Read Silimo Lukas 21 Bible Online

Lukas 21 - Silimo bible

Lukas 21

¹At Yesus en asogo moʼgulentesirik, orogole edenogo il yerentesi ʼgal e, is aphwami enilmu oruak aʼge pema uang Allah paget peti ogola pogumu ebano ʼgwelabugukhwe il yerentarok welaga.

²Yerentarok oruakma, at hwe sugwe ilmu erlak aʼge mesik wagarik e, uang sen modok wei aʼge ʼbiren ʼgwelabisokhwe il hesiat.

³Asogo ʼgwelabisokhwe il yerentesirik e, aphwami disogo moʼgulentesi, “Is aphwami onouang aʼbikmu eʼgerlakma aʼge ʼgegilogo pegesa ai, weiyat ʼgelaʼge o. Aʼgeat de, at hwe sugwe ilmu erlak aʼge ai nak e, wei nak osoʼboru oʼgo ʼbalogo no aʼge ʼberlegat pesi ai en e, modok aʼbik ʼgelaʼgeat pesi o, oluk demat moʼgulhentegis o,” oluk moʼgulentesi.

⁵Asogo moʼgulentesirik, Allah owi helep orogole modok ʼbogun wiak werigisa aʼge emin, o il opsogo di aʼge yu aʼge Allah paget pegesa aʼge emin, enil yetharok welat erliktugukhwe, at Yesus en disogo moʼgulentesi,

⁶“His o henil yethogu legep eba, pobuk helep mesik ukpo erlakma en modok moluksogo hwikhouwa aʼge oruak ani o,” oluk moʼgulentesi.

⁷Wene asogo moʼgulentesimu, is en, at Yesus ebam hin wokhogulat e, disogo moʼgulegisa, “Nue! Wene moʼgulnentigen ano re, metnerlige en ema o. Ebe eigoluk tagokhwe, ʼge aʼge naduk tagoma nenede weʼgerlema,” oluk moʼgulegisema,

⁸at Yesus en e, disogo moʼgulentesi, “Aphwami en lalhonobuano oluk e, henebabut heberlogo welemis o. Aphwami enebe aʼbigat en, ononuk an nonuk aʼge tuelak poluk disogo il wema ani o, At wema egesa ano an nebe wegi yuat o, ogulat, Ema ogwi ano arat horok lau waga o, ogulat, il wema ano, is ai eniak demat oluk henesaʼgo holholuk eneʼberlik lagup o.

⁹Is nin pema en, Weim obogwi, ogulat, Enebe mesik aʼge en homi pebisogo mukho lebigonobogwi o, ogulat, oluk ogwi holuk e, yuk oguptik henede oborlogouk ogup o. Naduk naduk asogo ema aʼgeat de, o ologun pam ema aʼge ai re, perlene ema erlak o,” oluk moʼgulentesirik e,

¹⁰wene mesik disogo moʼgulentesi, “Aphwami enaʼgul onuk loʼbok weim ʼgagalugulat, ap ononuk logo onosi eneragam aʼge loʼbok weim ʼgagalugulat, ʼgagalholuk weim obogukhwe,

¹¹mouk lok onogorlok aʼge erlanghasulat, o di owi yu owi soʼboru modok obuk laʼguk eselat, ou ebabut wiak aʼge enebam agalat, di aʼge yu aʼge onogorlok aʼge tagenebasulat, ʼbogorl pam en tu puk aʼge lalhasulat, tua o.

¹²Aʼge re, ai ʼberlegat owan tu erlak oruakhwe re, naduk naduk e, aphwami en henebe tenakhonoboluk, di obotut yu obotut takhonobogulat, o seʼban ogumu wokhonoboluk lagalat, herle wusogo onobogumu ʼgwelakhonobogulat, ap ononuk logo aʼge emin, ap ʼgain gubernurlak emin, eneʼbek wokhonoboluk lagalat, tua ai re, is en e, an nonuk ogulat, His at osi, oluk asogo takhonobouwa ani o.

¹³Asogo takhonobouwa ai pam e, an tisokhwe henil niogu legep aʼge yu obok ʼbaksogo moʼgulontouwagoluk panoasuak ema o.

¹⁴Ye, ai erlige re, his en wene oʼgo moʼgulentagup aʼge, an en henede ʼgagalogo moʼgulhentaikmu re, is wene henebam pouwa aʼge eba en, His heniak ai erlak o, oluk oʼgo u aʼge erlak ema ani o. Ai en e, owan takhonobo erlak oruakhwe, his honogola en, Wene asogo aʼge nebam pogwi holuk, nebe erlele hwerlaigoluk e, oʼgo ʼge aʼge moʼgulentaik, oluk henede perik erlagat wolomup o.

¹⁶Ye, henaiklak henialak en, honuelak henarilak en, his wokhonoboluk e, o wene enebam pogulat, noʼgorlogulat, tugumu eba henebi lagalat, henebe ado modok wathonobogulat, tua o.

¹⁷Ye, is aphwami ʼberlegat en e, an nonuk oluk, His e, at osi o, oluk henebe enebit modok hontouwa o.

¹⁸Aʼgeat de, henebe nalorogup erlak o, u ʼgelaʼge re, henasu henaʼgul pam eba mesigat holuk mesik nalema modok erlak o.

¹⁹Holuk e, henede haʼbuktak poluk e, henepe mosogoat wolorogup holuk e, noburlal-hoburlal hwerlagup ani o,” oluk moʼgulentesi.

