Read Silimo Yohanes 14 Bible Online

Yohanes 14 - Silimo bible

Yohanes 14

¹At Yesus en wene asogo moʼgulentesirik e, pobuk e, mesik disogo moʼgulentesi, “Neiyagai. His honogola en e, Eige, oluk henede perik wolorogup o. Henede Allah pam heʼberik pogulat, an nebam ogo heʼberik pogulat, togu lemis o.

²An naik owi pam eba re, o his wolomma eba ebale aʼbik selak oruak o. Asogo erlak wellepma re, an o his wolomma eba degeli laik, oluk wene werakhenebele erlak o.

³An o eba arat laiktik e, his honowi arat degelogo poluk, an weleikmu eba nemin wolomul en oluk, togolik wokhenebil weik o.

⁴Ye, o an laikmu ai, ebela ebe his henalugat o,” oluk moʼgulentesimu,

⁵at Tomas en e, disogo moʼgulesi, “Nue. O hat lagunmu ai nis neneperlakma re, ebela ai noʼgosogo en nenaluk om o,” oluk moʼgulesimu re,

⁶at Yesus en e, disogo moʼgulesi, “Ebela emin, dem wene emin, aphwami waragai aʼge enelalugabenebiso aʼge emin re, an nebeat o. At ap sa en an neʼbek wago erlak holuk, an naik oruakma ʼbekhit ʼgwilo modok mia o,” oluk moʼgulesirik,

⁷is ʼberlegat moʼgulentasulat e, “His an nebe henaluk egep ai re, an naik ogo henaluk emayat o. Henaluk ema ai re, hwerli yogodak hwerli en, at ebe henaluk agalat, henil hogulat, arat hogu legep o,” oluk moʼgulentasu lagama,

⁸at Filipus en e, disogo moʼgulesi, “Nue. Nenil holuk nenede haʼbuksogo welemagoluk, hat haik ai ebe moʼgulnentemen o,” oluk moʼgulesimu,

⁹at Yesus en e, disogo moʼgulesi, “Filipus not o. An o pageat eba enat nenemin welege aʼgeat de, hat en an nebe pobi nobu erlak welegenma hegi o, i a? Ye, ap sa en an il niesi ai re, an naigat il hesi o. Asogo aʼgeat de, hat en, Haik ai moʼgulnentemen o, oluk egen ai re, noʼgosogo oluk en egen.

¹⁰An en naik neʼbirek hwedik, ye, naik en an neʼbirek hwedik, welege ai, hat pobi taga legen erlak a?” oluk moʼgulesirik e, is ʼberlegat moʼgulentasulat e, “An en wene moʼgulhentasu legi ai re, an nogola en ʼgagalogo moʼgulhentasu legi puk. Erlak o. We, an naik neʼbirek hwedik welat, an niak pam en eselat, neʼgik pam en tagalat, taga legi aʼge ai, at uʼgwarek enat tago yo.

¹¹An en e, naik eʼbirek hwedik, ye, naik en e, an neʼbirek hwedik, welege o, egi ai, demat oluk, his pobi tit o. Ai pobitu mia holuk e, an tise legi aʼge ai henil holuk, pobi nebit o.

¹²At ap sa en ede an nebam heʼberik pasu holuk e, an taga legi aʼge ai, at en taga lemayat o. An taga legi ai re, weiyat ʼgelaʼge aʼgeat de, an naik eʼbek laik ai en e, at ap sa en ede an nebam heʼberik welago aʼge ai en ebenagaikmu loksogoat taga lema o, oluk niak demat moʼgulhentegis o.

¹³Ye, at ap sa en, di aʼge yu aʼge an nonuk ʼbalogo Allah ʼgonu moʼguloso holuk e, an omlogo en tagokhwe, is aphwami en naik erliktuagoluk, an en tik o.

¹⁴Asogo tik ai en e, his en di aʼge yu aʼge an nonuk ʼbalogo ʼgonu moʼgulnogu lemis o. Asogo ʼgonu moʼgulnogu lorogup holuk e, an en tik o,” oluk wene weragenebesi.

¹⁵At Yesus en wene asogo weragenebesirik e, wene mesik disogo moʼgulentesi, “His en an henede hwedik holuk e, an en ogo his disogo togu lemis o, asogo togu lemis o, oluk moʼgulhentasu legi aʼge ai togu lorogubat o.

