Read Silimo Lukas 20 Bible Online

Lukas 20 - Silimo bible

Lukas 20

¹Pobuk agauwa mesik erlige re, at Yesus Allah owi werikmu ʼgwegeitik welat e, aphwami wene op wene dokhumsogo moʼgulentasulat, enesaʼgo weriselat, tagoma re, is ap Allah eiye aʼge onuelak ʼgaindek emin, Allah iak pelal wogo eiye aʼge emin, enarluedek ebano emin, enemin at Yesus eʼbek wegesa.

²Wegesarik e, disogo moʼgulegisa, “Hat en e, noʼgwe on eiye egentik di tagalat, yu tagalat, taga legen. Ye, ap sa en eiye welemagoluk edikhebesimu taga legen. Moʼgulnentemen da,” oluk moʼgulegisema,

³at Yesus en e, “An ogo re, his en mesik moʼgulnemagoluk, hin wokhentaigat o.

⁴At Yohanes en ik olomu, ʼbelabenebise laga ano re, Allah ʼbogorl pam aʼge en moʼgulesimu ʼbelabenebise laga ya? At e, aphwami ʼgwiangma aʼge en moʼgulegisema ʼbelabenebise laga ya. Moʼgulnemis da!” oluk moʼgulentesimu,

⁵is-is nak ogulat e, “Allah ʼbogorl pam aʼge en moʼgulesimu ʼbelabenebise laga, oluk moʼgulomul ʼgal e, at en e, Holuk e, his e, Yohanes iak demat oluk pobirak erlak welegep ai nopaget, oluk muʼgulnontouwano.

⁶Ye, Aphwami en moʼgulegisema ʼbelabenebise laga, oluk umu re, eige! Is aphwami ʼberlek en, Yohanes ai Allah iagat moʼgulnentasu laga, oluk opugumu no oluk e, helep pam nenebe modok damuksogo watnonobuano,” oluk egesarik e,

⁷pobuk Yesus disogo moʼgulegisa, “Wene ai edip nis neneperlak o,” oluk moʼgulegisema,

⁸at Yesus en e, disogo moʼgulentesi, “Holuk e, an en ogo re, Ai aʼge eiye egirik taga legi oluk his moʼgulhentaik erlagat o,” oluk moʼgulentesi.

⁹At Yesus en asogo moʼgulentesirik e, pobuk aphwami ebano wene mesik ebam elitsogo disogo moʼgulentesi, “Ap mesik iabukmu anggur owi yeregei. Yogo poluk e, ap logon ʼgwelakharok welemagoluk onoboluk e, o walegat loluk agauwa logon eminsogo weleiktik en de, weigoluk laga.

¹⁰O eba lagarik oruakhwe, agauwa anggur eʼgen ʼbalogwi aʼge pam hegit lai lagama re, ap iabuk eiye aʼge ano en is ap ebano eʼgen akhen ʼbalogo wogemagoluk, eragam aʼge mesik perakpou waga. Eneʼbek perakpou wagama re, is ap yabuk pekharok welegesa aʼge ebano eneʼbek waga ʼgal e, ebe ʼgoʼbu worugulat eʼgen ʼbalom erlakma en weat togolik perakpegesa.

¹¹Perakpogwiam lagama re, nin pobuk eragam aʼge mesik perakpou wagayat. Perakpou waga aʼge re, is en eʼgerli wusogo ʼgoʼbu werak poluk e, eʼgen ʼbalom erlakma en weat togolik perakpegesayat.

¹²Agauwa ʼbirenam perakpou waga aʼge asogo tigisa ai en e, nin pobuk eragam aʼge mesik perakpou wagayat. Aʼge re, at pobuk perakpou waga aʼge ano wagama is en asogoat ʼgoʼbu emep nim-namsogo wusogo anggur yabukmu en hwikhai legesa.

¹³Asogo modok tagenebegesema re, at ʼgain iabuk eiye aʼge ano ogola en e, Pobuk e, noʼgosogo tik e. An nuʼgwarek nomlogo nede hwedik aʼge yuat eneʼbek perakpaikmu re, hau doʼgoksogo wusogo wouwa epasu legi, oluk epesirik perakpou waga.

¹⁴Perakpou wagoam wagama, is ap yabuk pekharok welegesa aʼge ebano enil yethegesarik e, is-is nak ogulat e, disogo egesa, Aik ebalema yabuk eiye ema aʼge ano ebe waga etle i o. Holuk yabuk yu nisat eiye omul en e, ebe woruok o, oluk,

¹⁵omlogo ano yabukmu en leget oʼborl akhit lebikpegesarik e, ebe modogat werigisa. Is asogo tigisa ai en e, ap ʼgain iabuk eiye aʼge ano en e, is ap ai noʼgosogo tagonobouwa epegep.

