Read Silimo Lukas 13 Bible Online

Lukas 13 - Silimo bible

Lukas 13

¹Ai erlige re, is aphwami pema en Yesus disogo moʼgulegisa, “Aphwami Galilea aʼge wam Allah akhit wusogo pogwiam, at Pilatus en is enemep emin, wam Allah akhit werigisa aʼge emep emin, mesikmu laʼbulogo warenebegei o,” oluk moʼgulosu egesa.

²Asogo moʼgulosu egesema, at Yesus en e, disogo moʼgulentesi, “His honogola en e, Is ap o Galilea aʼge pema ʼberlek e, weisogo logun wiak tugukhwe, is asogo warenebegei ai nak e, wiak logat togu legesema, enebabut pam warenebegei o, oluk opogu legep a?

³Erlak o. An en his moʼgulhentaik. His wiak togu legep aʼge ai ukpoluk henebabut heberlagai erlak holuk e, is waregesa ʼgelaʼgeat, his asogoat waroroguptik nalorogup ani o.

⁴Ye, his honogola en e, O Yerusalem ik omugwe pelak onuk Siloam eba o helep aʼge yat werigisa aʼge oruakma, ʼbullogo ʼbu agalat, enebe 18 enal ʼbesil-ʼbesalsogo sebelenebegei ano re, is aphwami pema ʼberlegat o Yerusalem welagai aʼge eba re, weiyat wiak ʼgelaʼge tugukhwe, is al ʼbesilogo sebelenebegei ai nak e, wiak logat togu legesema enebabut pam sebelenebegei epegep a?

⁵Erlak o. An en his moʼgulhentaik. His wiak togu legep aʼge ai, ukpoluk henebabut heberlagai erlak holuk e, is waregesa ai ʼgelaʼgeat, his ogo asogoat warotluk nalorogup ani o,” oluk moʼgulentesi.

⁶Asogo moʼgulentesirik e, wene mesik ebam elitsogo re, disogo moʼgulentesi, “Ap mesik iabukmu e ara owi yogo welaga. Oruakma re, Eʼgen egesegei a? Erlak o, oluk il ʼgogolil laga ʼgal e, ebe ikho erlak.

⁷Ikho erlakma lagarik e, eragam aʼge iabuk tenak welaga aʼge mesik disogo moʼgulesi, E ara yu eʼgen mesik egeimu a? Erlak a, oluk 3 tahun aʼge pam ʼgogolil waga legi aʼge re, ebe modok egesiso erlak. Holuk e, ʼgwiang almasogo yogo wolomma re, mukho hwikhemen o, oluk moʼgulesimu,

⁸at eragam aʼge ano en e, disogo moʼgulesi, Nue! Tahun yu pam e, moru erlakma en ukpouwok o. Asogo oruakhwe, an en hogol eselat, omogot ʼbaliselat, taga leik o.

⁹Asogo tagalomma, tahun pobuk aʼge pam en de, ebe egesiso holuk e, op o. Ye, oso erlak holuk e, hat en, Mukho hwikhomup o, oluk moʼgulnorogun ani o, oluk moʼgulesi,” oluk, at Yesus en moʼgulentesi.

¹⁰Asogo moʼgulontoluk welat e, agauwa sabit aʼge pam mesik Allah paget weat welat, at Yesus o aphwami Yahudi aʼge seʼban ogumu mesik ʼgoluk wene moʼgulentasu oruakma re,

¹¹hwe mesik muʼgat ebabut wiak aʼge ogola ʼgoluk welat oʼborl modok ʼgonu egeitik ʼbekhitsogo inom modok mia oruakhwe, 18 tahun aga aʼge eba welaga.

¹²Eba oruakma, at Yesus en, hwe ano il yethesirik e, iak pakhesi ʼgal wagama re, disogo moʼgulesi, “Nerei o! Hat hebam ou ai arat op orogun ai o. Herle ʼgelaʼge hettak welegen ano, arat hebilemen o,” oluk asogo moʼgulotluk e,

¹³eʼgik ebam pasukhwe erianoat, hwe ano oʼborl ʼbekhit agama, inagarik e, Allah erliktegei.

