Read Silimo Yohanes 5 Bible Online

Yohanes 5 - Silimo bible

Yohanes 5

¹Asogo toluk e, is Yahudi aʼge seni mesik sorogu legesa hegitsogo sorugukhwe Yesus pobuk o Yerusalem ʼbegei.

²O Yerusalem eba re, leget pakleget ʼgoduk emde ʼbelak mesik onuk Domba Eʼgebela ogwi aʼge eragam ik omugwe mesik is aphwami Ibrani aʼge eniak pam onuk Betesda ogwi aʼge yeʼgelak welaga. Ik omugwe ai eragam oʼgwe waliʼgogo re, orabo lengak owi huaben opsogo werik oruakma,

³aphwami esanat enebam ou aʼge emin, enil hopnik aʼge emin, ondogorlu wiak aʼge emin, onoyuk soborak aʼge emin, eba ʼbourak welat, [ik omugwe ano li aʼgesogo oborlogouk ua ya? erlak a, oluk ʼgwelakharok welegesa. Asogo ʼgwelakharok oruakma, malaikat Allah en yoʼgo ʼbelakpou wago aʼge ʼbu otluk, ik ano oborlogouk nasuam e, is aphwami enebam ou aʼge ebano mesik naduk naduk ik omugwema ano ʼbisoam e, di ou yu ou enebam eʼgin aʼge se aʼge ʼberlegat op aga legesa ai en e, ʼgwelakharok welegesa o.]

⁴

⁵Asogo ʼgwelakharok welegesa aʼge ap mesik e, ou werak oruakhwe 38 tahun aga aʼge emin enebe eba ʼbourak oruakma, Yesus il hesirik e, “Ap yu page enat disogo welagama hegi,” oluk il enak aʼge pobi tegeitik e, disogo moʼgulesi, “Nare. Hat obaphobu hagai ya? Hebit a,” oluk moʼgulesimu,

⁶

⁷ap ano en e, disogo moʼgulesi, “Nare o. Ik omugwe yu oborlogouk osoma, an nebe haʼboksogo ik olomu ʼbelapnobu aʼge, an nosi yema erlakma no oluk e, nomuat orok orok ʼbigoluk walhasukhweat de, is nari pema nak naduk ʼbogwi o,” oluk moʼgulesimu,

⁸at Yesus en e, disogo moʼgulesi, “Nare. Hebe inotluk, hegerlis demak aʼge ai horloluk lak o,” oluk,

⁹moʼgulosokhwe erianoat ap ano ou op agarik e, egerlis demak aʼge ano horloluk laga. At Yesus en ap ou aʼge obaptegei ai re, is aphwami Yahudi aʼge agauwa sabit aʼge pam Allah paget weat welagai ano pam obaptegei yo.

¹⁰Asogo weat oruakhwe obaptisoam lasumu re, is ap ʼgain Yahudi aʼge en enil hegesarik e, ap ou ʼgerat op aga aʼge ano disogo moʼgulegisa, “Nare o. O yogodak e, agauwa sabit aʼge pam Allah paget weat welat, hat hegerlis woluk lo puk aʼge woluk lasu legen yema re,” oluk, moʼgulegisema,

¹¹at ap ano en e, disogo moʼgulentesi, “Erlak o. An ap ou obapnebegei aʼge ai en, Hegerlis horloluk lak, oluk moʼgulnesimu en horloluk wga legi o,” oluk, moʼgulentesimu,

¹²is en hin ebam wogulat e, “Ap ai, sa en, Hegerlis horloluk lak, oluk moʼgulhesi,” oluk ebam hin wegesa aʼgeat de,

¹³at Yesus aphwami enebe aʼbik welegesa aʼge ebano eneʼgerlakma nalagama re, ap ebam ou obaptegei aʼge ano en e, “Sa en ou obapnebegeitik moʼgulnesi no,” oluk ede nalagama welaga.

¹⁴Asogo tolukmu en, pobuk, at Yesus Allah owi werikmu ap ano eʼbirek sarlok tigisarik e, disogo moʼgulesi, “Naik o. Yogodak hat hebe op egen ai re, pobuk wiak lok aʼge mesik hebam emano oluk e, mesik wiak togun o,” oluk moʼgulesi.

¹⁵Asogo moʼgulesimu, at ap ano is ap ʼgaindek Yahudi aʼge eneʼbek lagarik e, disogo moʼgulentesi, “Ap an ou obapnebegei egi ano re, Yesus enat obapnebegeimu o,” oluk moʼgulentesi.

