Read Silimo Lukas 2 Bible Online

Lukas 2 - Silimo bible

Lukas 2

¹Eria hegit e, ap ʼgain onuk logo aʼge Kaisar Agustus ai en aphwami o di owi yu owi ononuk ʼbaluagoluk yoʼgo lebigenebesi.

²Ononuk naduk naduk ʼbaligisa ai, ap onuk Kirenius ai, o propinsi Siria eba ʼgain gubernur oruakhwe ʼbaligisa.

³Asogo ononuk ʼbaluagoluk aphwami onowi seli loʼbok ʼgwil legesa.

⁴Ye, at Yusuf ogo re, Daud en dogoʼgwe aʼge no oluk e, o Galilea doʼgo o onuk Nazaret ai en e, o Yudea ap Daud dagagama, o onuk Betlehem ʼbigoluk, at Maria eʼbirek iak tagalat welaga aʼge ano emalik ogola oruakma eʼbiregat ononuk ʼbaluagoluk ʼbigisa.

⁵

⁶ʼBigisarik eba oruakma emalik ano doru hegit agama,

⁷emalik naduk aʼge abat deregei. Deregeitik e, o aphwami ap ʼbok aʼge nogogumu ebano modok ʼbeterak en e, sum kain aʼge pam eʼgirlogo, sapi soʼboru nasumu ʼgaʼgokma ebano ebe ʼbourak pesi.

⁸Eria hegit e, o Betlehem esaʼgoʼgwe eba, is ap wam domba oʼgonogulat welagai aʼge logon hubaʼgo onuam oʼgonogu legesa.

⁹Asogo oruakma eriano, nenaik ʼgain Onuk Logo aʼge malaikat ʼbogorl pam en yoʼgo ʼbelagonobou wago aʼge mesik ʼga en ʼgelaʼgeat wagarik e, onlogotma inagoam e, nenaik ʼgain Onuk Logo aʼge erliktogwi aʼge amulit enebam yogo pesimu, is onogorlok modok aga.

¹⁰Onogorlok agama re, at malaikat ano en e, disogo moʼgulentesi, “Honogorlok hagup o. Yethemit, op wene aphwami ʼberlegat onogola enagai aʼbik houwa aʼge, moʼgulhentau wegi o.

¹¹Yogodak delhonobua aʼge ʼgain Onuk Logo aʼge Kristus ano o ap Daud owi seli welagama ano dagagarik oruak o.

¹²Ebe enak aʼge henil holuk pobi togup en e, malik ʼget dogo aʼge sum kain aʼge pam eʼgirlogo wam sapi soʼboru nasumu ʼgaʼgokma pegesarik oruakma re, henil hai lagup o,” oluk moʼgulentesi.

¹³Asogo moʼgulentasukhwe erianoat, malaikat ʼbogorl pam en yoʼgo ʼbelagonobou wago aʼge enebe modok aʼbigat, ʼga en ʼgelaʼge enam egesarik e, at malaikat mesik ano eminat Allah erliktugulat disogo egesa,

¹⁴“Is erabu ʼbogorl oʼborl akhit welagai aʼge en, nenaik Allah aiat erliktogu lemak o. Ye, is aphwami ʼgwiangma yema enebe Allah ebam liok oso aʼge enede haʼbuksogo welemak o,” oluk egesa.

¹⁵Asogo moʼgulontoluk e, is ebano onoboluk naikheʼgwe togolik ʼbogorl pam ligagaihwe re, is ap wam domba oʼgonogu legesa aʼge ebano is-is nak en ogulat e, “Disogo agama o, oluk nenaik ʼgain Onuk Logo aʼge en moʼgulnentesi ai, o Betlehem hai louwok o,” oluk egesarik e,

¹⁶perleneat legesa ʼgal e, Maria Yusuf eʼbirek malik ʼget dogo aʼge ano wam sapi soʼboru nasumu ʼgaʼgokma ʼbourak poluk oruakma hai legesa.

¹⁷Hai legesarik enil hogulat e, wene malik ano paget malaikat en moʼgulentigisa aʼge ebano ʼbeliʼgogo moʼgulentigisa.

¹⁸Asogo moʼgulentigisema, is aphwami ebano enesaʼgo hweligisa aʼge ʼberlek en, disogo egesa, “Eige! Nonogorlok e,” oluk erliktigisa.

¹⁹Aʼgeat de, at hwe Maria ano nak e, wene egesa aʼge ebano edemu wesirik e, mennei eberise laga.