¹⁴Asogo tegeimu re, ap mesik seʼban ogumu eba onue ʼgain welaga aʼge ai en disogo egei, “Yesus ai agauwa sabit pam Allah paget weat oruakhwe, hwe ai ou obaptegei ai nopaget,” oluk olot het en e, aphwami aʼbik ebano disogo moʼgulentesi, “Di ebele yu ebele tugulom ai re, agauwa hebarlik aʼge pamat tugulom o. Holuk e, agauwa ai pamat ou henebam aʼge obaphonobuagoluk waga lomup. Aʼge re, Allah paget weat welagai erlige re, woluk worogup o,” oluk asogo moʼgulentesimu,

¹⁵at nonue ʼgain Onuk Logo aʼge en e, ap ano disogo moʼgulesi, “His henagap pam nak op ʼgelaʼge welat, henede ʼbiren aʼge yema re! His henebe ʼberlegat agauwa Allah paget weat welagai erligeat de, honuam wam sapi a, keledai a, owi werikmu en, ʼgoduk husogo herle hebilogo lebikpoluk e, ik nouwagoluk wogonoboluk laga legep erlak no? Wogonoboluk laga legebat ani o.

¹⁶Ai ʼgelaʼge re, hwe Abraham en dogoʼgwe aʼge yu Iblis en herle hetsogo tenak oruakhwe, 18 tahun aga aʼge yu, agauwa Allah paget weat welagai erlige, herle hebilogo pogwi erlak no? Hebilogo poat o,” oluk wene asogo moʼgulesimu,

¹⁷is pema Yesus enebit welegesa aʼge ebano ʼberlegat eneʼgerli egesa. Aʼgeat de, is aphwami pema enebe aʼbik ebano ʼberlek en e, at Yesus taga laga ano ʼberleksogo paget e, onogola enagai aʼbik hogu legesa.

¹⁸Asogo hegesema, at Yesus en e, disogo moʼgulentesi, “Allah en eragam enebasu ai, no ʼgelaʼge. An no pam elitsogo moʼgulhentaik,” oluk moʼgulentesirik e, mesik disogo moʼgulentesi,

¹⁹“Allah en eragam enebasu ai ebe re, ʼgebi eʼgen owi ʼgelaʼgeat o. Ap mesik en ʼgebi eʼgen owi mesik wik-wok iabukmu pelegeimu re, ʼbaktegeirik e, edip e ʼgelaʼge lok agama, sue darak noso aʼge en eʼgik duelak aʼge pam owi wosu ago ai ʼgelaʼgeat o,” oluk moʼgulentesi.

²⁰Asogo moʼgulentesirik e, pobuk mesik disogo moʼgulentesi, “Allah eragam enebasu ai ebe re, noʼgwe pam elitsogo moʼgulhentaik.

²¹Ai re, eʼgen soʼboru roti aʼge poruagoluk ogola ʼbelabogwi aʼge ai ʼgelaʼgeat o. Hwe mesik en gandum sagalak tepung ul ʼgelaʼge ano aʼge 40 kilo luʼgwasogo wik-wok, eʼgen roti poruagoluk ogola ʼbelabogwi aʼge ai ogola ʼbelakpoluk neʼgarlok-heʼgarlok takpesimu re, ebe modok peregei ai ʼgelaʼgeat o,” oluk moʼgulentesi.

²²Asogo moʼgulontoluk e, pobuk at Yesus o Yerusalem ʼbiselat, o seli lokma ʼgwiselat, weimu ʼgwiselat, wene moʼgulentil ʼbegei.

²³Asogo moʼgulentil ʼbisoma re, ap mesik en disogo moʼgulesi, “Nue. Allah en delonobua ai re, enebe loksogoat a? Weisogo a,” oluk egeimu, at Yesus en is aphwami eba welegesa aʼge ebano disogo moʼgulentesi,

²⁴“Is aphwami aʼbigat, ʼgoduk wei oʼgwe ʼguogoluk walhouwa aʼgeat de, mia ema ai paget e, his ʼgoduk wei oʼgwe ai ʼgwi lagup en e, henannisogo togu lomup o, oluk moʼgulhentasu legi o.

