Read Silimo Lukas 23 Bible Online

Lukas 23 - Silimo bible

Lukas 23

¹Wene asogo egesarik, aphwami welegesa aʼge ebano enebe ʼberlegat inegesarik e, Yesus ano Pilatus eʼbek woluk wegesa.

²Wegesarik wene ebam pogulat e, disogo moʼgulegisa, “Ap yu en aphwami nis aʼge lalenebiselat, uang pemerintah aʼge paget ap ʼgain Kaisar ano wogorogup no yo, eselat, Honue ʼgain Nonuk Logo aʼge Kristus ano anat o, eselat, oluk nis nenilem ese laga ai en woluk wege o,” oluk moʼgulegisa.

³Asogo moʼgulegisema, at Pilatus en Yesus ebam hin wokhasulat e, disogo moʼgulesi, “Ap Yahudi aʼge onue ʼgain onuk logo aʼge ano harat de egesa ya?” oluk moʼgulesimu, at Yesus en e, “Hat egen aiat o,” oluk moʼgulesimu,

⁴at Pilatus en e, ap Allah eiye aʼge onuelak ʼgaindek emin, aphwami aʼbik odoktak welegesa aʼge ebano emin, moʼgulentasulat e, “An en, at yu emdema wegi aʼge re, at wiak mesik tegeimu modok ho erlak o,” oluk moʼgulentesimu,

⁵is ebano pobuk eniak modok ning-nangsogo disogo moʼgulegisa, “Erlak o. Ap yu wene moʼgulentil denagalat e, aphwami o Yudea aʼge o di owi yu owi ʼberlegat enede ʼgagalil noso yo. Naduk naduk o Galilea eba en enede ʼgagal ʼgagal e, o yema waga o,” oluk moʼgulegisa.

⁶Asogo moʼgulegisema, at ʼgain Pilatus ano esaʼgo hwelegeitik e, “Ap yu o Galilea aʼge a? oluk, aphwami ebano moʼgulentesimu,

⁷is en e, “Ap ai, o at ʼgain Herodes en tenentarok welagoma ebano aʼge o,” oluk moʼgulegisema esaʼgo hwelegeitik e, ai erlige, at ap ʼgain Herodes ebe o Yerusalem eba ʼboluk oruakma no oluk e, eʼbek perakpou waga ai o.

⁸Perakpou wagama re, at Herodes ano Yesus taga laga aʼge nadugat esaʼgo hwelegeitik, ogola en e, “Ebe nil hele e. Elalinat tagenebil denago ai, mesik tagoma an nil hele e,” oluk opoluk oruakma no oluk e, at Yesus ebe eʼbek woluk wegesema, il holuk ogola agai hesi.

⁹Ogola agai holuk, di wene yu wene aʼbigat Yesus ebam hin wesi aʼge re, at en oʼgo mesik u erlakma en mo egei.

¹⁰Oʼgo u erlakma en mo egeimu re, is ap Allah eiye aʼge onuelak ʼgaindek emin, is ap Allah iak pelal wogo eiye aʼge emin, ebano horoksogo hopha ʼgwigisarik e, eniak ning-nangsogo wene ebam pogu legesa.

¹¹Pogumu re, at Herodes osi tentara aʼge emin en, Yesus ebe onogola en mi-miarak poluk, eniak esegen aʼbik wokhogu legesarik e, sum poksogo ʼgaindek ʼbuktak welagai aʼge mesik ʼbuktak poluk, togolik Pilatus eʼbek perakpesi.

¹²Naduk e, at Herodes Pilatus eʼbirek weim ʼbelak ʼgelaʼge welegesa aʼgeat de, asogo perakpesi, ai erlige eʼbirek op egesa.

