Read Silimo Yohanes 8 Bible Online

Yohanes 8 - Silimo bible

Yohanes 8

¹Is aphwami ebano lagaihwe re, at Yesus ano dom Zaitun pam ligaga.

²Ligagarik, hubet oʼgwe siaksogo ʼbu agarik e, Allah owi welikmu waga. Wagarik ʼgwegeimu re, aphwami aʼbigat at eʼbek wegesema, at ebe huragarik e, wene moʼgulentesi.

³Wene moʼgulentasu oruakma, is ap Allah iak eiye aʼge emin, ap Farisi aʼge emin en e, hwe mesik ʼbabi tagokhwe enil hegesarik, Yesus eʼbek woluk wegesarik e, hwe ano ebe ʼburl edikpegesarik e,

⁴Yesus disogo moʼgulegisa, “Nue. Hwe yu re, ʼbabi tagokhwe tenakpegerik en heʼbek woluk wege o.

⁵At Musa en wene Allah en nenesaʼgo weregei wene ano pam, pelal wasulat e, is hwami en, at yu tegei ai ʼgelaʼge togwi holuk e, helep pam enebe modok waronobu o, oluk moʼgulnentesimu wene ʼbelak oruak ebano re, hat en noʼgosogo moʼgulnentagun,” oluk moʼgulegisa.

⁶Wene asogo moʼgulegisa ai re, Yesus emde pam wene oʼgo osoma eʼgerli wusogo wene ebam dung houwogoluk egesa aʼgeat de, at odogun ʼgonutak welat eʼgik dum pam en ʼgwiang pam pelal wasulat mo egei.

⁷Asogo hallorak poluk oruakhwe, is en e, “Moʼgulnentemen da,” oluk moʼgulogwi modok oruak en e, at aʼgul lekholuk, disogo moʼgulentesi, “His welegep yema aʼge, ap mesik wiak tago erlak welago aʼge holuk, at en naduk hwe yu helep pam dungsogo woruak o,” oluk,

⁸moʼgulentesirik e, pobuk togolik odogun ʼgonu oluk eʼgik dum pam en ʼgwiang pam pelal wasu laga.

⁹Asogo wasukhwe, is ebano wene moʼgulentesi aʼge ano enesaʼgo hweligisarik e, is enarluedek naduk libegesema re, pobuk enebe ʼberlegat ling-long mesik ʼgegik, mesik ʼgegik ʼbogoligisema, at Yesus hwe ano eʼbirek enematek nak welat e,

¹⁰at Yesus ano aʼgul lekhesirik, at hwe ano disogo moʼgulesi, “Hwe yu nerei yo. Ap ebano re? Is en wene hebam pegesa aʼge ano, ap mesik en wathebegei ya? Erlak a,” oluk moʼgulese lagama,

¹¹at en e, “Nue. Modok erlak o,” oluk moʼgulesimu, at Yesus en e, disogo moʼgulesi, “An en ogo re, wene hebam poluk wathebik erlagat o. Hebe howi pam lak o. Laguntik holuk e, hwerli yogodak ya en pobuk wiak logon togun no yo,” oluk moʼgulesirik e, owi pam perakpesi.]

¹²Pobuk e, at Yesus en is aphwami ebano wene mesik disogo moʼgulentesi, “Aphwami o dakharak enebasu legi aʼge ai, anat o. Sa en an neʼberlik denaga lema holuk e, an nebe o dakharak welat enelalugabenebise legi aʼge anoat woknobua ai en e, at ai o hiktakma denaga lema erlak o,” oluk ese lagama,

¹³is ap Farisi aʼge ebano en e, “Hat e, hobok enaluk emagoluk, huʼgwarek enat moʼgulentasu legen ai re, hiak esei enat ese legen o,” oluk moʼgulegisema,

¹⁴at Yesus en e, disogo moʼgulentesi, “An wegi aʼge emin, laik aʼge emin, his heneperlak aʼgeat de, an nuʼgwarek nak e, nebe o eba en wegi, ye, pobuk o ebayat laik, oluk naluk ai en e, an nobok enaluk emagoluk nuʼgwarek enat moʼgulentasu legi ai re, wene ai demat moʼgulentasu legi o.

¹⁵His en wene nebam pogu legep eba re, his aphwami-aphwami nak wene enebam pogulat, noʼgorlogulat, togu legep ʼgelaʼgeat nebam pogu legep aʼgeat de, an nak e, aphwami wene enebam pasu legi modok erlak o.

¹⁶Aʼge re, an en wene enebam pelema re, ai an nomu nak puk. Naik peraknobou waga aʼge ano eminat welat ese legi ai en e, wene hegitsogoat aphwami enebam pele o.

¹⁷Wene, Allah en nenesaʼgo weregei wene ai pam disogo egei, Aphwami wene enebam pogulom holuk e, ap wene edip tigisa enaluk aʼge enebe ʼbiren en eniak eʼbirek hegit nak ogwi holuk e, wene ai demat u o, [5] oluk egeimu pelal wogo pegesa.

¹⁸Ai ʼgelaʼge re, an nobok, nuʼgwarek en eselat, naik peraknobou waga aʼge en eselat, moʼgulhontogu lege ai yo,” oluk ese lagama,

¹⁹is en e, “Hat haik ai ʼgeba oruak,” oluk moʼgulegisema, at Yesus en e, “An nebe yu emin, naik emin, heneperlagat o. An nebe henaluk wellepma re, naik ai ogo henalugat wellep o,” oluk moʼgulentesi.

²⁰Wene asogo moʼgulentesi ai re, at ebe Allah owi werikmu peti uang Allah paget pogumu eba eragam welat egei. Asogo osoam, at ebe tenakpo erlige owan lau wom erlak oruakhwe no oluk e, is aphwami ebano pema en tenakpo erlakma en mo egesa.

²¹Asogo mo egesema re, at Yesus wene pobuk mesik is ebano disogo moʼgulentesi, “An nebe pobuk laigat o. Loluk eba oruakhwe, his an heranobogup aʼgeat de, o an laikmu eba his lo mia ai en e, his wiak togu legep aʼge wene henebam oruakhweat de, henebe warorogup o,” oluk moʼgulentesimu,

²²is ap ʼgaindek Yahudi aʼge en e, disogo egesa, “Ap yu en moʼgulnentasulat e, O an laikmu eba his lo mia o, oluk moʼgulnentesi ai re, at uʼgwarek en wathwerlaigoluk oso hwi a,” oluk egesema,

²³at Yesus en e, disogo moʼgulentesi, “An nebe re, ʼbogorl abel likho aʼgeat wegirik welegi o. Aʼge re, his nak e, abel opma yema aʼgeat o. Honowi edip ʼgwiangma yemayat o. Aʼge re, an nowi edip ʼgwiangma yema erlak o.

²⁴Ai en e, an en wene naduk moʼgulhentasulat e, Wiak togu legep aʼge wene henebam oruakhwe warorogup o, oluk moʼgulhentegis ano re, disogo oluk egi. His en an nebaget e, At ebe otok modok welago aʼgeat o, oluk henede nebam heʼberik pagup erlak holuk e, wene henebam oruakhweat warorogup ai en egi o,” oluk moʼgulentesi.

²⁵Asogo moʼgulentesimu, is en e, “Hat hebe re, sa no,” oluk ebam hin wokhegesema, at en e, disogo moʼgulentesi, “ʼBurlat pobuk ai re, nopaget en moʼgulhentaik no.

²⁶An en di wene yu wene aʼbigat moʼgulhentasulat, wene henebam pasulat, noʼgorliselat, tu elirat aʼgeat de, at peraknobou waga aʼge ano iak demat nak oso ai en, at en osokhwe nesaʼgo hwelise legi aʼge aiat his ʼgwiangma aʼge yema moʼgulhentasu legi o,” oluk moʼgulentesi.

²⁷Asogo moʼgulentesi aʼgeat de, is en e, “At aik Allah paget obok moʼgulnentasu,” oluk wene ai pobitu erlakma en welegesa.

²⁸Asogo pobirak erlak oruakhwe, at en e, disogo moʼgulentesi, “An abat daklau wegi ano, his en an nebe e pam ediknebagup ai erlige, his en e, Otok modok welago aʼge ano ebe yuat o. At en wene moʼgulnentasulat e, ogola en ʼgagalogo u erlakma en, we, at aik en moʼguloso aʼge nak moʼgulnentasu lagama, oluk, henaluk emayat ani o.

