Read Silimo Lukas 18 Bible Online

Lukas 18 - Silimo bible

Lukas 18

¹Asogo moʼgulentesirik e, at Yesus en osi iak wogu legesa aʼge ebano seʼban ogu lemarik onogola ʼbuk otluk ukpo erlakma en, hwedik-hwadigat ogu lemagoluk, wene mesik ebam elitsogo disogo moʼgulentesi,

²“O seli mesik, ap ʼgain aʼge wene enebam pasulat, noʼgorliselat, tago aʼge mesik Allah ogorlok erlak welat, aphwami opsogo edeabenebiso erlak aʼge welaga.

³Asogo oruakma, hwe sugwe aʼge mesik ogo o seli anoat welaga. Welat e, nin erlige nan erlige ap ʼgain ano eʼbek wago modok welat e, disogo moʼgulese laga, Ap mesik an neʼbirek il ʼbelak aʼge hat en erlele woknobogun en wegi o, oluk moʼgulosu waga laga.

⁴Asogo moʼgulosu wagoam e, ap ʼgain ano en naduk iak holu erlakma en, ebit hasu laga aʼgeat de, pobuk ede eberiselat e, An nebabut e, Allah nogorlok erlaksogo welat, aphwami opsogo nedeabenebise legi erlak aʼgeat de,

⁵at hwe sugwe aʼge yu re, hwedik-hwadik derlelnobu wagoma re, owene hwalom erlakma en ukpoma re, neʼbek wago modok welat nogola mep sagal-ʼbagalsogo taga lemano oluk e, at owene ai hwaleigat o, oluk ogola epesi,” oluk Yesus en moʼgulentesi.

⁶Asogo moʼgulontoluk e, at nonue ʼgain Onuk Logo aʼge Yesus en e, mesik disogo moʼgulentesi, “Ap ebabut wiak aʼge hegitsogo tago erlak welat wene aphwami enebam pasulat, noʼgorliselat, tago aʼge egei ai pobi tit o.

⁷Ai ʼgelaʼge, at Allah en eiyagai pulogo enebesi aʼge en hup erlige eniak ningsogo yoʼgo pogwi holuk e, erlele wogonobua erlak no? Eniak oʼgonise lemarik en, pobuk holuk erlele wogonobua no?

⁸Erlak o. Perleneat erlele wogonobua o, oluk demat moʼgulhentegis. Asogo tagonobouwa aʼgeat de, an abat daklau wegi ano pobuk weiktik e, aphwami ʼgwiangma aʼge yema logon enede nebam heʼberik oruakma entau weik a? Erlak hwi a,” oluk moʼgulentesi.

⁹Asogo moʼgulentesimu, is aphwami pema akhit ebano onogola en e, disogo opogu legesa, “Is aphwami ʼberlegat yema mia ʼgelaʼge aʼgeat de, nis yu nak e, nenebe logo welat hegitsogo togu lege o,” oluk opogu legesema re, at Yesus en wene ebam elitsogo disogo moʼgulentesi,

¹⁰“Ap enebe ʼbiren aʼge seʼban uogoluk, Allah owi werikmu ʼgwi legesa. Ap mesik e, Farisi aʼge. Ye, ap mesik e, uang pemerintah paget ʼgonu oluk odoktiso aʼge.

¹¹Eʼbirek ʼgwi legesarik seʼban ogulat, ap Farisi aʼge ano inagarik seʼban ematekma eselat e, disogo egei, Naik Allah o! An nebabut e, aphwami ʼberlegat enebabut ʼgelaʼge re, erlak o. Is aphwami yogunat yogorlia wogwi aʼge emin, hegitsogo togwi erlak aʼge emin, hwami ʼbabi tenontogwi aʼge emin, ap uang pemerintah paget ʼgonu oluk odoktogwi aʼge yu emin, enebabut ai ʼgelaʼge re, an asogo modok tiso erlakma no oluk e, hau wathebise legi o.

¹²An e, seʼban mesik ogola agauwa ʼbirenam soʼboru nasu erlagat hweyang ʼgelaʼge poluk welat, naʼge di aʼge yu aʼge pagathwerlasu aʼge, ʼberlegat wenakho re, 10 lau wagoam e, mesik hat hebasulat, tago yo. Naik, oluk egei aʼgeat de,

¹³at ap uang pemerintah paget ʼgonu oluk odoktiso aʼge ano nak e, ebe walekma edik welat odogun ʼgonnuksogo il ʼbogorl akhit likho erlakma en ogorloksogo welat, eʼgik en ede pukhasulat e, disogo egei, Naik Allah o! An wiak tiso aʼge yu, hede niemen o, oluk moʼgulesi.

