Read Silimo Yohanes 16 Bible Online

Yohanes 16 - Silimo bible

Yohanes 16

¹At Yesus en wene asogo moʼgulentesirik e, pobuk mesik disogo moʼgulentesi, “His henede ʼbuk otluk, At nenebit, oluk, an nebe ʼgoboksogo uknebagupno oluk, wene ai ʼberlegat moʼgulhentasu legi o.

²Aphwami o seʼban ogumu en his heneʼgik lisogo lebikhonobouwa ani o. Ye, pobuk is aphwami his wathonobua aʼge enebe loʼbok onogola en e, Allah paget obat warenebige, oluk, ua aʼge oruagat ani o.

³Is en asogo takhonobouwa ai re, an naik emin nenebe eneperlak ai enat takhonobouwa o.

⁴Asogo takhonobogwi holuk e, honogola en, Wene yu, at en nadugat moʼgulnentesi ano, arat taknobogwi yu i o, oluk honogola oboruagoluk, wene ai ʼberlegat moʼgulhentegis ani o,” oluk moʼgulentesi. At Yesus en wene asogo moʼgulentesirik e, pobuk mesik disogo moʼgulentesi, “An his henemin yema welege ai en e, wene yu ʼberlegat his yoʼgo henebasulat moʼgulhonto erlakma en welegi aʼgeat de,

⁵pobuk, at an nebe peraknobou aga aʼge ano eʼbek laik aʼge re, his mesik en e, Nue. Hat o ʼgeba lagun, oluk nebam hin wokniogu legep modok erlak o.

⁶An en wene moʼgulhentegis ai en, his honogola modok wiak aga aʼgeat de,

⁷an en wene ebe ʼbaksogo moʼgulhentaik o. An legi ho puk holuk e, at his lethentasulom aʼge ai heneʼbek welep erlak aʼgeat de, an laik ai en, at ai an en heneʼbek perakpou weik o. Holuk e, an laik ai en, his henebaget op modok ema o, oluk demat moʼgulhentegis o.

⁸At ai ebe wotluk e, is aphwami ʼgwiangma aʼge en togwi aʼge paget ʼbaksogo moʼgulentasulat, His henede oborogu legep aʼge ai re, wiak togwi aʼge paget emin, ʼbekhitsogo tugulom aʼge paget emin, Allah en wene enebam pasulat, noʼgorliselat, tiso aʼge paget emin, henede wiak oborogu legep o, oluk wene ʼbaksogo moʼgulentauma o.

⁹At wotluk, His en henede at Yesus ebam heʼberik po erlak welegep ai dagan togu legep o, oluk ʼbaksogo moʼgulentauma.

¹⁰Ye, mesik e, an naik oruakma lasuam, his henil niagup modok erlak ai en e, at lethentasu lema aʼge ai wemarik e, wene hegitsogo tugulom aʼge paget ʼbaksogo moʼgulhentauma o.

¹¹Ye, mesik e, Allah en aphwami ʼgwiangma aʼge onue ʼgain ano wene ebam poluk mabenap pesimu oruak ai en, at lethentasu lema aʼge ai wemarik e, Allah en wene enebam pasulat, noʼgorliselat, tago ai paget ʼbaksogo moʼgulentau wemayat o.

¹²An en wene aʼbigat moʼgulhonto aʼgeat de, his wo aʼge henebabut mia aga o.

¹³Asogo aʼgeat de, Allah Arogun, dem wene nak oso aʼge ai wemarik e, ebela eneperlakma enaluk aʼge yen moʼgulontogwi ai ʼgelaʼge, dem wene ʼberlegat pobi togup en moʼgulhentasu lema o. Asogo moʼgulhentasu lema ai re, wene at ogola en ʼgagalogo ese lema erlak o. We, at esaʼgo hweliso aʼge nak eselat e, pobuk ema aʼge moʼgulhentasu lema o.

¹⁴An niak moʼgulhentasu legi aʼge ai, at en wik-wok e, his moʼgulhentasu lema ai, an logo nebasu lema o.

¹⁵Di aʼge yu aʼge naik en aʼge ʼberlegat e, an en aʼge ai en e, Allah Arogun ai an niak wik-wok, his moʼgulhentasu lema o, oluk moʼgulhentegis ai o,” oluk moʼgulentesi.

¹⁶At Yesus en wene asogo moʼgulentesirik e, mesik disogo moʼgulentesi, “Agauwa weiyat weleiktik en, an nebe henil niagup erlak o. Asogo henil nio erlakma en agauwa weiyat logon weleiktik en, pobuk henil niagup ani o,” oluk moʼgulentesimu enesaʼgo hweligisarik e,

¹⁷at osi iak wogu legesa aʼge ebano pema akhit en, is-is nak en ogulat e, disogo egesa, “At en e, Agauwa weiyat weleiktik en, an nebe henil niagup erlak o. Asogo henil nio erlakma en, agauwa weiyat logon weleiktik en, pobuk henil niagup o, eselat, An naik eʼbek laik, eselat, egei ai, wene ebe nopaget egei epegep.