¹⁶At ebe wemarik e, is ai enebe modogat wusogo hwigontoluk e, enebalema yabuk anggur yabuk ano tenak welemagoluk e, ap logon muon edigonobouwayat o,” oluk moʼgulentesimu, is ebano en e, “Eige! Asogo tu puk o!” oluk moʼgulegisema,

¹⁷at Yesus orogole edenogo is ebano il yerontoluk e, disogo moʼgulentesi, “Is ap agaikhen en pelal wokho pogulat e, Is ap tukang o helep aʼge worogwi aʼge en, o ebe worugulat e, Helep yu wiak, oluk ukpegesa aʼge ai o waʼgiat dalagama o, [17] oluk pelal wogo pegesa ai nopaget pegesa epegep.

¹⁸Ap sa en ebe ʼbule helep ai pam ʼbu ago holuk e, ebe modok seʼgerl-seʼgarltak pouwa o. Ye, helep ai sa ebam sebelu ago holuk e, ebe modok al ʼbesilogo worua o,” oluk moʼgulentesi.

¹⁹At Yesus en wene asogo moʼgulentesimu re, is ap Allah iak pelal wogo eiye aʼge emin, Allah eiye aʼge onuelak ʼgaindek ebano emin, enesaʼgo hweligisarik e, “Wene ai nis nenebaget ebam elitsogo moʼgulnentesi hegi o,” oluk pobi tigisarik e, ai erlige, at Yesus ebe tenakpouwogoluk tigisa aʼgeat de, aphwami ebano onogorlok en e, mo egesa.

²⁰Mo egesarik pobuk, at en iak ua aʼge ai pam ebe wene eʼgen poluk, at gubernur aphwami tenentarok welat wene enebam pasulat, noʼgorliselat, tago eiye aʼge en wene ebam pouwagoluk, ap logon enebabut op aʼge ʼgelaʼge Yesus enilen wogu lemagoluk peragonobou wegesa.

²¹Peragonobou wegesema, Yesus eʼbek wegesarik e, hin wokhogulat, disogo moʼgulegisa, “Nue! Hat e, wene moʼgulentasulat aphwami logon holukhwema enebasulat, logon hoʼborlma enebasulat, taga legen erlak o. We, hiak hegitsogo nak eselat, Allah ogola en e, Aphwami disogo togu lemak, oluk ogola epasu aʼge demat moʼgulnentasu legen ai, nis nenaluk o.

²²Holuk e, nis aphwami Yahudi aʼge togu lege hegitsogo, uang pemerintah paget, ʼgain onuk logo aʼge Kaisar wogum elit a? Mia ya,” oluk moʼgulegisema,

²³at Yesus en e, “Is ap yu an lalnobuogoluk eniak lalogo moʼgulnegisa hegi,” oluk, enak aʼge pobirak onoboluk e, disogo moʼgulentesi,

²⁴“Uang perak yabuk agauwa mesik erlige nak togwiam eneʼgik oʼgo wogontogwi ano aʼge mesik onukniemit da,” oluk moʼgulentesimu onukhegesema re, “Yu sa orogole heleʼgik aʼge pam onuk pelal wogo oruak epegep,” oluk moʼgulentesimu, is en e, “Yu ʼgain Kaisar at o,” oluk moʼgulegisa.

²⁵Asogo moʼgulegisema, at Yesus en e, disogo moʼgulentesi, “Holuk e, Kaisar en aʼge holuk e, Kaisar at wogogulat, Allah en aʼge holuk e, Allah at wogogulat, togu lemis o,” oluk moʼgulentesi.

²⁶Asogo moʼgulentasu lagama, aphwami enilem iak egei aʼge paget il walsogo wene ebam po aʼge erlak agama re, is en e, “Eige! Wene oʼgo hegitsogo egei ai nonogorlok e!” oluk, eniak erlak mo egesa.

²⁷Asogo oruakhwe, pobuk is ap Saduki aʼge en, “Aphwami warotluk en e, pobuk enelaluk ema modok erlak,” oluk ogwi aʼge pema Yesus eʼbek wegesarik ebam hin wokhogulat e, disogo moʼgulegisa,

²⁸“Nue! At Musa en disogo moʼgulentesi, Ap mesik ugwe horloluk emalik dagonobu erlakma en, ebe warago holuk e, ebalema emalik logon dagonobuagoluk e, hwe sugwe ai ap ai orat wo yo, [18] oluk moʼgulnentesirik pelal wokho pesimu oruak o.

²⁹Asogo egei aʼge oruakma re, ap enebe sabiren enaik mesigat aʼge en dogo welegesa. Dogo welat, onue naduk aʼge ai ugwe wesirik, eiyagai dagonobu erlakma en waraga.

³⁰Waragama re, ot eʼberlik aʼge ano en, hwe sugwe ano wesirik en e, waraga.

