Read Silimo Yohanes 18 Bible Online

Yohanes 18 - Silimo bible

Yohanes 18

¹At Yesus en seʼban asogo arat oluk e, at osi iak wogu legesa aʼge ebano at ebe emin liplai legesarik, ik onuk Kidron ik etle akhit yabuk e eʼgen noʼgwi aʼge owi yogoʼgwe libegesarik osi eneminat eba ʼgwigisa.

²At Yesus osi iak wogu legesa aʼge ebano agauwa pobuk naduk eba odokti laga legesarikmu no oluk e, at Yudas Yesus woruagoluk yoʼgo laga aʼge ano yabuk ano aluk welaga.

³Asogo alukmu no oluk e, is ap Allah eiye aʼge onuelak ʼgaindek emin, is ap Farisi aʼge emin en e, onosi Allah owi ʼgwelakharok welegesa aʼge yoʼgo onoboluk peragenebegesema, at Yudas e tentara aʼge esan logoak mesik enemin wogonoboluk, segen emin, waʼgun emin, di esaga yu esaga emin, woluk eba legesa.

⁴Legesema, at Yesus en, “An nebe pobuk disogo taknobouwa o,” oluk ʼberlegat aluk welaga ai en e, eneʼbek wagarik e, disogo moʼgulentesi, “His sa palo til wegep,” oluk moʼgulentasu lagama,

⁵is en e, “Yesus owi Nazaret aʼge ano palo til wege o,” oluk mo gulegisema, at Yesus en e, “Ai nebe anat o,” oluk moʼgulentesi. Asogo osokhwe, at Yudas Yesus woruagoluk yoʼgo laga aʼge ano eneragam edik welaga.

⁶Edik oruakhwe, at Yesus en e, “Ai nebe anat o,” oluk moʼgulentasukhwe, is ebano maming hogulat e, onoʼborlhan en erleʼgalogo ʼbou til-til laga legesa.

⁷Asogo lagaihwe, at Yesus en pobuk mesik emin disogo moʼgulentesi, “His sa palo til wegep,” oluk moʼgulentesimu, is en e, “Yesus owi Nazaret aʼge ano palo til wege o,” oluk moʼgulegisema,

⁸at Yesus en e, disogo moʼgulentesi, “Ai nebe anat o, oluk nadugat moʼgulhentegis ebano re. His anat palo nebil wegep holuk e, an nosi yema louwagoluk ugenebemit o,” oluk moʼgulentesi.

⁹Asogo moʼgulentesi ai re, owan lailo erlak oruakhwe nadugat, at Yesus en Allah moʼguleselat e, “Naik Allah o. Aphwami hat en woknigen aʼge ebano mesik nalom erlak o,” oluk moʼgulesi aʼge ano iak demat emagoluk asogo moʼgulentesi ai o.

¹⁰Asogo moʼgulentasukhwe, at Simon onuk mesik Petrus ano eʼgarok ai erlige tenakho oruakma lisogo wesirik e, ap ʼgain Allah eiye aʼge eragam aʼge onuk Malkus ai weriogoluk lelhesi ʼgal e, esaʼgo ʼbekhit akhit sebasogo ʼbo pesi.

¹¹Asogo ʼbo pesimu, at Yesus en disogo moʼgulesi, “Petrus. Heʼgarok hauwak oʼgwe ebalema ʼgwelakpemen o. Aphwami en ik naʼgogo wogontogwiam, noʼgwi ai ʼgelaʼge, an naik en, Hat di obotut yu obotut takhobouwa o, oluk moʼgulnesi aʼge ai hegitsogo taknobo mia epegen? Erlak o. Taknoboat o,” oluk moʼgulesi.

¹²Wene asogo oluk egeimu re, is ap tentara aʼge esan logolak ebano onue ʼgain mesik emin, ye, is ap Yahudi aʼge Allah owi ʼgwelakharok welagai aʼge emin, enemin en e, at Yesus ebe tenakpoluk, eʼgik herle werigisa.

¹³Eʼgik herle wusogo naduk naduk ap Hanas eʼbek woluk wegesa. Ap Hanas ai ebe re, is ap Allah eiye aʼge onue ʼgain tahun ai pam welaga aʼge onuk Kayafas ai iemal.

¹⁴At Kayafas ai ebe re, nadugat is ap Yahudi aʼge moʼgulentasulat e, “We, nis ʼberlegat nenebaget ap mesigat aʼge mesik warom ai re, obat o,” oluk enesaʼgo weregei aʼge anoat o.