¹³Ye, at Yesus woluk legesema re, at Pilatus en, is ap Allah eiye aʼge onuelak ʼgaindek emin, is ap Yahudi aʼge ʼgaindek ononuk oruak aʼge logon emin, onosi ʼberlegat emin, “Odoktu manis o,” oluk moʼgulentesimu wegesema re,

¹⁴wene disogo moʼgulentesi, “Ap yu en aphwami lalenebil noso yu i o, oluk, an neʼbek woluk wegeptik wene ebam pegepma re, an en his henilemat wene edip ʼbalegis aʼge re, his en wene ebam pegep ʼgelaʼge re, hegi erlak o.

¹⁵Ye, at ʼgain Herodes asogo mesik ho erlakma re, nis neneʼbek yema perakpou waga ai o. Wiak togwiam wene enebam poluk en waronobogwi ai ʼgelaʼge, ap yu en asogo wiak mesik tegeimu hegi modok erlak o.

¹⁶Holuk, we, lagalʼbisok ʼgoʼbu nak wusogo herle hebelik o,” oluk moʼgulentesi. [

¹⁷Asogo moʼgulentesi ai re, seni onuk Paskah ano aʼge noʼgukhwe, at Pilatus en ap eneʼgik herle werak aʼge mesigat holuk mesik hebilogo wogentasumu no oluk e, asogo moʼgulentesi ai o.]

¹⁸Asogo moʼgulentesi aʼgeat de, is ap ʼberlek ebano en e, eniak lere-ʼgobo ogulat e, “Ap Barabas ai nak eʼgik herle hebilnontoluk e, ap ai re, werip o,” oluk moʼgulegisa.

¹⁹At Barabas ai naduk e, ap logon enemin, aphwami o kota lok ano aʼge homi pebisogo, “Nonuelak ʼgaindek pemerintah aʼge, nenebit,” oluk weim obogulat aphwami pema warenebise lagama eʼgik herle wusogo pegesa aʼge oruakma asogo moʼgulegisa.

²⁰Moʼgulegisema, at Pilatus ogola en e, “Yesus ai eʼgik herle hebilogo ukpaik,” asogo epasulat oluk e, iak pobuk lagaksogo moʼgulentesi aʼgeat de,

²¹is ogo eniak uarekmasogo ogulat e, “E pam edikpoluk werip o! E pam edikpoluk werip o!” oluk moʼgulegisema,

²²at Pilatus eʼgik ʼbirenam moʼgulentesirik e, pobuk mesik emin moʼgulentasulat e, “At yu no wiak tegeimu en no. Wiak togwiam waronobogwi ai ʼgelaʼge, an wene edip palegis aʼge, at yu en wiak mesik tegeimu hegi erlak o. Holuk e, ʼgoʼbu nak woroguptik e, eʼgik herle hebilogo ukpaik o,” oluk moʼgulentesi aʼgeat de,

²³e pam edikpoluk woruagoluk eniak lere-ʼgobo ogulat ʼgonu moʼgulegisema re, is eniak anni aga.

²⁴Is eniak anni agama, at Pilatus en is en ʼgonu egesa hegitsogoat wene daksogo egeitik,

²⁵at Barabas en homi pebisogo weim ebiselat aphwami warenebise lagama eʼgik herle wusogo pegesa aʼge ano, “Herle hebilogo woknonto yo,” oluk egesa ano wogentasulat, ye, at Yesus ano nak e, is onogola epegesa aʼge hegitsogo tuagoluk osi eneʼgikmu pasulat, tegei.

²⁶Asogo wogentesimu woluk wegesa ʼgal e, ap onuk Simon, owi o Kirene aʼge mesik o wema en o kota lokma ʼgwigoluk lasumu, ebe tenak pegesarik, e Yesus edikpoluk worua aʼge ano woluk e, Yesus eʼberlik wemagoluk eniak ningsogoat moʼgulegisa.

²⁷Yesus ebe woluk wagaihwe aphwami aʼbik eneʼberlik wagalat e, hwami pema at ebaget nge tugulat, enede eneʼgik en dung til wegesa.

²⁸Asogo til wagaimu, at Yesus orogole edenogo ʼgwelagentesirik e, disogo moʼgulentesi, “His hwami o Yerusalem aʼge yema re, an nebaget nge togup no yo. His e, henemalik enemin honuʼgwarek henebaget nge tit o.