²⁰Ye, is ap domba oʼgonogu legesa aʼge ebano enil holuk pobuk naikheʼgwe togolik wagalat e, “Wene malaikat en moʼgulnentigisa ano hegitsogoat agama nenil hogulat, nenesaʼgo holugulat, tige o,” oluk, Allah erliktugulat, hau worugulat, il il wegesa.

²¹Asogo wegesema welegesarik en, agauwa sabiren welegesarik loruk oʼgwe re, malik ano agap eʼgerlimu aʼge ʼbalu hegitsogo ʼbaligisarik e, ebe owan ia ogola om erlak oruakhwe malaikat en egei hegitsogo re, onuk Yesus tualigisa.

²²Onuk arat tualigisarik e, Allah en pageat Musa moʼgulesimu, at en eselat e, “Hwami enemalik dagonoboluk e, agauwa asogo ʼgelaʼge takpoluk parema libagalom o,” oluk egei aʼge hegitsogoat, asogo welegesarik e, malik ʼget dogo aʼge ano nenaik ʼgain Onuk Logo aʼge wogomogoluk woluk o Yerusalem wegesa.

²³Asogo woluk wegesa ai re, nenaik ʼgain Onuk Logo aʼge en pageat nenesaʼgo weregei wene ano pam eselat e, disogo egei, “Malik naduk aʼge ap holuk e, an henaik nebaget po yo,” [1] oluk egei.

²⁴Ye, “Sue abiang ʼgelaʼge ai aʼge aik mesik de a? Ia mesik de a. Ye, at e, sue ʼberl ʼget aʼge ʼgelaʼge ebe ʼbiren holuk a, an henaik ʼgain Nonuk Logo aʼge nebaget watnum o,” [2] oluk egei ano hegitsogo wogomogoluk woluk wegesa.

²⁵Ai erlige ap o Yerusalem aʼge mesik onuk Simeon. At ebabut e, op, Allah ogorloksogo welat, modok hegitsogo taga laga. Asogo tagalat, aphwami Israel aʼge onogola obabonobouema aʼge ai yetharok oruakma, Allah Arogun ebam louk egeimu welaga.

²⁶Asogo ebam louk u agarik e, disogo moʼgulesi, “Hat hebe warom erlak oruakhwe, ap ʼgain mesik nenaik ʼgain Onuk Logo aʼge en edikpoluk perakpou weik egei ano wagoam hil holuk en warorogun o,” oluk, obok moʼgulesirik e,

²⁷at Simeon ano Allah Arogun ebam louktak welat, Allah owi werikmu ʼgoluk oruakma, Yesus aik ia eʼbirek Allah en egei aʼge pelal wogo welaga aʼge hegitsogoat tuogoluk e, Yesus dogo aʼge ano woluk ʼgwigisa.

²⁸ʼGwigisema, Yesus dogo ano Simeon agaimu wesirik e, Allah onuk erliktiselat disogo egei,

²⁹“Naik Allah o. Aphwami di owi yu owi enebe ʼberlegat enil houwagoluk, delnonobua aʼge arat perakpou wegenma hegi o. At en e, is oʼborl oʼgwe aʼge heʼbek wemagoluk o dakharak enebasulat, hat heiyagai Israel aʼge erligonobuagoluk o dakhasogo welat, tua aʼge nil arat hegi o. Holuk e, hat en moʼgulnigen hegitsogoat, yogodak an heragam aʼge nede haʼbuksogo yema ukpoluk heʼbek weik en woknobumu re, obat o,” oluk, Allah erliktegei.

³⁰

³¹

³²

³³Malik ai obok asogo egeimu re, ia emin, aik emin, enesaʼgo hweligisarik e, “Eige!” oluk erliktigisa.

³⁴Ye, at Simeon ano en e, “Allah en obaphonobuak,” oluk, ede aganhan pam moʼgulontoluk e, malik ano ia Maria moʼguleselat e, disogo egei, “Allah en e, malik yu pam, is ap Israel aʼge enebe esanat, pema edigenebasulat, nin pema ʼbelagenebasulat, tuagoluk edikpesi o. At yu aphwami ʼberlegat pobi tuagoluk edikpesi aʼgeat de, is aphwami ʼberlek en, Nenebit o, oluk ogwi ano,

³⁵onogola opogwi aʼge ai enagat ema o. Ye, hat ogo re, ʼgarok eʼgat mago aʼge en hede pam dainsogo horu ʼgelaʼgeat, hogola modok wiak ema ani o,” oluk moʼgulesi.

