Read Silimo Lukas 12 Bible Online

Lukas 12 - Silimo bible

Lukas 12

¹Wene asogo ogukhwe, aphwami modok aʼbigat eneragam odoktu egesema re, enebe modok ʼbi-ʼbeterakma oluk e, is pema en is nin pema onoyuk en sobut-sebat ontoluk laga legesa. Asogo legesema, at Yesus en e, osi iak wogu legesa aʼge ebano wene disogo naduk moʼgulentesi, “Ap Farisi aʼge enebabut e, eʼgen soʼboru roti aʼge poruagoluk, ogola ʼgwelabogwi aʼge ai ʼgelaʼge welat e, enagap pam nak op ʼgelaʼge aʼge re, enede ʼbiren ai en, wiagaphonobuano oluk, henebabut heberlogo welemis o.

²Aʼge re, di aʼge yu aʼge sebelak aʼge ai ʼbaktagalat, hisogo oruak aʼge ai enalugapsogo selakma pasulat, tua nak o.

³Asogo tua ai en e, his o hiktakma welat ogu legep aʼge ai, o dakharakma en osokhwe ʼberlegat enesaʼgo holua o. Ye, o pam welat heniak ngorluksogo enesaʼgo eleʼgwe ogu legep aʼge ai re, o dum pam ligemarik eniak loksogo moʼgulontogukhwe holuayat o,” oluk moʼgulentesi.

⁴Asogo moʼgulentesirik e, mesik disogo moʼgulentesi, “Narilak norokhwi o! An wene yu his henebaget moʼgulhentaik o. Aphwami en henebe wathonobua ai honogorlok hagup o. Henagap oʼborl petne nak wathonobuarik e, is en pobuk mesik wiagaphonobo puk ai en, honogorlok hagup o.

⁵Aʼgeat de, his sa honogorloksogo wolom no. An en moʼgulhentaik. At Allah en henagap oʼborl petne wathonoboluk e, pobuk odouk orloukmu elit perakhonobo aʼge oruak aiat honogorloksogo wolomup o, oluk moʼgulhentasu legi ai o.

⁶Aʼge re, sue wulue ai oʼgo meren pam ʼbalogwi no. Ebe huaben aʼge oʼgo uang sen modok weiyat ʼbiren aʼge pam wogwi ani. Asogo togwi aʼgeat de, at Allah sue ai mesik nak holuk memerak pasu erlak eberak modok welago yo.

⁷Ye, his henasu henaʼgul pam oruak aʼge ʼberlegat, at Allah en eʼgik modok wonogo welago yo. At Allah en e, sue wulue aʼbik ai logo ʼgelaʼge epasu erlak o. Henebeat logo modok epasu o. Ai en e, honogorlok erlaksogo welemis o,” oluk moʼgulentesi.

⁸Asogo moʼgulentesirik, mesik disogo moʼgulentesi, “Ap sa en, Yesus ai an nue o, oluk aphwami enilem, ʼbaksogo oso holuk e, an abat daklau wegi ano en ogo re, At yu an not o, oluk, is malaikat Allah en yoʼgo peragonobou wago aʼge ebano enilem niak ʼbaksogoat moʼgulentaik o.

⁹Aʼgeat de, ap sa en, Yesus ai an neperlak o, oluk, aphwami enilem, elabe tago holuk e, an en ogo re, At ai an neperlagat o, oluk, is malaikat ʼbogorl pam aʼge Allah en yoʼgo peragonobou ago aʼge ebano enilem niak ʼbaksogo moʼgulentaik o.

¹⁰An abat daklau wegi ano re, nobok wiak ʼbalogwi holuk e, wiak tua aʼge ai enebe loʼbok Allah en erlagapsogo ukpouwa aʼgeat de, Allah Arogun ai obok wiak ʼbalogwi holuk e, wiak tua aʼge ai Allah en erlagap pouwa modok erlak o.