²⁹At peraknobou waga aʼge ano, ebam liok oso aʼge nak taga legi ai en e, at en an nebe ʼgobologo uknobo erlakma en neʼbirek hwedik modok welagai o,” oluk moʼgulentesi.

³⁰At Yesus en wene asogo moʼgulentasu lagama, aphwami enebe esanat enede at ebam heʼberik pegesa.

³¹Enede asogo heʼberik pegesema, at Yesus en e, is ap Yahudi aʼge enede at ebam heʼberik pegesa aʼge disogo moʼgulentesi, “His en, an niak hologo togu lorogup holuk e, henebe an nosi demat aʼge neragam welat e,

³²wene dem wene henaluk ema o. Henaluk emma, wene dem ai pamat henebe herle hebilogo henematekma henebaik o,” oluk moʼgulentasu lagama,

³³is en e, disogo moʼgulegisa, “Nis e, ap Abraham en dogoʼgwe aʼge oluk e, nenebe aphwami logon eneragam aʼge om erlak aʼge nak welege o. Aʼgeat de, hat en eselat e, Henebe herle hebilogo honomuat henebaik o, oluk egen ai re, hede ʼgesogo epegentik en egen,” oluk moʼgulegisema,

³⁴at en e, disogo moʼgulentesi, “Aphwami wiak togwi aʼge ai enebe loʼbok e, wiak togwi aʼge ai eragam aʼgeat, oluk demat moʼgulhentegis o.

³⁵Ye, is eneragam aʼge ai re, onuelak enemin modogat welagai erlak aʼgeat de, eneiyagai demat aʼge nak e, enemin modogat welagai o.

³⁶Ai ʼgelaʼge re, an Allah ebe omlogo en, his herle hebilogo honomuat henebaik holuk e, demat herle hebelik honomuat wolorogup o,” oluk moʼgulentesi.

³⁷Asogo moʼgulentesirik, mesik disogo moʼgulentesi, “Aʼge re, his e, ap Abraham en dogoʼgwe aʼge welegep, eba re, an nalugat o. Aʼgeat de, his honogola en e, an niak wo henebit ai en e, his enat an nebe watnobuogoluk nuwaʼgun ʼgabolugu legep ai o.

³⁸An e, naik emin welat nil hasu legi aʼgeat moʼgulhentasukhweat de, his nak e, henaik ano en oso aʼge iak hologo togu legep o,” oluk moʼgulentesi.

³⁹Asogo moʼgulentasu lagama, is en e, “A! Nis nenaik Abraham at o,” oluk egesema, at en e, disogo moʼgulentesi, “His henebe demat Abraham en dogoʼgwe aʼge wellepma re, Abraham taga lagasogoat tugullep o.

⁴⁰Aʼge re, an wene dem wene Allah en osokhwe nesaʼgo hwelegis aʼgeat moʼgulhentasu legi aʼgeat de, his en an nebe watnobuogoluk nuwaʼgun ʼgabolugu legep ai ʼgelaʼge, at Abraham en asogo taga laga erlak aʼgeat togu legep o.

⁴¹His e, henaik ano en tiso aʼge togu legep o,” oluk moʼgulentasu lagama, is en e, disogo moʼgulegisa, “A! Nis ʼbabi ʼgwelogo daknenebigisa aʼge puk. Nis nenaik Allah emategat o,” oluk moʼgulegisema,

⁴²at en e, disogo moʼgulentesi, “His e, demat henaik Allah wellepma re, an nomu nede opoluk wegi puk. We, nebe edip Allah aʼge oluk e, at en peraknobou wagama wegirik welegi ai en e, an nebe henedesogo wellep o.

⁴³Asogo wegirik, wene moʼgulhentasu legi aʼge his pobirak erlak welegep ai nopaget. Asogo welegep ai re, an niak hwelak wolom henebit ai enat o.

⁴⁴Asogo henebit ai re, his henaik Iblis atma, his en at agai epasu aʼge aiat henagai en togu legep ai o. Ye, at Iblis ai edipmu enat aphwami warenebiso aʼgeat o. At wene dem wene ogola erlak ai en e, wene dem wene ogukhwe eniak ago hasu erlak o. Iblis iak esei oso ai re, at ebabut otogatma at iak eseiyat oso yo. Eniak esei ogwi ai re, edip e, arat o.

