi.