Read Silimo Yohanes 7 Bible Online

Yohanes 7 - Silimo bible

Yohanes 7

¹Wene asogo arat moʼgulontoluk e, is ap ʼgaindek Yahudi aʼge en, Yesus ebe woruogoluk obok ʼbalogu legesa ai en e, at ebe o Yudea ʼboluk nosolom ebit en e, o Galilea doʼgo eba nese laga.

²Asogo nese laga eria hegit e, is aphwami Yahudi aʼge o pageat orabo werik poluk welegesa aʼge enede ebesogo welat, ebaget seni sakho no aʼge arat horok lau waga.

³Asogo horok lau wagama welat, at Yesus uʼgwarek arilak aʼge ogo re, enede at ebam heʼberik po erlak welegesa ai en e, disogo moʼgulegisa, “Hat hosi hiak wogwi aʼge ebano en, hat taga legen aʼge tisokhwe enil hiouwagoluk, o yema ukpoluk o Yudea ʼbin o. Ap ʼgain omogoluk holuk e, hisakho togwi erlak o. Holuk e, hat taga legen ai, aphwami ʼgwiangma aʼge enebe ʼberlegat enaluk emagoluk selakmayat seʼbin o,” oluk moʼgulegisa.

⁴

⁵

⁶Asogo moʼgulegisema, at Yesus en e, disogo moʼgulentesi, “O nin erlige nan erlige his en tu re, elit oruak aʼgeat de, an en tu aʼge agauwa owan lau wom erlak o.

⁷Is aphwami ʼgwiangma aʼge en his holuk nak e, enebiraphonobogwi modok erlak aʼgeat de, an e, Is togwi ai wiak modok, oluk oso ai en e, anat enebirapnobogwi o,” oluk moʼgulentesirik e,

⁸mesik disogo moʼgulentesi, “An tu aʼge owan oruak ai en e, seni sorua aʼge ai sorugumu yogodak ya ʼbik erlak o. We, his nak ʼbi lit o,”

⁹oluk moʼgulentesirik, at o Galilea eba mo egei.

¹⁰Asogo mo egeimu, at arilak ebano nak seni ano sorugumu arat ʼbigisarikmu re, at Yesus pobuk aphwami eneperlak oruakhwe hisakho ʼbegei.

¹¹Eba ʼbegeitik oruakhwe, is ap ʼgaindek Yahudi aʼge seni sorugumu welat Yesus ebe heratuogoluk hin wogulat e, “At ebe ʼgeba oruak,” oluk egesema,

¹²is aphwami aʼbik ebano enesaʼgo hweligisarik e, eniak ling-long ogulat, is nin pema akhit en e, “At e, op,” ogwiam e, is nin pema en e, “Erlak o. At e, wiak. Aphwami lalenebiso,” oluk egesa.

¹³Asogo egesa aʼgeat de, is ap ʼgaindek Yahudi aʼge onogorlok en e, eniak ʼbaksogo Yesus obok u erlak. We ling-long nak egesa o.

¹⁴Seni ano nil lagaihwe agauwa ʼburl heisogo Yesus Allah owi werikmu ʼgoluk, wene moʼgulentasu laga.

¹⁵Moʼgulentasukhwe, is ap ʼgaindek Yahudi aʼge en e, disogo egesa, “Eige! Nonogorlok o. Ap yu sekola tu erlak aʼgeat de, di wene yu wene yema noʼgosogo aluk aga epegep,” oluk egesema,

¹⁶at Yesus en e, disogo moʼgulentesi, “An en wene moʼgulhentasu legi ai, an nogola ʼgagalogo moʼgulhentasu legi erlak aʼgeat de, at an peraknobou waga aʼge ano en moʼgulnosokhwe moʼgulhentasu legi o.

¹⁷Ye, ap sa en Allah ogola epasu aʼge hegitsogo tu agai holuk e, an en wene moʼgulentasu legi aʼge ai, Allah en moʼgulosokhwe oso ai o, eselat, Uʼgwarek ogola en ʼgagalogo oso, eselat, enak aʼge holuk e, aluk emayat o.

¹⁸Holuk e, sa en wene uʼgwarek ogola en ʼgagalogo oso aʼge ai, aphwami en erliktuagoluk oso yo. Aʼgeat de, sa en, at perakpou waga aʼge erliktuagoluk oso holuk e, modok iak esei oso erlak o. We, demat oso yo.

¹⁹Ye, wene Allah en nenesaʼgo weregei wene ai, Musa en pelal wokho wokhentesi erlak no? At enat wokhentesi ani o. Aʼgeat de, ap his aʼge mesik en, wene ai hegitsogo tago erlak welat an watnobuagoluk nobok ʼbalogu legep ai nopaget,” oluk moʼgulentesimu,

²⁰is aphwami aʼbik ebano en e, disogo moʼgulegisa, “A! Muʼgat ebabut wiak aʼge hogola ʼgwegeitik hede ʼbalagama ese legen a? Sa en wathebigoluk oso en ese legen,” oluk moʼgulegisema,

²¹at Yesus en e, disogo moʼgulentesi, “An en e, agauwa sabit aʼge pam Allah paget weat welat elalinat mesik erlige tegis aʼge re, his ʼberlek en e, Eige! oluk honogorlok aga ai o.

