Read Silimo Yohanes 12 Bible Online

Yohanes 12 - Silimo bible

Yohanes 12

¹Wene asogo egesarik oruakhwe, agauwa huaben welemarik en, agauwa mesik pam seni Paskah ano aʼge nouwogoluk owan oruakhwe, at Yesus o Betania ap Lazarus waragama en elalugap pesi aʼge ano owi pam waga.

²Wagama, is aphwami eba aʼge en ebaget serigisema re, hwe Marta en soʼboru soʼburentasukhwe, Lazarus emin, aphwami yoʼgo enebegesa aʼge ebano emin, Yesus eminat neʼgesa.

³Asogo noʼgukhwe, at hwe Maria en aʼbosu onuk narwastu eʼben op aʼge oʼgo aʼbigat ʼbalogwi aʼge, setengah liter oʼgo ʼbil-ʼbal Yesus oyuk pam egelik pesirik e, at Maria uʼgwarek asu pam horegei. Asogo tegeimu, o ogola ebano eʼben sang-pang egei.

⁴Asogo tegeimu, at Yesus osi iak wogu legesa aʼge mesik onuk Yudas Iskariot, pobuk Yesus woruagoluk yoʼgo laga aʼge ano en e, disogo egei,

⁵“Aʼbosu narwastu ai pam aphwami yabuk eneʼgik agauwa mesigat paget togwiam eneʼgik oʼgo mesik mesik wogontogwi ano aʼge 300 wik-wok e, is aphwami enaʼge erlak aʼge soʼburonto aʼgeat de, aʼbosu almaregei ai nopaget,” oluk, wene ʼbalegei.

⁶Asogo wene ʼbalegei ai re, aphwami enaʼge erlak aʼge ai ede en egei puk. We, at arilak enemin enebe ʼberlegat onouang owi tenak welat, at uʼgwarek paget hisakho hwerlasu laga ai en egei o.

⁷Asogo egeimu, at Yesus en e, disogo moʼgulesi, “Hwe yu aʼbosu egelik nebesi ai paget, wene yagoso puk o. An nebe pobuk watnobuema nebe waromma werak salnobuogoluk aʼbosu egilnobu ʼgelaʼgeat pekharok welagarik egilnebegei yu i o.

⁸Ye, is aphwami enaʼge erlak aʼge ai, his henemin modok wolorogup aʼgeat de, an nak e, his henemin modok weleik erlak o,” oluk moʼgulentesi.

⁹At Yesus en asogo moʼgulentesirik oruakma, aphwami en e, “At Yesus ebe o Betania oruak o,” oluk egesema, is aphwami Yahudi aʼge enebe ʼberlegat enesaʼgo hweligisarik legesa. Asogo legesa ai re, at Yesus nak enil houwogoluk legesa puk. At e, Lazarus werak aʼge Yesus en elalugap tegei ano eminat enil ontouwogoluk legesa.

¹⁰Legesema, is ap Allah eiye aʼge onuelak ʼgaindek en e, disogo egesa, “Lazarus elalugap tegei ai en, aphwami Yahudi aʼge enebe aʼbigat nis neniak ukpoluk enede Yesus ebam heʼberik pogwi o,” oluk, Lazarus ogo woruogoluk waʼgun ʼgabolugu legesayat.

¹¹

¹²Asogo egesarik oruakhwe, loruk oʼgwe, is aphwami en e, “At Yesus o Yerusalem weigoluk wago yo,” oluk egesema, is aphwami aʼbik seni Paskah nouwogoluk noʼgumu odoktigisa aʼge ebano enesaʼgo hweligisarik e,

¹³haʼbu ʼgelaʼge eʼgela ʼbalhegeik woluk e, Yesus ologotma amitmit supsogo liplau wagalat e, disogo egesa, “Nue wa! Nue wa! Nue wa!” oluk u ʼgelaʼge, “Hosana! Nenaik Allah ʼgain Onuk Logo aʼge en nis aphwami Israel aʼge nonue ʼgain perakhobou wagama wegen aʼge yu, at enat obaphobuak o,” [7] oluk weni wetil wetil ʼgwigisa.

