Read Silimo Yohanes 20 Bible Online

Yohanes 20 - Silimo bible

Yohanes 20

¹Werak asogo pegesarikmu re, o hari Minggu pam, at hwe Maria owi o Magdala aʼge ano o hiktak oruakhwe hubet siaksogo werak owik pegesema ano wagarik il ʼgwelakhesi ʼgal e, ʼgoduk helep aʼge lerakpegesa aʼge ano, wokhegesema ʼgoduk hwerik oruakma hesi.

²Asogo hwerik oruak en il holuk e, pungtak modok ap Simon onuk mesik Petrus ano emin, Yesus osi iak wogu legesa aʼge mesik at ede hwedik aʼge ano emin, eneʼbek lagarik e, disogo moʼgulentesi, “Aphwami en nonue ʼgain Onuk Logo aʼge werak owikmu en woluk libegesarik ʼgeba pei legesa ʼgelaʼgeatma re, nis wongtak pege o, norokhwi,” oluk moʼgulentesimu,

³at Petrus emin, Yesus ot mesik ano emin, emin werak owik pegesema ano wegesa.

⁴Asogo emin mesik oʼgwe pungtak wegesa ʼgal e, at Yesus ot mesik ano en, at Petrus pobugap poluk e, at naduk perlenesogoat werak owik pegesema ano waga.

⁵Asogo arat wagarik, werak owik pegesema ano aʼgul ʼgonu oluk il saboksogo ʼgwelakhesi ʼgal e, sum lenan aʼge nak noʼgorlogo ʼgwiangma oruakma il hesirik e, ebe owik ogola ʼgwilo erlakma en mo egei.

⁶Asogo ʼgu erlakma en oruakma, at Simon onuk mesik Petrus ano pobuk at eʼberlik waga lagarik ʼbekhirat werak aʼge pegema ano ʼgwegeitik il ʼgwelakhesi ʼgal e, sum lenan aʼge ano nak noʼgorlogo ʼgwiangma oruakma il hesi.

⁷Asogo aʼgeat de, sum Yesus aʼgul hettak aʼge noʼgorlak nak e, sum lenan aʼge ano noʼgorlak welagama eriano emin mesikmu erlakma en, we, ematekma ʼgeksogo ʼgelaʼge eʼgirlogo oruakma il yethesi.

⁸Asogo hesirikmu en, at Yesus iak wogu legesa aʼge mesik naduk werak aʼge pegesema waga aʼge ano pobuk ogola ʼgwegeitik il ʼgwelakhesi ʼgal e, asogo oruakma il hesirik e, demat oluk pobi tegei.

⁹At asogo il ho erlakma re, nadugat is nin pema en e, Allah iak pelal wokho pogulat e, “At ebe warotluk en pobuk elaluk ema ani o,” oluk egesema pelal wogo oruak aʼge ano is pobirak erlak welegesarik e, ai erlige en de, at il hesirik e, pobi tegei ai o.

¹⁰Asogo pobi tegeitik e, is Yesus osi iak wogu legesa aʼge eʼbirek ano togolik o pam legesa.

¹¹Is asogo legesa aʼgeat de, at hwe Maria nak e, pobuk wagarik werak pegesema ano eragam edik welat il ʼgwelakharok ʼgal e, nge taga laga.

¹²Asogo nge tagalat, il ʼgwelakhesi ʼgal e, Yesus werak aʼge pegesema ano malaikat enebe ʼbiren onosum ʼgut aʼge ʼbuksogo, at mesik Yesus werak aʼge pegesema ebano aʼgul akhit, ye, at mesik e, age akhit, hweriogo oruakma il entesi.

¹³Asogo entesimu, is en e, disogo moʼgulegisa, “Hwe yu nerei o. Hat nopaget nge taga legen o,” oluk egesema, at en e, disogo moʼgulentesi, “An nue ʼgain Onuk Logo aʼge werak aphwami en woluk o ʼgeba pei legesa hweatma re, an neperlak en nge taga legi o, norokhwi,” oluk moʼgulentesirik,

¹⁴il oʼborl akhit hebeksogo yethesi ʼgal e, at Yesus ebe edik oruakma il hesi aʼgeat de, “Ai Yesus demat o,” oluk pobitu erlak.

¹⁵Pobirak erlak oruakma re, at Yesus en e, disogo moʼgulesi, “Hwe yu nerei o. Hat nopaget nge taga legen. Ye, hat e, sa hera taga legen,” oluk moʼgulesimu, at ogola en e, “Ap yu yabuk tiso aʼge hegi,” oluk epesi. Asogo epesirik e, disogo moʼgulesi, “Nue. At ebe werak aʼge hat wegentik woluk momu pei legen holuk e, ebe o ʼgeba pei legenma o. An wai laik en e, moʼgulnemin o,” oluk moʼgulesimu,

¹⁶at Yesus en moʼguleselat e, “Hwe Maria,” oluk moʼgulosoam, Maria orogole hebeksogo Yesus wogotluk e, nis neniak pam, “Guru nue,” oluk u ʼgelaʼge re, is Ibrani aʼge eniak pam e, “Rabuni,” oluk hau weregei.