¹⁵Asogo woluk wegesema, at Simon onuk mesik Petrus ano en, at Yesus osi iak wogu legesa aʼge mesik eʼbirek Yesus eʼberlik wegesa. Asogo wegesarik, at Petrus nak e, leget oʼborl akhit ebela pam de, ʼgodukmu oruakhwe, at Yesus ot mesik ai re, ap Allah eiye aʼge onue ʼgain ano en ebe alukmu no oluk e, at Yesus eʼbirek ap ʼgain ai owi selimu ʼgwigisa. ʼGwigisarik e, at Yesus ot, ap Allah eiye aʼge onue ʼgain en ebe aluk aʼge ano, pobuk togolik liplau waga. Liplau waga ʼgal, hwele mesik aphwami libom ʼguom tugumu ʼgodukmu ʼgagalak welago aʼge ano en eʼbirek weneane egesarik e, Petrus woluk ʼgwegei.

¹⁶

¹⁷Asogo woluk ʼgwisoma, at hwele ano ʼgoduk libom ʼguom tugumu ʼgagalak welago aʼge ano en Petrus moʼguleselat e, “Hat e, at yu osi iak wogwi aʼge ebano erlak no? At osi aʼgeat o,” oluk moʼgulesimu, at Petrus en e, “An e, erlak o,” egei.

¹⁸Asogo egeitik oruakhwe, o ai erlige re, sogwei aʼbik en e, is eneragam aʼge emin, is ap Allah owi ʼgwelakharok welagai aʼge emin, odouk muʼgalegisarik e, edik welat sogwei oroʼgugumu re, at Petrus eneʼbek lagarik eneminat sogwei oroʼgogulat edik welegesa.

¹⁹Asogo sogwei oroʼgugukhwe, ap Allah eiye aʼge onue ʼgain ano en, at Yesus ebam hin wokhasulat e, “Hat hosi hiak wogwi aʼge ai salak de. Ye, hat hiak moʼgulentasu legen ai, ʼgesogo no,” oluk ebam hin wokhesimu,

²⁰at Yesus en disogo moʼgulesi, “An en aphwami ʼgwiangma aʼge wene moʼgulentasulat e, ʼbaksogo nak moʼgulentasu legi o. O is aphwami Yahudi aʼge ʼberlegat odoktak poluk seʼban ogwiʼgwe emin, Allah owi werikmu emin, eba nak moʼgulentasu legi o. Wene hisakho mesik ese legi modok erlagat aʼgeat de,

²¹an nebam hin wokniasu legen ai nopaget. An en wene moʼgulentasuam is arat enesaʼgo holugumu re, an en wene moʼgulentasu legi aʼge ai, is enalugat oruak o. Holuk e, is enebam hin wogentemen o,” oluk osoam e,

²²ap Allah owi ʼgwelakharok welagai aʼge ebano mesik ebe eria edik welat e, at Yesus eʼgik dagosadak weriselat, disogo moʼgulesi, “Ap Allah eiye aʼge onue ʼgain yu en moʼgulhosoam, hat en wene asogo moʼgulom no? Mia o,” oluk moʼgulese lagama,

²³at Yesus en e, disogo moʼgulesi, “An niak dagansogo egi holuk, wene dagansogo egi aʼge ʼbaksogo moʼgulnorogunmu re! Niak hegit egi aʼge pagerat, dagosadak watnebigen ai, nopaget,” oluk moʼgulesimu,

²⁴pobuk at Hanas en, at Yesus eʼgik herle wusogoat, at Kayafas ebe ap Allah eiye aʼge onue ʼgain ano eʼbek woluk wemagoluk perakpou waga.

²⁵Asogo yoʼgo perakpou wagama wegesema re, at Simon onuk mesik Petrus ano odouk muʼgelakma erianoat sogwei ereʼgiselat edik oruakma, is aphwami en e, disogo moʼgulegisa, “Hat e, at osi iak wogwi aʼge ebano erlak no? Hat at osi aʼgeat o,” oluk moʼgulegisema, at en e, “An e, erlak o,” oluk elabe tegei.

²⁶Elabe tegeimu re, ap Allah eiye onue ʼgain aʼge ano eragam aʼge mesik, at Petrus en esaʼgo saboksogo ʼbo pesi aʼge ano are mesik en e, “Hat e, hebe at emin yabuk e eʼgen owi yogoma oruakma nil hiegi ebano re,” oluk moʼgulesimu,

²⁷at Petrus en e, “Erlak o,” oluk elabe tegei. Asogo elabe tagokhwe erianoat sue ayam iak egei.

²⁸Asogo toluk, sue iak egeimu hubet siaksogo at Yesus ap ʼgain Kayafas oruakma en, o wene enebam pogulat, noʼgorlogulat, tugumu ebano woluk wegesa. Woluk wegesarik e, Yesus nak olema ʼgwelakpegesarik, “Nis seni Paskah ano aʼge noʼgulomma re, nonomuat ʼgumu re, nis wiak omulno,” oluk e, o wene enebam pogulat, noʼgorlogulat, tugumu eba ʼgwilo erlakma en, we, o selimu mo egesa.

