Read Silimo Yohanes 3 Bible Online

Yohanes 3 - Silimo bible

Yohanes 3

¹Aphwami Yahudi aʼge onue ʼgain ap Farisi aʼge onowene tenakho welaga aʼge mesik onuk Nikodemus.

²Ye, at ap ai o hubaʼgo agauwa mesik erlige Yesus eʼbek wagarik e, disogo moʼgulesi, “Nue. Ap mesik Allah emin hwedik erlak holuk e, hat en elalin tu puk aʼge til denaga legen ai ʼgelaʼge, modok tu mia. Ai en e, hat en wene moʼgulnontouwagoluk Allah en perakhobou wagama wegen oluk nenaluk aga o,” oluk moʼgulesi.

³Asogo moʼgulesimu, at Yesus e, disogo moʼgulesi, “Aphwami Allah en enebe pobuk togolik ʼget dagenebiso erlak holuk e, at eragam enebasumu eba enil houwa modok erlak o, oluk, niak demat moʼgulhese legi o,” oluk moʼgulesimu,

⁴at Nikodemus en e, disogo moʼgulesi, “A! Aphwami enarluema re, noʼgosogo pobuk dagonobu epegen. Enialak onogola ʼgoluk en pobuk elit dagonobu no? Mia o,” oluk moʼgulesimu,

⁵at Yesus en e, disogo moʼgulesi, “Aphwami ik pam emin, Allah Arogun pam emin, dagenebiso erlak holuk e, Allah en eragam enebasumu eba ʼgua modok erlak o, oluk, niak demat moʼgulhese legi o.

⁶Ye, aphwami en dagonobogwi ai re, aphwamiat dagagai o. Ye, Allah Arogun en dagenebiso ai re, Allah Arogun aʼgeat ʼget dagagai o.

⁷His henebe loʼbok pobuk togolik ʼget dagom, oluk moʼgulhegis ai en, “Eige! Nogorlok o, oluk, hede perik togun o.

⁸Sogwei ai, we, omu yogunat punhasuam e, iak nak hesaʼgo hwelise legen aʼgeat de, ebe wago re, ʼgeba en ʼgelaʼgeat wago yo. Ye, lasu re, ʼgebane lasu ʼgelaʼgeat lasu o. Hat e, heperlak o. Ai ʼgelaʼge, aphwami Allah Arogun en dagenebiso re, enebe loʼbok asogoat dagenebiso yo,” oluk moʼgulesi.

⁹Asogo moʼgulesimu, at Nikodemus en e, disogo moʼgulesi, “Wene egen ai re, noʼgosogo tagonobo ebele paget en egen,” oluk hin wesimu re,

¹⁰at Yesus en e, disogo moʼgulesi, “Nue. Hat hebe re, aphwami Yahudi aʼge wene moʼgulentasu legen aʼgeat de, an en wene moʼgulhese legi aʼge yu re, pobi tigen erlakma hegi o. I a?

¹¹Ye, nis en wene nenaluk aʼgeat moʼgulhontogulat, nenil hege aʼgeat demat oluk, ʼbeliʼgogo moʼgulhontogulat, togu lege aʼgeat de, neniak on holu pukmu en e, henebakhenne togu legep ai en, niak demat moʼgulhese legi o.

¹²An en wene ʼgwiangma aʼge paget moʼgulhentasuam e, his en demat oluk pobi togu legep erlak holuk e, an en wene ʼbogorl pam aʼge paget moʼgulhontoma pobuk noʼgosogo wene ai demat oluk pobi togup epegep. Pobi togup modok erlak o,” oluk moʼgulesi.

¹³Asogo moʼgulesirik e, disogo moʼgulesi, “Ap mesik ʼgwiangma en ʼbogorl pam modok ligom erlak. We, an ʼbogorl pam en abat dakla ʼbu wegi aʼge ano nagat o.

¹⁴Ye, at Musa o leimu aphwami erlakma eba welat, ʼgosu ʼgelaʼge heliʼgogo e pam edikpesi ai ʼgelaʼge, is aphwami yema enede an abat daklau wegi aʼge yu nebam heʼberik pouwa aʼge enebe loʼbok enelaluk modok welemagoluk, an asogoat ediknobo hegitsogoat ediknobouwayat o.

¹⁶Di aphwami yu aphwami at Allah ede hwedik en enede an nebam heʼberik pouwa aʼge enebe loʼbok warotluk e, nal ema erlak o. Erelaluk modok welemagoluk, omlogo an nebe mesigat dogo aʼge wogentesi.

¹⁷Ye, an Allah omlogo ʼgwiangma yema peraknobou waga aʼge ai re, di aphwami yu aphwami wene enebam poluk wiagabonobuagoluk peraknobou waga puk. We, enebe delonobuagoluk peraknobou waga o.

¹⁸Holuk e, ap sa en ede an nebam heʼberik pasu holuk e, Allah en wene ebam poluk wiagap pouwa erlak aʼgeat de, ap sa en ede an Allah omlogo mesigat dogo aʼge yu nebam heʼberik pasu erlak ai enat, wiagap pouwa aʼge wene arat ebam pesimu oruak o.