¹⁴ʼGogwiam, at Allah en pageat disogo egeimu pelal wogo oruak o, “His aphwami o kota Sion welegep aʼge honogorlok hagup o! Honue ʼgain wam keledai emalik ʼget owan aʼge oʼborl pam huragarik wago etle henil yethemit o!” [8] oluk egei hegitsogoat, Yesus wam keledai emalik ʼget owan aʼge mesik wesirik e, oʼborl pam huragarik ʼgwegei ai o.

¹⁵

¹⁶Asogo ʼgwegei ai erlige re, is at osi iak wogu legesa aʼge ebano en, wene aga aʼge ano pobitu erlak. Aʼgeat de, at Yesus waragama pobuk Allah en elalugap pesirik logo pesimu enede eberigisarik e, disogo egesa, “At ebaget Allah iak pelal wogo oruagat o. Is aphwami en at ebaget tugukhwe nenil hege ano re, wene pelal wogo oruak ai hegitsogoat tigisema o,” oluk enede eberigisa.

¹⁷Ye, at Lazarus werak saligisarikmu no oluk e, at Yesus en worlhesimu ebe elaluk agarik liplau wagama, is aphwami enil hegesa aʼge ebano en, is pema akhit moʼgulontogulat e,

¹⁸“At Yesus ebe pobi tuagoluk elalin aʼge mesik tegei,” oluk egesema aphwami enebe aʼbik enesaʼgo hweligisarikmu no oluk e, Yesus orogolema liplau wegesa ai o.

¹⁹Asogo liplau wegesa ai en, is ap Farisi aʼge en is-is nak wene ogulat e, “Yethemit! Di aphwami yu aphwami ʼberlegat, at eʼberlik modok lagai ai en e, nis en togu lege aʼge ano tugukhwe, neniak lok ema opogu legep a? Modok erlak o,” oluk egesa.

²⁰Is aphwami en seni noʼgulat Allah erliktuogoluk wegesa ai re, is ap Yunani aʼge ado pema enemin wegesa.

²¹Is ap ai wegesarik e, ap Filipus owi o Galilea doʼgo, o kota onuk Betsaida aʼge ʼbegeitik oruakma, eʼbek wegesarik e, disogo moʼgulegisa, “Nue. Nis Yesus eʼbek wom nenagai en wege o,” oluk egesema,

²²at Filipus en wene egesa aʼge ano, at Andreas moʼgulesi lagarik eʼbirek en pobuk Yesus moʼgulegisa.

²³Asogo moʼgulesi legesema, at Yesus en e, disogo moʼgulentesi, “An abat daklau wegi ano, nebe erliknobua ano arat horok lau waga o.

²⁴Ye, is aphwami en, gandum eʼgen owi ʼgwiangma yogo erlakma, aphwami waragai ai ʼgelaʼge, agap naduk aʼge muk otluk ʼget aʼge ʼbaktiso erlak holuk e, eʼgen mesigat owi yorogwi aʼge aiat welema o. Aʼgeat de, owi ai ʼgwiangma yorumu, aphwami waragai ʼgelaʼge, agap naduk aʼge ai muk otluk nak e, pobuk ʼget aʼge ʼbaktagalat eʼgen aʼbigat oso yo,” oluk moʼgulentesi.

²⁵Asogo moʼgulentesirik, wene mesik disogo moʼgulentesi, “At ap sa ede en e, An ʼgwiangma yema nebe nelaluk wolom nagai, oluk epasu holuk e, pobuk ebe elaluk modok wolom aʼge paget e, nal ema o. Aʼgeat de, at ap sa ede en e, ʼGwiangma yema nelaluk wolom e, nebit, oluk epasu holuk e, at ai pobuk nalom erlakma en elaluk modok welema o.

