Read Silimo Peragenebesi 1 Bible Online

Peragenebesi 1 - Silimo bible

Peragenebesi 1

¹Teofilus nue. An en naduk wene pelal wokho heʼbek perakpou wegi ai re, at Yesus en di ebele yu ebele tagalat, di wene yu wene moʼgulentasulat, taga laga wene edip pam hwerli en,

²at aik en ebe ʼbogorl pam woluk ligaga ai hwerli, pelal wokho perakpou wegi ai. At ebe ʼbogorl pam owan woluk ligom erlak oruakhwe, at osi enebe pulogo yoʼgo onoboluk peragenebaigoluk tegei aʼge ebano Allah Arogun anni pam enesaʼgo weregei.

³Yesus ebe waragarik elaluk otluk, agauwa 40 enemin welat e, at ebe dokhumsogo pobi tuagoluk di aʼge yu aʼge elalin aʼge aʼbigat taga laga. Asogo tagalat, at en e, “An nebe yu. Enil dokhumsogo niouwak o,” oluk pobuk naduk onorogolema inotluk onugentasulat, Allah eragam welagai wene moʼgulentasulat, taga laga.

⁴Agauwa mesik erlige at osi enemin mesikmu odoktak welat e, disogo moʼgulentesi, “Yohanes en ik olomu ʼbelabenebise laga aʼgeat de, his agauwa loksogo wolom erlakmayat, Allah en ik olomu ʼbelaphonobu ʼgelaʼge, at Arogun henebam ʼbelakpouma ai re, henebe o Yerusalem yema en ʼbogologup o. An naik en e, Is wogentaik, oluk wene wusogo obok moʼgulhentesi aʼge ai, an en naduk obok moʼgulhentegis aiat o. Holuk e, yetharok wolomup o,” oluk obok moʼgulentesi.

⁶At Yesus en wene asogo moʼgulentesirik e, at osi enemin odoktak welat e, osi en at ebam hin disogo wegesa, “Nue o. Pageat di aphwami yu aphwami nis Yahudi aʼge nonue ʼgain onuk logo aʼge eragam welegesa ai ʼgelaʼge, pobuk asogo wolomul aʼge, yogodak ya pamat nenebagun a? Owan a,” oluk moʼgulegisa.

⁷Moʼgulegisema re, at en disogo moʼgulentesi, “Wene egep ai re, an naik eiye aʼge en epesi hegitsogoat ema ai his en e, Hwerli ai hwerli pam welemarik en ema o, oluk his henaluksogo wolom mia o.

⁸Asogo aʼgeat de, Allah Arogun henebam ʼbu ago holuk, henanni ema o. Henanni emarik e, o kota Yerusalem en, propinsi Yudea en, Samaria en, hwerli o di owi yu owi esaʼgo esaʼgo eba ʼberlegat lagalat, an di ebele yu ebele til denagokhwe henil niegep aʼge ano, an nebaget moʼgulentil laga lomup o,” oluk moʼgulentesi.

⁹Wene asogo arat moʼgulentesimu, Allah en at ebe ʼbogorl pam woluk ligagoam, enil oruakhwe o hena en sebelhesimu re, enil pobuk ho erlak.

¹⁰Ho erlak welat, at Yesus ebe woluk ligagokhwe enil ʼbogorl akhit likharok oruakhwe erianoat, ap enebe ʼbiren onosum ʼgut ʼbuktak aʼge eneragam inla ʼbu egesa.

¹¹Ina ʼbu egesarik e, disogo moʼgulentigisa, “His aphwami o Galilea doʼgo aʼge yu logwe. Henil ʼbogorl pam likharok welegep ai nopaget. At Yesus his yema honoboluk e, Allah en ʼbogorl pam woluk ligagokhwe henil hegep ai ʼgelaʼge, pobuk asogoat ʼbuma o,” oluk moʼgulenta ʼbu egesa.

¹²Asogo moʼgulentigisema, dom Zaitun pam eba en ʼbu egesarik e, o kota Yerusalem walegat e, puk. We, horok satu kilometer ʼgelaʼge ʼgu egesa.

