Read Silimo Yohanes 2 Bible Online

Yohanes 2 - Silimo bible

Yohanes 2

¹Asogo togu legesarik, nogo agauwa ʼbiren oluk henaganak aʼge en e, o Galilea o kota mesik onuk Kana ai, ap mesik ugwe wogogukhwe Yesus ia yoʼgo pegesema eba emin welegesa.

²Eba oruakma, at Yesus osi iak wogu legesa aʼge enemin ogo re, yoʼgo enebegesema legesarik welegesayat.

³Legesarik oruakhwe, anggur weʼgen aʼbosu neʼgak aʼge ʼberlegat erlak agama re, at Yesus ia enat disogo moʼgulesi, “Is anggur eʼgen aʼbosu neʼgak aʼge erlak agama oruak o,” oluk moʼgulesi.

⁴Asogo moʼgulesimu, at Yesus en e, disogo moʼgulesi, “Eige. Nia. An en tu aʼge owan hegit lau wom erlak oruakhweat de, hat en an nopaget moʼgulnigen,” oluk moʼgulesi.

⁵Asogo moʼgulesi aʼgeat de, at ia en, is hwe wogegisa eiye eneragam aʼge disogo moʼgulentesi, “At en, Disogo tit, oso holuk e, at en ua aʼge aiat tit o,” oluk moʼgulentesi.

⁶Is aphwami Yahudi aʼge en page eba enat tugulat e, di aʼge yu aʼge emin, enebetne emin, emerak poluk nak togwi aʼge paget ik eʼbe dorom ʼgelaʼge ebe helep aʼge heleʼgik lok aʼge ebe hebarligen eba pegesema welaga. Dorom ʼgelaʼge ebe loʼbok ogola re, ik 100 liter ʼgelaʼge naʼgu elit aʼge welaga.

⁷Asogo oruakma re, at Yesus en is eneragam aʼge ebano moʼgulentasulat e, disogo moʼgulentesi, “Ik eʼbe dorom ʼgelaʼge eba pam ik naʼgwit o,” oluk moʼgulentesimu, emde lorophegeik naʼgwigisa.

⁸Asogo naʼgwigisema re, at Yesus en is ebano disogo moʼgulentesi, “Yogo. Naʼgwigep aʼge ai mesik luʼgwasogo ap ʼgain seni seregei eiye aʼge wogesi lit o,” oluk moʼgulentesimu wogesi legesa.

⁹Is en ik luʼgwasogo wogesi legesarikmu no oluk e, ik eʼbe dirak aʼge, oluk enaluk welegesa aʼgeat de, at ʼgain ano nak e, “ʼGeba en woluk wegesa,” oluk eperlak welat e, ik ano anggur eʼgen aʼbosuat agama, oduk nekhesi ʼgal e, op en ap ugwe wogegisa aʼge ano iak pakhesi.

¹⁰Iak pakhesimu wagama re, disogo moʼgulesi, “Aphwami ʼberlek en anggur eʼgen aʼbosu wogentasulat e, op aʼge naduk wogontogwi holuk, loksogo noʼgwiam, pobuk wiak aʼge wogontogwi aʼgeat de, hat nak e, op aʼge poluk welegentik en pobuk selakma pegen yu, nogorlok o!” oluk moʼgulesi.

¹¹At Yesus ebe pobi tuagoluk elalin aʼge mesik tu erlak welagarik naduk naduk tegei yu re, o Galilea kota Kana welat tegei ai o. Asogo tegei ai pam, at erliktogwi aʼge enaluksogo moʼgulentesimu, is at osi iak wogu legesa aʼge ebano Yesus ebe pobirak poluk, enede at ebam heʼberik pegesa.

¹²Asogo arat toluk e, at Yesus ebe emin, ia emin, arilak emin, osi iak wogu legesa aʼge emin, enemin o Kapernaum legesa. Legesarik e, agauwa wei nagat welegesa.

¹³Eba oruakma en, is aphwami Yahudi aʼge en e, “Nadugat at Allah en delnenebegei o,” oluk, enede eberak welat domba wam wusogo seni onuk Paskah paget no aʼge arat horok lau wagama re, Yesus o Yerusalem ʼbegei.

