Read Silimo Yohanes 21 Bible Online

Yohanes 21 - Silimo bible

Yohanes 21

¹At Yesus en asogo tegeitikmu en, ik Tiberias omugwema, at osi iak wogu legesa aʼge ebano pobuk onorogolema inaga. Onorogolema inaga ai, wene ebe re, disogo oluk.

²Agauwa mesik erlige re, at Simon onuk mesik Petrus ano emin, Tomas onuk mesik Holubaʼge ano emin, Natanael owi o Galilea doʼgo o onuk Kana aʼge emin, Zebedeus eiyagai emin, Yesus osi enebe ʼbiren logon emin, odoktigisa.

³Asogo odoktigisarik e, at Simon onuk mesik Petrus ano en, is pema disogo moʼgulentesi, “An yogodak e, hiane wai laiyogoluk o,” oluk egeimu re, is pema akhit ebano en e, “Nis neneminat ouwok o,” oluk egesarik e, emin loluk ik so ogola ʼgoluk legesarik aʼge re, o hup modok lok aʼgeat de, hiane ogo mesik wo erlagat.

⁴Asogo wo erlak oruakma, o dakha osokhwe, at Yesus lagarik, ik esaʼgoma edik welaga aʼgeat de, at osi iak wogu legesa aʼge ebano en e, “Ai Yesus ebeat o,” oluk pobitu erlak.

⁵Asogo pobitu erlak oruakma re, at Yesus en disogo moʼgulentesi, “Ap yema logwe. Nosi. Hiane mesik wegep a?” oluk moʼgulentesimu, is en e, “Modok erlagat o,” oluk moʼgulegisema,

⁶at Yesus en e, disogo moʼgulentesi, “Sum hiane sum ai, ik so abel heneʼgik ʼbekhit akhit ʼbelakpemit o. Asogo ʼbelabogupmu re, hiane wagup ani o,” oluk moʼgulentesimu sum hiane sum ano ik olomu ʼbelakpegesema hiane modok aʼbik yagaragama re, lisogo wa ʼgwilo modok mia aga.

⁷Asogo mia agama welat, at Yesus osi ebano aʼge mesik, at ede hwedik aʼge ano en e, Petrus disogo moʼgulesi, “Petrus, ap ai nonue ʼgain Onuk Logo aʼge anoat o,” oluk moʼgulesi. At Yesus ot ano en e, “Ap ai nonue ʼgain Onuk Logo aʼge anoat o,” oluk Petrus moʼgulosoam esaʼgo hwelegeitik e, osum oʼborl oʼgwe aʼge noʼgorlogo pesirik noʼgorlak welaga aʼge ano perleneat ʼbuktegeirik e, ik olomu ʼbok ʼbegei.

⁸Asogo ʼbisokhwe, Yesus osi pema ebano is welegesa eriano hwerli en ik esaʼgo walek e, puk. We horogat, 100 meter ʼgelaʼgeatma re, hiane aʼbik sum hiane sum emde loroptak aʼge ano lisogo woluk ik so wusogo ik esaʼgoma liplau wegesa.

⁹Arat liplau wegesarik so ogola en ʼbu egesa ʼgal e, hiane emin, soʼboru roti aʼge emin, werakho odouk eʼgen pam orluktak oruakma enil hegesa.

¹⁰Asogo hegesema, at Yesus en e, disogo moʼgulentesi, “Nosi. Hiane ʼgerat wegep aʼge ebano logon woluk manis o,” oluk moʼgulentesimu,

¹¹at Simon onuk mesik Petrus ano ik so ogola ʼgwegeitik e, hiane lok aʼge nak ebe 153 sum hiane sum emde loroptak aʼge ano lisogo woluk e, ik esaʼgoma liplau waga. Hiane modok aʼbik aʼgeat de, sum ano weiyatma no oluk e, derlep u erlak, we, op nak welaga.

¹²Sum asogo woluk liplau wagama, at Yesus en e, disogo moʼgulentesi, “Nosi. Soʼboru nul en manis o,” oluk moʼgulentesi. Asogo moʼgulentesimu, is at osi ebano en e, “yu nonue ʼgain Onuk Logo aʼge ebeat o,” oluk enak aʼge hegesarikmu no oluk e, at mesik en e, “Hat hebe sa o,” oluk onogorlok erlaksogo hin mesik wokho erlakma en mo egesa.

¹³Asogo mo egesarik oruakhwe, at Yesus ano pobuk eneʼbek horoksogo hegilhai lagarik e, soʼboru roti aʼge ano wesirik, is soʼburontoluk e, hiane ano asogoat soʼburentesi.

¹⁴At Yesus asogo tegei ai re, at ebe warotluk togolik elaluk agarik en, eʼgik henaganak aʼge en de, osi onorogolema inaga ai o.

