Read Silimo Lukas 14 Bible Online

Lukas 14 - Silimo bible

Lukas 14

¹Asogo moʼgulentesirik e, agauwa sabit pam mesik, Allah paget weat welat, Yesus ap Farisi aʼge onuelak ʼgain mesik owi pam soʼboru eʼbirek nouwogoluk lagarik oruakma, aphwami en, at Yesus dokhumsogo enilen wogu legesa.

²Asogo enilen wogukhwe, ap mesik eʼgik oyuk perik welat ou ningtak welaga aʼge Yesus orogole hegit eriano wagarik welaga.

³Oruakma, at Yesus en ap Allah iak pelal wogo eiye aʼge emin, ap Farisi aʼge emin, ebano disogo moʼgulentesi, “Wene Allah en nenesaʼgo weregei aʼge ai pam, at en eselat e, Agauwa sabit aʼge pam an nebaget weat welat aphwami ou werak aʼge elit obabonobu egei ya? Erlak a,” oluk asogo moʼgulentesimu re,

⁴is ebano wene oʼgo u erlakma en eniak erlak mo egesema, at Yesus en ap ano eʼgik tenak poluk ou obaptegeitik e, “Lak o,” oluk perakpesi.

⁵Perakpesimu, ap ano lasukhwe re, at Yesus en is ebano disogo moʼgulentesi, “Allah paget weat welarat de, his mesik honomlogo a? Honuam sapi a, ik omugwe pelakma ʼbiso holuk e, perleni-perleneat heneʼgik tenak poluk porlu agalom erlak no? Porlu agalomat o,” oluk moʼgulentesimu re,

⁶is ap ebano en wene oʼgo moʼgulom e, mia agama eniak modok u erlakma en mo egesa.

⁷Ap ʼgain aʼge mesik en aphwami enemin soʼboru mesikmu nouwogoluk yoʼgo enebesi aʼge, ap ʼgaindek huragaimu eba nak huregesarik oruakma en e, at Yesus il yerontoluk e, wene ebam elitsogo disogo moʼgulentesi,

⁸“Ap mesik ugwe wogogulat, seni sakho nouwogoluk, hat ap mesik yoʼgo hebasu holuk e, hat hebe malik wei aʼgeat de, ap mesik ʼgain aʼge heʼbiregat yoʼgo honobouema re, ap ʼgain aʼge huragaimu eba hutlai lagun no yo. Asogo hutlai laguntik oruakma re, ap ʼgain aʼge heʼbirek yoʼgo honobouwa aʼge ano wago holuk e, at ap yoʼgo honobouwa aʼge ano en moʼgulheselat e, Not yu. Ap yu hat hebalema huremagoluk, hat hebe, oluk moʼgulhosoam e, hat heʼgerli otluk ap we aʼge huragaimu eba hutlai lagunno oluk e, ap ʼgain aʼge huragaimu eba ʼbekhit hutlai lagun o.

¹⁰Ap sa en uʼgwarek ede paget logo pasu holuk e, Allah en sebelogo pouwa o. Ye, ap sa en uʼgwarek ede paget sebeliso holuk e, pobuk Allah en logo pouwa ai en e, hat asogo yoʼgo hobogwi holuk e, ap we aʼge huragaimu ebayat hutlai lo yo. Eba hutlai lorik oruakma, ap yoʼgo hobouwa aʼge ano wemarik e, Nare. Hat e, ap ʼgain aʼge huragaimu yema hutla suk o, oluk asogo oso holuk e, is aphwami ʼberlegat seni sogo henemin nouwogoluk odoktua aʼge ebano enilemat moʼgulhosokhwe, is en e, Ap yu ʼgain aʼge hegi, oluk enil enak aʼge yethiouwa o. Holuk e, ap we aʼge huragaimu ebayat hurom o,” oluk moʼgulentesi.

¹²Asogo moʼgulontoluk e, at Yesus en ap owi eiye aʼge en yoʼgo enebesi aʼge ano moʼguleselat, “Erlige a? Hopmuʼgwe a, hat en aphwami enemin soʼboru mesikmu nouwogoluk holuk e, hemin hwedik aʼge emin, harilak aʼge emin, huelak aʼge emin, ʼgain aʼge enilmu aʼbik aʼge henemin welegep aʼge eba emin, eba re, yoʼgo enebagup o. Asogo togun holuk e, pobuk is pema seni sorogulat hat yoʼgo hoboma, oʼgo dip uano yo.

¹³Aʼge re, hat asogo seni seriselat holuk e, enilmu erlak enerlagaik aʼge ai emin, enawe edenak aʼge emin, ondogorlu wiak aʼge emin, enil hopnik aʼge emin, is asogo aʼge holuk yoʼgo onobogu lomup o. Asogo yoʼgo onobogwiam, is en hat yoʼgo hobouwa erlak ai enat, hat hogola hagai aʼbik hagun ani o. Is ai en oʼgo wokhema erlakma re, aphwami enede hegit aʼge waragaimu, Allah en enelalugabonobua ai erlige re, hat taga lorogun aʼge oʼgo, at Allah enat wokhema o,” oluk moʼgulentesi.

¹⁵At Yesus en asogo moʼgulentesimu, aphwami soʼboru nouwogoluk hweriogo welegesa aʼge ebano, ap mesik en esaʼgo hwelegeitik e, Yesus disogo moʼgulesi, “Is aphwami logon Allah en eragam enebasumu ebano welat soʼboru nouwa aʼge ai, onogola enagai houwa ani o,” oluk moʼgulesimu,

¹⁶at Yesus en disogo moʼgulesi, “Ap mesik seni logat serigoluk obok leʼgelak poluk e, aphwami modok aʼbigat yoʼgo enebesi.