²⁹O selimu mo egesema re, at Pilatus eneʼbek liplau wagarik e, disogo moʼgulentesi, “Malik logwe. Ap yu wene noʼgosogo ebam pegeptik en woluk wegep,” oluk moʼgulentesimu,

³⁰is en e, disogo moʼgulegisa, “At yu wiak telip erlak wellepma re, hat heʼbek woluk wolo erlagat o,” oluk moʼgulegisema,

³¹at Pilatus en e, disogo moʼgulentesi, “Ap yu woluk laguptik e, his en togwi hegitsogoat honuʼgwarek en wene ebam pogulat, noʼgorlogulat, tip o,” oluk moʼgulentesimu, is ap Yahudi aʼge en e, disogo moʼgulegisa, “Nis nonomu en wene enebam poluk waronobu mia ani o,” oluk moʼgulegisa.

³²Eniak asogo moʼgulegisa ai re, at Yesus en wene pageat moʼgulentasulat, “An disogo taknoboluk watnobua ani o,” oluk ese laga aʼge ano, is asogo tigisema, at iak ano demat aga o.

³³Is Yahudi aʼge en asogo moʼgulegisema, at Pilatus o wene enebam pasulat, noʼgorliselat, tagoma ano togolik ʼgwegeitik, at Yesus ebam iak pakholuk e, disogo moʼgulesi, “Aphwami Yahudi aʼge onue ʼgain onuk logo aʼge ano harat a?” oluk moʼgulesimu,

³⁴at Yesus en e, disogo moʼgulesi, “Hat en wene an nobok egen ai re, hat hogola en ʼgagalogo egen a? At e, is aphwami pema en moʼgulhegisema en de, egen a,” oluk moʼgulesimu,

³⁵at Pilatus en e, disogo moʼgulesi, “Wene moʼgulnigen ai re, an nebe ap Yahudi aʼge de, moʼgulnigen a? Is ap huʼgwarek hue hari emin, ap Allah eiye aʼge onuelak ʼgaindek emin, enemin en, hat hebe an woknegisa ai re, hat noʼgosogo tigenma o,” oluk moʼgulesimu,

³⁶at Yesus en e, disogo moʼgulesi, “An en aphwami neragam enebasu legi ai re, aphwami ʼgwiangma aʼge en eneragam onobogwi ai ʼgelaʼge puk. Erlak o. We, an neragam enebasu legi ai re, ʼgwiangma aʼge wellepma re, nosi en an nebe is ap Yahudi aʼge wogonto mia o, oluk, nebe erlele woknobuogoluk emin ebelip aʼgeat de, an neragam enebasu legi ai ʼgwiangma aʼge erlak ai en e, erlele woknobua erlak o,” oluk moʼgulesimu,

³⁷at Pilatus en e, “Holuk e, hat demat ʼgain honuk logo aʼge hwi a,” oluk ese lagama, at Yesus en e, disogo moʼgulesi, “An nebe ʼgain nonuk logo aʼge hat egen aiat o. Ai pagerat an en dem wene obok ʼbaksogo moʼgulentasu leigoluk nebe ʼgwiangma yema dakla ʼbu egi o. Aphwami wene dem wene ai oruak akhit lai legesa aʼge enebe loʼbok an niak enesaʼgo hologwi o,” oluk moʼgulese lagama,

³⁸at Pilatus en e, “Wene dem wene ai no wene no,” oluk moʼgulesi. Wene asogo moʼgulesirik e, at Pilatus pobuk ap Yahudi aʼge eneʼbek liplau wagarik e, disogo moʼgulentesi, “An en at wene ebam pegep aʼge ʼbeleʼgegis aʼge re, at wiak mesik tegeimu hegi modok erlak o.

³⁹Asogo aʼgeat de, his en seni Paskah noʼgulat, ap herle werak aʼge mesik herle hebilhontouwagoluk ʼgonu moʼgulnogwiam, hebilhentasu legi ano en e, his ap Yahudi aʼge honue ʼgain onuk logo aʼge yu herle hebilhonto henagai ya? Henebit a,” oluk moʼgulentesimu,

⁴⁰is en eniak ʼberaksogo aʼbigat ogulat e, disogo moʼgulegisa, “Erlak o. At ai herle hebelogup erlak o! We, at Barabas aiat herle hebilnentemen o!” oluk moʼgulegisa. At Barabas ai re, ebabut wiak welat yogorlia wasu laga aʼge paget en de, egesa o.