¹⁸An agauwa we, wei nak weleik, oluk egei ai, ebe nopaget en moʼgulnentesi epegep. Nis e, pobi tige modok erlak o,” oluk egesa.

¹⁹Asogo egesema, at Yesus en e, “Is yu wene an nebam hin wokniouwogoluk ogwi hegi,” oluk enak aʼge pobirak enebesirik e, disogo moʼgulentesi, “Narilak o. Agauwa wei nak wolomultik en e, an nebe henil nio erlakma en wolorogup ani o. Ye, agauwa weiyat logon woloroguptik en pobuk an nebe henil niagup ani o, oluk moʼgulhentegis ai paget his-his ogu legep a?

²⁰Pobuk his honogola en ngi togwi nge togwi wolorogup aʼgeat de, is aphwami ʼgwiangma aʼge onogola enagai houwa o. Asogo aʼgeat de, his honogola wiak wolorogup aʼge ai, pobuk op agoam honogola henagai aʼbik hagup o, oluk demat moʼgulhentegis o.

²¹Hwe mesik emalik doru hegitsogo nonouk wiaksogo nonouk hegitsogoat tu nonouk aʼbik tiso aʼgeat de, emalik ano arat dakhorloluk e, Nemalik arat dakhwerlegi o, oluk ogola agai aʼbik hasulat e, nonouk aʼbik tiso aʼge ano meme oso yo.

²²His asogoat. Yogodak honogola wiak welegep aʼgeat de, pobuk an nemin sarlok tul ai erlige, honogola henagai aʼbik hagup ani o. Ye, his honogola henagai ai, is aphwami pema en erlagap pouwa modok erlak o.

²³Hwerli ai hwerli arat lai lotluk e, his en wene mesik an nebam hin wokniagup modok erlak o. Holuk, an en wene mesik moʼgulhentaik o, His en di aʼge yu aʼge an nonuk ʼbalogo naik ʼgonu moʼgulorogup holuk e, at en wokhontouwayat o, oluk demat moʼgulhentegis.

²⁴O naduk hwerli en yogodak hwerli, an nonuk ʼbalogo di aʼge yu aʼge logon ʼgonu ogwi erlak welegepma o. Holuk e, honogola henagai aʼbik hagup en e, at ʼgonu moʼgulogu lemis o. Asogo moʼgulogulomma, wokhentasu lemayat o,” oluk moʼgulentesi.

²⁵At Yesus en wene asogo moʼgulentesirik mesik disogo moʼgulentesi, “Wene ʼberlegat eba re, ebam elitsogo nak moʼgulhentasu legi aʼgeat de, pobuk naik obok eselat, ebam elitsogo moʼgulhentaik erlak o. We, ʼbaksogo nak moʼgulhentaik erlige oruagat o.

²⁶His en e, Yesus ebe Allah oruakma en waga aʼge, oluk, pobi nobugulat, henedeapnebigep ai re, naik en his ogo edeaphenebasuat o. His henebaget an en naik ʼgonu moʼguleik oluk moʼgulhentasu legi erlak o. We, o ai erlige re, his honuʼgwarek en an nonuk ʼbalogo naik ʼgonu moʼgulorogup o.

²⁸An nebe Allah oruakma en aphwami ʼgwiangma aʼge eneʼbek ʼbu egi aʼgeat de, yogodak is ʼgwiangma yema onoboluk togolik naik eʼbek ligegeik o,” oluk moʼgulentesimu

²⁹at Yesus osi iak wogu legesa aʼge ebano en e, disogo moʼgulegisa, “Nue. Yogodak hat en wene ebam elitsogo moʼgulnonto erlak o. We, ʼbaksogo nak moʼgulnentigen o.

³⁰Hat e, aphwami logon en wene mesik hin wokhio erlak holuk e, wene ebe heperlak puk o. Hat di wene yu wene ʼberlek haluk nak hiege o. Hat hebe demat Allah en perakhobou wagama wegen o, oluk yogodak en pobi hebige o,” oluk moʼgulegisa.

³¹Asogo moʼgulegisema, at Yesus en e, “Yogodak en de, arat pobi nebigep a?” oluk moʼgulentesi.

³²Asogo moʼgulentesirik e, mesik disogo moʼgulentesi, “His ʼberlegat, ʼbogulogo lebikhonoboma, an nematek nak uknoboluk honowi loʼgwe loʼbok ʼbogologup ano owan welege aʼgeat de, yogodak arat lau waga o. His asogo ʼbogologupmu, an naik eʼbirek wolomul ai paget e, nematek nak weleik erlak o, oluk demat moʼgulhentegis o,” oluk moʼgulentesirik e,

³³mesik disogo moʼgulentesi, “His an nemin hwedik welat, henede haʼbuksogo welemak oluk, wene ai ʼberlegat moʼgulhentegis o. His aphwami ʼgwiangma aʼge di obotut yu obotut takhonobogu lema o. Aʼge re, aphwami ʼgwiangma aʼge arat mabenabenebegimu ai re, honogorlok erlaksogo welemis o,” oluk moʼgulentesi o.