²⁵Ye, o eba ap owi eiye aʼge ai inemarik, ʼgoduk ʼbetesogo lariso lomma re, his odipmu edik welat, ʼgoduk puk-puk hogulat e, Nue o! Nis ʼgoduk hutnentemen o, oluk moʼgulorogup aʼgeat de, at en e, His henebe an neperlak o. ʼGeba en wegep o, oluk moʼgulhentasuam,

²⁶his en moʼgulugulat, Nonowi seli loʼbok noʼgulat, soʼboru nemin sakho noʼgulat, wene moʼgulnentasulat, taga legen ani o, oluk moʼgulorogup aʼgeat de,

²⁷at en e, His o ʼgeba en wegep. Henebe an neperlak o. His wiak togu legep aʼge neʼbek ʼgu orogup. Eria enat ʼbekhit lit o, oluk moʼgulhontouwa ani o.

²⁸Asogo moʼgulhontoma, his odipmu welat, ap Abraham emin, Ishak emin, Yakub emin, ap pema logon Allah iak moʼgulontogu legesa aʼge ebano emin, Allah eragam opma eba oruakma, henil ʼgwelagentagup ani o. Ye, his nak e, ʼgoduk lasogo lebikhonoboma odipmu eba welat, heniak ʼgerlit marogulat, nge togwi modok wolorogup ani o.

²⁹Ye, is aphwami erabu akhit en, orogobu akhit en, etleba akhit en, yema akhit en, Allah eragam enebasumu eba seni nouwogoluk odoktuma o.

³⁰Aʼge re, yethemit! Is aphwami o yogodak pobuk aʼge ai naduk ema o. Ye, naduk aʼge ai pobuk ema o,” oluk moʼgulentesi.

³¹Wene asogo owan moʼgulentasukhwe, is ap Farisi aʼge pema Yesus eʼbek wegesarik e, disogo moʼgulegisa, “Ap Herodes en wathebigoluk oso ai re, o yema wolorogun o. Hweiye o momu ʼbok lak o,” oluk moʼgulegisema,

³²at Yesus en disogo moʼgulentesi, “Ap ebabut mene orlomene ebabut ʼgelaʼge ai, wene yu perleneat moʼgulesi lit o. An e, o yogodak emin, loruk emin, muʼgat ebabut wiak aʼge aphwami onogola ʼgoluk oruakma henokho lebikpasulat, ou werak aʼge holuk, obabenebiselat, taga leiktik e, agauwa mesik en de, an tigoluk wegi aʼge il hodologo ʼgobok tik o.

³³Asogo tik aʼgeat de, ap Allah iak moʼgulontogwi aʼge ai, wema waronobu puk o. Yerusalem eba en nak waronobu ai en e, an yogodak emin, loruk emin, hau emin, eba lasu leik en e, hegit hegi o.

³⁴Eige. His aphwami o Yerusalem aʼge yu nede o! His en ap Allah iak moʼgulontogwi aʼge enebe waronobogulat, ap Allah en yoʼgo onoboluk heneʼbek peragonobou wago aʼge helep en damuk-demaksogo waronobogulat, togu legep ai nede o! Sue ayam olu agapsaburl lekho odoksogo enebasu ai ʼgelaʼge, an en nin hwedik nan hwedigat his o yema welegep aʼge ʼberlek asogoat odoksogo henebaigoluk epasu legi aʼgeat de, his en, Nenebit, ogu legep ai nede o!

³⁵Ai en e, Allah en his henebe ukhonoboma, honowi werik aʼge ai polugat welema o. Hwerli yogodak ya his en e, an nebe henil nio erlak woloroguptik e, pobuk his en e, Nenaik ʼgain Onuk Logo aʼge Allah en perakhobu wagama wegenma re, at enat obaphobuak o, [13] oluk pobuk moʼgulnorogup ai hwerli henil niagup ani o,” oluk moʼgulentesi.