¹⁴Is seʼban asogo egesa ai paget, an wene mesik moʼgulhentaik. Ap sa en ede logo pagathorloluk erlikhwerlasu holuk e, Allah en sebelak pasu o. Ye, ap sa en uʼgwarek ede sebelak pasulat, An mia, epasu holuk e, Allah en logo pasu ai en e, at ap seʼban naduk egei aʼge ai, Allah en wene ebam aʼge erlagapsogo ukpo erlakma en mo egei. Aʼgeat de, at ap seʼban pobuk egei aʼge ai nak e, Allah en wene ebam aʼge erlagapsogo ukpesimu owi pam laga o, oluk moʼgulhentegis,” oluk moʼgulentesi.

¹⁵At Yesus en asogo moʼgulentesirik oruakma, pobuk aphwami en enemalik wei aʼge Yesus en eʼgik enebam pouwagoluk eʼbek wogonoboluk wegesa. Asogo wogonoboluk wagaiam e, at Yesus osi iak wogu legesa aʼge ebano en enil ontoluk e, wene yagentigisa.

¹⁶Asogo wene yagentigisa aʼgeat de, at Yesus en malik wei aʼge ebano wemagoluk worlentesimu wagaihwe re, at iak wogu legesa aʼge ebano disogo moʼgulentesi, “Aphwami enebabut is malik wei aʼge eba enebabut ʼgelaʼge ema holuk e, Allah en eragam enebasumu eba eiye ema ai en e, malik wei aʼge eba an neʼbek wemak o. Wene ʼbalogup.

¹⁷Sa en, malik wei aʼge Allah en eragam enebasu wene ai wik-wok ʼgwi lagai ai ʼgelaʼge ʼgwi lagai erlak holuk e, ʼgwi louwa modok erlagat o, oluk demat moʼgulhentegis o,” oluk moʼgulentesi.

¹⁸Asogo moʼgulentasu lagama re, is ap Yahudi aʼge onue ʼgain mesik en e, Yesus disogo moʼgulesi, “Nue. Wene moʼgulnentasu legen ai, hat obat o. An noburlal-hoburlal om aʼge eiye eik en, an nebabut noʼgosogo taga leik o,” oluk moʼgulesimu,

¹⁹at Yesus en e, disogo moʼgulesi, “Hat op o, oluk moʼgulnigen ai re, noʼgosogo oluk moʼgulnigen. At mesik op e, erlak o. We, at Allah ematek nagat op o.

²⁰Wene Allah en, Disogo tip, asogo tip, oluk nenesaʼgo weriselat e, disogo egeimu oruak o, ʼBabi tenentagup o. Aphwami enebe waronobogup o. Yogorlia wagup o. Henepenenat lalholuk onobok ʼbalogup o. Henialak henaiklak eniak hologo hau doʼgoksogo waronobogu lomup o, [14] oluk nenesaʼgo weregei ano hat halugat o,” oluk moʼgulesimu,

²¹at ap ano en e, disogo moʼgulesi, “Wene moʼgulnigen ai ʼberlegat e, an nebe malik wei aʼge pam enat nesaʼgo hwelak welat hegitsogo taga legi aʼgeat o,” oluk moʼgulesimu,

²²at Yesus esaʼgo hwelegeirik e, disogo moʼgulesi, “Wene mesigat nak e, tu erlak welegen o. Hat haʼge ebano perlengsogo is logon enebam oʼgo ʼbalogo sabusi lak o. Saborogun aʼge ebano is aphwami pema enaʼge erlak welat enerlagaik aʼge ai modok soʼbusogo wogontomup o. Asogo arat wogentagunmu re, hat ʼbogorl pam aʼge loksogoat eiye orogun ani o. Holuk e, asogo arat soʼbusogo wogontoluk e, an neʼberlik noso lorogun en manup o,” oluk moʼgulesimu,

²³at ap ano esaʼgo hwelegeitik e, aʼge modok aʼbikmu no oluk e, ogola modok wiak aga.

²⁴Asogo ogola wiak agama re, at Yesus il enak aʼge yetholuk e, osi disogo moʼgulentesi, “Eige. Nogorlok e. Aphwami enaʼge aʼbik aʼge Allah en eragam enebasumu eba noʼgosogo ʼgwilo ʼgelaʼgeat o.

²⁵Wam unta lok aʼge ai hin eleʼgwe ʼgwelabumu re, elit sollongsogo ʼgwilo aʼgeat de, is aphwami enaʼge aʼbik aʼge Allah en eragam enebasumu eba ʼgwilo modok mia o,” oluk moʼgulentesi.