¹⁶Asogo togwiam, his lethentasulat, henemin modok welemagoluk, an en naik ʼgonu moʼguleikmu, at en mesik ʼbelakhonobouma o. At ai ebe re, Allah Arogun dem wene moʼgulhentasu lema aʼge. Asogo henebam ʼbelakhonobou womma, is aphwami ʼgwiangma aʼge en, at ai ebe eneperlagat o. Ye, ebe enil houwa erlagat, ai en e, ebe wo miayat o. Asogo aʼgeat de, his nak e, at ebe henemin welat, honogola modok welema ai en e, at ebe henaluk wolorogup o.

¹⁸An ogo re, his henebe malik seʼbin aʼge ʼgelaʼge ukhonoboluk laik erlak o. We, pobuk togolik hentau weigat o.

¹⁹Agauwa wei nak weleiktik e, aphwami ʼgiwangma aʼge enil modok niouwa erlak aʼgeat de, his nak e, an nalugat weleik, ye, his pobuk henalugat wolorogup ai en e, henil niagup o.

²⁰Asogo henil niagup ai erlige re, an naik neʼbirek hwedik welege, ye, his an nemin hwedik, ye, an his henemin hwedik welege aʼge ai, henaluk ema o.

²¹At ap sa en, an en, disogo taga lomup, asogo taga lomup, oluk moʼgulhentegis aʼge ai, niak hwelakpoluk tago holuk e, an nebe ede hwedik aʼge at ebe aiat o. Ye, naik en ogo at ai ede hwedigat o. Ye, an en at ai nede hwedik welat, nebe pobi nobuagoluk moʼguleik o,” oluk moʼgulentesimu,

²²ap Yudas Iskariot ano puk. At e, Yudas ap muat aʼge mesik en e, disogo moʼgulesi, “Nue. Hat hebe pobi hobuagoluk, aphwami ʼberlegat moʼgulonto erlakma en, nis nak moʼgulnentagun ai nopaget en,” oluk moʼgulese lagama,

²³at Yesus en e, disogo moʼgulentesi, “At ap sa en an nebe ede hwedik holuk e, an niak hwelakpoluk taga lema o. An niak hwelakpoluk tagalemma re, naik en at ai ede hwedik welema o. Asogo welat, an naik emin ap ai eʼbek wotluk, at emin modok hwedigat wolomul o.

²⁴Ye, at ap sa en, an nebe ede hwedik erlak holuk e, an niak hwelakpoluk tiso erlak ebe aiat o. An niak his hologu legep ai re, an niak aʼge puk. We, an naik peraknobou waga aʼge ano iagat o.

²⁵Wene ai an nebe his henemin welat, moʼgulhentasu legi. Aʼgeat de, an naik en at Arogun his lethentasu lemagoluk, an nonuk pam ʼbelakpou wemma re, at en di wene yu wene ʼberlegat moʼgulhentasulat, an en moʼgulhentasu legi aʼge ai ʼberlegat honogola ebethentasulat, taga lema o.

²⁷Holuk e, his henede haʼbuksogo welemagoluk an nede haʼbuksogo welago aʼge wokhontoluk laik o. Ai re, aphwami ʼgwiangma aʼge en wogontogwi ai ʼgelaʼge wokhentaik erlak ai en e, henede perik welat honogorlok hagup o.

²⁸An laik aʼgeat de, pobuk togolik heneʼbek weik o, oluk moʼgulhentegis ano arat henesaʼgo hweligep ani o. An nebe henede hwedik wellepma re, an naik ebe logo aʼge, ye, an nebe mia ai en e, an naik eʼbek laik ai paget honogola henagai helep o.

²⁹Wene ʼberlegat moʼgulhentegis ai ebe demat ago holuk, his en e, Wene moʼgulnentesi aʼge ano arat demat aga o, oluk pobirak poluk, henede an nebam heʼberik pagup en oluk, wene ai ebe owan ago erlak oruakhwe, obok naduk moʼgulhentegis o.

³⁰Aphwami ʼgwiangma aʼge onue ʼgain ano ebe wago ai en e, an wene aʼbigat moʼgulhentaik erlak o. At ai wema aʼgeat de, an at eʼgik pam welegi erlak o.

³¹Asogo aʼgeat de, an naik nede hwedik welegi ai aphwami ʼgwiangma aʼge enaluk emagoluk, an naik en nesaʼgo wusogo moʼgulnoso aʼgeat taga legi o,” oluk moʼgulesirik e, “Nosi o. Lul en inemis o,” oluk moʼgulentesi.