¹¹His henemdema wouwagoluk, aphwami en is aphwami Yahudi aʼge seʼban ogumu eba emin, is ap pemerintah aʼge onlogotma eba emin, is ap ʼgain ononuk logo aʼge onlogotma emin, wokhonoboluk henebei lagai holuk e, honogola en e, Nis nenagap delogo wene oʼgo ʼge aʼge ul, oluk henede porogup o.

¹²Ai erlige re, his en wene oʼgo uagoluk Allah Arogun en, Disogo it o, oluk, honogola ʼgagalua aʼge oruak o,” oluk moʼgulentesi.

¹³At Yesus en asogo moʼgulentasukhwe, is aphwami aʼbik odoktak welegesa aʼge ebano mesik en e, disogo moʼgulesi, “Nue. An nue en nis nenaik waragalat, at emening aʼge nis neʼbirek nenebaget poluk laga aʼgeat de, nare omu nak hwerlesirik oruak ai, logon meʼgisogo woknemagoluk, moʼgulomup o,” oluk moʼgulesimu,

¹⁴at Yesus en e, disogo moʼgulesi. “Henebe degelogo honoboluk henaʼge loʼbok soʼburonto ai, an ediknebegesema epegen?” oluk moʼgulesirik e,

¹⁵aphwami aʼbik ebano disogo moʼgulentesi, “Aphwami enaʼge aʼbik welagai ai pam enelaluk welagai erlak o. Di aʼge yu aʼge an naʼge nak wellep, oluk enede opogu lemano oluk henebabut heberlogo wolomup o,” oluk asogo moʼgulentesirik e,

¹⁶wene mesik ebam elitsogo disogo moʼgulentesi, “Ap ʼgain aʼge mesik en iabuk ʼgwiang eseimu owi yeregeimu re, ebe eʼgen aʼbik egeimu,

¹⁷at ap ano ogola en e, Owi yeregis aʼge ebe eʼgen aʼbik egesegei ai, ebe ʼbalogo paikmu ebale erlak yema re, noʼgosogo tik, oluk, ede eberise laga.

¹⁸Ede eberise lagarik e, Disogo tik, oluk, ede epesi, O werik naduk pasu legimu eba yu moluksogo re, pobuk lok aʼge mesik werik poluk, naʼge emin, di aʼge yu aʼge owi yeregis aʼge eʼgen ʼbelak aʼge emin, o eba modogat pasu leik o.

¹⁹Asogo poluk oruakhwe, nuʼgwarek en nesaʼgo weriselat e, Yogo. Mo ligagalat, ʼbu agalat, tisokhwe di tahun yu tahun paget naʼge aʼbik elitsogo pagathwerlegirikmu re, op o. Yogodak set hwalogo welat, soʼboru nasulat, anggur eʼgen aʼbosu nasulat, tagalat e, nogola nagai hasu leik o, oluk nuʼgwarek nesaʼgo werise leik, oluk ede epasu lagama,

²⁰at Allah en e, Ap yu, hede modok erlak yema re! Yogo hup nogogumu yayat harogun ʼgegilogo lebikpou wema ani o. Lebikpou wagoam, haʼge modok aʼbik odoksogo pagathwerlegen eba sa eiye ema epegen, oluk asogo moʼgulesi.

²¹Ai ʼgelaʼge re, is aphwami Allah ilem ebe aʼge wo erlak welat, is onuʼgwarek en aʼge nak odoksogo pagathorlogwi ai, ai emin hegirat o,” oluk moʼgulentesi.

²²Asogo moʼgulontoluk, at osi iak wogu legesa aʼge ebano disogo moʼgulentesi, “An en asogo moʼgulhentegis ai re, his honogola en e, Nenelaluk wolomogoluk e, nonsoʼboru ʼge aʼge nul. Nonosum ʼge aʼge ʼbuktul, oluk, henede perik welat wenemennei yat horok eberogu lorogupno oluk moʼgulhentegis o.

²³Noʼgwi aʼge ai abel akhit aʼgeat de, logo re, henebe henelaluk wolom aiat o. Ye, sum ʼbuktogwi aʼge ai abel akhit aʼgeat de, logo re, henebe aiat o.