¹⁴ʼBegeitik Allah owi werikmu ʼgwegei ʼgal e, is aphwami oʼgo ʼbalogwi aʼge, sapi emin, domba emin, sue ʼberl ʼgelaʼge emin, oʼgo wogulat, is pema eba hweriogo welat uang agam-pagam hogulat, tugukhwe at il entesi.

¹⁵Asogo tugukhwe il ontoluk e, herle ʼgoʼbi aʼge ʼgoʼbu heliʼgogo sapi wam emin, domba emin, lagalʼbisok ʼgoʼbu wusogo Allah owi werikmu en mukho lebikpoluk, e delak pam en uang agam-pagam hogu legesa aʼge ebano abel edenogo ʼboluk-ʼbelaksogo hwikhai lasulat,

¹⁶is aphwami sue ʼberl ʼgelaʼge oʼgo wogu legesa aʼge wene yagentasulat, tegei. Asogo wene yagentasulat e, “Sue yema horloluk lebemis o. An naik owi werikmu yema, o oʼgo ʼbalugumu ʼgelaʼge ʼbalugu legep yema re, asogo modok togup o,” oluk moʼgulentesi.

¹⁷Asogo wene yagentesimu, is ap at osi iak wogu legesa aʼge ebano onogola en e, “Nadugat is ap pema en Allah iak pam pelal wokho pogulat e, disogo egesema oruak ano, Naik Allah, hat howi werik aʼge nede modok hwedik en nolot modok het ago yo, [2] oluk pelal wegesema oruak epegi,” oluk enede eberigisa.

¹⁸Yesus en is aphwami ebano asogo moʼgulentesimu, is ap ʼgaindek Yahudi aʼge en Yesus ebe wene yagugulat e, disogo moʼgulegisa, “Hat en tigen yu re, eiye welat tu hegirat tigenma oluk, pobi hobul en, elalin aʼge mesik tin da,” oluk wene yagegisa.

¹⁹Asogo wene yagegisema, at Yesus en e, disogo moʼgulentesi, “Allah owi yu moluk tit o. Arat moluk togupmu re, an en pobuk agauwa ʼbirenam werise leiktik henaganak aʼge en arat ologun ʼbalogo werik o,” oluk moʼgulentesi.

²⁰Asogo moʼgulentesimu re, is ap ʼgaindek Yahudi aʼge ebano en e, disogo moʼgulegisa, “A! Allah owi yu owan worogukhwe 46 tahun welege aʼgeat de, hat e, Agauwa ʼbiren nak werise leiktik en, agauwa henaganak aʼge en arat ologun ʼbalogo werik, egen ai re, elirat werigoluk en egen a? Mia o,” oluk moʼgulegisa.

²¹Asogo moʼgulegisa aʼge re, Yesus en wene Allah owi werik paget egei ai, o werik aʼge paget egei puk. At uʼgwarek ebe pagerat egei yo.

²²Wene asogo egeitik, pobuk ebe waragarik en elaluk agama, is ap at osi iak wogu legesa aʼge ebano en, “Wene yu nadugat moʼgulnentasukhwe nenesaʼgo hwelige aʼge,” oluk enede eberigisarik, Allah iak pelal wogo aʼge ano emin, wene Yesus en moʼgulentesi aʼge ano emin, pobi tigisarik onogola en demat epegesa.

²³Asogo egesarik oruakhwe, o Yerusalem is aphwami Yahudi aʼge domba wam wusogo seni onuk Paskah noʼgukhwe, at Yesus eba enemin welat ebe pobi tuagoluk, elalin aʼge til laga ai en e, aphwami aʼbik enil hegesarik enede at ebam heʼberik pegesa.

²⁴Asogo heʼberik pegesa aʼgeat de, at Yesus uʼgwarek nak e, is enebe ʼberlegat enebabut alukmu re, “Demat woknobua,” oluk ede is enebam heʼberik po erlakma en welaga.

²⁵Aphwami onogola at aluk modok welago ai en e, is aphwami pema en, “Is logon enebabut degenik o,” oluk, at moʼgulom modok mia o.