¹⁹Ye, Allah en wene enebam pasu ai re, ebe disogo. An en o dakharak enebasu legi aʼge nebe arat ʼgwiangma ʼbu wegi aʼgeat de, aphwami enebabut wiak togwi ai en e, At o dakharak ai nenebit o. At e, o hiktak aiat nenagai, oluk onogola opogwi o.

²⁰Ye, is aphwami wiak togwi aʼge enebe loʼbok enede en opogulat e, Nis o dakharak ai pam lul holuk e, nis wiak togwi aʼge ʼbaguarik selakma enam emano, oluk, an o dakharak aʼge yu modok enebit en e, neʼbek wagai erlakma en mo ogwi o.

²¹Asogo enede opogwi aʼgeat de, is pema enebabut hegitsogo togwi aʼge enebe loʼbok en, enede opogulat e, Allah emin hwedik welat disogo op togu legema, oluk, selakma emagoluk, an o dakharak aʼge neʼbek wagai o,” oluk moʼgulesi.

²²Asogo arat moʼgulesirik e, pobuk at Yesus ebe emin, osi iak wogu legesa aʼge emin, enemin o Yudea ʼbigisarik e, aphwami ik olomu ʼbelabonobogulat agauwa wei nak welegesa.

²³Asogo togu legesa eria erlige re, Yohanes eʼgik herle wusogo o herle werak onobogumu owan ʼgwelabu erlakma en welat e, o onuk Ainon o Salim eragam eba ik aʼbikmu no oluk e, aphwami ik olomu ʼbelabonobuagoluk, Yohanes eʼbek wagaiam e, ik olomu ʼbelabenebise lagayat.

²⁵Asogo ik olomu ʼbelabenebiso oruakma, at Yohanes osi iak wogu legesa aʼge emin, is ap Yahudi aʼge logon emin, enemin, is ap Yahudi aʼge en di aʼge yu aʼge emesogo nak tugumu no oluk e, wene ai paget wene aʼbik ʼbalugu legesa.

²⁶Wene ʼbalugu legesarik, Yohanes eʼbek legesarik e, disogo moʼgulegisa, “Nue. Ap mesik hat heʼbirek ik Yordan etle akhit welat e, at ebaget obok ʼbeliʼgogo moʼgulnentigen aʼge ano en ik olomu ʼbelabenebisokhwe aphwami enebe ʼberlegat at eʼbek wagai o,” oluk moʼgulegisa.

²⁷Asogo moʼgulegisema, at en e, disogo moʼgulentesi, “Malik logwe. Nosi. Ap mesik Allah en moʼgulom erlakma, at uʼgwarek ede en nak ʼgagalogo elirat til lo mia o.

²⁸Ap ai en aphwami delonobuagoluk Allah en yoʼgo poluk perakpou weik egei ano re, an e, erlak aʼgeat de, at pobuk weriogoluk an naduk peraknobou wagama wegi o, oluk, moʼgulentasumu his arat henesaʼgo hologu legep epegi o.

²⁹Ye, ap mesik ugwe wasu holuk e, hwe ai ogun e, ap aiat o. Ye, ap ugwe horlo aʼge oruak ai are mesik eragam edik welat, at iak osoam esaʼgo hwelak welat ogola agai hasu ʼgelaʼge, an yogodak asogoat nogola nagai hasu legi o.

³⁰Ap ai onuk ligom erlige ligagokhwe re, an nonuk ʼbuom erlige ʼbu agokhwe, tua o,” oluk moʼgulentesi.

³¹Ye, aphwami ʼberlegat e, ononuk erlak nak o. We, at erabu en ʼbu aga aʼge aiat ʼgain onuk logo aʼge oruak o. Ap mesik ebe ʼgwiangma en dogo aʼge holuk, ebe ʼgwiangma aʼgeatma re, wene ʼgwiangma aʼgeat oso yo. Is aphwami ʼberlegat ononuk erlak ʼgelaʼge oruakhwe re, ap mesik ʼbogorl pam en ʼbu aga aʼge aiat onuk logo oruak o.

³²At il hesi aʼge emin, esaʼgo hwelegei aʼge emin, ʼbaksogo moʼgulentasukhweat de, is aphwami ʼberlek en e, at en wene ʼbeliʼgogo moʼgulentasu aʼge ai, enebakhennesogo ukpogwi o.

³³Asogo ukpogwi aʼgeat de, is aphwami pema en e, At en wene ʼbeliʼgogo moʼgulnentasu aʼge ai demat oluk wogwi aʼge en e, Allah iak ai demat oluk wogwi o.

³⁴At Allah en perakpou waga aʼge ai, Allah Arogun hwerli po erlakma en daksogo modok wogesimu Allah iagat moʼgulnentasu o.

³⁵At aik en omlogo ebe ede hwedik welat, di aʼge yu aʼge ʼberlegat at eiye welemagoluk wogosi o.

³⁶Holuk e, ap sa en ede Allah omlogo pam heʼberik pasu holuk, enelaluk welema aʼge eiye agarik oruak o. Aʼgeat de, ap sa en, at omlogo iak hweliso erlakma en, ebakhenne ukpasu aʼge ogo, elaluk modok welema aʼge ai eiye ema erlak o. We, Allah olot het ebam poluk modok welema o.