¹⁶Asogo moʼgulentesimu re, is aphwami Yahudi aʼge agauwa sabit aʼge pam Allah paget weat oruakhwe, Yesus en ap ano ou obaptegei ano en e, at Yesus ebe wiagap pouwogoluk egesa.

¹⁷Asogo egesa aʼgeat de, at Yesus en disogo moʼgulentesi, “An naik agauwa mesik mo u erlakma en, o yogodak ya eminat tagenebasu modok welago ai ʼgelaʼge, an asogoat tagenebasu modok welegi o,” oluk moʼgulentesimu,

¹⁸is ap ʼgaindek Yahudi aʼge ebano en agauwa sabit aʼge pam Allah paget weat welat, Yesus en ou tu pukmuat tegei ai pam nak ebe woruogoluk tigisa puk. Aʼgeat de, at en, “An nebe Allah neʼbirek hegirat o,” oluk u ʼgelaʼge re, “An naik ebe Allah at o,” oluk, egei ai en, ebe woruogoluk ebenagaikmu obok ʼbaligisa.

¹⁹Obok asogo ʼbaligisema re, at Yesus en e, ap ebano wene disogo moʼgulentesi, “Di aʼge yu aʼge an naik en tisokhwe nil ho erlakmayat de, we, an nede opoluk tu mia ai en e, an naik tiso aʼgeat hegitsogo taga legi o, oluk demat moʼgulhentegis.

²⁰An naik en e, omlogo at ede hwedik modok welat, at ebe enat di aʼge yu aʼge tago aʼge ʼberlegat moʼgulnosoam yogodak tisokhwe henil niegep ano re, weiyat ʼgelaʼge aʼgeat de, pobuk his erliktuagoluk moʼgulnosoam lok aʼge tisokhwe his henil niagup aʼge oruagat o.

²¹Ye, an naik en aphwami werak aʼge enelalugabenebiso ai ʼgelaʼge, omlogo an en aphwami werak aʼge asogoat enelalugabenebik o, oluk nede epasu aʼge enebe loʼbok enelalugabenebiso.

²²Aphwami ʼberlek en an naik erliktogwi ai ʼgelaʼge, an omlogo asogoat erliknobogu lemagoluk, at en aphwami uak lologo wene enebam pasulat, noʼgorliselat, tago erlak. We, omlogo an enat uak lologo wene enebam pasulat, noʼgorliselat, tuagoluk, neʼgikmu pesi o. Holuk e, is aphwami pema en an erliknobogwi erlak holuk e, an naik peraknobou waga aʼge ai, erliktogwi erlagat o,” oluk, moʼgulentesirik wene pobuk mesik disogo moʼgulentesi,

²³

²⁴“Is aphwami pema en, an niak wogulat, enede an peraknobou waga aʼge ano pam heʼberik pouwa holuk e, aphwami warotluk lagai edip ukpoluk enelaluk modok welema aʼge edip pam arat wegesarik oruak o. Enelaluk modok welema aʼge eiye egesarik oruak en e, pobuk wene enebam pouwa erlagat o, oluk demat moʼgulhentegis.

²⁵Ye, aphwami werak aʼge en, an Allah omlogo niak enesaʼgo holua erlige owan oruakhweat de, arat lau wagarik oruak o. Is niak enesaʼgo holua aʼge holuk e, enelaluk emarik enelaluk modok welema o, oluk demat moʼgulhentegis.

²⁶Enelaluk modok welagai aʼge edip an naik uʼgwarek eiye welago ai ʼgelaʼge, omlogo an neʼgik pam pesimu eiye welegi o.

²⁷An nebe abat daklau wegi ai en, aphwami uak lologo wene enebam pasulat, noʼgorliselat, tuagoluk, naik en anat neʼgik pam pesi o.

²⁸Ye, pobuk e, aphwami ʼberlegat onuak oʼgwe loʼbok en, an niak enesaʼgo holholuk, enelaluk ema erlige oruak o. Is ai, logon enebabut op togu legesa aʼge holuk, enelaluk modok welemagoluk edigenebasulat, ye, is logon enebabut wiak togu legesa aʼge holuk, wene enebam paigoluk edigenebasulat, tua oluk moʼgulhentegis ai en, Wene ai nogorlok e, oluk, alik worogup o,” oluk moʼgulentesi.