³⁶Ye, o eba hwe mesik onuk Hana. Ap Fanuel aʼgul onuk Aser aʼge agalogo, Allah iak moʼgulentasu aʼge welaga. At ogun wesi hwerli en 7 tahun eʼbirek welegesarik,

³⁷sugwe pesi hwerli en, at ebe umur 84 tahun modok sebal agarik welaga. Welat e, agauwa agauwa ebano soʼboru no erlak hweyang ʼgelaʼge poluk Allah owi werikmu eba hup erlige ebit om erlakma en, seʼban oso modok welaga.

³⁸Asogo oso oruakma, at Yesus aik ia emin ʼgwigisarik welegesa ai erlige eneʼbek wagarik e, disogo egei, “Allah naik o,” oluk hau weregeitik e, is aphwami o Yerusalem aʼge onogola en e, Allah en pobuk delnonobua oluk yetharok welegesa aʼge ʼberlegat moʼgulentasulat e, “Ebe waga yu o,” oluk, malik ano obok moʼgulentasu laga.

³⁹Nenaik ʼgain Onuk Logo aʼge en nenesaʼgo weregei aʼge pelal wegesa ano hegitsogo arat tigisarik e, at Yesus aik ia onowi pam ik Galilea omugwe o onuk Nazaret ano orlu egesa.

⁴⁰Orlu egesarik welat, malik ano arlue agalat, ebe anni agalat, ede modok ʼgagal agalat, taga lagama, Allah ede aganhan ebam pasu laga.

⁴¹Tahun ebe loʼbok mo ligom, ʼbugom, osokhwe, Yesus aik ia eʼbirek domba wam wusogo seni Paskah sakho nouwogoluk e, o Yerusalem ʼbi legesa.

⁴²Asogo ʼbi legesarikmu no oluk e, is eba malik dagagaiam 12 tahun arat takpoluk seni sakho nouwogoluk odokto ʼgogugumu no oluk e, at Yesus ano 12 tahun arat lau wagama re, seni sakho nouwogoluk woluk ʼbigisa.

⁴³ʼBigisarik seni arat noluk e, Yesus aik ia eʼbirek Yesus o Yerusalem eba mo egeimu is eneperlagat naikheʼgwe togolik onowi pam orlu egesa.

⁴⁴Is aik ia onogola en e, Yesus ano aphwami pema enemin wege aʼge ebano re, pobuk enemin wagai hwi a? opoluk waga legesarik e, nogouwogoluk en de, enil ʼgwelakhegesa ʼgal ebe erlak en e, “Ue ari enemin oruak hwi a? Ye, at e, arilak enemin oruak hwi a,” oluk enebam hin wegesa.

⁴⁵Hin wegesa ʼgal ebe erlak en e, pobuk togolik o Yerusalem at palo seʼbigisa.

⁴⁶ʼBigisarik, palo tugulat agauwa ʼbiren denaga legesarik e, pobuk agauwa henaganak aʼge en de ʼgwelakhegesa ʼgal e, at ebe Allah owi werikmu ʼgoluk, is ap Allah iak moʼgulontogu legesa aʼge enemin eneʼgerlakma hweriogo welat, is ebano eniak ogukhwe esaʼgo hweliselat, is en ogukhwe at en oʼgo eselat, hin wasulat, tagoma hwiarigisa.

⁴⁷Asogo ogulat, is en hin wogumu, at wene modok aluk welat oʼgo moʼgulentesi ai paget e, is ap odoktak welegesa aʼge ebano ʼberlek en iak enesaʼgo hweligisarik e, “Nonogorlok e!” oluk erliktigisa.

⁴⁸Asogo erliktugumu, is at aik ia eʼbirek en ebe arat hwiarigisarik e, “Nonogorlok e!” oluk erliktigisa. Erliktigisarik ia en e, disogo moʼgulesi, “Nomlogo, hat disogo taknenebegen ai nopaget. Haik nemin nenede perik welat herahebil denaga lege yema hil nentemen,” oluk asogo moʼgulesimu,

⁴⁹at Yesus en e, “His an heranebil denaga legep ai nopaget. An naik owi werikmu wolom ano heneperlak no?” oluk moʼgulentesi aʼgeat de,

⁵⁰is eʼbirek pobi tu erlakma en nelakpoluk welegesa.

⁵¹Asogo oluk e, at Yesus aik ia emin o Nazaret orlu egesa. Orlu egesarik welat, at aik ia eniak opsogo hwelak poluk taga laga. Ye, ia re, wene ebano ʼberlegat edemu wesirik eberak modok welaga.

⁵²Ye, at Yesus asogo welat, ebe arlue agalat, ede modok ʼgagal agalat, tagokhwe, aik Allah emin, aphwami emin, at ebaget enebam lobuk ese laga.