Read Silimo Yohanes 6 Bible Online

Yohanes 6 - Silimo bible

Yohanes 6

¹Pobuk e, at Yesus ik Galilea omugwe, onuk mesik Tiberias ogwi aʼge ai, ik etle akhit libaga.

²Ik etle akhit lebagoma re, naduk aphwami enebam ou aʼge elalinat obabenebisokhwe enil hegesarikmu no oluk e, aphwami enebe aʼbigat esan pulholuk, at eʼberlik legesa.

³Eʼberlik lagaihwe, at Yesus osi iak wogu legesa aʼge ebano eneminat libegesarik e, duk pam ligotluk huregesa.

⁴Ye, eria hegit e, is aphwami Yahudi aʼge en e, “Allah en delnenebegei,” oluk enede ebesogo seni onuk Paskah noʼgwi aʼge ano arat no hegit lau waga.

⁵Asogo huregesarik, at Yesus il yerentesi ʼgal e, aphwami aʼbik esan logolagat odoktu agaimu il yerontoluk, Filipus disogo moʼgulesi, “Filipus. Aphwami esan yema soʼboru nouwagoluk, o ʼgeba aʼge oʼgo ʼbalontul epegen,” oluk moʼgulesi.

⁶Asogo moʼgulesi ai re, at Yesus en tu aʼge aluk welarat de, at Filipus ebabut ʼbaliogoluk moʼgulesi ai o.

⁷Asogo moʼgulesimu, at Filipus en e, disogo moʼgulesi, “Aphwami en yabuk agauwa mesik erlige togwiam eneʼgik oʼgo uang wogontogwi ai aʼge nis en 200 pam soʼboru roti aʼge oʼgo ʼbali loma re, aphwami yema, wei wei eʼgen wokhegeik elit no? Miayat o,” oluk egeimu re,

⁸at Yesus osi iak wogu legesa aʼge mesik onuk Andreas, Simon onuk mesik Petrus ano ot en e, disogo moʼgulesi,

⁹“Nue. Yema malik wei aʼge mesik soʼboru roti jelai worogo aʼge huaben, ye, hiane nin ʼbiren tenak oruak aʼgeat de, aphwami esan degenikmu re, elirat no epegen? Mia o,” oluk moʼgulesimu,

¹⁰at Yesus en e, osi ebano disogo moʼgulentesi, “Nosi. Aphwami eba huremagoluk moʼgulentemit o,” oluk egeimu, ʼbugu eʼgela aʼbik oruakma re, ʼgwe ebano huretil legesa. Huretil legesema re, aphwami enebe aʼbik aʼgeat de, ap nak wenakho enebe re, 5.000 wenagenebigisa.

¹¹Asogo huretil legesema re, at Yesus en soʼboru roti aʼge eriano eʼgikmu wesirik e, “Naik Allah o,” oluk hau wusogo re, aphwami aʼbik huregesa aʼge ebano soʼburontoluk e, hiane eriano asogoat soʼburentesi. Soʼburentesimu, is onogola en, nele epegesa hegitsogoat onogum ningsogo neʼgesa.

¹²Onogum ningsogo neʼgesema re, at osi iak wogu legesa aʼge ebano disogo moʼgulentesi, “Soʼboru neʼgesarik ado dedilogo ukpegesa aʼge eba alemat emano oluk e, odoksogo mesikmu pemit o,” oluk moʼgulentesimu re,

¹³soʼboru roti jelai aʼge worogo huaben aʼge ebano neʼgesarik, dedilogo pegesa aʼge mul sum egeik 12 aʼge emde lorophegeik yagasogo pegesa.

¹⁴Asogo yagasogo pegesema, at Yesus en ebe pobi tuagoluk elalinat tegei aʼge ano, is aphwami enil hegesarikmu no oluk e, disogo egesa, “Ap mesik en Allah iak ʼgwiangma yema moʼgulnentauma egesa ano ebe demat aʼge re, yuat o,” oluk egesa.