²⁹Pobuk wiak ema aʼge oruak ani o. Ai erlige re, is aphwami en ogulat, Hwami abeli aʼge, enemalik dagonobogwi erlak aʼge, enagamu noʼgwi erlak aʼge, ai nak e, onogola enagai ho ʼgelaʼge o, ua o.

³⁰Ai erlige re, aphwami en e, Nenebe al ʼbesilnenebin o, oluk, dom lok aʼge moʼgulugulat, Nenebe hisogo nenebemen, oluk dom wei aʼge moʼgulugulat, ua o. [22]

³¹Ai ʼgelaʼge re, yogodak ya e ʼget aʼge pam ʼgelaʼge welat taknobogwi yu re, pobuk e ʼbuk aʼge pam ʼgelaʼge lai lasulat, noʼgosogo tul epegep,” oluk moʼgulentesi.

³²Ye, at woluk wagalat e, is ap enebabut modok wiak togu legesa aʼge enebe ʼbiren enemin waronobuogoluk wogonoboluk wegesayat.

³³Wogonoboluk e, dom aʼgul onuk Enaʼgul ʼBelak duk pam wegesarik, at Yesus ebe e pam edikpogulat e, ap enebe ʼbiren enebabut modok wiak togu legesa aʼge mesik eʼgik ʼbekhit akhit, ye, mesik eʼgik hware akhit, edigonoboluk emin warenebegisa.

³⁴Asogo edigenebegesema welat e, at Yesus en Allah disogo moʼgulesi, “Naik o! Is yu eneperlak welat taknobogwi yu re, wene enebam po erlakma en erlagapsogo ukpemen o,” oluk moʼgulesi. Ye, is aphwami ebano en e, asogo edigonoboluk, “At Yesus osum noʼgorlak ebano sa ʼgelaʼge eiye ema,” oluk e, helebeʼgen hwikhai lagalat, hwikhau wagalat, tigisarik, helebeʼgen enebam aga aʼge nak soʼbusogo hwerlegesa.

³⁵Is aphwami ebano edik welat enil oruakhwe re, is ap Yahudi aʼge onuelak ʼgaindek ebano eneʼbiang harlik hogulat, Yesus eniak esegen wokhogulat e, disogo egesa, “At yu Allah en Kristus edikpoluk perakpou weik egei ano ebe arat holuk e, is aphwami pema elirat delenebise laga ano ʼgelaʼge, uʼgwarek en asogo delhorlouwak e,” oluk egesa.

³⁶Ye, is ap tentara aʼge ebano eʼbek horoksogo wegesarik e, anggur eʼgen aʼbosu esik wiak aʼge hek-hek hogulat eniak esegen disogo yagegisa, “Hat aphwami Yahudi aʼge onue ʼgain honuk logo aʼge demat holuk e, huʼgwarek en delhwerlagunmu re,” oluk moʼgulegisa.

³⁷

³⁸Ye, is en e, “APHWAMI YAHUDI AʼGE ONUE ʼGAIN ONUK LOGO AʼGE EBE YUAT O,” oluk pelal wokho e Yesus wusogo edikpegesa aʼge ano pam dopnorak pegesa.

³⁹At Yesus asogo wusogo edikpogulat, ap wiak togu legesa aʼge emin wusogo edigenebegesa aʼge eriano, at mesik en Yesus iak esegen yageselat e, “Hat Kristus at epegi. Holuk e, huʼgwarek en delhwerlasulat, nis ogo delnenebiselat, togunmu re,” oluk moʼgulesi aʼgeat de,

⁴⁰at are akhen ano en e, at wene yageselat e, “Hat yu ogo re, at wusogo pegesa ʼgelaʼgeat nenemin hegit-hegit wusogo nenebegesema re, Allah hogorlok erlak a?

