Read Silimo Lukas 15 Bible Online

Lukas 15 - Silimo bible

Lukas 15

¹Asogo moʼgulentesirik, pobuk agauwa mesik erlige re, is ap pemerintah paget uang ʼgonu oluk odoktogwi aʼge emin, wiak togwi aʼge emin, enebe ʼberlek Yesus iak enesaʼgo holuogoluk e, hau wegesa.

²Asogo wegesa ʼgal e, is ap Farisi aʼge emin, is ap Allah iak pelal wogo eiye aʼge emin, enil ontoluk e, eniak ngorluk-ngorluk ogulat e, disogo egesa, “Ap yu en aphwami wiak togwi aʼge wogenebegeitik soʼboru enemin mesikmu noʼgwi ai, nonogorlok o!” oluk egesema re,

³at Yesus en e, wene ebam elitsogo disogo moʼgulentesi,

⁴“Ap his aʼge mesik wam domba wam 100 welago aʼge re, mesik nak nalomma 99 eriano o leimu onoboluk e, mesik nak nalago aʼge ano ukpo erlakma en modok heratil-palil denagalat e, arat hwiariso erlak no?

⁵Asogo arat hwiakhorloluk e, ogola agai holuk odogun pam sukhensogo woluk e,

⁶ue ari emin, aphwami pema onowi seli mesikmu aʼge emin, ʼberlegat worlontoluk e, An nuam nalaga aʼge ano arat hwiakhorloluk wegi ai en, nonogola nenagai houwok o, oluk moʼgulentasu ano erlak?

⁷Ai ʼgelaʼge, aphwami enebe 99 aʼge ebano en, An wiak logon tegistik no oluk e, nebabut heberleik no? Erlak o, oluk, enebabut heberlom mia en e, is ʼbogorl pam welagai aʼge ai onogola enagai houwa erlak o. Aʼgeat de, is aphwami wiak togwi aʼge mesigat aʼge en ebabut heberliso holuk e, is ʼbogorl pam welagai aʼge ai onogola enagai aʼbik houwa o, oluk moʼgulhentegis o,” oluk moʼgulentesi.

⁸Asogo moʼgulentesirik e, wene mesik disogo moʼgulentesi, “Hwe mesik uang sen aʼge ebe 10 tenak oruakma mesik nalago holuk e, ukpo erlakma en esaga ʼgwielak poluk, o holuʼgwe ollong hosogo lebikpoluk degeliselat e, arat hwiakhwerlasu ano erlak no?

⁹Asogo arat hwiakhorloluk e, hwami, at agarulak emin, onowi seli mesikmu welagai aʼge emin, worlentasuam odoktu agaiam e, Nouang sen aʼge nalaga aʼge an arat hwiakhwerlegi ai en e, nis ʼberlegat nonogola nenagai houwok o, oluk moʼgulentasu ano erlak?

¹⁰Ai ʼgelaʼge, aphwami wiak togwi aʼge mesigat aʼge ebabut heberliso holuk e, is malaikat Allah en yoʼgo peragonobou wago aʼge ebano onogola enagai aʼbik houwa o, oluk demat moʼgulhentegis o,” oluk moʼgulentesi.

¹¹Asogo moʼgulentesirik e, wene mesik disogo moʼgulentesi, “Ap mesik eiyagai ap enebe ʼbiren welegesa.

¹²Aʼge re, ap labo aʼge en aik moʼguleselat e, disogo moʼgulesi, Naik! Hat waromma hemening woknum aʼge holuk e, yogodak yayat woknemin o, oluk moʼgulesimu re, at enaik ano en e, at emening aʼge soʼburonto aʼge hegitsogo perlengsogoat eiyagai eʼbirek soʼbusogo wogentesi.

¹³Asogo soʼburentesimu, omlogo labo aʼge ano agauwa mesik emin wolom erlakma en, di aʼge yu aʼge, at hwerlesi aʼge modok perlengsogo oʼgo ʼbalogo uang sabuthorloluk e, o walekma eba laga. Lagarik eba welat e, ogola eberu erlakma en, we, yogunat til denagalat ouang ebano modok nal-pal takpesi.

¹⁴Modok nal-pal takpoluk oruakma, o eba soʼboru modok obuk aʼbik agama re, ap ano soʼboru nele aʼbik aga.

¹⁵Soʼboru nele aʼbik agama re, ap ano ogola en e, Ap owirak aʼge mesik iabuk tisokhwe nosoʼboru woknese lemagoluk, eʼbek laik, oluk laga. Lagama re, ap owirak aʼge ano en e, o igowi uam pekharok welemagoluk perakpesi.