¹⁵Soʼboru asogo arat neʼgesema, at Yesus en at Simon onuk mesik Petrus ano emdema wasulat e, “Simon Yona omlogo not o. Is harilak pema yema re, an enede hwedik e, mia ʼgelaʼge aʼgeat de, hat nak e, an hede hwedik ʼgelaʼge welegen a?” oluk moʼgulesimu, at Petrus en e, “I o, nue. An en hat hebe nedeat o,” oluk moʼgulesimu, at Yesus en e, disogo moʼgulesi, “Holuk e, nuam domba ena aʼge opsogo ʼgwelagentarok wolomup o,” oluk moʼgulesi.

¹⁶Naduk asogo moʼgulesirik, pobuk mesik emin disogo emdema wokhesi, “Simon Yona omlogo not o. Hat en an hede hwedik welegen a?” oluk moʼgulesimu, at en e, “I o. Nue. An en hat hebe nede hwedik welegi ai, hat halugat o, nue,” oluk moʼgulesi lagama, at Yesus en e, “Holuk e, an nuam domba oʼgoniso lomup o,” oluk moʼgulesi.

¹⁷Eʼgik ʼbirenam emdema wokhesirik pobuk emdema mesik disogo wokhesiat, “Simon Yona omlogo not o. Hat en an nebe hede a?” oluk, asogo emdema eʼgik ʼbirenam wokhesirik e, pobuk mesik ogo, “Hat en an nebe hede welegen a?” oluk moʼgulesi ai en e, ede wiak agama, at en Yesus disogo moʼgulesi, “Nue. Hat e, di wene yu wene ʼberlegat haluk o. Holuk e, an en nue hebe nede welegi ai, hat halugat o,” oluk moʼgulese lagama, at Yesus en e, disogo moʼgulesi, “Holuk e, an nuam domba opsogo ʼgwelagentarogat wolomup o,” oluk moʼgulesi.

¹⁸Asogo moʼgulesirik e, wene mesik disogo moʼgulesi, “Nadugat, hat hebe souwe pam welat e, An o eba laik, oluk ʼbagaluk huʼgwarek en ningsogo wanhorloluk lasu legen aʼgeat de, pobuk hat hebe sebal oroguntik, heʼgik ʼbelinghasuam e, is nin pema en hat heʼgik herle ningsogo wathoboluk e, o hat lo hebitmu wokhoboluk louwa ani o, oluk demat moʼgulhegis o,”

¹⁹oluk wene asogo moʼgulesi ai re, at Petrus pobuk disogo takpoluk woruema Allah erliktu aʼge paget moʼgulesi ai o. Arat asogo moʼgulesirik e, mesik disogo moʼgulesi, “An neʼberlik noso lomup o,” oluk moʼgulesi.

²⁰At Yesus en wene asogo moʼgulesimu, at Petrus orogole edenogo il oʼborl akhit yethesi ʼgal e, Yesus ot mesik ede hwedik aʼge ano eneʼberlik wagoma yethesi. At ai ebe re, nadugat soʼboru noʼgulat Yesus eragam horoksogo hweriogo welat, at en e, “Yesus nue. Sa en nue ʼgain Honuk Logo aʼge wathobuagoluk yoʼgo louwa no,” oluk ebam hin wokhesi aʼge ano.

²¹At Petrus en ap ano il yetholuk e, Yesus disogo moʼgulesi, “Nue. At ap ai pobuk noʼgosogo tua epegen,” oluk moʼgulese lagama,

²²at Yesus en e, “An nogola en e, ap ai ebe elaluk oruakma, an pobuk weik epaik holuk e, hat en tu aʼge puk. An nomu enat, tik ani o. Asogo aʼgeat de, hat nak e, an neʼberlik nese lomup o,” oluk wene asogo moʼgulesi aʼge ano,

²³is Yesus osi iak wogu legesa aʼge en e, “Yesus en, Not ai ebe pobu warema modok erlak o,” oluk egei ʼgelaʼge, obok sagarak pegesa. Aʼgeat de, at Yesus en e, “An not ai pobuk warema modok erlak o,” oluk u erlakma en. We, “An nogola en, ap ai ebe elalugat oruakma an pobuk weik epaik holuk e, hat en tu aʼge puk. An nomu enat, tik o,” oluk wene ai aʼge paget egei aʼge de, asogo egesa ai o.

²⁴Wene Yesus ot mesik paget egei ai, nebe anat o. An nil hegi aʼge enat ʼbaksogo moʼgulhonto ʼgelaʼge, pelal ʼbalogo pegi yu o. Wene ai an nil hegi aʼge enat ʼbaksogo moʼgulhentegis ai demat, oluk, nis ʼberlegat nenaluk o.

²⁵At Yesus en di wene yu wene pema akhit taga laga aʼge aʼbigat taga laga aʼgeat de, wene ʼberlegat mesik-mesik ʼbeling-ʼbelangsogo pelal wokho pelema re, o ʼgwiangma yema ʼbetesogo re, ebale ʼgeba po ʼgelaʼgeat elep ani o.