⁴¹Nis e, wiak togu legema nenebabut pam watnonobu hegitsogoat watnenebigisa aʼgeat de, at yu nak e, wiak mesik asogo tu erlak o,” oluk moʼgulesirik,

⁴²pobuk, at Yesus disogo moʼgulesi, “Nue o! Hat ʼgain honuk logo aʼge weleigoluk wagalat, an nebam eberip o,” oluk moʼgulesimu,

⁴³at Yesus en e, disogo moʼgulesi, “O yogodak yayat neʼbirek o opma eba lultik wolomul o, oluk demat moʼgulhegis o,” oluk moʼgulesi.

⁴⁴Asogo enebegesema welegesa, o erlige ede ʼburl jam 12 hegit o hik egeimu re, mo yoru erlak oruakhwe o eba ʼberlegat hwerli jam 3 o hiktak modok welaga. Jam 3 agama re, Allah owi werikmu sum kain aʼge o ogorli dit akhit oʼgwe ʼbelak welaga aʼge ano ʼburl heisogo ʼbaktil ʼbu aga.

⁴⁵

⁴⁶Asogo tegeimu, at Yesus iak loksogo Allah moʼguleselat e, “Naik o. An narogun hat en ʼgegilogo heʼgikmu wagun en, moʼgulhegis o,” oluk moʼgulesirik e, arat lebeksogo waraga.

⁴⁷Asogo tegeimu ap tentara aʼge onue ʼgain ano il holuk Allah erliktagalat e, “Ap yu demat wiak tu erlakma hegi o,” oluk egei.

⁴⁸Ye, is aphwami aʼbik enil houwogoluk wegesa aʼge asogo tisokhwe enil holuk pobuk togolik onowi pam lagalat, enebe ʼberlegat enede eneʼgik en dung hogulat wetil wetil legesa.

⁴⁹Ye, Yesus eba enaluk aʼge ʼberlegat, is hwami o Galilea en Yesus eʼberlik ʼbigisa aʼge emin, is logon emin, enebe walekma edik welat e asogo tagokhwe enil pusogo yetharok welegesayat.

⁵⁰Asogo tigisema re, ap mesik onuk Yusuf, owi aphwami Yahudi aʼge onowi kota mesik onuk Arimatea ai aʼge. Ogola en e, “Allah en eragam nonobouwa ai re, metnerlige nonobouwa,” oluk yetharok welat, ebabut op welat hegitsogo taga laga aʼge, ebe Yahudi onuelak ʼgaindek wene ʼbeloʼguogoluk enemin odoktugu legesa aʼge. Asogo aʼgeat de, is arilak en, Yesus obok ʼbalogo werigisa ai, at en, “I o, woruok,” oluk u erlak welagarik e,

⁵¹

⁵²at Yesus ebe werak Pilatus eʼbek ʼgonu laga.

⁵³ʼGonu lagama, at Pilatus en e, “I o, op o,” oluk moʼgulesimu, wagarik Yesus werak ano e pam en ʼbelakpou wagarik e, sum kain lenan aʼge pam eʼgirlogo re, owik aphwami werak aʼge onobogu lemagoluk helep owik ebale ʼgerat heleʼgigisarik e, werak owan onobogwi erlakma pei laga.

⁵⁴Pei laga ai erlige, is aphwami Yahudi aʼge weiyat wolomtik seʼban uogoluk welat, di aʼge yu aʼge odoksogo pogumu hegitsogo hari Jumat pesi.

⁵⁵Ye, is hwami o Galilea en Yesus eʼberlik ʼbigisa aʼge ebano Yusuf eʼberlik wegesarik e, “Yesus ebe werak owikmu ai asogo pesi,” oluk enil pobisogo hegesa.

⁵⁶Enil holuk olema legesarik e, e di aganeʼgen yu aganeʼgen eʼben op aʼge emin, aʼbosu eʼben op aʼge emin, Yesus werak ano ebetne egeli louwogoluk e, degelogo pegesa. Asogo pegesarik, is aphwami Yahudi aʼge Allah en enesaʼgo weregei hegitsogo agauwa sabit aʼge pam Allah paget weat welegesa.