Read Silimo Yohanes 9 Bible Online

Yohanes 9 - Silimo bible

Yohanes 9

¹At Yesus ebe o eba ukpoluk ebela pam lasulat, il yethesi ʼgal e, ap mesik ia ogola en modok il hopnik dagaga aʼge il hesi.

²Asogo hesimu, at osi ia wogu legesa aʼge ebano en e, disogo moʼgulegisa, “Nue. Ap il hopnik aʼge ai re, edip at uʼgwarek en wiak tegei pam en a? At e, edip aik iak wiak tigisa pam en ebe asogo dagaga ya,” oluk moʼgulogu legesema,

³at Yesus en e, disogo moʼgulentesi, “Edip ap yu emin, aik ia emin, wiak tigisa pam il hopnik aʼge dagaga puk. At e, Allah en ap yu obap tagoam aphwami en enil holuk, at Allah en tago aʼge enaluk emagoluk dagagama o,” oluk moʼgulentesirik e,

⁴mesik disogo moʼgulentesi, “Pobuk o hik ua o. Asogo hik uema re, aphwami pema en di aʼge yu aʼge tu mia ema ai en e, at peraknobou waga aʼge en tago aʼge ai, o yogodak o dakharak oruakhwe ya pamat togu lomok o.

⁵An ʼgwiangma yema welat, nebe o dakharak ʼgelaʼge no oluk e, aphwami o dakharak enebasu legi o,”

⁶oluk asogo arat moʼgulentesirik e, was topuksogo ʼgwiangma pesirik en, eʼgik en ʼgwiang emin sip-sip ʼgelaʼge takpoluk en ap ano il pam egilhesi.

⁷Asogo egilhesirik e, ap ano disogo moʼgulesi, “Horogole ik Siloam omugwe etle emethai lak o,” oluk moʼgulesi. Ik ai nis neniak pam e, perakpesi u ʼgelaʼge onuk Siloam oruakma moʼgulesi. Asogo perakpesimu, at ano lagarik, orogole emethesi ʼgal e, il op agama togolik waga.

⁸Asogo op otluk wagoma, is aphwami at arilak aʼge emin, is logon ap ano naduk emde ʼgonu wiak osokhwe enil hogu legesa aʼge emin, enil hegesarik e, disogo egesa, “Eige! Nogorlok e. Ap yu re, ebe hweriogo nak welat, oʼgonu wiak oso aʼge erlak no? Ap anoat o,” oluk egesema,

⁹is aphwami ebano pema en e, disogo egesa, “Ebe arat o,” ogulat, is nin pema en e, “At puk. Mu aʼge de, at orogole ʼgelaʼge o,” ogulat, egesema at uʼgwarek en e, “An nebe demat o,” oluk moʼgulentesimu,

¹⁰is en at ebam hin wokhogulat e, “Hil ai noʼgosogo op aga,” oluk moʼgulegisema,

¹¹at ap ano en disogo moʼgulentesi, “Ap onuk Yesus ogwi aʼge ano en ʼgwiang aʼge eʼgik en sip-sip ʼgelaʼge takpoluk nil pam egelik nebesirik disogo moʼgulnesi, Horogole ik Siloam omugwema etle emesi lu o, oluk, moʼgulnesimu, at en moʼgulnesi ʼgelaʼgeat legirik, arat emethegi ʼgal e, nil ano op aga o,” oluk moʼgulentesimu,

¹²is en e, at moʼgulugulat e, “Ap ai ebe ʼgeba oruak?” oluk egesema, at en e, “An neperlak o,” oluk moʼgulentesi.

¹³Asogo egeimu, is en e, ap il hopnik aʼge ano ap Farisi aʼge eneʼbek woluk legesa.

¹⁴Ai erlige re, agauwa sabit aʼge pam Allah paget weat oruakhwe, at Yesus en ʼgwiang aʼge si-sip ʼgelaʼge takpoluk ap il hopnik aʼge ano dektak pesi.