¹⁷Asogo hau weregeimu re, at Yesus en e, disogo moʼgulesi, “An nebe naik eʼbek owan ligom erlak welegi ai en e, heʼgik ebisogo tenniarok wolorogun o. An nosi wene disogo oluk moʼgulentai lak o, An emin, his emin, nenaik Allah ebam heʼberik welege aʼge ano eʼbek legeigoluk taga legi o, egei oluk nosi moʼgulentai lak o,” oluk moʼgulesimu,

¹⁸at hwe Maria ano Yesus osi iak wogu legesa aʼge ebano eneʼbek lagarik e, disogo moʼgulentesi, “Logwe! Nonue ʼgain Onuk Logo aʼge an arat nil holuk wegi o,” oluk, moʼgulentasulat wene moʼgulesi aʼge ano ʼbeliʼgogo moʼgulentai laga.

¹⁹Asogo moʼgulentau wagarikmu en, o hari Minggu welegesa ai erlige hubaʼgo at Yesus osi iak wogu legesa aʼge ebano, is ap Yahudi aʼge onogorlok en e, o akhen mesikmu ʼgoduk ʼberlegat ʼgorlok ʼbetesogo ʼgwi legesarik welegesa. Asogo oruakma, at Yesus lagarik eneʼgerlakma inagarik e, disogo moʼgulentesi, “Nosi. Henarogun lagup o,” oluk asogo moʼgulentesirik,

²⁰eʼgik emin, abel emin, werigisa aʼge ano sogomerli hwiagentesi. Asogo hwiagentesimu enil hegesarik e, “Nonue demat o,” oluk onogola enagai aʼbik hegesa.

²¹Asogo enagai aʼbik hegesema, at Yesus en wene mesik emin pobuk disogo moʼgulentesi, “Nosi o. Henarogun lagup o. An naik en peraknobou waga ai ʼgelaʼge, an en his asogoat perakhenebaik o,” oluk moʼgulentesi.

²²Asogo moʼgulentesirik e, emde age enebam pusogo pasulat e, disogo moʼgulentesi, “Allah Arogun hwerlemit o.

²³Ye, his en aphwami wiak togwi aʼge erlagapsogo ukpogu lorogup holuk e, at Allah en erlagapsogo ukpouwayat o. Ye, is aphwami logon wiak togwi aʼge, his en erlagapsogo ukpogu lorogup erlak holuk e, at Allah en ogo erlagapsogo ukpouwa modok erlagat o,” oluk moʼgulentesi.

²⁴At Yesus ebe osi onorogolema inaga ai erlige re, ap enebe 12 ebano aʼge is pema nak oruakma. Ye, at Tomas onuk mesik Holubaʼge ogwi ano ebe erlakma waga.

²⁵Asogo ebe erlakma oluk e, is Yesus osi pema nak en e, disogo moʼgulegisa, “Tomas nare o. Nis nonue ʼgain Onuk Logo aʼge ano arat nenil hege o,” oluk moʼgulegisa aʼgeat de, at en e, disogo moʼgulentesi, “An en at eʼgik pam paku werigisa aʼge ele nil pobisogo ho erlak, ye, sogomerli neʼgik tenho erlak, abel oʼgwe waʼgun ele neʼgik dum ʼgwelabu erlak holuk e, demat oluk epaik modok erlak o,” oluk moʼgulentesi.

²⁶Asogo moʼgulentesirikmu en e, agauwa sabit pam welegesarik agaikhe pam en e, is Yesus osi iak wogu legesa aʼge ebano Tomas eminat, o anoat odoktigisarik, ʼgoduk ʼberlegat ʼgorlok ʼbetesogo lerakpoluk welegesa aʼgeat de, at Yesus wagarik eneʼgerlakma inagarik e, disogo moʼgulentesi, “Nosi o. Henarogun lagup o,” oluk moʼgulentesirik e,

²⁷pobuk at Tomas disogo moʼgulesi, “Hat hogola en demat oluk hede nebam heʼberik po erlakma en welegen ai ʼgelaʼge wolorogun o. Demat oluk epagun en e, heʼgik pakniasulat, neʼgik sogomerli hil niasulat, nabel waʼgun ele heʼgik dum ʼgwelakpasulat, toguntik e, hede nebam heʼberin o,” oluk moʼgulesi.

²⁸Asogo moʼgulesimu, at Tomas en e, “Eige! Nue, hebe ʼgain Honuk Logo aʼge Allah at hiegi o,” oluk moʼgulesimu,

²⁹at Yesus en e, disogo moʼgulesi, “Hat e, hil arat niegentik demat oluk hede nebam heʼberik pegen. Asogo aʼgeat de, is aphwami logon enil nio erlak aʼge en de, enede nebam heʼberik pouwa holuk e, onogola enagai houwa o, oluk demat moʼgulhegis,” oluk moʼgulesi.

³⁰At Yesus en is osi iak wogu legesa aʼge en at ebe pobi tuagoluk enilem elalin taga laga aʼge pema aʼbigat tegei aʼgeat de, buku yu pam pelal wo erlak.

³¹Asogo aʼgeat de, pelal wogo oruak aʼge yu ʼberlegat his en e, Yesus ai Allah omlogo, nis aphwami delnonobuagoluk polikpoluk perakpou waga ano demat, oluk pobirak poluk henede at ebam heʼberik pogulat, at onuk ʼbalogwiam henelaluk welemagoluk, pelal wokho pegi o.