Read Silimo Yohanes 10 Bible Online

Yohanes 10 - Silimo bible

Yohanes 10

¹At Yesus en wene asogo moʼgulentesirik e, pobuk mesik disogo moʼgulentesi, “An en wene mesik demat moʼgulhentaik o. Ap sa en wam domba wam waigoluk ebe lalma ʼgwiogoluk e, ʼgoduk ʼgwilo oʼgwe ʼbekhit ʼgwi lasu erlakma en, we, leget siatle hasogo ʼgwiso holuk e, at ebe ai yogorlia wasu aʼge en yogorlia waiyogolugat o.

²Ye, ap sa en, ʼgoduk ʼgwi lagai oʼgwe ʼbekhit ʼgwiso holuk e, at ai domba eiye welat ʼgwelakharok welago aʼgeat o.

³At domba eiye welat ʼgwelakharok welago aʼge ai, ebe wago holuk, at ap mesik domba owi ʼgodukmu ʼgagalak welago aʼge en ʼgoduk huthasuam, at domba eiye aʼge ano en iak pakhasuam, is domba wam en, at iak enesaʼgo hologumu no oluk e, ononuk loʼbok worlentasulat, wogonoboluk odipmu libago yo.

⁴Wogonoboluk libagalat e, at ebe naduk lasukhwe, uam domba ebano, at iak enalukmu no oluk e, eʼberligat lagai o.

⁵Obat asogo lagai aʼgeat de, is ap muon eniak ogwiam e, is domba wam en is eniak eneperlakma no oluk e, eneʼberlik lo pukmu en hweiye lagai o,” oluk,

⁶at Yesus en, wene ai ebam elitsogo is moʼgulentesi aʼgeat de, wene yu ʼge aʼge paget egei hweat, pobirak erlakma en welegesa.

⁷Asogo pobirak erlak oruakhwe, pobuk at Yesus en e, disogo moʼgulentesi, “Wene demat mesik moʼgulhentaik. Wam domba wam ai eneʼgebela re, an nebeat o.

⁸An owan wom erlak oruakhwe, is aphwami logon naduk wegesa eba re, is enebe ʼberlegat wam domba wam yogorlia worogulat, hisarogulat, togwi aʼge wegesarikmu no oluk e, is wam domba wam en, is eniak enesaʼgo holu erlakma en welegesa.

⁹Ebela ʼgoduk e, an nebeat o. Ap sa en an nebam ʼgwiso holuk, ebe op degelak modok welat, libom-ʼguom eselat e, eʼgela op aʼge nak nasu lema o.

¹⁰Ye, is ap yogorlia wogwi aʼge wagai ai re, wam domba wam yogorlia hisarogulat, waronobugulat, enebe modok erlagabonobugulat, tuogoluk wagai aʼgeat de, an wegi ai nak e, is aphwami di aʼge yu aʼge aʼbikmu eʼgerlakma hialogo welagai ai ʼgelaʼge, enebe enelaluk modok welemagoluk enelalugabonobolukmu en demat aʼge eʼgerlakma hialogo welemagoluk wegi o.

¹¹Wam domba wam eiye welat ʼgwelakharok welago aʼge, nebabut op e, nebe anat o. Wam domba wam eiye welat ʼgwelakharok welagai aʼge, ebabut op aʼge re, uam domba erlele wokho wareigat o, oluk ogola epasu.

¹²At asogo epasu aʼgeat de, at ap mesik wam domba wam eiye aʼge erlak. At uam puk. At we, oʼgo wogemagoluk ʼgwelakharok oruakma mene orlomene wagoma il yetholuk, wam domba wam ukpoluk hweiye lasuam e, mene orlomene ano en domba ebano iak en dalukhegeik wogenebigoluk mukho-makho ʼbogulogo lebigenebasu.

¹³At ai oʼgo wogemagoluk wam domba wam ʼgwelakharok welago aʼge ai en e, wam ebano ede erlak en ugonoboluk hweiye lasu ai yo.

¹⁴Wam domba wam ʼgwelakharok welago aʼge nebabut op e, nebe anat o. Naik en an aluk, ye, an en at naluk, welege ai ʼgelaʼge, an en nuam domba naluk, ye, is en an enaluk, welagai o. Asogo welat, an nuam domba erlele wokho wareigoluk welegi o.

¹⁵

¹⁶Ye, an nuam domba wam ebe lalma yema nak oruak puk. O muʼgwe logon oruagat o. Nuam eba aʼge niak enesaʼgo holuagoluk wogonoboluk weigolugat welegi o. Onobuomma, is an nuam domba wam yoʼgo ʼbelak mesik oʼgwe noʼgu lema o. Asogo noʼgukhwe, an nematek en ʼgwelagentarok weleik o.

¹⁷An wareiktik togolik nelaluk eigoluk nebe wareik epasu legi ai en e, naik en an ede hwedik welago yo.

¹⁸An en wareik epasu erlakmayat, is aphwami logon en ebagase pam watnobu mia o. We, an nuʼgwarek nogola enat, nebe wareik epaik erligeat wareik o. Wareiktik e, pobuk togolik nelaluk eik ai nuʼgwarek nogola en epaik hegitsogoat o. Asogo tuagoluk naik en peraknobou waga aʼgeat tik o, oluk demat moʼgulhentegis o,” oluk moʼgulentesi.

¹⁹Wene asogo moʼgulentesi ai en, is ap Yahudi aʼge eniak aʼbik sagaligisarik enebe ʼburl meʼgerigisa.

²⁰Asogo meʼgerigisarik, is enebe pema lok oʼgwe en e, disogo egesa, “At yu muʼgat ebabut wiak aʼge ogola ʼgwegeitik ebe ede ʼbalagarik wene osokhweat de, his at iak hologu legep ai nopaget,” oluk egesa.