²⁶Ye, at ap sa en an neragam aʼge welat, ede en e, An Yesus ebagerat taga leik o, oluk epasu holuk e, an weleikmu eba neʼbiregat modok wolomogoluk neʼberlik wagalom o. Ye, at ap sa en an nebaget tagalema aʼge ai, naik en at ebe hau doʼgoksogo worua o, oluk niak demat moʼgulhentegis o,” oluk moʼgulentesi.

²⁷At Yesus en wene asogo moʼgulentesirik e, seʼban mesik disogo egei, “Naik o, an di obotut yu obotut haik ai en, yogodak nede modok heseliso ai re, hat en nebe delnebin o, oluk moʼgulhum aʼgeat de, asogo taknobouwagolugat wegirikmu no oluk e, asogo ik erlak o, naik.

²⁸Holuk e, naik, hat honuk logo pagathwerlemen o,” oluk moʼgulosoam e, ʼbogorl pam en iak eselat e, disogo egei, “Arat logo pagathwerlegirik e, pobuk logo pagathwerlaigat o,” oluk moʼgulosoam,

²⁹is aphwami enebe aʼbigat eba edik welegesa aʼge enesaʼgo hweligisarik e, is nin logon en e, “Orlolu iak egei,” oluk ogulat, ye, is nin pema en e, “Erlak o. Is malaikat ʼbogorl pam yoʼgo noʼgwi aʼge mesik en iak pakhesi o,” oluk ogulat egesa.

³⁰Asogo egesema, at Yesus en e, disogo moʼgulentesi. “Iak osoma henesaʼgo hweligep ai re, an nebaget puk. His henebagerat egei o.

³¹Yogodak Allah en, aphwami ʼgwiangma aʼge wene enebam pasulat, noʼgorliselat, tagalat e, at onuk logo ʼgwiangma aʼge ano mukho lebikpasulat, tua ano arat horok lau waga o.

³²An nebe ʼgwiangma yema ediknobouema re, an en aphwami ʼberlegat lis-lis wogonoboluk nuʼgwarek neʼbek onobou weik o,” oluk moʼgulentesi.

³³Asogo moʼgulentesi ai ebe re, “An pobuk aphwami en disogo ediknoboluk watnobua o,” oluk u ʼgelaʼge egei o.

³⁴Asogo egeimu, is aphwami aʼbik ebano en e, disogo moʼgulegisa, “Wene Allah en nenesaʼgo weregei aʼge ai pam e, nis aphwami delnonobuagoluk Allah en ap mesik perakpouma aʼge ai ebe wemarik e, elaluk modok welema o. Oluk egeimu nenesaʼgo hologu lege aʼgeat de, hat en eselat e, An abat daklau wegi ano aphwami en ʼgwiangma yema ediknobouwa o, oluk egen ai re, ap mesik ebe abat daklauma egei ai ebe sa paget egeimu en egen,” oluk moʼgulegisa.

³⁵Asogo moʼgulegisema, at Yesus en e, disogo moʼgulentesi, “An nebe o dakharak enebasu aʼge ano re, we, weiyat nemin wolomul o. Holuk e, at ap sa en o hiktakma lasu holuk e, O ʼgeba lasu legi logwe, eperlak welat lasu ai en e, his lagaiam o hik uano, oluk, an dakharak enebasu aʼge nemin oruakhwe yayat o dakharakma laga lemis o.

³⁶His henebe an en dakharak enebasu aʼge an neiyagai orogup en e, an henemin oruakhwe yayat, nebe pobirak noboluk henede nebam heʼberik pogu lemis o,” oluk moʼgulentesi. Wene arat asogo moʼgulontoluk, is eba onoboluk, at Yesus ebe momu hisaklai laga.

³⁷At Yesus ebe is en pobi tuagoluk enilem elalin aʼge aʼbigat taga laga aʼgeat de, is en, At demat oluk, ebe pobi togu legesa modok erlak.

