Read Silimo Yohanes 4 Bible Online

Yohanes 4 - Silimo bible

Yohanes 4

¹Asogo togu legesema, is aphwami en e, disogo egesa, “Is aphwami enebe weisogo ʼgelaʼge nak Yohanes osi omogoluk eragam wagaiam ik olomu ʼbelabenebiso aʼgeat de, is logon enebe aʼbigat Yesus osi omogoluk eragam wagaiam ik olomu ʼbelabenebiso yo,” oluk ogwiam, at Yesus en e, “Wene ai, is ap Farisi aʼge enesaʼgo hweligisa hegi,” oluk aluk aga.

²Asogo egesa ai re, at Yesus ebe yen e, ik olomu ʼbelabenebise laga erlak. We, at osi iak wogu legesa aʼge eba en ʼbelabonobogu legesa aʼgeat de, egesa.

³Asogo ogwiam, “Enesaʼgo hweligisa o,” oluk, Yesus aluk agarik e, at o Yudea ukpoluk o Galilea togolik orlu weigoluk orlu waga.

⁴Asogo orlu waga ai re, ebela muʼgwe erlak. We, ebela o Samaria ʼgweat orluom hegit agama orlu aga.

⁵Orlu agalat, o Samaria o kota mesik onuk Sikar horoksogo ʼguogoluk, ʼgwiang mesik ap Yakub en nadugat omlogo Yusuf wogesimu eba orlu aga.

⁶O erlige ede ʼburl jam 12 orlu agarik, at Yesus ano ebela en werak no oluk e, ik ap Yakub egeik omugwe delakma ik naʼgugu legesema ebano huragarik welaga.

⁷Eba hweriogo oruakhwe, osi iak wogu legesa aʼge ebano soʼboru oʼgo ʼbaluogoluk o kotama ebano ʼgwigisema, at hwe Samaria aʼge mesik ik naʼgwigoluk liplau waga. Liplau wagama, at Yesus en e, disogo moʼgulesi, “Nerei yo. An ik logon naʼgogo woknemin o,” oluk, ʼgonu moʼgulesimu,

⁸

⁹is aphwami Yahudi aʼge aphwami o Samaria aʼge enemin il ʼbelak welegesa ai en e, at hwe Samaria aʼge ano en at Yesus disogo moʼgulesi, “Hat ap Yahudi aʼge. Ye, an e, hwe Samaria aʼgeat de, nopaget, Ik nangnemin, oluk ʼgonu moʼgulnigen,” oluk moʼgulesimu,

¹⁰at Yesus en e, disogo moʼgulesi, “Allah ebabut op en weat oʼgo erlak wogentasu aʼge ai emin, ye, an en, Ik logon naʼgogo woknemin, oluk ʼgonu moʼgulhegis ai, nebe emin, pobirak nebelenma re, hat en ik logon ʼgonu moʼgulnosokhwe, an en ik enelalugabenebiso aʼge demat wokhetli o,” oluk moʼgulesi.

¹¹Asogo moʼgulesimu, at hwe ano en e, disogo moʼgulesi, “Nue. Hat ik eʼbe erlak. Ye, ik yu ogorlukmu orogobuat aʼge re, hat en ik enelalugabenebiso aʼge ai, ʼgeba aʼge naʼgogo wokneriogoluk en egen.

¹²Ik yu nis neneʼba ʼgain Yakub en delegeitik, at ebe emin, eiyagai emin, uam emin, noʼgu legesarik en, nis pobuk noʼgu lemagoluk woknentesi aʼge ai, hat hogola en e, At ebe mia ʼgelaʼge. Ye, an nak e, nebe ʼgain, oluk epegentik en egen a?” oluk moʼgulesi.

¹³Asogo moʼgulesimu, at Yesus en e, disogo moʼgulesi, “Is aphwami ik yu aʼge noʼgwi holuk e, pobuk ik nele ema aʼgeat de,

¹⁴ik an en wogontoma noʼgwi holuk e, is onogola en ik elaruk ʼgelaʼge porlolu tago modok welema ai en e, enelaluk modok welat, is pobuk ik nele aga lema modok erlak o,” oluk moʼgulesi.