²²Aʼge re, his henemalik enagap eneʼgerlimu aʼge ʼbalogu legep ai re, edip at Musa puk. Erlak o. Edip Musa ebe owan dagom erlak oruakhwe neneʼbalak en ʼbalonobogu legesa aʼgeat o. Ai en, Musa en asogo ʼbalenebip oluk moʼgulhentesimu, agauwa sabit aʼge pam Allah paget weat welat ʼbalonobogu legep ai o.

²³Ye, wene Allah en nenesaʼgo weregei wene at Musa en moʼgulhentesi aʼge ai sagalugumuno oluk, agauwa sabit aʼge pam Allah paget weat welat enagap eneʼgerlimu aʼge ʼbalogu legep aʼgeat de, an en agauwa sabit aʼge pam Allah paget weat welat, ap mesik ebe modok obaptegis aʼgeat de, his en nopaget wene yaknogu legep.

²⁴Wene ebe dokhumsogo heneperlak aʼgeat de, we wene selakma aʼge nak henaluk welat, aphwami logon wene enebam pagup no yo. Wene dokhumsogo henaluk otluk en, wiak togwi hegitsogoat wene enebam pogu lomup o,” oluk moʼgulentesi.

²⁵At Yesus en wene asogo moʼgulentasu oruakma, is aphwami o Yerusalem aʼge enebe ado logon en disogo ogu legesa, “Ap woruogoluk obok ʼbalogwi ano, ebe ai erlak no? Ebe aiat o.

²⁶Aʼgeat de, ebe yethemit! Nogorlok e. Ogorlok erlaksogoat welat, wene moʼgulnentasukhwe, is en wene oʼgo moʼgulom erlakma en mo ogwi yu. Is ap nonuelak ʼgaindek yema onogola en e, Ap yu nis aphwami delnonobuagoluk Allah en perakpou weik, oluk egei aʼge ano ebe aiat, oluk onogola epegesarik en ogwi hwi a.

²⁷Asogo aʼgeat de, nis aphwami delnonobuagoluk Allah en perakpou weik egei aʼge ano ebe wago holuk, edip ʼgeba en waga hwe, aphwami ʼberlegat eneperlak welema aʼgeat de, ap yu nak e, Ebe ap edip eba aʼge, oluk nenalugat o,” oluk ogu legesa.

²⁸Asogo ogu legesema, at Yesus Allah owi werikmu oruakma re, iak loksogo disogo moʼgulentesi, “An nebe emin, nebe o eba en wegi emin, his henaluk no? An wegi ai re, an nomu nede opoluk wegi erlak o. We, at iak demat nak oso aʼge ano enat peraknobou waga aʼgeat de, at ebe his heneperlak o.

²⁹Asogo aʼgeat de, an nak e, at enat peraknobou wagama, o at oruakma eba enat wegerikmu re, an at ebe naluk o,” oluk moʼgulentasu lagama,

³⁰is en Yesus ebe tenakpouwogoluk tigisa aʼgeat de, at ebe tenakpo hegit lau wom erlak ai en e, ebe tenakpo erlakma en mo egesa.

³¹Is pema en tenakpouwogoluk ogu legesa aʼgeat de, is aphwami aʼbik ebano enebe pema logolagat enede Yesus ebam heʼberik pegesarik disogo egesa, “Ap ai elalin aʼge tegei ye, mia epegep? Ye, aphwami delnonobuagoluk Allah en perakpou weik egei ano wemarik e, ebe pobi tuagoluk elalin aʼge logat tua no? Erlak o,” oluk egesa.

³²Asogo ogulat, is aphwami aʼbik ebano eniak ling-long Yesus obok ogumu, is ap Farisi aʼge enesaʼgo hweligisarik e, is ap Allah eiye aʼge onuelak ʼgaindek enemin en ap Allah owi werik ʼgwelakharok welagai aʼge pema en Yesus ebe tenakpouwagoluk wene weragenebegesa.

³³Asogo ogukhweat, at Yesus en disogo moʼgulentesi, “An we, lodu nak agauwa wei nak henemin wolomultik e, at peraknobou waga aʼge ano eʼbek togolik arat laik o.

³⁴An o eba loluk oruakma, his en an heranebil noʼgu lorogup aʼgeat de, his o an weleikmu eba lo modok mia ai en, an nemin sarlok tul erlak o,” oluk, moʼgulentasu lagama,

³⁵is ap Yahudi onuelak ʼgaindek ebano en, is-is nak ogulat e, disogo egesa, “At yu o ʼgeba loluk oruakma, nis at heratil lultik emin sarlok tul erlak ai en moʼgulnentesi epegep. Ap nis aʼge o ʼbullogo aphwami Yunani aʼge eneʼbek legesarik oruakma eneʼbek loluk, aphwami Yunani aʼge wene moʼgulentasu leigoluk egei epegep a?