⁴⁵Aʼgeat de, an en wene dem wene moʼgulhentasu legi ai re, his en e, Demat, oluk pobi togu legep erlak o.

⁴⁶An en wiak tagoma, his logon en henil niegep aʼge holuk e, moʼgulnemis da. Erlak o. An en wene dem weneat moʼgulhentasukhwe, pobi togu legep erlak ai nopaget.

⁴⁷Ap sa en ebe Allah aʼge holuk, Allah iak ai esaʼgo hweliso aʼgeat de, his e, henebe Allah en aʼge puk. Mu aʼge no oluk e, at iak henesaʼgo holu henebit ai o,” oluk moʼgulentesi.

⁴⁸At Yesus en wene asogo moʼgulentesimu, is ap Yahudi aʼge ebano en e, disogo moʼgulegisa, “Hat hebe ap Samaria aʼge yu re, logwe! Muʼgat ebabut wiak aʼge hogola ʼgwegeitik oruak o, oluk moʼgulhogu lege ano demat moʼgulhogu lege hegi,” oluk moʼgulogu legesema re,

⁴⁹at en e, disogo moʼgulentesi, “An muʼgat ebabut wiak aʼge nogola ʼgwilo erlak o. An en naik erliktisokhweat de, his en an nonuk wiagap pogu legep o.

⁵⁰Aʼge re, an nuʼgwarek nebaget erliknobuagoluk taga legi puk. Erlak o. At e, an erliknobuagoluk, at ap mesik en wene enebam pasulat, noʼgorliselat, tua aʼge oruak o.

⁵¹Ye, ap sa en an niak hologo taga lema holuk e, warom erlakma en elaluk modok welema o, oluk demat moʼgulhentegis,” oluk, moʼgulentasu lagama,

⁵²is ap Yahudi aʼge ebano en e, disogo moʼgulegisa, “Ap Abraham emin, ap Allah iak moʼgulontogu legesa aʼge ebano emin, arat waretil legesa aʼgeat de, hat en eselat, Ap sa en an niak hologo taga lema holuk, warom erlakma en elaluk modok welema o, oluk egen ai en e, muʼgat ebabut wiak aʼge demat hogola ʼgwegeitik oruak, oluk, pobi hebige o.

⁵³Nis neneʼba Abraham ebe waraga aʼge ai, ebe malik wei aʼge ʼgelaʼge. Aʼge re, hat nak e, hebe ʼgain a? Is ap Allah iak moʼgulontogu legesa aʼge ebano waretil legesa aʼgeat de, hat hebe sa ʼgelaʼge en ese legen no,” oluk moʼgulegisema,

⁵⁴en e, disogo moʼgulentesi, “An nuʼgwarek en erliktagallema re, we ʼburlat erliktagalle o. An naik ebe naluk aʼge ai, his en, at ebe pobirak erlak welat, Nis nenaik Allah, oluk ogu legep ano, at ebe enat, erliknebiso yo. An e, At ebe neperlak, oluk elimu re, his heniak esei ogu legep ʼgelaʼgeat eli o. Aʼge re, at ebe nalukmu no oluk e, at iak hologo taga legi o.

⁵⁵

⁵⁶Ye, his heneʼba Abraham ano en e, an weik aʼge paget eselat e, At wagoam nil haik, oluk an nalik werise lagama no oluk e, il arat niesirik ogola agai hesi,” oluk moʼgulentasu lagama,

⁵⁷is ap Yahudi aʼge ebano en e, disogo moʼgulegisa, “Hat hebe dagegen pam en 50 tahun owan lailo erlak oruakhweat de, Abraham elirat hil hegentik en ese legen a? Mia o,” oluk moʼgulegisema,

⁵⁸at en e, disogo moʼgulentesi, “An niak demat moʼgulhentaik o. At Abraham ai ebe owan dagom erlakhwe, an notok modogat welago yo,” oluk moʼgulentesi.

⁵⁹Asogo moʼgulentasu lagama, is ap ebano en e, at Yesus ebe woruogoluk helep eneʼgikmu wegesa aʼgeat de, Yesus ebe hisak agarik en, o Allah owi werikmu ukpoluk momu laga.