²⁴At sue ʼboʼgiet tago aʼge pobi tit o. At en e, di aʼge yu aʼge owi yeriselat, eʼgen ʼbaliselat, tago modok erlak o. Ye, pobuk no aʼge paget eʼgen ʼbalogo o werikmu pagathwerlasumu modok erlak aʼgeat de, at Allah en osoʼboru wogosoat o. Aʼge re, at Allah en sue ai ede ningtak pasu a? Erlak o. We, his henebe aiat modok ede ningtak pasulat honsoʼboru wokhontouwa erlak no? Wokhontouwayat o.

²⁵Hat ap mesik en e, An nebe wareik eria hegit e, lebeksogo warom erlakma en, il mesik emin ogo nelaluk welle e, oluk, wenemennei yat horok eberogup ai pam logon emin helaluk wolom no? Mia o.

²⁶Holuk e, his en di wene yu wene wei aʼge tu mia en welat e, lok aʼge ai henede porogu legep ai nopaget.

²⁷Owil sing lek ʼgut lek oso ai pobi tit o. Owil ai owan igoluk e, set hoporak til lagalat, herle tualogo sum ʼgelaʼge egesogulat, togwi modok erlak aʼgeat de, ap ʼgain Salomo welat alli aʼge wogoma erliktogu legesa ai mia epegi o. Owil ai nak e, il amolit op modok ai hemit!

²⁸Holuk e, eʼgela herleʼgela o lei oʼgwe welago aʼge ai re, yogodak ʼgelaʼge, op wolotluk e, loruk oʼgwe re, odoukmu narlik pogwi aʼgeat de, Allah en onosum ʼbuktak onobo ʼgelaʼge op aʼge heliʼgogo enebasu ai hegitsogo, his henebe henebaget opsogo ʼbuktak honobouwa erlak no? Henede Allah ebam heʼberik po puk yu re!

²⁹Honogola en e, Nonsoʼboru emin, nenegeik emin, noʼgwe nul, oluk, ai aʼgeat logo poluk henede perik wolorogup o.

³⁰Asogo togwi ai ʼberlegat e, is aphwami oʼborl oʼgwe aʼge en ai aʼge logo poluk heratil noʼgwi aʼgeat de, his yu nak e, di aʼge yu aʼge erlak en henerlagaik ʼgelaʼge welegep ai, at henaik Allah ʼbogorl pam aʼge aluk welago yo.

³¹At Allah eragam ʼgoluk wolomul ai aʼge logo pagup holuk e, his di aʼge yu aʼge ai ebam louksogo wokhontouwayat o.”

³²“Holuk e, his Allah eiyagai egeptik odoktak welegep aʼge henebe wei nak aʼge yu, narilak o! Allah en his at eragam henebaigoluk ede epesirik oruakma re, honogorlok hagup o.

³³His henaʼge di aʼge yu aʼge eba oʼgo ʼbalogo saboroguptik e, oʼgo uang odoktogup aʼge ebano is enaʼge erlak welat enerlagaik aʼge ai soʼbusogo wogontomup o. Soʼburontoluk e, uang owi pobut ago erlak aʼge wokho poluk, yagasogo pogulom ʼgelaʼge, henaʼge modok op aʼge erlak ago erlak aʼge, is ap enil ʼberege wiak aʼge en yogorlia wa ʼgugulat, elaluk aʼge en ʼbaliselat, tago modok erlakma ʼbogorl pam eba yagasogo honobouwagoluk pagathwerlai laga lomup o.

³⁴Henaʼge henede hwedik aʼge eba odoksogo oruakma, henede ebayat welema o,” oluk moʼgulentesi.

³⁵Asogo moʼgulentesirik e, pobuk moʼgulentasulat e, “Ap ʼgain aʼge hwami wogontugumu loluk seni noluk wagaimu, osi eragam aʼge yetharok enepe heberlogo oruakma, at togolik wagalat e, ʼgoduk ʼbak-ʼbakhasuam perleneat ʼgoduk huthogwi ʼgelaʼge, his ogo re, honosum opsogo ʼbik-ʼbuk e, esaga ʼgwialogo poluk wolomup o.

