Read Silimo Peragenebesi 10 Bible Online

Peragenebesi 10 - Silimo bible

Peragenebesi 10

¹O Kaisarea eba ap esan lok mesik tentara Roma aʼge onuk ap Italia esan oluk ogu legesa aʼge ap mesik onue ʼgain aʼge onuk Kornelius welaga.

²At Allah ogorloksogo welat eiyagai enemin en erliktogu legesa. Erliktogulat e, is aphwami Yahudi aʼge ebano logon eneʼgikmu erlak enerlagaik aʼge loksogo lerontogulat, seʼban mo u erlakma en oso modok welaga.

³Asogo oso modok welat e, agauwa mesik erlige re, mo hweya lai lasukhwe jam 3 ʼgelaʼge pam, abi ʼgelaʼge disogo hesi. Malaikat Allah en yoʼgo ʼbelabonobou wago aʼge ebano mesik ʼbu agarik Kornelius eʼbek ʼgwegeitik e, “Kornelius,” oluk moʼgulesi.

⁴Moʼgulesimu, at Kornelius il at ebam putsogo yethasulat, ogorlok agarik e, “I, nue. Nopaget,” oluk egeimu, at en e, “Hat seʼban eselat, aphwami eneʼgigem erlak enerlagaik aʼge lerentasulat, taga legen ai re, Allah aluk agarik e, hebam ede eberak oruak o.

⁵O yogodak o Yope eba ap mesik onuk naduk aʼge Simon. Pobuk aʼge Petrus, ogwi aʼge ano wemagoluk, ap mesik at yoʼgo perakpomup o.

⁶At ebe ap ʼbok ʼgelaʼge wagarik e, ap Simon wam sapi agap domba agap noʼgorlak ereʼgiso aʼge ano owi ik laut lok yeʼgelak eragam eba oruak o,” oluk moʼgulesi.

⁷Arat moʼgulotluk e, malaikat Allah en yoʼgo ʼbelagonobou wago aʼge ano libagarik ligagama re, at Kornelius en, eragam aʼge owi pam welagai aʼge enebe ʼbiren emin, ap mesik ebe tentara, eʼgaragun aʼge Allah ebe erliktagalat Kornelius emin modok denaga laga aʼge ai emin, worlentesi.

⁸Worlentesirik peragenebaigoluk tagalat, wene abi hesi aʼge wene ano moʼgulentesirik, o Yope peragenebesi.

⁹Peragenebesimu, is ebano laga legesarik loruk oʼgwe o Yope horoksogo ʼguogoluk lagaihwe, at Petrus ano erlige jam 12 seʼban igoluk o dum ebak aʼge duelakma ligagaimu eba ligaga.

¹⁰Ligagarik seʼban oso oruakma soʼboru nele aga. Nele agarik oruakhwe, aphwami logon en soʼboru nouwagoluk o pam owan werarugukhwe re, abi ʼgelaʼge pam hesi.

¹¹ʼBogorl hialogo re, sum kain ʼgelaʼge lok aʼge oʼgut ugan egeik aʼge pam erlelik aʼge ʼgwiangma ʼbelakpou wagoam il hesi.

¹²Sum ai ogola re, di wam yu wam, di inaʼge yu inaʼge ʼgwiangma welago aʼge eba emin, di tue yu tue ʼbogorl oʼgwe darak noso aʼge eba emin, ʼberlegat yagarak welaga.

¹³Oruakma re, Allah en sa iak ʼgelaʼgeat moʼguleselat e, “Petrus. Hebe inoroguntik e, eba wusogo men o,” oluk moʼgulesi.

¹⁴Asogo moʼgulesimu, at Petrus en e, “Erlak o. Nue. An asua aʼge emin, yuelak erlak aʼge emin, wei nak ogo nasu erlagat welago yo,” oluk moʼgulesi.

¹⁵Asogo moʼgulesimu, iak ano en mesik moʼguleselat e, “Allah en, No re, op o, oluk egei holuk e, hat en, Asua aʼge, no mia, oluk hogola epagun o,” oluk moʼgulesi.

¹⁶Eʼgik ʼbirenam asogo moʼgulesirik, mesik moʼgulotluk e, sum ʼgelaʼge ano ʼbogorl pam en lisogo wesimu ʼgoboksogo ligaga.

¹⁷Ligagama, at Petrus en e, “Nabi ʼgelaʼge hegi ai ebe ʼgesogo ʼgelaʼgeat o,” oluk wongsogo mo egeitik ede eberisoma re, is ap Kornelius en peragenebesi aʼge ebano legesarik, aphwami logon moʼgulontogulat e, “Simon owi re, ʼge o,” oluk hin wegesema, is en e, “Owi re, ai o,” oluk egesema, arat ʼgodukmu ʼgwigisa.

¹⁸ʼGwigisarik eniak olema ʼgwelakpegesema, enebe liplau wegesema re, disogo moʼgulentigisa, “Ap ʼbok aʼge mesik onuk naduk aʼge Simon, pobuk aʼge Petrus, ano ebe yema henemin welegep a? Erlak a,” oluk hin wegesa.