¹⁵Asogo egesema, at Yesus ogola en e, “Is ebano wemarik, an is onue ʼgain welemagoluk eniak ningsogo ediknobouwa hegi,” oluk enebabut enak aʼge ʼbalegeitik e, o eba ukpoluk omuat duk pam ligaga.

¹⁶At Yesus ebe asogo lagarik, osi iak wogu legesa aʼge ebano eneʼbek wom erlakma en, owan oruakhwe, o arat hik egeimu, is nak ik yeʼgelak ano ik iak pam ʼbu egesarik e, ik so ogola ʼgwigisarik, wusogo o Kapernaum liplau mogoluk wegesa.

¹⁷

¹⁸Liplau wagaimu re, yasobu loksogo punhau wagama re, ik aʼbik hererim-hereram hesi.

¹⁹Ik hererim-hereram hasukhwe, is ano ik so wetil wetil ʼburl heirakma 5 kilometer de a, 6 kilometer de a, walegat lau wegesa ʼgal e, at Yesus ano oyuk ik ogum petne pil pil enebe hegit horok lau wagokhwe, enil yetholuk onogorlok aʼbik aga.

²⁰Onogorlok aʼbik agama re, at Yesus en e, disogo moʼgulentesi, “Nosi. An nebeat waga legi o. Holuk e, honogorlok hagup o,” oluk moʼgulentesimu,

²¹is onogola enagai holuk Yesus ebe ik so ogola ʼgwelakpogukhwe erianoat, ik so ano is onogola en, “Ik esaʼgo eria hegit lobomul o,” oluk epegesa hegitsogoat arat lau wegesa.

²²Wegesarik hubet oʼgwe re, is aphwami aʼbik ik esaʼgo etle akhit oʼgwe onoboluk wegesa aʼge ebano onogola en e, “Eige. O sono ik so mesigat nak welaga aʼgeat de, at Yesus ebe emin erlak o. We, at osi iak wogwi aʼge nak ik so wusogo libagaimu nenil entige o,” oluk epegesa. Asogo ik so ebe erlak holugat egesa aʼgeat de,

²³pobuk ik so mu aʼgeat mesik aphwami o onuk Tiberias aʼge en wusogo, nonue ʼgain Onuk Logo aʼge Yesus en seʼban eselat Allah hau wusogo soʼboru roti aʼge soʼburentesimu neʼgesema ebano libegesarik oruakma, enil hegesa.

²⁴Enil hegesarik onogola en opogulat e, “Yesus ebe emin, osi iak wogwi aʼge emin, enebe yema erlak yema re,” oluk ik so ogola ʼgoluk, Yesus ebe heratil, o Kapernaum liplau wegesa.

²⁵Is aphwami ebano liplau wegesarik e, at Yesus o Kapernaum oruakma eʼbek wegesarik e, disogo moʼgulegisa, “Nue, hat o yema metne wegen,” oluk ebam hin wokhegesema,

²⁶at en e, disogo moʼgulentesi, “An wene mesik moʼgulhentaik. An nebe pobi nobuagoluk elalin aʼge tisokhwe henil niegep ano paget heranebil wegep puk. Erlak o. We, soʼboru roti aʼge soʼbusogo wokhentegismu honogum ningsogo neʼgep ano paget heranebil wegep hentegis ai o, oluk demat moʼgulhentegis o.

²⁷Soʼboru muk otluk erlak om aʼge paget yabuk nak togup o. At e, soʼboru modok modok wolom aʼge noʼgulat, enelaluk modok wolom aʼge ai, an enat wokhentasu lemagoluk, naik en yoʼgo noboluk peraknobou wagama, abat daklau wegi ai paget yabuk togu lemis o,” oluk moʼgulentesi.

