Read Silimo Yohanes 15 Bible Online

Yohanes 15 - Silimo bible

Yohanes 15

¹At Yesus en wene asogo moʼgulentesirik e, pobuk mesik moʼgulentesi, “E anggur edip demat aʼge re, an nebeat o. Ye, ebe eiye re, an naigat o.

²E edeʼbi ebe loʼbok, an nebam hwedik welat eʼgen oso erlak holuk, daksogo hwikhaik o. Aʼgeat de, e edeʼbi ebe loʼbok eʼgen oso holuk e, logon eminsogoat ese lemagoluk emening ʼbalogo ʼbogun taga leik o.

³Ye, his e, an en wene moʼgulhentasu legi ai en e, henemening ʼgelaʼge ʼbalogo ʼbogunsogo henebesimu welegep o.

⁴Asogo henemening ʼgelaʼge ʼbelak welegep ai re, his an nemin hwedik, ye, an his henemin hwedik, wolomok o. E edeʼbi ai re, ebe pam hwedik erlak holuk, eʼgen u re, modok mia o. We, e ebe pam hwedik holuk, eʼgen oso ai ʼgelaʼge, his an nemin hwedik wolorogup erlak holuk e, op aʼge tu re, mia o. We, an nebe pam hwedik holugat, op tugulom o.

⁵E ebe anat o. Ye, e edeʼbi hisat o. His an nemin hwedik erlak, we, ʼbelak welat, di aʼge yu aʼge mesik tu re, modok mia ai en e, at ap sa en an neʼbirek hwedik, ye, an at eʼbirek hwedik, wolomul holuk e, at ai eʼgen aʼbik u ʼgelaʼgeat, op aʼge loksogo tua o.

⁶Ye, e edeʼbi ʼbalogo hwikhogwi aʼge ʼbuk agoam e, aphwami en odoksogo poluk odoukmu hwikhai lagaiam odouk nasu ai ʼgelaʼge, at ap sa en an neʼbirek hwedik erlak, ʼbelak oruak holuk e, asogoat daksogo hwikhouema ebe odouk nouwa o.

⁷His an nemin hwedik welat niak honogola oruak holuk e, we, noʼgwe aʼge his henagai aʼge an ʼgonu moʼgulnorogup holuk wokhentaikmu hwerlagubat o.

⁸His heneʼgen aʼbik ikho ʼgelaʼge op aʼge loksogo togup holuk, aphwami en an naik erliktua o. His henebe nosi demat aʼge niak wogu legep aʼge welat, asogoat togu lorogup o,” oluk moʼgulentesi.

⁹At Yesus en wene asogo moʼgulentesirik mesik disogo moʼgulentesi, “Naik en an ede hwedik welago ai ʼgelaʼge, an en his nede hwedik welegi o. Asogo his nede hwedik weleik en e, an nemin hwedigat wolomup o.

¹⁰Ye, an naik en, Disogo tip, asogo tip, oluk nesaʼgo wusogo moʼgulnesi aʼge ai, an en at iak hologo tisokhwe, at en an ede hwedik welago ai ʼgelaʼge, his ogo asogoat, an en his henesaʼgo wusogo, Disogo tip, asogo tip, oluk moʼgulhentasu legi aʼge ai, his en an niak hologo togu lorogup holuk e, an en ogo his nede hwedik weleik o.

¹¹Ye, an nogola nagai hasu legi ai ʼgelaʼge, his honogola henagai hogulat, pobuk loksogo henagai hogu lemagoluk, wene ai ʼberlegat moʼgulhentegis o.

¹²His en togu lemagoluk, wene ebe yuat henesaʼgo wusogo moʼgulhentaik o, An en his nede hwedik welegi ai ʼgelaʼge, his en asogoat his-hisat nede-hede welemagoluk moʼgulhentegis o.

¹³Is pema akhit enarilak enede hwedik e, mia ʼgelaʼge aʼgeat de, ap mesik arilak ede hwedik en, is enebaget warema ai nak e, modok logo yo.