²⁰At Yesus en asogo moʼgulentesirik, wene mesik disogo moʼgulentesi, “Is ap tentara aʼge en o kota Yerusalem ai modok leget wusogo pouwa holuk e, O lerak poluk wolloʼgen dagalogo watnonobua ano arat horok lau waga hegi o, oluk henede opomup o.

²¹Ai erlige re, disogo ema, asogo ema, oluk, is ap Allah iak pelal wokho pegesa aʼge ebano en egesa ai emin hegit emagoluk e, aphwami wiak togwi aʼge wene yogodak ya pam enebam pouwa ai en, his o Yudea da ya welema aʼge holuk, dom pam hweiye ligagalat, o Yerusalem welema aʼge holuk, o kota ano ukpoluk hweiye ʼbogolugulat, tit o. Ye, o esaʼgoma igowi wolorogup aʼge holuk e, o kota yema ʼgu orogup o.

²³Ai erlige re, o yema modok wik-wiaksogo tagenebasulat, Allah olot het aphwami yema enebam pasulat, tua ai en e, is hwami enemalik onogolarak aʼge emin, enemalik pou agamu wogontogwi aʼge emin, wiak houwa ai eige! Nede o!

²⁴Aphwami pema re, ʼgarok pam waronobogulat, pema re, herle wusogo o di owi yu owi enebi lagalat, tua o. Ye, o kota Yerusalem yu, aphwami oʼborl oʼgwe aʼge onoyuk en al ʼbesil-ʼbesal tagonoboluk, o sebelu ʼgu agalat welema aʼgeat de, modok sebelak welema erlak o. We, Allah en, Is aphwami oʼborl oʼgwe aʼge, o Yerusalem hwerli yu hwerli pamat sebelak welema, oluk epesi hegitsogoat welema o,” oluk Yesus en moʼgulentesi.

²⁵At Yesus en asogo moʼgulentesirik e, pobuk mesik disogo moʼgulentesi, “Henede weʼgerlogo re, mo emin, dugwi emin, hwesagal emin, ai mu ʼgelaʼge pelalisoam hagup o. Ye, ʼgwiangma yema ik laut omugwe lok yeʼgelak welago aʼge ano ogo anni wiak hererim hau wagalat e, iak loksogo ʼbukhwak osolomma re, is aphwami enaʼgul onuk loʼbok onogorlok emarik enede porua ani o.

²⁶Ye, ʼbogorl pam enanni aʼbik aʼge onoborlogouk hogulomma, is aphwami en e, Di tagalat, yu tagalat, tua ano arat ema hegi, oluk onogorlok en enede modok erlak ema ani o.

²⁷Ai erlige re, an abat daklau wegi ano nannisogo o hena ogola ʼbu agokhwe, enil nioluk erlik aʼbik nobua o.

²⁸Wene ʼberlegat ema egi ai re, arat edip serlelhasu holuk e, his honogola en e, Delnonobua ano arat horok lau waga o, oluk, henebe inotluk henaʼgul lekho welemis o,” oluk moʼgulentesi.

²⁹At Yesus en asogo moʼgulentesirik e, wene mesik ebam elitsogo disogo moʼgulentesi, “Di agan, yu agan emin, e ara emin, tiso ano pobi tit!

³⁰E ai eʼgela lologo ʼbisoam pobuk erlit sebeliso holuk e, Yogo. O yogodak hebi ema hegi, oluk honomuat henede en pobi togu legep ani o.

³¹Ai ʼgelaʼge re, an en, Disogo ema, asogo ema, oluk moʼgulhentegis ano ebe agoam henil holuk honogola en e, Allah eragam onobouwa ano arat horok lau waga hegi, oluk henede opomup.

³²Disogo ema, yusogo ema, oluk moʼgulhentegis ai, aphwami o yogodak oruak aʼge enebe logon erlak om erlakma en owan oruakhweat, ʼberlek ema o, oluk demat moʼgulhentegis o.

³³ʼBogorl emin, ʼgwiang emin, erlak ema aʼgeat de, an niak ai re, modok erlak ema erlak o,” oluk moʼgulentesi.

³⁴At Yesus en wene asogo moʼgulentesirik e, eʼberlik disogo moʼgulentesi, “Di aʼge yu aʼge sakho werakho honogum ningsogo noʼgulat, ik honuk-honuk tuogoluk noʼgwi aʼge ano noʼgulat, di aʼge yu aʼge ʼgwiangma aʼge paget mennei yat horok eberugulat, asogo til denagalat henebabut heberlak erlak wongat oruakma,

³⁵ʼbaik sepna en al ʼbesilogo weriso ʼgelaʼge, an wene egi aʼge ai mesik erlige tagalat, aphwami ʼgwiangma aʼge modok ʼberlegat wiagabenebiselat, his henemin wiagaphonobuano oluk e, henebabut heberlogo wolomup o.

³⁶Disogo yusogo ʼberlegat ema egi ano tagokhwe re, henannisogo henepe mosogo woloroguptik, heneʼgerli erlaksogo nologotma edik oruakma, an abat daklau weik ano hentau weik en e, nin hwedik nan hwedik seʼbanat ogulat e, henebabut heberlogo welemis o,” oluk moʼgulentesi.

³⁷Wene asogo moʼgulentesirik e, pobuk at Yesus o dakha osokhwe Allah owi werikmu en, wene moʼgulentasulat, o hik osokhwe dom Zaitun duk pam seʼban il ligagalat, taga laga.

³⁸Asogo tisokhwe, aphwami ʼberlek ebano at iak holuogoluk e, Allah owi werikmu hubet siaksogo odoktu waga legesa.