¹⁶Perakpesimu eba welat e, ogola en e, Nogum ning uagoluk e, soʼboru esing wam nasu aʼge ai nasulle e, oluk epesi aʼgeat de, wogogu legesa erlak en e,

¹⁷weat welat ebabut heberlagarik e, “Eige! An naik ano owi eragam aʼge iabuk togwi aʼge ebano enebe esanat soʼboru aʼbik dedilogo pogulat noʼgukhweat de, an yu nak e, soʼboru nele en wareik hegi!

¹⁸Holuk e, an pobuk yema en naik eʼbek laiktik e, disogo moʼguleik, Naik! At Allah ʼbogorl pam aʼge ai emin, hat emin, henil salogo wiak modok tegismu o.

¹⁹Asogo wiak tegismu re, hat en e, Yu an nomlogo, oluk pobuk u modok mia o. We, hat heragam aʼgeat nebemen o, oluk moʼgulesi laik, oluk ede epesi.

²⁰Asogo opoluk, o welagama ebano ukpoluk e, aik ano eʼbek weigoluk owan wagoma, at aik ano en e, walekma wagokhwe il yetholuk e, ede pu egeitik, pungtak lagarik e, ebagase parliksogo hau emde motok-motok weregei.

²¹Asogo tegeimu, at omlogo ano en e, disogo moʼgulesi, Naik! An e, at Allah ʼbogorl pam aʼge ano emin, hat emin, henil salogo wiak tegis o. Asogo tegismu re, Yu an nomlogo, oluk pobuk u modok mia o, oluk moʼgulesi.

²²Asogo moʼgulesi aʼgeat de, at aik ano en eragam aʼge ebano worlentesirik e, disogo moʼgulentesi, Laguptik e, sum op aʼge ano woluk perleneat ʼbuktakpou wagalat, tigene op aʼge eʼgik pam ʼbuktakpou wagalat, sepatu oyuk pam ʼbuktak pasulat, perleneat tit o.

²³Asogo toluk e, sapi wam emalik esei aʼbik aʼge ano wokho, at ebaget nonogola nenagai hogulat ebaget wusogo soruok o.

²⁴An nomlogo yu waraga epege aʼge elaluk agarik wagama re! Modok nalaga aʼgeat de, pobuk hwiarige ai o, oluk, onogola enagai aʼbik hegesa.

²⁵Asogo tugukhwe erianoat, at ue ano yabukmu welagarik waga ʼgal e, gitar worogulat weni worogumu eniak esaʼgo hwelegei.

²⁶Hwelegeitik e, aik eragam aʼge ebano aʼge mesigat worlhasuam wagama re, disogo moʼgulesi, Eniak olema eba noʼgosogo togwi, oluk, hin wesimu,

²⁷at ano en e, Erlak o! Hot ano wagama o. At ebe ebam ou erlak op aʼge wagama re, haik en uam sapi emalik esei aʼbik aʼge ano waresimu togwi o, oluk asogo egeimu,

²⁸at ap naduk dogo aʼge ano olot het agarik e, owi pam ʼgwi lo ede modok ʼbuk agarik oruakma, aik ano liplau wagarik e, iak sakhosogoat, ʼGwi lus o, oluk moʼgulesi.

²⁹Moʼgulesimu omlogo ano en aik moʼguleselat e, disogo egei, Hesaʼgo hwelin. An e, di tahun yu tahun hat hebaget hiabuk modok aʼbik taga legi o. Asogo tagalat e, hat en, Di tin, yu tin, oluk moʼgulnese legen aʼge ano mesik nebit oso erlakma en tago aʼgeat de, sapi emalik mesigat aʼge an narilak nenemin nonogola nenagai hogulat sakho nouwagoluk woknum erlagat.

³⁰Aʼgeat de, hat homlogo ai hwami yogunat tenentil neselat hat warorogunmu hemening eiye om aʼge hegitsogo wogigen aʼge ano modok nal-palsogo ukpoluk waga aʼge ai nak e, sapi emalik esei aʼge ano wusogo ebaget serigen yema re! oluk moʼgulesimu,

³¹at aik ano en e, Nomlogo yo! Hat neʼbirek welege aʼge yu re, an naʼge di aʼge yu aʼge ʼberlegat e, hat en aʼgeat o.

³²Aʼgeat de, hat hot yu re, waraga epege aʼge re, elaluk agarik waga o. Ye, ebe ogo re, nalaga aʼge hwiakhwerlege o, ai en e, nonogola nenagai hogulat tu aʼgeat togu lege o, oluk moʼgulesi,” oluk Yesus en moʼgulentesi.