²⁹

³⁰Asogo moʼgulentesirik e, wene mesik disogo moʼgulentesi, “An nemategat nede opoluk di aʼge yu aʼge tu mia ai en e, an en nede opoluk taga legi erlak o. We, at an peraknobou waga aʼge ede epasu aʼge hegitsogo tigoluk taga legi ai en, naik iak eʼberligat, aphwami uak lologo wene enebam pasulat, noʼgorliselat, taga legi ai, hegitsogoat ese legi o,” oluk moʼgulentesi.

³¹Asogo moʼgulentesirik mesik moʼgulentasulat e, “An nebe pobi nobuagoluk nuʼgwarek nobok ʼbeliʼgogo moʼgulhentelema re, demat oluk henede ebetlip erlak o.

³²Asogo aʼgeat de, an nebe pobi nobuagoluk, naik en nobok ʼbeliʼgogo moʼgulhentasu ai, demat moʼgulhentasu oluk, an nalugat o.

³³His en Yohanes ebam an nebaget hin wouwagoluk honosi yoʼgo peragenebegepma re, at en e, dem wene paget nobok ʼbaksogo moʼgulhentesi ani o.

³⁴An nebe pobi nobuagoluk aphwami en nobok ʼbeliʼgogo moʼgulontogwi ai nagai en moʼgulhentasu legi puk. We, Allah en his delhonobuagoluk moʼgulhentasu legi o.

³⁵At Yohanes ai ebe re, esaga ʼgwialogo pogwiam yogo pasu ʼgelaʼge oruakma, his en, Esaga ʼgelaʼge nenebam yogo pasu lemak, oluk, lodu pagerat honogola henagai hogu legep ai,

³⁶an nebe pobi nobuagoluk, at en nobok ʼbeliʼgogo moʼgulentasu laga aʼgeat de, mia ʼgelaʼge o. At e, an naik en, Niabuk ado ologun po erlakma en ʼberleksogoat tip o, oluk, yoʼgo nebesimu taga legi ai pam nak e, aphwami en, At ebe aik en perakpou wagama, oluk nobok osoma enesaʼgo holugulat nebe pobi nobu ʼgelaʼgeat pobi nobu o.

³⁷An nebe pobi nobuagoluk, naik en peraknobou waga aʼge ai en, nobok ʼbaksogoat moʼgulhentesi aʼgeat de, his en naik iak henesaʼgo hwelak erlagat, orogole henil hogwi erlagat welat e,

³⁸at en yoʼgo noboluk peraknobou waga aʼgeat de, henede nebam heʼberik pogu legep erlak ai en, at iak honogola oruak modok erlak o.

³⁹His en opogulat e, Nenelaluk modok wolomul e, Allah iak pelal wogo aʼge tenakho welege yu pamat wolomul o, oluk, pelal wogo ai opsogo ʼgwelakhogu legep aʼgeat de, pelal wogo ai, an nebe pobi nobuagoluk wegesema oruakhweat de,

⁴⁰henebe henelalugaphonobuagoluk an neʼbek wom e, henebit o.

⁴¹Asogo togu legep aʼgeat de, an nak e, aphwami en erliknobuagoluk taga legi erlak.

⁴²His nak e, Allah henedesogo welegep modok erlak ai re, an henebabut naluk o.

⁴³An naik en peraknobou wagama wegi aʼgeat de, his en an nebe woknobogu legep erlak o. Asogo aʼgeat de, at ap mesik uʼgwarek ede opoluk wago holuk nak e, ebe wo aʼge henebabut hentasu legi o.

⁴⁴Allah ematek otok modok welago ai en erlikhonobuagoluk togwi erlak welat e, his-hisat hat mesik en erliktagalat, hat mesik en erliktagalat, erliktogu legep ai en, henede an nebam noʼgosogo heʼberik po epegep. Mia o.

⁴⁵Aʼge re, an en Allah ilem wene henebam pouwa oluk henede epagup o. At e, Musa iak ai pamat obapnonobua oluk henede henagai hogu legep aʼgeat de, at enat wene henebam pouwa o.

⁴⁶An nobok henaluk emagoluk, at Musa en pelal wokho pesi ai en e, at en pelal wesi aʼge ai demat oluk pobi tugullepma re, Yesus demat, oluk pobi nebelibat o.

⁴⁷Aʼge re, wene Musa en pelal wokho pesi aʼge ai, his en demat oluk pobitu erlakma en welegep holuk, an niak ai noʼgosogo pobirak poluk demat oluk epagup no. Mia o,” oluk moʼgulentesi.