³⁶

³⁷At ʼgain ano eragam aʼge ebano onue yetharok oruakma ebe wagalloma re, onogola enagai aʼbik houwa o. Asogo yetharok oruakma wemarik e, at onue ano osum is onosum ʼgelaʼge ʼbuksogo, at osi ebano seni ano nouwagoluk enebe mesikmu laʼbuksogo huremma re, at en soʼburontouwa, oluk moʼgulhentegis.

³⁸Asogo tua ai re, at ebe o hup ede ʼburl wema ya? O ede weʼgerlisokhwe wema ya. Is yetharok oruakma hentau wagoam, onogola enagai aʼbik houwa o.

³⁹Wene yu honogola eberak wolomup o. Ap owi eiye aʼge mesik ede epasulat e, O yogo hup e, jam ai pam an nowi pam yema ap mesik yogorlia waigoluk ʼguma, oluk aluk wellepma re, at ebe owi pam ʼgagalak wellepma re, o hebat posogo yogorlia wa ʼgu elep erlak e, henalugat ani o.

⁴⁰Ai ʼgelaʼge his honogola en e, At ai erlige wema, oluk opogwi erlakma en wongat oruakma, an abat daklau wegi ano re, arat weik ai, henebe degelak welemis o,” oluk moʼgulentesi.

⁴¹At Yesus en wene asogo moʼgulentesimu at Petrus en disogo moʼgulesi, “Nue! Wene ebam elitsogo moʼgulnentigen ai re, nis nenebaget nak egen a? At e, aphwami ʼberlegat enemin paget egen a,” oluk moʼgulesimu,

⁴²at nonue ʼgain Onuk Logo aʼge Yesus en e, disogo moʼgulesi, “Ap ʼgain aʼge mesik eiyagai ʼgwelagentarok welat onsoʼboru no aʼge wogonto hegitsogo wogentasu lemagoluk, at eragam aʼge yoʼgo pasuam ogola ʼgagalak welat ebabut ue iak oso aʼge hegitsogo tago ai sa ʼgelaʼge epegen. At ai ue ano en, edikpoluk lasu o.

⁴³Edikpoluk lasuam, eragam aʼge ano asogo hegitsogo tagoma, at ue ano togolik il hau wago holuk, eragam aʼge ano ogola en agai aʼbik houwa o.

⁴⁴Asogo op tagoma, hau wemarik e, ue ano en e, An naʼge yema perlengsogo hat heʼgik pamat welemak o, oluk edikhobouwa o, oluk demat moʼgulhentegis o.

⁴⁵Aʼgeat de, at eragam aʼge ai ebabut wiak holuk e, ogola en e, Nue ano perlene wago erlak ai, welemarik en wema hegi, oluk, at ue eragam aʼge logon ap et, hwami et, ʼgoʼbu waronobogulat, soʼboru emin, anggur eʼgen aʼbosu emin, emde lago wiak noluk, ologun pam, anggur eʼgen aʼbosu ai en ebe ede ʼbalagalat, tagalat e, at en e,

⁴⁶Nue ano o ai erligeat, jam ai pam wema, oluk modok eperlak oruakma, ue ʼgain ano hau wemarik e, eragam aʼge ano ebe ʼgoʼbu modok wusogo re, is aphwami pema enede Allah pam heʼberik pogwi erlak aʼge enebasumu eba peragonobouwa o.

⁴⁷Ye, ap eragam aʼge mesik ogola en e, An nue en, Yabuk disogo wokho nebelep, oluk ogola epasu aʼge aluk welarat de, yabuk ano wogo ebasu erlak welema holuk e, ap ai ʼgoʼbu obotut wiak wosuma ani o.