¹⁹Hin wogukhwe re, at Petrus ano abi ʼgelaʼge hesi aʼge ano, “Ebe ʼgesogo ʼgelaʼge hegi o,” oluk ede eberiso oruakma, Allah Arogun en e, “Ap enebe henagan aʼge herahebil wegesarik oruak o.

²⁰Holuk e, hat hebe sialogo ʼboguntik, is ai an enat peragonobou wegimu wegesa ai en e, Nenemin lo mia, oluk, hogola wenemennei eberak erlakma enat hemin lu o,” oluk moʼgulesi.

²¹Moʼgulesimu, at Petrus eneʼbek ʼbegeitik e, disogo moʼgulentesi, “Nebe heranebil wegep ai re, nebe yuat o. His no oluk en wegep,” oluk moʼgulentesi.

²²Asogo moʼgulentesimu, is en e, “Ap tentara aʼge esan pulhogwi aʼge onue ʼgain onuk Kornelius, ai en peraknonobou wagama wege o. At ai ebabut hegitsogo tagalat, Allah ebe ogorloksogo welat, tisokhwe, is aphwami Yahudi aʼge ʼberlek en ebabut ʼbaligisarik e, asogoat obok op ogwi o. At ai asogoat tisokhwe, malaikat Allah en yoʼgo ʼbelagonobou wago aʼge ebano mesik en e, Petrus ai en wene hat hesaʼgo holu aʼge moʼgulheriogoluk oruak o, oluk hat yoʼgo perakhoboumagoluk moʼgulesimu, at en peraknonobou wagama heʼbek wege o,” oluk moʼgulegisa.

²³Asogo moʼgulegisema, at en e, “Holuk e, an nemin nogouwogoluk, ʼgu manis o,” oluk moʼgulentesi. Moʼgulentesimu re, nogoluk loruk oʼgwe enelaluk egesarik e, is Allah eiyagai o Yope eba aʼge eneminat wegesa.

²⁴Wagalat, ebela pam agauwa mesik nak nogoluk e, o Kaisarea wegesa. Wagaihwe, at Kornelius onlogotma welat e, uelak osi emin, arilak orokhwi at emin ʼbalirak aʼge emin, yoʼgo enebesimu re, ʼberlegat odoktigisarik oruakma wegesa.

²⁵Wegesarik e, at Petrus ebe o pam ʼgwiogoluk tisoma, at Kornelius en at ebe wesirik e, odogorlu pam huragarik Petrus eragam sakhun egeitik e, erliktegei.

²⁶Asogo erliktegei aʼgeat de, at Petrus en e, “Nue, inemen o. An nebe aphwami aʼgeatma re, asogo erliknobogun o,” oluk eʼgik tenakho edikpesi.

²⁷Edikpoluk e, eʼbiregat weneane il-il o pam ʼgwigisa ʼgal e, aphwami esanat odoktu egesarik oruakma at Petrus il yerentesi.

²⁸Il yerontoluk e, disogo moʼgulentesi, “Nis aphwami Yahudi aʼge en his aphwami oʼborloma aʼge henemin hwedik togulat, nis heneʼbek ʼgugulat, tu puk oluk, wene ʼbelak welaga ai, henalugat o. Asogo aʼgeat de, at Allah en, Aphwami muon eba, enemin wolom e, asua o, oluk u mia o, oluk moʼgulnesimu re,

²⁹his en e, an nebaget yoʼgo peragenebegepma an nebit u erlakma en wegi o. Wegi aʼge re, wene mesik hin wokhentaik. Wene ebe no oluk an nebaget yoʼgo peragenebegep,” oluk moʼgulentesi.

³⁰Asogo moʼgulentesimu, at Kornelius en e, “O hau ua, mo hweya lai lasukhwe, o jam 3 degenik aʼge pamat, an nowi pam seʼban egi o.

³¹Seʼban asogo osoma re, ap mesik osum amulit aʼbik ʼbuktak aʼge an nilem inla ʼbu aga. Inla ʼbu agarik e, Kornelius. Hat seʼban ese legen ano, Allah esaʼgo hwelegeimu ai o. Ye, aphwami eneʼgikmu erlak welat enerlagaik aʼge lerentasu legen ano, Allah en ede hebam eberak oruagat o.

³²O Yope eba re, ap ebe mesigat aʼge de, onuk naduk aʼge Simon. Ye, pobuk aʼge, Petrus, ai yoʼgo louwagoluk ap mesik perakpemen o. At ebe re, ap ʼbok ʼgelaʼge wagarik e, ap onuk Simon, sapi agap domba agap noʼgorlak ereʼgiso aʼge ano owi ik laut lok yeʼgelak esaʼgoma eba oruak ani o, oluk moʼgulnesi.

³³Ai enat, an agauwa mesik wolom erlakma en e, ap mesik yoʼgo heʼbek perakpegimu, hat hebabut op en mo u erlakma en op wegen o, nue. Nis yogodak ʼberlegat Allah ilem welege yema re, nonue ʼgain Onuk Logo aʼge en, Wene moʼgulontomup, oluk moʼgulhesi aʼge, wene ano ʼberlegat nenesaʼgo holuogoluk welege o, nue,” oluk moʼgulesi.