¹⁵Asogo obaptegei ai en, is ap Farisi aʼge en ap il hopnik aʼge ano ebam hin wokhogulat e, “Hil ai noʼgosogo op aga,” oluk egesema, at en e, “At ano en ʼgwiang aʼge sip-sip ʼgelaʼge takpoluk nil pam egilniesimu, emesi legimu re, op aga o,” oluk moʼgulentesimu,

¹⁶is ap Farisi aʼge pema en e, disogo egesa, “Agauwa sabit aʼge pam Allah paget weat wolom o, oluk, wene ʼbelak aʼge ai sagalogo ukpesirik tegei ai en e, at ebe Allah oruakma en waga aʼge puk. Erlak o,” oluk egesa aʼgeat de, is ap pema en e, “At ebe wiak tiso aʼge wellepma re, wene pobi tuagoluk elalin aʼge disogo tu no? Erlak o,” oluk, is onogola asogo hun domok epegesarik eniak sagalugulat enebe meʼgerigisa o.

¹⁷Asogo meʼgerigisarik e, ap il hopnik aʼge ano ebam hin pobuk wokhogulat e, “Hat en e, At en nil obapnebesi oluk egen ani o. Holuk e, ap ai obok hat en noʼgosogo ogun,” oluk moʼgulegisema, at en e, “At ebe ap Allah iak moʼgulontogwi aʼge anoat o,” oluk moʼgulentesi.

¹⁸Asogo moʼgulentesi aʼgeat de, is ap ʼgaindek Yahudi aʼge en naduk ap yu il hopnik welaga aʼgeat de, yogodak arat op agama o, oluk pobitu enebit en e, ap ano aik ia worlontogwiam wegesema re, enebam hin wogontugulat e,

¹⁹“His en e, malik il hopnik aʼge dagagama egep ano re, ebe yuat a? Holuk e, yogodak il noʼgosogo op aga,” oluk moʼgulentigisema,

²⁰is en moʼgulontogulat e, “Malik yu re, ebe nis en derige aʼge il hopnik aʼgeat dagaga, ogu lege ano aʼgeat de,

²¹noʼgosogo op aga hwe, nis neneperlak o. Ye, ap sa en obaptegei hwe, nis neneperlagat o. Holuk e, at ebe malik wei aʼge puk. Ebe arlueatma re, at uʼgwarek ebaget moʼgulhontouwagoluk ebam hin wokhemit o,” oluk moʼgulentigisa.

²²Asogo moʼgulentigisa ai re, is ap ʼgaindek Yahudi aʼge en, ogulat e, “Is aphwami enebe loʼbok en, Ap yu re, Allah en nis aphwami delnonobuagoluk perakpou weik egei ano Kristus ebe yuat o, oluk ʼbaksogo oso holuk e, seʼban ogumu o ogola en de, lisogo lebikpouwok o,” oluk wene ʼbaligisa aʼge oruak ai en e, ap ai aik ia is ap ʼgaindek Yahudi aʼge onogorlok en e,

²³disogo egesa, “At ebe re, malik wei aʼge puk. Ebe arlueatma re. At uʼgwarek en moʼgulhontouwagoluk ebam hin wokhemit o,” oluk moʼgulentigisa ai o.

²⁴Asogo egesema, is en e, ap nadugat il hopnik aʼge dagagarik welaga aʼge ano pobuk, “Suk,” oluk worlhogwiam wagama re, disogo moʼgulegisa, “Ap ai ebe wiak tago aʼge nis nenaluk welat e, hat huʼgwarek en hiak demat Allah onuk hoʼbuk ʼbalogo moʼgulnentemen o,” oluk moʼgulegisema,

²⁵at en e, disogo moʼgulentesi, “Ap ai ebe wiak tago aʼge hwi a? Erlak a. An neperlak aʼgeat de, an nadugat nil hopnik welegi aʼge re, yogodak ya op egirik welegi ai nak e, naluk o,” oluk moʼgulentesimu,

²⁶is en e, disogo moʼgulegisa, “At en noʼgosogo obaphebegei? Hil noʼgosogo obaphebegei,” oluk moʼgulegisema,

²⁷at en e, disogo moʼgulentesi, “Wene arat naduk moʼgulhentegis aʼgeat de, henesaʼgo holu henebit en tugularat de, pobuk henesaʼgo holuogoluk en de, ogu legep ai nopaget. His ogo at osi om henagai en ogu legep hwi a? I a,” oluk moʼgulentesimu,

²⁸is en eniak esegen yagogulat e, “Hat at ot egentik ese legen hegi. Nis e, ap Musa osi welege o.