²⁸Asogo moʼgulentasu lagama, is en at disogo moʼgulegisa, “Nue. Allah ogola epasu aʼge hegitsogo til lagaihwe re, nis nenebabut noʼgosogo tagalom o,” oluk, ebam hin wegesema,

²⁹at en e, disogo moʼgulentesi, “Allah ogola epasu aʼge his en tu ai ebe re, yu o. Henede an Allah en peraknobou wagama wegi aʼge yu, nebam heʼberik po aiat o,” oluk moʼgulentesimu,

³⁰is en e, disogo moʼgulegisa, “Hebe pobi hobuagoluk, elalin aʼge mesik tisokhwe nenil hioluk en nak de, nenede hebam heʼberik pul en, ebe ʼge aʼge togun. Mesik e, noʼgosogo togun.

³¹Neneʼbalak o leimu aphwami erlakma welat, soʼboru no ʼgelaʼge, onuk manna aʼge noʼgu legesa oluk, Allah iak pelal disogo oluk wogo oruak o, Is onsoʼboru noʼgu lemagoluk, at en ʼbogorl pam en ʼbelakpou waga laga, [3] oluk pelal wogo oruak ʼgelaʼgeat noʼgu legesa,” oluk moʼgulegisa.

³²Asogo moʼgulegisema, at en e, disogo moʼgulentesi, “An en wene demat aʼge mesik moʼgulhentaik. Soʼboru ʼbogorl pam en ʼbelakpou waga laga ai re, at Musa en puk. Erlak o. At e, soʼboru ebe aʼge ai re, naik en an nebe aphwami ʼgwiangma aʼge enelalugabenebiso aʼge ʼbogorl pam en ʼbu wegi aiat wokhentasu legi o,” oluk moʼgulentesi.

³³

³⁴Asogo moʼgulentesimu, is en e, disogo moʼgulegisa, “Nue. Soʼboru ai aʼge woknentasu modok welemen o,” oluk moʼgulegisema,

³⁵at en e, disogo moʼgulentesi, “Soʼboru enelalugabenebiso aʼge ai re, an nebeat o. Ap sa en an neʼbek wagalat, ede nebam heʼberik pasulat, tua holuk e, soʼboru nele agalat, ik nele agalat, tise lema erlak o.

³⁶Aʼge re, an en wene naduk moʼgulhentegis ʼgelaʼgeat, henil niogu legep aʼgeat de, henede nebam heʼberik po henebit o.

³⁷Aʼge re, an ʼbogorl pam en ʼbu egi ai re, an nuʼgwarek nede en ʼgagalogo tigoluk ʼbu egi puk. We, at peraknobou aga aʼge ede epasu aʼge aiat hegitsogo tigoluk ʼbu egi ai en e, aphwami an naik en woknoso aʼge enebe loʼbok neʼbek wagaiam e, an en, His an neʼbek worogup no, oluk, wene yagentaik erlak o.

³⁸

³⁹Ye, at ede epasu aʼge an en tuagoluk peraknobou waga ai re, ebe yu, At en aphwami an woknoso aʼge ʼberlegat mesik nelakpasu erlagat, o ologun pam, an enat enelalugabonobuagoluk,

⁴⁰naik ede epasu o. Asogo epasulat, aphwami en Allah omlogo nebe yu enil niogulat, enede nebam heʼberik pogulat, togwi holuk, enebe loʼbok enelaluk modok welemagoluk, o ologun pam, an en enelalugabonobuagoluk ede epasu o,” oluk moʼgulentesi.

⁴¹Ye, at Yesus en asogo moʼgulentasulat, “Soʼboru roti ʼbogorl pam aʼge ai re, an nebeat ʼbu egi o,” oluk moʼgulentesi ai en, is ap Yahudi aʼge en, at obok ngorluk-seʼgip ʼbalugulat e,

⁴²“At yu onuk Yesus, ap Yusuf omlogo. Ye, at aik ia nenaluk aʼgeat de, at en eselat e, An nebe re, ʼbogorl pam en ʼbu egi, oluk egei ai re, noʼgosogo oluk egei epegep,” oluk egesema re,

⁴³at Yesus en e, “His-his nobok ngorluk-seʼgip ʼbalugu legep ai re, ʼbalogup.