¹⁵Asogo moʼgulesimu, at hwe ano en e, disogo moʼgulesi, “Nue. An ik nele en ik yu naʼgu aga leik erlak holuk e, ik hat en egen aʼge ai woknemin o,” oluk ʼgonu moʼgulesi.

¹⁶Asogo moʼgulesimu at Yesus en e, disogo moʼgulesi, “Hat hogun eʼbirek yema worogup en e, worlhai lak o,” oluk moʼgulesi.

¹⁷Asogo ese lagama, at hwe ano en e, “An nogun erlak o,” moʼgulesimu, at Yesus en e, disogo moʼgulesi, “An nogun erlak egen ai demat egen o.

¹⁸Hat hogun mesik wasulat, ukpasulat, mesik wasulat, enebe huaben wogenebigentik en, yogodak ap mesik heʼbirek welegep ai re, hat hogun puk. Is mu aʼge de ai en e, hat wene demat egen o,” oluk moʼgulesi.

¹⁹Asogo ʼbaksogo moʼgulese lagama, at hwe ano en, at disogo moʼgulesi, “Eige. Nue. Hat hebe re, demat Allah iak moʼgulentasu legen aʼge hegi o, oluk arat pobi hebegis o.

²⁰Ye, nis nenaʼbu neneʼbalak en e, dom ya pam welat Allah erliktogu legesa aʼgeat de, his Yahudi aʼge en e, Allah o wema erliktogwi erlakma re, we, o Yerusalem eba en nagat erliktu o, oluk egepma o,” oluk moʼgulesimu,

²¹at Yesus en e, disogo moʼgulesi, “Hwe yu nerei yo. Wene moʼgulheik aʼge yu re, demat opomup o. O dom yu pam emin, o Yerusalem emin, eba nak Allah erliktugulom puk. His agauwa Allah erliktugulom aʼge hegit e, o pobuk mesik dakha ua aʼge oruak o.

²²Allah en aphwami ʼberlegat delenebigoluk, nis aphwami Yahudi aʼge en wene moʼgulontouwagoluk yoʼgo nenebesi ai en e, nis Yahudi aʼge en Allah ebe nenaluk aʼge erliktogu lege aʼgeat de, his nak e, ebe heneperlak welarat erliktogu legep ai o.

²³Asogo Allah erliktogu lege aʼgeat de, is aphwami en pobuk Allah erliktugulat e, mubelesogoat ʼgelaʼge erliktua aʼge oruagat o. At Allah ogola en e, An Narogun e, Allah ebe ai ʼgelaʼge, oluk moʼgulentasuam hegitsogo demat erliknobogu lemak, oluk, epasu ai en e, yogodak ya en asogo erliktugulom o.

²⁴Allah ebe re, Arogun aʼge ai en e, at erliktuogoluk Arogun emin hwedik welat demat erliktu aʼgeat erliktu o,” oluk moʼgulesi.

²⁵Asogo moʼgulesimu, at hwe ano en e, disogo moʼgulesi, “Aphwami delnonobuagoluk Allah en ʼgain onuk Kristus ai perakpouma. Perakpou wagoam e, ebe wemarik e, di wene yu wene ʼberlegat nis moʼgulnentasu lema ani o, oluk an naluk o,” oluk moʼgulesi.

²⁶Asogo moʼgulesimu, at Yesus en e, disogo moʼgulesi, “Ap egen ai ebe re, an nemin weneane ogu lege aʼge nebe yuat o,” oluk moʼgulesi.

²⁷Asogo moʼgulosokhwe, at Yesus osi iak wogu legesa aʼge ebano togolik liplau wegesa ʼgal e, Yesus hwe aʼge mesik eʼbirek weneane ogumu, enil ontoluk e, “Nogorlok e,” oluk, erliktigisa aʼgeat de, is nin pema en hin wogontugulat e, “Hwe yu, hat no hagai en wegen,” oluk ogulat, “Yesus. Hat hwe yu heʼbirek weneane ai no oluk ogu legep,” oluk ogulat, moʼgulonto pukmu en mo egesa.