¹³ʼGu egesarik, o pam eba ʼgwigisarik e, o holiʼbo welegesema ebanoat ligegesarik welegesa. Is ai enebe re, Petrus o, Yohanes o, Yakobus o, Andreas o, Filipus Tomas eʼbirek o, Bartolomeus Matius eʼbirek o, Alfeus omlogo Yakobus ai o, Simon, “O yema nonowirak aʼge nak wolomul o,” oluk ese laga aʼge ai o, Yakobus omlogo Yudas ai o, enemin welegesa.

¹⁴Is enebe eria emin, Yesus ia Maria emin, hwami logon emin, Yesus osi eʼberlik aʼge eneminat, enebe ʼberlegat enede mesigat welat e, seʼban ogwi modok welegesa.

¹⁵Ai erlige, Allah eiyagai logon enemin enebe 120 ʼgelaʼge odoktak welat, at Petrus eneʼgerlakma en inagarik e, wene disogo moʼgulentesi,

¹⁶“Narilak norokhwi o. At Yudas ano re, nis nenemin yabuk opsogo tise lemagoluk Yesus en yoʼgo poluk edikpesimu, nis nenemin op welegerigat de, pageat wene Allah Arogun en at Yudas paget egeimu, at Daud en pelal wokho pesi aʼge oruakma, at Yudas en is ap Yesus ebe tenak pouwagoluk wogonoboluk waga ai, tu hegirat aga o,” oluk moʼgulentesi.

¹⁸(At Yudas e, wiak tegei ai paget, oʼgo wogegisema re, ʼgwiang oʼgo ʼbali laga. ʼBali lagarik eba loluk orogole sogup wathwerlasulat, ogum supsogo re, olot ʼbullogo waraga.

¹⁹Asogo waragama, aphwami o Yerusalem welegesa aʼge enebe ʼberlegat enesaʼgo hweligisarik e, enaluk agarik, ʼgwiang ai paget, nis neniak pam emep ʼbegeimu u ʼgelaʼge, is eniak pam onuk Akeldama tualigisa.)

²⁰Asogoat, at Petrus en disogo moʼgulentesi, “Weni pelal wogo aʼge buku Mazmur ano pam disogo egesa, O at oruakma owi poluk emak. Aphwami logon at owi pam eba enebe erlagat welemak o, [1] oluk pelal wegesa. Ye, mesik e, disogoat egesa, At ebe ebalema ap mu aʼge edikpouwak, [2] oluk egesa.

²¹Holuk e, nis nenemin nese lemagoluk, ap mesik edikpouwok. Ap edikpul ai re, hwerli at Yohanes ik olomu ʼbelabenebise laga ai hwerli en e, nonue ʼgain Onuk Logo aʼge Yesus emin nin hwedik nan hwedik at eʼberlik noʼgu legerik, hwerli Yesus aik en nis neneʼgerlakma en ʼgegilogo ʼbogorl pam woluk ligaga ai hwerli, nenemin noʼgu lege aʼge holuk, Yesus elaluk aga ai demat. Nenil hegerik, oluk nenemin moʼgulentil denaga lemagoluk, edikpouwok o,” oluk moʼgulentesi.

²³Moʼgulentesimu re, is en e, “Ap yu edikpouwok a? Ap yu edikpouwok a,” oluk enebe ʼbiren ononuk egesa. Ap mesik onuk henagan, Yusuf ogulat, Barsabas ogulat, Yustus tualogo ogulat, ogu legesa aʼge. Ye, ap mesik Matias ai.

²⁴Ononuk egesarik, Allah yoʼgo pogulat e, “Nenaik o. Ap Yudas hat hiak moʼgulentil denaga lemagoluk yoʼgo pegen aʼgeat de, at en ukpoluk warom hegitsogoat waragama, ebalema ap enebe ʼbiren yu, hat en ap ʼge ʼgelaʼge yoʼgo pegen. Hat aphwami enebe ʼberlegat enede haluk ai o. Holuk e, Ap ebe yu yoʼgo pegi o, oluk, hat en moʼgulnentemen o,” oluk moʼgulegisa.

²⁶Asogo egesarik e, “Ap yu edikpul a? Yu edikpul a,” oluk helebeʼgen sa pam hegit ema oluk ononuk ʼbalholuk walhegesa ʼgal e, ap Matias ebam hegit aga. Hegit agama, is ap Yesus en enebe yoʼgo onoboluk peragenebesi aʼge ebano enebe 12 aʼge de, 11 agama re, 12 emagoluk Matias enemin welemagoluk edikpegesa ai o.