⁴⁴An naik peraknobou waga aʼge ano en, aphwami lis-lis an neʼbek wogonoboluk wago erlak holuk e, neʼbek wom mia o. We, at en is logon lis-lis wogonoboluk an neʼbek wagai holuk nak e, o ologun pam, an en enelalugabenebaigat o.

⁴⁵Wene ai paget is ap Allah iak moʼgulontogu legesa aʼge ebano en pelal wokho pogulat disogo egesa, Is aphwami ʼberlegat Allah enat wene moʼgulontouwa o, [4] oluk, pelal wokho pegesa ai ʼgelaʼgeat, aphwami an naik iak enesaʼgo holholuk, at en moʼgulentasukhwe moʼgulegisa holuk e, enebe loʼbok an neʼbek wagaiat o.

⁴⁶Wene moʼgulhentegis yu re, is aphwami pema en, an naik ai enil hegesa oluk moʼgulhentegis puk. We, an nomuat Allah oruakma en wegi aʼge yu nak e, naik nil hegi o.

⁴⁷Ap sa en ede an nebam heʼberik pasu holuk e, enelaluk modok welagai aʼge eiye agarik oruak o, oluk, demat moʼgulhentegis o,” oluk moʼgulentesirik,

⁴⁸wene mesik eʼberlik disogo moʼgulentesi, “Soʼboru enelalugabenebiso aʼge ai re, an nebeat o.

⁴⁹His heneʼbalak o leimu aphwami erlakma welat soʼboru no ʼgelaʼge, manna ai aʼge noʼgu legesa aʼgeat de, enebe waretil wegesa ai o.

⁵⁰Asogo waregesa aʼgeat de, soʼboru demat aʼge ʼbogorl pam en ʼbu aga ai. Asogo ʼbu agarikmu re, sa en soʼboru ai aʼge nasu holuk e, at ebe warom erlakma en, elaluk modok welema o.

⁵¹Soʼboru enelalugabenebiso aʼge ʼbogorl pam en ʼbu ago ai re, an nebeat o. Soʼboru an en wogentaik aʼge ai, sa en nasu holuk e, at ebe elaluk modok welema o. Aphwami ʼgwiangma aʼge enelaluk welemagoluk an nebe is enebaget wareik ai, an nebeat wogentaik o,” oluk moʼgulentesi.

⁵²Asogo moʼgulentesimu re, is ap Yahudi aʼge ebano, is-is nak eniak sagalugulat e, wene disogo egesa, “Ap yu logwe. An yu ebe aʼge nis nouwagoluk noʼgosogo woknentaiogoluk en moʼgulnentesi epegep,” oluk egesema,

⁵³at Yesus en e, “An en wene mesik moʼgulhentaik. An abat daklau wegi ano nebe noʼgulat, nemep noʼgulat, togu legep erlak holuk, enelaluk modok welagai aʼge, his eiye om erlakma enat welegep o, oluk demat moʼgulhentegis.

⁵⁴Aʼgeat de, sa en an nebe nasulat, nemep nasulat, tiso holuk e, enelaluk modok welema aʼge ano eiye otluk oruakma, o ologun pam an en elalugap paik o.

⁵⁵An nebe emin, nemep emin, ai re, honsoʼboru henegeik ebe aʼgeat o.

⁵⁶Sa en an nebe nasulat, nemep nasulat, tiso holuk e, at en an nemin hwedik, ye, an en, at emin hwedik, wolomul o.

⁵⁷An naik elaluk modok welago aʼge en peraknobou wagama wegi ano, at elaluk welago ai en an nelaluk welegi ai ʼgelaʼge, ap sa en, an nebe nasu holuk e, an nelaluk welegi ai en, at elaluk welema o.

⁵⁸Ye, soʼboru ʼbogorl pam ʼbu aga aʼge yu re, his heneʼbalak noʼgu legesa aʼge enebe waraga legesa ai ʼgelaʼge re, erlak aʼgeat de, ap sa en soʼboru ebe aʼge yu nasu holuk, elaluk modok welema o,” oluk moʼgulentesi.