²¹Asogo egesa aʼgeat de, is pema akhit en e, disogo egesa, “Erlak o. Aphwami muʼgat ebabut wiak aʼge onogola ʼgoluk e, wene asogo ogwi erlak o! Muʼgat ebabut wiak aʼge en enil hopnik aʼge elirat obabonobu epegep? Modok mia o,” oluk egesa.

²²Asogo egesarikmu en, is aphwami Yahudi aʼge onogola en e, “O Yerusalem Allah owi werik aʼge pobuk opsogo degelige ano yo,” oluk onogola eberak welat seni sorugumu ano arat hegit aga. O eria hegit e, o wiak welaga.

²³Asogo oruakhwe, at Yesus Allah owi werikmu, o sorloʼbon onuk Salomo osorloʼbon oʼgwe nosoma,

²⁴is ʼgaindek Yahudi aʼge eragam odoktu egesarik e, disogo moʼgulegisa, “Nenede perik oruakhwe uknenebasu legen yu, nenede yamuksogo, hwerli agauwa ʼge pam en moʼgulnentagun. Allah en Kristus yoʼgo poluk perakpou weik egei ano, hebe harat holuk e, ʼbaksogoat moʼgulnentemen o,” oluk moʼgulogu legesema,

²⁵at Yesus en e, disogo moʼgulentesi, “An arat moʼgulhentasu legi aʼgeat de, his en demat oluk opogu legep erlak o. An naik en yoʼgo nebesimu taga legi ai, an nobok ʼbaksogo moʼgulhonto ʼgelaʼgeat taga legi aʼgeat de,

²⁶his henebe an en aʼge domba puk, mu aʼge oluk e, nebe pobi nobogu legep erlak ai o.

²⁷His honogola asogo epegep aʼgeat de, is pema en e, an nuam domba aʼge holuk, niak enesaʼgo holholuk, is en an nebe enalukmu no oluk e, neʼberlik wagai o.

²⁸Neʼberlik noʼgukhwe, is enelaluk modok welemagoluk enelalugabenebasu leik ai en e, is enebe warotluk nalema erlak o. Is an neʼgik pam oruakhwe, is ap nin pema en delogo wogonobu mia o.

²⁹Ap pema mia aʼgeat de, an naik en nuam domba woknesi aʼge ai nak e, ebe anni oruak o. Is an naik en woknesi aʼge ai, at eʼgik pam oruakma, is ap logon en delogo wogonobu mia o.

³⁰Naik neʼbirek nenebe re, mesigarat o,” oluk moʼgulese lagama,

³¹is ap ʼgaindek Yahudi aʼge en e, helep eneʼgikmu wegesarik e, Yesus ebe modok woruogoluk tigisa.

³²Asogo togu legesema, at Yesus en e, disogo moʼgulentesi, “An naik en op aʼge aʼbigat tuagoluk yoʼgo nebesi aʼge tagoma, henil niogu legep aʼge eba ʼberlegat e, mesik ʼge ʼgelaʼge dagan tegismu en nebe watnobuogoluk togu legep,” oluk moʼgulentasu lagama,

³³is en e, disogo moʼgulegisa, “Hat op taga legen ai en helep pam wathobuogoluk togu lege puk. We, hat hebe aphwami aʼgeat de, Allah onuk wiagapsogo, disogo ese legen, An Allah nemin hegit, oluk ese legen ai enat wathobuogoluk togu lege o,” oluk moʼgulogu legesema,

³⁴at Yesus en e, disogo moʼgulentesi, “Wene Allah en nenesaʼgo weregei aʼge ano pam, at en e, disogo egeimu pelal wogo pegesema oruak, His henebe Allah ʼgelaʼgeat o, [6] oluk pelal wokho oruak ano erlak no?

³⁵Wene Allah iak pelal wogo welago ai ʼberlek e, mesik sogwi ago erlak ani o. Ai en e, is at iak moʼgulentesi aʼge paget, Henebe Allah ʼgelaʼgeat o, oluk egeimu pelal wogo oruakhweat de,

³⁶an en e, Nebe Allah omlogo, egi ai en, Allah onuk wiagaregei, oluk nopaget ogu legep. Allah enat yoʼgo nebesirik, demat nebe poliknoboluk ʼgwiangma yema peraknobou waga aʼgeat de, asogo nopaget ogu legep.

³⁷An naik en e, Disogo taga lomup, oluk, peraknobou waga aʼge, ebe tu erlak wellema re, his en nebe pobirak noboluk henede nebam heʼberik po mia o.

³⁸Aʼgeat de, an en tisokhwe, his en demat oluk henede an nebam heʼberik po henebit ai o. Asogo tigep ai re, an en naik emin hwedik, ye, at en an nemin hwedik, welege ai, henaluk oroguptik en demat oluk pobi togup en e, an taga legi aʼge ai demat oluk pobi tit o!” oluk moʼgulentasu lagama,

³⁹is en e, at Yesus ebe tenakpouwogoluk tigisa aʼgeat de, niagup-hiagup aʼge long egei.

⁴⁰Yesus asogo lagarik, pobuk togolik ik Yordan etle akhit oʼgwe at Yohanes en naduk aphwami ik olomu ʼbelabenebise lagaʼgwe ebano libagarik welaga.

⁴¹Eba oruakma, aphwami aʼbik at eʼbek wegesarik e, disogo egesa, “At Yohanes en elalin aʼge mesik taga laga modok erlak aʼgeat de, at en ap yu obok ese laga ano iak ebe enak aga,” oluk egesarik e,

⁴²is aphwami eba welegesa aʼge enebe aʼbigat enede Yesus ebam heʼberik pegesa.