³⁶At en moʼgulnentasulat, His an nebe heranebil noʼgu lorogup aʼgeat de, an nemin sarlok tul erlak o. Ye, his o an weleikmu eba lo modok mia o, oluk moʼgulnentesi ai re, at ede noʼgosogo epesirik en moʼgulnentesi epegep,” oluk ogu legesa.

³⁷Wene asogo egesarikmu en, seni ano ologun ʼgoboksogo noʼgumu, Yesus ebe inagarik e, iak loksogoat disogo moʼgulentesi, “Sa en ik nele takhebasu holuk, an neʼbek na wom o.

³⁸Ye, sa en ede an nebam heʼberik pasu holuk e, ik enelalugabenebiso aʼge ano at ap ano ogola en ik elaruk porlolu taga lema, oluk Allah iak pelal wogo aʼge pam egesa hegitsogoat ema o,” oluk,

³⁹wene asogo moʼgulentesi ai re, aphwami enede at ebam heʼberik pogwi aʼge enebe loʼbok Allah Arogun wogontouwa, oluk obok moʼgulentesi aʼgeat de, eria hegit, at Yesus ebe erliktugukhwe ligaga ano owan ligom erlakma no oluk e, Allah Arogun owan ʼbelakpou wom erlak oruakhwe egei.

⁴⁰Wene asogo moʼgulentasuam, is aphwami aʼbik ebano enesaʼgo hweligisarik e, is logon en e, disogo egesa, “Ap yu re, ap mesik Allah iak moʼgulnentau wema egeimu, yetharok welege aʼge anoat o,” oluk ogwiam e,

⁴¹is nin pema en e, “Erlak o. Aphwami delnonobuagoluk Allah en perakpou weik egei aʼge anoat o,” oluk egesa aʼgeat de, is nin pema en e, disogo egesa, “Aphwami delnonobuagoluk Allah en perakpou weik egei aʼge ano, o Galilea en elit wom no? Mia o.

⁴²Aphwami delnonobua aʼge Allah en perakpou weik egei aʼge ai re, ap Daud en dogoʼgwe aʼge, at Daud uʼgwarek owi edip ebe welagama, o Betlehem eba dagema, oluk Allah iak pam pelal wokho pegesema oruak erlak no?

⁴³Oluk asogo il laga legesarik, ologun pam e, aphwami aʼbik ebano Yesus ebaget eniak sagalogo enebe meʼgerigisa.

⁴⁴Asogo meʼgerigisarik, is pema en Yesus ebe tenakpouwogoluk tigisa aʼgeat de, tenakpo erlakma en mo egesa.

⁴⁵Asogo mo egesarik oruakhwe, is ap Allah owi werik ʼgwelakharok welegesa aʼge en Yesus ebe tenakpouwogoluk wene weragenebegesa aʼge ebano togolik is ap Allah eiye aʼge onuelak ʼgaindek emin, is ap Farisi aʼge emin, eneʼbek wegesema re, disogo moʼgulentigisa, “Ap ano ebe tenakpoluk neneʼbek woluk wegep erlak ai, nopaget en mo egep,” oluk moʼgulentigisema,

⁴⁶is en e, disogo moʼgulentigisa, “Eige! Wene at en oso ai ʼgelaʼge re, is ap pema en wene asogo ogukhwe ontogu lege modok erlak aʼgeat de, at en wene muat oso ai en e, ebe ukpege o,” oluk, moʼgulentigisema re,

⁴⁷is ap Farisi aʼge ebano en e, disogo moʼgulentigisa, “His ogo re, at en lalhenebegeimu de, ogu legep hwi a?

⁴⁸Nis ap Yahudi aʼge honuelak ʼgaindek logon en enede at ebam heʼberik pogulat, nis ap Farisi aʼge logon en enede at ebam heʼberik pogulat, tugumu logon ontogu legep a? Modok erlak o.

⁴⁹Modok erlak aʼgeat de, is aphwami aʼbik yema wene Allah en nenesaʼgo weregei wene ano eneperlak welat ogwi ai, Allah en heman enebesimu oruak o,” oluk moʼgulentigisa.

⁵⁰Asogo moʼgulentigisema, ap is aʼge mesik onuk e, Nikodemus, nadugat o hubaʼgo Yesus eʼbek waga aʼge ano en, is disogo moʼgulentesi,

⁵¹“Ap yu logwe. Wene Allah en nenesaʼgo weregei aʼge ano pam e, ap mesik iak enesaʼgo holu erlagat, ye, at tegei aʼge wene edip pobisogo eneperlak welat e, wene naduk ʼbekhit ebam po yo, oluk egei no? Erlak o,” oluk moʼgulentesimu,

⁵²is en e, at disogo moʼgulegisa, “Hat ogo re, howi o Galilea aʼge no? Ap Allah iak moʼgulontogwi aʼge mesik o Galilea en wema oluk Allah iak pam pelal wogo aʼge mesik oruakma hil hagun modok erlakma re, hil opsogo ʼgwelakhasu lomup o,” oluk moʼgulegisa. [

⁵³Asogo moʼgulogu legesarik e, aphwami ebano onowi loʼgwe loʼbok ʼbogulogo legesa.