³⁸Is asogo togu legesa ai re, ap Yesaya Allah iak moʼgulentasu laga aʼge en eselat e, disogo egei, “Allah ʼgain Onuk Logo aʼge, naik wa. Nis en hat hiak moʼgulontogwiam, sa en wene ai demat oluk pobi tegei no. Hat heʼgik anni enil houwagoluk elalin aʼge taga legen ano ebe tagokhwe, sa en il hioluk pobi hebegei no. Erlak o.” [9] oluk egei aʼge pelal wogo oruak ai, demat emagoluk, asogo togu legesa ai o.

³⁹At Allah en disogo tagenebesi ai en e, is asogo demat oluk pobitu erlakma en togu legesa, oluk Yesaya en mesik disogo egei,

⁴⁰“At Allah en e, is enil en pobisogo holuk, onogola eberak poluk enebabut heberl otluk e, an neragam wagaiam, an en is obabenebaikno oluk, an enat is enil hopnik pasulat, enede ʼbugap tagalat, tegis o,” [10] oluk egeimu, Yesaya en pelal wokho pesimu oruak ai o.

⁴¹At Yesaya en wene asogo egei ai re, at Yesus en pobuk tagokhwe ebe erliktua aʼge paget il hesirik en, at obok egei ai o.

⁴²Wene asogo egeimu pelal wogo oruak aʼgeat de, is ap ʼgaindek Yahudi aʼge pema akhit enebe aʼbigat, enede Yesus ebam heʼberik pegesa aʼgeat de, is en e, disogo togu legesa, “Is ap Farisi aʼge en o seʼban ogumu en neneʼgik lisogo lebiknonobouwano,” oluk e, “Nenede Yesus ebam heʼberik pege o,” oluk aphwami enil pam ʼbaksogo ogu legesa erlak.

⁴³Is ai Allah en erligonobuagoluk togu legesa erlak o. We, aphwami en erligonobu enagai en togu legesa ai o.

⁴⁴Is asogo togu legesa aʼgeat de, at Yesus en iak loksogoat disogo moʼgulentesi, “At ap sa en ede an nebam heʼberik pouwa holuk e, an nebam nak heʼberik pouwa puk. Erlak o. We, an peraknobou waga aʼge ano ebam ede heʼberik pouwa o.

⁴⁵Ye, at ap sa en, il an niasu holuk e, an peraknobou waga aʼge anoat il hasu o.

⁴⁶Ye, is aphwami enede an nebam heʼberik pouwa aʼge ʼberlegat e, o hiktakma welemano oluk, o dakharak enebaiogoluk an nebe o dakharak enebasu aʼge ʼgwiangma yema ʼbu egi o.

⁴⁷An ʼgwiangma yema ʼbu egi ai re, aphwami wene enebam paiogoluk ʼbu egi puk. We, enebe delenebiogoluk ʼbu egi ai en e, at ap sa en an niak esaʼgo holholugat de, niak hologo tiso erlak holuk e, an enat wene ebam paik puk. Erlak o.

⁴⁸At e, at ai an nebe woknobu ebirat, ye, niak pobisogo wo ebirat, ai en e, at ai wene ebam pouwa aʼge oruak o. Wene ebam pouwa ai re, o ologun pam degelonobua ai pam, an en wene moʼgulhentasu legi ai pamat wene ebam ema o, oluk asogo moʼgulhentasu legi ai re,

⁴⁹an nogola en ʼgagalogo moʼgulhentasu legi puk. Erlak o. We, an en moʼgulhontouwagoluk an naik peraknobou waga aʼge ano enat, Disogo in, asogo in, oluk moʼgulnosokhweat moʼgulhentasu legi o.

⁵⁰Ye, at en nis nenelaluk welemagoluk wene nenesaʼgo wusogo, Disogo tip, asogo tip, oluk nenesaʼgo wusogo moʼgulnentasu aʼge ai nis nenelaluk welemagoluk moʼgulnentasu, oluk an naluk o. At naik en wene moʼgulnoso aʼgeat moʼgulhentasu legi o,” oluk moʼgulentesi.