⁴⁸Aʼgeat de, eragam aʼge mesik ogola en e, An nue an, Yabuk disogo wokho nebelep e, oluk ogola epasu aʼge eperlak welat asogo wogo ebasu erlak ʼgoʼbu obotut wiak woru hegirat wiak tiso holuk, ʼgoʼbu weisogo ʼgelaʼge wosuma o. Aphwami enebe loʼbok aʼbigat wogontouwa aʼge ai, uʼgwarek wagalat aʼbigat ʼgonu ua o. Ye, di aʼge yu aʼge loksogo eneʼgik pam welemagoluk edikpouwa aʼge ai, pobuk, Loksogo woknemis, oluk ua o,” oluk moʼgulentesi.

⁴⁹Asogo moʼgulontoluk eʼberlik disogo moʼgulentesi, “An e, o ʼgwiangma yema odouk ʼgwelabigoluk wegirikmu no oluk e, odouk ai perlenesogo magale dainuak, oluk nede epasu legi.

⁵⁰Aphwami yema ik olomu ʼbelabonobogwi ʼgelaʼge, an di obotut yu obotut taknobouwa aʼge re, owan oruakhwe, nogola wiak welegi o.

⁵¹His honogola en e, At ʼgwiangma yema waga ai re, aphwami ʼgwiangma yema aʼge laʼbulogo enebaigoluk waga, oluk epegep a? Erlak o. An e, hwerlirak enebaigoluk wegi o, oluk moʼgulhentasu legi.

⁵²O yogodak hwerli en e, ap mesik eiyagai enemin enebe huaben onowi mesikmu aʼgeat welat, is-is enemin hwerlisogo wiak agalat, enebe henagan en e, enebe ʼbiren onobok ʼbalugulat, ye, nin enebe ʼbiren en e, enebe henagan eriano onobok ʼbalugulat, tua o.

⁵³Enemin asogo hwerlirak welat e, aik en e, omlogo eʼbirek il ʼbalagalat, omlogo en e, aik eʼbirek il ʼbalagalat, ia en e, emalik eʼbirek il ʼbalagalat, emalik en e, ia eʼbirek il ʼbalagalat, iemalhwe en e, iemalhwe eʼbirek il ʼbalagalat, iemalhwe en e, iemalhwe eʼbirek il ʼbalagalat, asogo enemin il ʼbaletil louwa ani o,” oluk moʼgulentesi.

⁵⁴Asogo moʼgulentesirik e, aphwami aʼbik ebano wene mesik disogo moʼgulentesi, “O mo obuk oso hegit etleba en o hena mesik orlu ago holuk e, Yekha! Moru wema, oluk ogu legep ano hegitsogo re, moru arat wago yo.

⁵⁵Ye, o sogwei ik obut akhit orogobu en punhau wago holuk e, Yetha! O hebi dain ua hegi, oluk ogu legep ano hegitsogo re, arat hebi ago yo.

⁵⁶His henagap pam nak op ʼgelaʼge henede ʼbiren yema re! ʼBogorl ʼgwiang orogole pobirak poluk e, Asogo ema, oluk, henede weʼgerlak welat, ebabut enagat ʼbalugu legep aʼgeat de, o yogodak welege ya pam disogo ema, oluk, pobirak erlak welegep ai nopaget,” oluk moʼgulentesi.

⁵⁷Asogo moʼgulentesirik e, wene mesik disogo egei, “Wene honuʼgwarek en ologun wusogo hegirap togu legep erlak ai nopaget.

⁵⁸Ap mesik en wene hat hebam poluk wene edip ʼbeloʼgogwi aʼge eneʼbek wokhoboluk louwarik, is ap ebano en e, hebe polisi eneʼgigem poma, is en e, eneʼgik herle wusogo onobugumu ebano ʼgwelakhebi louwano oluk e, owan ebelaʼgwe lagalat eria enat heʼbirek wene erlagapsogo ukpomup o.

⁵⁹Ye, erlagapsogo ukpagun erlak holuk e, heʼgik herle wusogo ʼgwelakhoboma re, oʼgo daksogo modok wogoso erlak holuk e, eba en liplauma modok erlak ani o, oluk moʼgulhentegis ai o,” oluk moʼgulentesi.