²⁸Asogo mo egesarik oruakhwe, at hwe ano ik eʼbe eba ukpoluk e, pungtak o kota eba ʼgwi lagarik aphwami eba aʼge wene disogo oluk moʼgulentil denaga laga,

²⁹“Ap mesik en an di bele, yu bele, tagalat denaga legi aʼge ʼberlegat ʼbaksogo modok moʼgulnesi aʼge ebe eria ʼgelaʼge oruak o. At ebe Kristus Allah en delnenebigoluk perakpouma ano hwi a? Ye, muat a. Henil hagup en manis o,” oluk moʼgulentil laga.

³⁰Asogo moʼgulontoluk lagama, is aphwami ebano o kota eba ukpoluk liplau wegesarik e, Yesus ebe haumogoluk wegesa.

³¹Haumogoluk owan wagaihwe, Yesus osi iak wogu legesa aʼge ebano en, at disogo moʼgulegisa, “Nue. Hat soʼboru naduk men o,” oluk moʼgulegisa.

³²Asogo moʼgulegisa aʼgeat de, at en e, disogo moʼgulentesi, “Soʼboru an en aʼge oruak aʼgeat de, ebe ʼge aʼge hwe, his heneperlak o,” oluk moʼgulentesimu,

³³at osi iak wogu legesa aʼge ebano en is-is nak hin wogulat e, disogo egesa, “Aphwami en di aʼge yu aʼge mesik at nouwagoluk wogosu wegesema en egei hwi a?” oluk egesa.

³⁴Asogo egesema at Yesus en e, disogo moʼgulentesi, “At en an peraknobou waga aʼge ano ede epasu aʼge hegitsogo taga legi ai emin, an tuagoluk yoʼgo nebesi aʼge ai ologun ʼbalogo dakhaigoluk taga legi ai aʼge emin, an nosoʼboru re, aiat o.

³⁵Ye, his en ogulat e, Dugwi henagan wolotluk en de, uganak aʼge holuk en eʼgen egesik aʼge ano arat ʼbalul o, oluk ogu legep aʼgeat de, an en wene mesik moʼgulhentaik o. Gandum owi yogoʼgwe henil yethemit! Eʼgen egesik aʼge hurle agarik ʼbalu hegit agama oruak o.

³⁶Ebe arat ʼbalogwi holuk e, ap mesik owi yeriso aʼge emin, ye, akhen eʼgen ʼbaliso aʼge emin, eʼbirek onogola enagai houwagoluk, yogodak at mesik eʼgen ʼbaliso aʼge ai oʼgo hwerlasuat o. Oʼgo hwerlasu ai ebe re, eʼgen ʼbalogo odoksogo pogwi ai ʼgelaʼge, aphwami enelaluk modok welemagoluk odoksogo enebasu aiat o.

³⁷Wene yu re, eniak lagaksogo ogulat e, At ap mesik en owi yeriselat, at ap mesik en eʼgen ʼbaliselat, togwi oluk ogwi ai demat o.

³⁸Is pema en yabuk set wiaksogo wegesa aʼge, his en we sawesogo welegep aʼge yu, eʼgen nak ʼbalogup en yoʼgo honoboluk perakhenebegi ai o. Is logon yabuk set wiaksogo wegesarik enemak pegesa aʼge, his en eʼgen nak ʼbalogu lorogup en perakhenebegi o,” oluk moʼgulentesi.

³⁹Ye, at hwe ano o pam ʼgwegeitik e, wene disogo moʼgulentesi, “At ap ai en, an di bele yu bele tagalat, taga legi aʼge ʼberlek ʼbaksogo modok moʼgulnesi,” oluk moʼgulentil nese laga ai en e, aphwami o Samaria aʼge eba enebe aʼbigat enede Yesus ebam heʼberik pegesa.

⁴⁰Asogo heʼberik pegesarik e, pobuk Yesus eʼbek liplau wegesarik, disogo moʼgulegisa, “Hat nenemin yema wolomok o,” oluk tenakpegesema, enemin eba agauwa ʼbiren welegesa.