¹⁴Ye, an en henesaʼgo wusogo, Disogo tip, asogo tip, oluk moʼgulhentasu legi aʼge ai, niak hologo togu lorogup holuk e, his an narilagat o.

¹⁵Is aphwami eneragam aʼge ai, onuelak togwi aʼge eneperlak ai en e, an en hwerli yogodak yu pam en, His an neragam aʼge, oluk moʼgulhentaik erlak o. Di wene yu wene naik en moʼgulnesi aʼge ʼberlegat moʼgulhentasu legi ai en e, Narilak, oluk moʼgulhentasu legi ai o.

¹⁶His en an poliknebegep puk. We, an en his polikhenebegi ai, e eʼgen egesiso ai ʼgelaʼge, modok modok welema aʼge ti lagup en oluk, henebe polikhonoboluk edikhenebegi. Ai en e, we, noʼgwe, his henagai aʼge an nonuk ʼbalogo naik ʼgonu moʼgulorogup holuk e, at en wokhontouwayat o.

¹⁷Ye, an en wene moʼgulhentegis ai, ebe logo re, His-his nede-hede wolomup o, oluk moʼgulhentegis aiat o,” oluk moʼgulentesi.

¹⁸At Yesus en wene asogo moʼgulentesirik, pobuk mesik disogo moʼgulentesi, “Is aphwami ʼgwiangma aʼge en modok enebiraphonobogwi holuk e, naduk an enebirapnobogu legesa ano henede eberip o.

¹⁹His henebe aphwami ʼgwiangma aʼge wellepma re, is aphwami ʼgwiangma aʼge en e, Is e, nis nonosi, oluk enede hwedigaphenebelip aʼgeat de, his henebe is aphwami ʼgwiangma aʼge oruakma polikhenebegirik wokhenebegismu re, henebe is aʼge welegep puk. Ai en e, modok enebiraphonobogwi o.

²⁰Ye, ap ʼgain mesik eragam aʼge ʼgelaʼge oruakhwe, at eragam aʼge ano logo ʼgelaʼge welago erlak o, oluk moʼgulhentegis ano honogola eberit o. Is en an wiagapnobogwi holuk e, his asogoat wiagaphonobuayat o. Ye, is en an niak hologo togwi holuk e, his heniak hologo tuayat o.

²¹Asogo aʼgeat de, is en, at an peraknobou waga aʼge ano ebe eneperlak ai en e, Is yu at osi, oluk, wene moʼgulhentegis ai ʼberlegat takhonobouwa o.

²²An wegirik, wene ʼberlek ai is moʼgulonto erlakma en wellema re, is wiak oluk wene enebam poluk wellep erlak ani o. Aʼgeat de, yogodak, wene moʼgulentau wegi ai en e, is en, An wiak tu erlak, oluk, wene enebam aʼge noʼgorlu miayat aga o.

²³At ap sa en apseri weraknebasu holuk e, an naik ebe at apserirak pasu o.

²⁴Is aphwami pema akhit en togwi modok erlak aʼge, di wene yu wene enilem taga legi ano tagalle erlakma re, Is wiak, oluk eli erlak o. Asogo aʼgeat de, an en wene ai ʼberlegat tisokhwe enil niegesarik en, an naik neʼbirek modok enapserirak nonobogwi o.

²⁵Asogo aʼgeat de, Allah en, Disogo tip, asogo tip, oluk enesaʼgo weregei wene ano pam, iak disogo pelal wogo oruak, Wene edip erlakmayat, is en an enapseriapnebegesa, [12] oluk egeimu, pelal wogo pegesa aʼge ai demat emagoluk asogoat togwi o.

²⁶His lethentasu lemagoluk Allah Arogun dem wene moʼgulontouwagoluk wago aʼge ai, an naik oruakma en his heneʼbek perakpou wagoam e, at en an nobok ʼbaksogo moʼgulhentasu lema o.

²⁷At en an nobok asogo osokhwe, his ogo re, an his henemin naduk nadugat welege ai en e, his en an nobok ʼbaksogo moʼgulontogu lorogubat o,” oluk moʼgulentesi.