³¹Waragama, nin pobuk onot eneʼberlik aʼge ano en wesi aʼge re, asogoat eiyagai dagonobu erlakma en warat aga. Asogo, is ap enebe sabit eria en, hwe mesigat aiat wegesarik e, eneiyagai dagonobu erlakma en waretil modok wegesa.

³²Ye, pobuk e, hwe ebe ano warat aga.

³³Holuk e, is ap enebe sabiren eria en, hwe mesigat aʼge ai wil wegesarikmu re, pobuk Allah en aphwami werak aʼge enelalugabonobua ai erlige re, hwe ai sa ʼgelaʼge ugwe ema epegen,” oluk hin wokhegesa.

³⁴Asogo hin wokhegesema, at Yesus en e, disogo moʼgulentesi, “O yogodak ya ʼgwiangma welat e, ap en hwami horlogulat, is nin pema wogontugulat, togwi aʼgeat de,

³⁵is aphwami waragaiam Allah en enelalugabonobua ano pam, o pobuk wolomulmu eba re, elit welemak, oluk epasu aʼge eba welat, hwami horlogulat, is nin pema wogontugulat, togu lema modok erlak o.

³⁶Aphwami warotlukmu Allah en enelalugabonobua ai en e, enebe Allah eiyagai, is malaikat ʼbogorl pam yoʼgo noʼgwi aʼge emin hegitsogo welat, pobuk waraga lema modok erlak o.

³⁷Is aphwami warotlukmu Allah en enelalugabenebiso ai paget e, at Musa en, e hourak aʼge edipmu Allah ebe il hesi wene ai pam disogo egei, Abraham o, Ishak o, Yakub o, enaik Allah at o, [19] oluk egeirik pelal wokho pesi ai o.

³⁸At Allah il pam is enebe ʼberlek en e, enelaluk oruak ai en e, Allah ebe re, aphwami werak aʼge enaik puk. Enelaluk aʼge enaik o,” oluk moʼgulentesi.

³⁹Asogo moʼgulentesimu re, is ap Allah iak pelal wogo eiye aʼge pema en e, disogo moʼgulegisa, “Nue. Hat wene oʼgo obat moʼgulentigen o,” oluk moʼgulegisema

⁴⁰is ap logon en e, hin wo onogorlok agama re, hin wo erlakma en mo egesa.

⁴¹Asogo mo egesa aʼgeat de, at Yesus en is disogo moʼgulentesi, “Kristus Allah en yoʼgo poluk perakpou weik egei ano, ebe Daud en dogoʼgwe aʼge o, oluk ogwi ai, noʼgosogo holuk ogwi epegep.

⁴²At Daud uʼgwarek en buku Mazmur wene pam disogo egei, ʼGain Allah Onuk Logo aʼge en an nue ʼgain Onuk Logo aʼge moʼguleselat e, Aphwami hat heselei aʼge ebano hoyuk en al ʼbesilogo enebagun en, an en owan heʼbek onobou wom erlak oruakhwe, an neragam neʼgik ʼbekhit akhit hebe ʼgainat hweriogo wolorogun o, [20] oluk Allah en Kristus moʼgulesi, oluk Daud en egeimu pelal wogo oruak ai re,

⁴³

⁴⁴at Daud en Kristus ebe paget, Nue ʼgain Onuk Logo aʼge, oluk egei aʼgeat de, is aphwami en, Kristus ai Daud en dogoʼgwe aʼge, oluk noʼgosogo u epegep. Asogo u mia o,” oluk moʼgulentesi.

⁴⁵At Yesus en wene asogo moʼgulentasukhwe, aphwami ʼberlegat enesaʼgo hwelak oruakhwe, is at osi iak wogu legesa aʼge ebano disogo moʼgulentesi,

⁴⁶“Is ap Allah iak pelal wogo eiye aʼge enebabut togwi ai en lalhonobuano oluk, henebabut heberlogo welemis o. Is ap ai enebabut e, onosum yat aʼge ʼbuktak poluk pasar oʼgo wogumu eba is aphwami en hau doʼgoksogo waronobuagoluk lagalat, o aphwami Yahudi aʼge seʼban ogumu ebano ap ʼgain enebalema ʼgolokho hutla ʼgugulat, aphwami seni lok sakho noʼgumu ap ʼgain huragaimu ebano ʼgolokho hutla ʼgugulat, tugulom enagai welat togwi o.

⁴⁷Asogo welat, hwami sugwe aʼge onowi werik emin, enaʼge emin, sebelhorlugularat de, aphwami en enesaʼgo holugulat e, Is op, opouwagoluk seʼban yat wiak litluk lagai aʼge ano asogo togwi erlak wellepma re, Allah en wene weiyat enebam poluk wellep o. Aʼge re, asogo togwi ai en, wene eʼgin aʼge enebam poluk wiagabonobua ani o,” oluk moʼgulentesi.