¹⁷Yoʼgo enebesirik e, ebe arat sogo poluk e, eragam aʼge mesik moʼguleselat e, Seni sogo yu arat no horok aga. Holuk e, aphwami yoʼgo enebegi aʼge ebano wemagoluk e, wogenebi lit o, oluk perakpesi.

¹⁸Perakpesimu, moʼgulentil lasukhwe re, is aphwami ebano ʼberlegat enebit en eniak lalogo moʼgulugulat e, ap mesik en e, Nare o. An yabuk mesik oʼgo ʼbalegeitik en e, nil ʼgogoli laiyogoluk welegi o. Holuk e, seni nagup ai re, an weik erlak o, oluk moʼgulesi.

¹⁹Ye, at mesik en e, Nare o. An wam sapi ouwarli wogo aʼge 10 en ʼbiren hegeik urut nak oʼgo ʼbalegis aʼge nil hai laiyogoluk welegi o. Holuk e, seni nagup ai re, an weik erlak o, oluk moʼgulesi.

²⁰Ye, at mesik en e, Nare o. An hwe ʼgerat wegirikmu re, seni nagup ai, an na wom e, mia o, oluk moʼgulesi.

²¹Eniak asogo nak il legesema re, at eragam aʼge ano en ue ano moʼgulosu waga. Asogo moʼgulosu agama, at ue eiye aʼge ano olot het aʼbik agarik e, disogo moʼgulesi, O kota lok yu, ebela lok oʼgwe emin, wei oʼgwe emin, lasulat, aphwami enerlagaik aʼge emin, enawe edenak aʼge emin, enil hopnik aʼge emin, onoyuk soborak aʼge emin, wogonoboluk manup o, oluk moʼgulesi.

²²Asogo moʼgulesimu re, at ap ano loluk wagarik e, ue ano disogo moʼgulesi, Nue. Moʼgulnigen ano wogonoboluk wegi aʼgeat de, o pema modok selak oruak o, oluk moʼgulesi.

²³Asogo moʼgulesimu, ue ano en eragam aʼge ano moʼguleselat e, disogo moʼgulesi, Holuk e, seni seregis aʼge yu, is aphwami naduk yoʼgo enebegi aʼge ebano nau wagaimu no, oluk moʼgulhegis ai o. Holuk e, aphwami o kota yu odipmu aʼge, ebela lok oʼgwe, wei oʼgwe, yogunat denagai aʼge ai an nowi pam yema o ʼbetesogo ʼgumagoluk, hiak annisogoat wogenebil laguntik e, onobo ʼgu manup o, oluk moʼgulesi,” oluk Yesus en moʼgulesi.

²⁵Aphwami modok aʼbigat Yesus eʼberlik diptak modok laga legesema re, at Yesus orogole edenogo is aphwami ebano yerontoluk e,

²⁶“His henialak henaiklak emin, honugwami henemalik emin, honue henari emin, henebe honuʼgwarek eba emin, ʼberlegat, Modok nebit o, oluk, opo erlak welat, an nosi omogoluk neragam ʼguom mia o.

²⁷E edikpoluk waronobogwi aʼge ano henagan loʼbok woluk an neʼberlik worogup erlak holuk e, an nosi omogoluk neragam ʼguom miayat o.

²⁸His mesik en o yat helep aʼge pam lagabogo woruogoluk obok ogulat, o ebe ologun ʼbalogo woru aʼge paget uang ebe elit a? Mia ya, oluk heneʼgik wonogo erlakma en, we, henebakhenne yogunat mesik worogu legep no? Erlak o.

²⁹Oʼgo paget ai re, heneʼgik wonogo erlakma en worogwi holuk e, o waʼgi delak polugat de, o ebe ologun ʼbalogo woru mia ago holuk, is aphwami muon enil holuk e, Ap ai o waʼgi delak pesi aʼgeat de, ologun ʼbalogo woru mia agama ukpesi o, oluk eida aʼbik ngik-ngeksogo tagobouwano yo.

³¹Ai ʼgelaʼge ap ʼgain onuk logo aʼge mesik en weim obok lebikpoluk ap ʼgain mesik emin ebi louwogoluk e, ebe naduk yamuksogo hurotluk e, An nosi enebe 10 ribu ya re, at ap ʼgain ai osi enebe 20 ribu eba emin elit obu hwi a? Mia ya, oluk ede eberu erlakma en, we, ʼbekhit ebi lagai no?

³²Erlak o. Enede eberugulat, Obu mia o, oluk opogwi holuk e, is selei aʼge ebano owan walekma wagaihwe, Weim obu mia o, oluk, Nenemin lialuogoluk oʼgo no aʼge wokhonto, oluk yoʼgo perakpasu epegi.

³³Ai ʼgelaʼge, his mesik henaʼge di aʼge yu aʼge ukpo erlakma en welat an nosi omogoluk neragam ʼguom mia o,” oluk moʼgulentesi.

³⁴Asogo moʼgulentesirik e, mesik disogo moʼgulentesi, “Mayu ai obat aʼgeat de, orlouk erlak ago holuk e, noʼgwe pam orlougap po epegep.

³⁵Erlak o. Mayu orlouk erlak aʼge ai re, owi yogoma pogulat, ʼgwiang esei emagoluk yabuk esap dorogulat, po modok mia en e, hwikhai lagai o, oluk moʼgulhentegis aʼge ai henesaʼgo oruak holuk, opsogo hwelit o,” oluk moʼgulentesi.