²⁹Ye, ap Musa paget e, wene Allah enat moʼgulesi, oluk, nis nenaluk aʼgeat de, ap ai paget nak e, ebe o ʼgeba en waga aʼge hwe, nis neneperlak o,” oluk ogu legesema,

³⁰at en e, disogo moʼgulentesi. “Eige! Nogorlok e. Ap ai en, an nil obapnebesi aʼgeat de, his en, At ebe o ʼgeba en waga aʼge hwe, nis neneperlak, oluk ogu legep ai, elalinsogoat ogu legep o.

³¹Aphwami wiak togwi aʼge Allah en eniak esaʼgo hweliso modok erlak ai en, nis nenaluk o. We, aphwami Allah onogorloksogo welat, at ogola epasu aʼge hegitsogo togwi aʼge holuk, eniak Allah esaʼgo hweliso yo.

³²Ye, aphwami edipmu en til til yogodak hwerli, aphwami logon enil hopnik aʼge dagagaiam pobuk obabenebigisa, oluk nenesaʼgo hologu lege modok erlak o.

³³Ap ai Allah en perakpou welep erlak wellepma re, at en di tiselat, yu tiselat, tiso ai ʼgelaʼge tagallep erlak o,” oluk moʼgulentasu lagama,

³⁴is en e, disogo moʼgulegisa, “Hat hebabut wiak aʼge dagegentik, wiak modok taga legen aʼgeat de, hat en wene nis moʼgulnonto no? Modok mia o,” oluk moʼgulegisarik e, o seʼban ogumu ebano en eʼgik lisogo leget oʼborl akhit lebikpou wegesa.

³⁵Is aphwami en, “Is en ap ano leget oʼborl akhit lebikpou wegesa,” oluk egesema, at Yesus esaʼgo hwelegeitikmu en, pobuk ap ano emin sarlok tigisarik e, disogo moʼgulesi, “Ap mesik ebe abat daklauma, oluk egesa ano, ebe pobirak poluk hede ebam heʼberik pagun a?” oluk moʼgulesimu,

³⁶at en e, disogo moʼgulesi, “Ap ai ebe sa no, nue. An en ap ai ebe pobirak poluk e, nede ebam heʼberik paik en e, moʼgulnemin o,” oluk moʼgulesimu,

³⁷at Yesus en e, “Hat hil arat niegen aʼge ano yogodak neʼbirek weneane ogu lege nebe yuat o,” oluk moʼgulesimu,

³⁸at en e, disogo moʼgulesi, “Yogodak arat pobirak hoboluk nede hebam heʼberik pegi o, nue,” oluk odogorlu pam huragarik e, Yesus erliktegei.

³⁹Asogo erliktegeimu, at Yesus en e, disogo moʼgulesi, “An en e, aphwami logon enil hopnik aʼge obabenebiselat, is logon enil op aʼge hiktak enebasulat, taga leigoluk nebe ʼgwiangma yema ʼbu egi o,” oluk osokhwe,

⁴⁰is ap Farisi aʼge logon eba welat enesaʼgo hweligisarik e, disogo egesa, “Hat hogola en e, Is enil hopnik aʼge, oluk epasulat, nis ogo moʼgulnentigen a? Erlak o,” oluk moʼgulegisema re,

⁴¹at Yesus en e, disogo moʼgulentesi, “His henil hopnik wellepma re, his wiak oluk wene henebam pelep erlak o. Aʼgeat de, his en e, Nis nenil op hogu lege, oluk ogu legep ai en e, Allah en, His wiak, oluk, wene henebam pesimu oruak o,” oluk moʼgulentesi.