³⁴At Petrus en wene edip pam en moʼgulentasulat e, “At Allah ebabut e, aphwami enagap pam nak il ontoluk e, logon olukhwema enebasulat, logon oʼborloma enebasulat, tiso erlak ani o, oluk e, yogodak en pobi tegis o.

³⁵Aphwami enaʼgul onuk da ya aʼge at ebe onogorlok welat enebabut hegitsogo togwi aʼge wogenebiso nak hegi o.

³⁶Holuk e, nis aphwami ʼberlegat nonue ʼgain Onuk Logo aʼge Yesus Kristus en laʼbulogo nonobouwagoluk, wene op wene ai, ebe nis aphwami Yahudi aʼge neneʼbek perakpou waga aʼge ano henaluk o.

³⁷Wene ebe aga ai re, at Yohanes en ik olomu ʼbelabenebiselat, wene ik olomu ʼbelabenebiso wene ai moʼgulentasu lagarikmu re, at Yesus owi Nazaret aʼge ano, Allah en Arogun ebam ʼbelakpou wagalat, anni wogeselat, tegeitik, eʼbirek welaga ai en, naduk naduk o Galilea doʼgo eba en, o aphwami Yahudi aʼge onowi loʼgwe o da ya eba lasulat, di aʼge yu aʼge opsogo nak tagalat, is logon Iblis en ningsogo tenentarok welaga aʼge obabenebiselat, til denaga laga ai henalugat o.

³⁸

³⁹Aphwami Yahudi aʼge onowi o da ya eba emin, o kota Yerusalem werik oʼgwe eba emin, denagalat, ʼberlegat tise laga aʼge ai, nis nenil hege o. Asogo aʼgeat de, at ebe e pam edikpoluk werigisa ai.

⁴⁰Asogo werigisa aʼgeat de, agauwa ʼbiren werak oruakma, agauwa henaganak aʼge, Allah en elalugaptegeitik e, ebe aphwami en enil houwagoluk selakma pesi ai o.

⁴¹Asogo selakma pesi aʼgeat de, aphwami ʼberlegat enil ho erlak. We, nadugat at Allah en, Is enebe eriayat enil houwak o, oluk poliknenebesi aʼge nak e, at Yesus ebe werak oruakma Allah en elalugaptegeimu, nis at emin welat soʼboru emin, ik emin, neneminat neʼge.

⁴²Asogo welat e, nis en aphwami wene moʼgulentil lagalat e, Aphwami ʼberlegat, waregesa aʼge emin, enelaluk oruak aʼge emin, wene enebam pogulat, noʼgorlogulat, tuagoluk, Allah en Yesus at edikpesi, oluk, dokhumsogo moʼgulentil laga lemagoluk yoʼgo nenebesi o.

⁴³At Yesus paget, is ap Allah iak moʼgulontogu legesa aʼge ebano ʼberlek en e, obok ogulat e, disogo egesa, At ebe wagoam e, is aphwami wiak togwi aʼge enede at ebam heʼberik pouwa aʼge enebe loʼbok, is wiak togwi aʼge ai, at Allah en at Yesus onuk pam erlagapsogo ukpouwa o, oluk moʼgulontogu legesa,” oluk at Petrus en moʼgulentesi.

⁴⁴At Petrus en wene asogo owan moʼgulentasu oruakma, Allah Arogun is aphwami wene ai enesaʼgo hologu legesa aʼge ebano enebe ʼberlegat enebam louk laʼbu aga.

⁴⁵Asogo ʼbu agama, is aphwami enagap eneʼgerlimu aʼge ʼbelak welat wene demat oluk wegesa aʼge logon Petrus emin, wegesarik oruakma, Allah en Arogun asogo is oʼborl oʼgwe aʼge enebam ʼbelakpou wagama, hwerlegesarik, wene is muon eniak eneperlak aʼge pam elalinat ogulat, Allah erliktogulat, tugukhwe, enil hogulat, enesaʼgo hologulat, tigisarik e, disogo egesa, “Allah en Arogun is aphwami oʼborlma aʼge elirat wogentesimu hegi o. Nonogorlok o,” oluk erliktigisa. Asogo erliktigisema, at Petrus en e, disogo moʼgulentesi,

⁴⁶

⁴⁷“Yethemit. Is yu Allah Arogun nis woknentasu ai ʼgelaʼgeat, is ogo wogentesimu hwerlegesa ai o. Holuk e, sa en, Is ik olomu ʼbelagonobugup no, oluk wene ʼbalu epegep. Elit ʼbelabonobuat o,”

⁴⁸oluk moʼgulentesirik, Yesus Kristus onuk ʼbalogo ik olomu ʼbelabonobuagoluk, is logon moʼgulentesimu ʼbelabenebigisa. Asogo ʼbelabenebigisema, is en e, at Petrus moʼgulogulat e, “Nue. Agauwa wei logon nenemin wolomultik en lagun o,” oluk tenak pegesema enemin welegesa.