⁵⁹Wene Yesus en asogo moʼgulentesi ai re, at ebe o Kapernaum o aphwami Yahudi aʼge seʼban ogumu eba wene moʼgulentasulat moʼgulentesi.

⁶⁰At Yesus en wene asogo moʼgulentesimu, is at osi iak wogu legesa aʼge ebano logon enebe esanat wene ai enesaʼgo hweligisarik e, disogo egesa, “Wene egei ai re, eʼgin aʼbikmu re, sa ʼgelaʼge en wouwa epegep. Mia o,” oluk egesa.

⁶¹Asogo at ebe moʼgulom erlakma en egesa aʼgeat de, at en e, “Wene egi ano paget nosi en orlumamitsogo ʼbou togwi hegi,” oluk enebabut enak aʼge ʼbalegeitik disogo moʼgulentesi, “Wene moʼgulhentegis ano en, At nenebit, oluk ʼgoboksogo uknobouwogoluk togu legep a?

⁶²An abat daklau wegi ano naduk welegimu pobuk togolik ligagokhwe henil nioluk, honogola ʼgesogo epagup.

⁶³Allah Arogun en aphwami enelalugabenebiso yo. Aphwami ʼgwiangma aʼge enanni pam mesik tu mia o. Aʼge re, wene an en moʼgulhentasu legi ai, Allah Arogun enat oso aʼge no oluk e, enelalugabenebiso wene moʼgulhentasu legi o.

⁶⁴Wene ai pam enelalugabenebiso aʼgeat de, his pema akhit yema demat oluk henede an nebam heʼberik pogwi erlak welegep hegi,” oluk moʼgulentesi. Asogo moʼgulentesi ai re, is pema enede at ebam heʼberik po erlak aʼge emin, at mesik en Yesus ebe woruagoluk yoʼgo louwa aʼge emin, is ai, asogo tua, oluk at page edipmu enat aluk welagarikmu no oluk e, wene asogo moʼgulentesi ai o.

⁶⁵Asogo moʼgulentesirik e, wene mesik disogo moʼgulentesi, “Asogo oluk, an en e, Aphwami Allah en onogola ʼgagaliso erlak holuk, an neʼbek wom mia oluk, moʼgulhentegis ai o,” oluk moʼgulentesi.

⁶⁶Wene asogo moʼgulentasu lagama, at osi iak wogu legesa aʼge ebano enebe esan logon Yesus ukpoluk ʼbogoligisarik e, pobuk eʼberlik noʼgulomogoluk, eʼbek wom erlakma en mo egesa.

⁶⁷Asogo ʼbogoligisema, at Yesus en osi 12 ebano disogo moʼgulentesi, “His ogo re, asogoat uknoboluk ʼbogoluogoluk opogu legep a?” oluk moʼgulentesi.

⁶⁸Asogo moʼgulentasu lagama, at Simon onuk mesik Petrus ano en e, disogo moʼgulesi, “Eige. Nue. Nenebe nenelaluk modok wolom ebele paget e, wene hat en moʼgulnentasu legen ʼgelaʼge yema re, hat ukhoboluk ap sa eʼbek lo epegen.

⁶⁹Nis en e, nonue hat Allah uʼgwarek ebaget edikhoboluk, demat at en perakhobou wagama oluk, pobi hebigerik nenede hat hebam heʼberik pege o,” oluk asogo moʼgulesimu,

⁷⁰at en e, is disogo moʼgulentesi, “An en his henebe 12 yema polikhenebegi erlak no? An enat polikhenebegi o. Aʼgeat de, hat mesigat aʼge re, Iblis en aʼgeat welegen o,” oluk moʼgulentesi.

⁷¹Wene asogo egei ai re, ap Simon Iskariot omlogo onuk Yudas paget egei. At ap ai ebe Yesus osi enebe 12 ebano aʼgeat de, pobuk Yesus ebe woruagoluk yoʼgo laga ai aʼge paget egei o.