²⁶Asogo moʼgulentesimu, is aphwami ebano enesaʼgo hweligisarik e, at Yesus disogo moʼgulegisa, “Holuk e, Allah en aphwami salak ʼgelaʼge nak e, elit delonobu logwe,” oluk moʼgulegisema,

²⁷at Yesus en e, disogo moʼgulentesi, “Aphwami en tu re, modok mia aʼgeat de, at Allah en di bele yu bele tu nak e, elit o,” oluk moʼgulentesi.

²⁸Asogo moʼgulentesimu, at Petrus en e, disogo moʼgulesi, “Aʼge re, nis hat heʼberlik noʼgu lomogoluk nenaʼge di aʼge yu aʼge ukpoluk wegerik hemin noʼgu lege aʼge yu nak e, noʼgorak,” oluk moʼgulesimu,

²⁹at Yesus en e, disogo egei, “Sa en Allah eragam weleigoluk holuk e, owi werik emin, ugwe emin, ue ari emin, aik ia emin, eiyagai emin, ugonoboluk wago holuk e, o yogodak ya pam welat ebalema modok aʼbik ebam louksogo wogema o. Ye, o pobuk ema eriano pam welat, noburlal-hoburlal wogemayat o, oluk demat moʼgulhentegis o,” oluk moʼgulentesi.

³⁰

³¹At Yesus en wene asogo moʼgulontoluk e, osi enebe 12 ebano wogonoboluk e, enematekma ʼgeksogo legesarik disogo moʼgulentesi, “Nosi o. Nis yogodak o Yerusalem ʼbugu lege ai o. Arat ʼbilulmu re, is ap naduk Allah iak moʼgulontogu legesa aʼge ebano en e, an abat daklau wegi ano pobuk taknobouwa aʼge pelal wokho pegesa aʼge hegitsogoat taknobouwa ani o.

³²Nebe watnobuagoluk, yoʼgo loluk is ap oʼborlma aʼge eneʼgikmu nobouwa ani o. Nobouema, eniak esegen yaknogulat, was topuktak nobogulat,

³³lagalʼbisok ʼgoʼbu watnobogulat, toluk e, nebe modok watnobua o. Watnobuema, agauwa ʼbiren werak weleiktik en, henaganak aʼge en de, nelaluk eik ani o,” oluk,

³⁴asogo ʼbaksogo moʼgulentesi aʼgeat de, hisogo aʼge egei oluk, at osi ebano en e, no aʼge paget egei, oluk nelak pegesa.

³⁵At Yesus o Yeriko ʼgwi laigoluk horok lai laga ʼgal e, ap mesik il hopnik aʼge welat emde ʼgonu wiak ese laga aʼge ebela pam eriano hweriogo oruakma re,

³⁶aphwami eniak aʼbik il lagaimu esaʼgo hwelegeirik e, disogo moʼgulentesi, “Eniak eba, no paget il wagai,” oluk hin wesi.

³⁷Hin wesimu, is en e, disogo moʼgulegisa, “Yesus owi Nazaret aʼge ano ebela ʼgo yu wago en ogwi o,” oluk moʼgulegisema,

³⁸ap ano en iak loksogo eselat e, Yesus disogo moʼgulesi, “Yesus Daud en dogoʼgwe aʼge nue a! Hedeapnebin a,” oluk moʼgulesimu,

³⁹is aphwami naduk legesa aʼge ebano en e, “Hiak o,” oluk wene yagegisa aʼgeat de, pobuk ebenagaikmu iak loksogoat disogo moʼgulesi, “Daud en dogoʼgwe aʼge nue a! Hedeapnebin a,” oluk moʼgulesimu re,

⁴⁰at Yesus ebe duksogo inagarik e, aphwami ebano disogo moʼgulentesi, “Ap ai woluk manis o,” oluk moʼgulentesimu, ap ebe ano Yesus eragam pou wegesema, at en hin wokhasulat,

⁴¹“An en noʼgosogo takhobouwagoluk moʼgulnigen,” oluk moʼgulesimu, at ap ano en e, disogo moʼgulesi, “Nue e. Nil yu dektak nebagun en moʼgulhegis o,” oluk moʼgulesimu,

⁴²at Yesus en e, disogo moʼgulesi, “Hil hopnik aʼge ai dek in o. Hat hede nebam heʼberik pegen ai pamat op egen o,”

⁴³oluk moʼgulosokhwe erianoat, il hopnik aʼge ano op agarik Yesus eʼberlik lasulat e, Allah erliktil laga. Ye, is aphwami pema akhit ebano Yesus en tegei aʼge ai enil hegesarik e, is en ogo Allah erliktigisa.