⁴¹Yesus enemin eba welat, naduk enebe wei nak enede at ebam heʼberik pegesa aʼgeat de, pobuk wene at ebe en moʼgulentasumu, enesaʼgo hweligisarik e, enebe modok aʼbik enede at ebam heʼberik poluk,

⁴²hwe ano disogo moʼgulegisa, “Yogodak nis nenede at ebam heʼberige yu re, wene hat en moʼgulnentigen ai pam nak nenede at ebam heʼberik pege puk. Erlak o. At e, at ebe en wene moʼgulnentasuam nonuʼgwarek en nenesaʼgo domok holugulat, Aphwami ʼgwiangma aʼge ʼberlegat delnenebiso aʼge ebe yuat o, oluk pobirak poluk nenaluk agalat, tige ai pam en e, nenede at ebam heʼberik pegeat o,” oluk moʼgulegisa.

⁴³At Yesus agauwa ʼbiren eba enemin welegesarik e, o Galilea arat orlu aga.

⁴⁴Orlu aga ai re, at uʼgwarek en eselat, “Ap Allah iak moʼgulentasu aʼge ai re, onuʼgwarek onowi pam aʼge onue enari en hau doʼgoksogo waronobogwi modok erlak o,” oluk, pageat moʼgulentesi aʼgeat de,

⁴⁵is aphwami o Galilea aʼge o Yerusalem seni Paskah sorugumu ʼbigisarik oruakma, Yesus en di aʼge yu aʼge tisokhwe enil hegesarikmu no oluk e, at ebe orlu agokhwe hau wusogo wegesa.

⁴⁶At Yesus ebe asogo hau wusogo wegesema re, nadugat ik we egeik aʼge anggur eʼgen aʼbosu tegeimu ano o Galilea kota onuk Kana ano waga. Wagarik oruakma, ap ʼgain pemerintah aʼge mesik, owi o Kapernaum aʼge, omlogo ebam ou aʼbik welaga.

⁴⁷Oruakma, aphwami en e, “Yesus ano o Yudea en Galilea orlu wagarik oruak o,” oluk egesema esaʼgo holholuk eʼbek wagarik e, disogo moʼgulesi, “Nue. An nomlogo ou en wareriogoluk ʼgelaʼge oruak en, hat loluk obap togun en yoʼgo hebegi o,” oluk moʼgulesimu re,

⁴⁸at Yesus en e, ap ʼgain ano disogo moʼgulesi, “His aphwami yema henebabut e, an en his henaluk emagoluk elalin aʼge logon tagokhwe henil nioluk nak e, henede nebam heʼberik po hentasu legi o. Elalin aʼge tiso erlak holuk e, henede nebam heʼberik po puk hentasu legi o,” oluk moʼgulesimu,

⁴⁹ap ʼgain ano en moʼguleselat e, “Nue o. An nomlogo ebe owan warom erlak oruakhwe eriayat obap togun en louwok o,” oluk moʼgulesimu,

⁵⁰at Yesus en e, disogo moʼgulesi, “Homlogo ai arat ou selang ua o. Holuk e, togolik lak o,” oluk moʼgulesimu, ap ano ogola en epasulat e, “Wene moʼgulnesi ai demat moʼgulnesi hegi,” oluk, ede Yesus ebam heʼberik poluk laga.

⁵¹Asogo ede ebetluk ebela pam owan lasumu, at eragam aʼge mesik wene woluk wegesa ʼgal emin sarlok tigisarik e, disogo moʼgulegisa, “Hat homlogo ano arat ou selang agama en wege ai o,” oluk moʼgulegisema,

⁵²at en is enebam hin wogentasulat e, “O mo ʼga hegit en selang egei,” oluk moʼgulentesimu, is en e, disogo moʼgulegisa, “Erlige de, hopmu akhit jam satu hegit agama ou aganhan ano arat horl aga o,” oluk moʼgulegisema,

⁵³at ap ano ogola en eberiselat e, “Erlige hopmuʼgwe o mo eria hegit, at Yesus en e, Homlogo ou selang ema o, oluk, moʼgulnesi hegitsogoat selang agama hegi,” oluk, ogola eberegeitik lagarik e, at ebe emin, eiyagai ʼberlegat emin, enede Yesus ebam heʼberik pegesa.

⁵⁴Pegesema, at Yesus ebe o Yudea en Galilea naduk orlu agarik aphwami en ebe pobi tuagoluk wene elalin aʼge naduk mesik tegeitikmu en, pobuk orlu agarik mesik tegei ai o.