Read Silimo Peragenebesi 14 Bible Online

Peragenebesi 14 - Silimo bible

Peragenebesi 14

¹Is Paulus Barnabas eʼbirek o Ikonium eba welat, o aphwami Yahudi aʼge seʼban ogu legesema ʼgwigisarik e, wene asogoat moʼgulentigisema, enebe esanat, Yahudi aʼge et, Yunani aʼge et, wene ai demat oluk wegesa.

²Wegesema, is aphwami Yahudi aʼge ado pema en e, wene ai enesaʼgo hologulat, demat oluk onogola opo erlak aʼge en e, is aphwami oʼborloma aʼge Allah eiyagai enebit emagoluk onogola ʼgagalogu legesa.

³Asogo onogola ʼgagalogukhweat de, is Paulus Barnabas eʼbirek agauwa esanat o eba onogorlok erlaksogoat welat e, wene nonue ʼgain Onuk Logo aʼge taga laga wene ai moʼgulontogu legesa. Moʼgulontogulat, Allah ebabut op en woknentasu wene ano, “Demat o,” oluk pobi tuagoluk moʼgulontogwiam, is en elalin tu puk aʼge tagonobogu lemagoluk, Allah en enanniabenebasu laga.

⁴Asogo togu legesa aʼgeat de, is aphwami o kota eba aʼge enebe esanat meʼgisogo re, is pema aphwami Yahudi aʼge oruak oʼgwe agalat, is nin pema is ap Yesus en enebe yoʼgo onoboluk peragenebesi aʼge ebano oruak oʼgwe agalat, tigisa.

⁵Asogo meʼgitholuk e, is aphwami oʼborl oʼgwe aʼge emin, Yahudi onuelak ʼgaindek emin, enemin egesarik e, “Paulus lak di obotut yu obotut tagonobogulat, enebe helep en modok waronobuok o,” oluk onobok ʼbaligisa.

⁶Onobok ʼbaligisema, is enaluk agarik e, hweiye ʼbogulogo, o Likaonia doʼgo eba o Listra o, Derbe o, o eragam oʼgwe eba logon o, ʼbi legesa.

⁷ʼBi legesarik e, wene op wene ano moʼgulontogu legesayat.

⁸O Listra eba ap mesik ia ogola en dagagalat oyuk soborak aʼge dagagarik oyuk ʼguk en ebela lo erlakma en hweriogo modogat welaga.

⁹Hweriogo welat Paulus en wene moʼgulentasukhwe esaʼgo hwelak oruakma, at Paulus en il ebam pusogo yethasulat e, ede en e, “Ap ai ede en, Demat obapnobua, oluk epesirik oruak hegi o,” oluk ede epesi.

¹⁰Asogo epesirik, iak loksogoat moʼguleselat e, “Hebe ʼbekhitsogo inemen o,” oluk moʼgulesimu re, sialogo inagarik ebela lak-wak tegei.

¹¹At Paulus en asogo tegeimu re, is aphwami esan ebano enil hegesarik e, is aphwami o Likaonia aʼge eniak pam disogo egesa, “Ap yu enebe walhebak aʼgeat de, aphwami ʼgelaʼge egesarik en, onuʼgwarlo poluk neneʼbek ʼbu egesa yu i o,” oluk eniak amitmit loksogo sup egesa.

¹²Eniak amitmit asogo sup egesarik e, Barnabas onuk Zeus tualogulat, ye, wene Paulus en ese laga ai en, at onuk Hermes tualogulat, tigisa. Asogo tualenebigisa ai re, is en e, “Nis en aʼge walhebak o,” oluk ebam heʼberik welat erliktogu legesa ebano aʼge ononuk petne tualenebigisa ai o.

¹³Asogo tualenebigisarik e, ap Zeus eiye aʼge asua owi o kota eba esaʼgoma werik welaga aʼge en, wam sapi ierak aʼge emin, e owil il op aʼge emin, woluk, o kota ʼgogumu eba ʼgoduk emde ʼbelakma waga. Wagarik e, aphwami aʼbik ebano enemin en, Paulus Barnabas eʼbirek warontouwogoluk tigisa.

¹⁴Warontouwogoluk togwiam, is Paulus Barnabas eʼbirek Yesus en yoʼgo onoboluk peragenebesi aʼge ebano enesaʼgo hweligisarik e, mo uagoluk, onuʼgwarek en onosum oʼborl oʼgwe aʼge derlep-derlapsogo hwikholuk e, aphwami esan odoktak oruakma eneʼbek pungtak legesa. Legesarik e, eniak loksogoat moʼgulontogulat,

¹⁵“Ap yema logwe. His noʼgosogo togu legep. Narilak norokhwi. Nis nenebe re, his ʼgelaʼge aphwami aʼgeat o. Aʼge re, his en di aʼge yu aʼge we ʼburlat togu legep aʼge ai ukpoluk e, henebabut heʼberloroguptik, honolukhwe Allah elaluk modok welago aʼge ai wogeripogoluk wene moʼgulhentil wege aʼge o. At Allah ai re, ʼbogorl emin, ʼgwiang emin, ik laut lok yeʼgelak emin, di aʼge yu aʼge ʼbogorl pam welago aʼge emin, ʼgwiangma welago aʼge emin, ik olomu welago aʼge emin, walhesi aʼge o.

¹⁶Pageat nenaʼbulak en ʼbekhit nenaiklak dagetil waga legesa eria erlige re, Allah en e, Di aphwami yu aphwami enaʼgul onuk loʼbok en enasua domok ebam heʼberik oruakhweat de, at en ugenebasu laga.

¹⁷Asogo aʼgeat de, is aphwami en at ebe pobi tuagoluk, di aʼge yu aʼge logon walho erlakma en meme egeitik welago puk o. We, at op nak tagalat, nonsoʼboru nonogum ningsogo noʼgulat, nonogola nenagai hogulat, togu lemagoluk, at moru ʼbogorl pam en ʼbelakpou wagalat, noʼgwi aʼge ai no hegit lau wagoam loksogoat woknentasulat, tiso ai o,” oluk enesaʼgo weregei.

¹⁸Enesaʼgo asogo weregei aʼgeat de, is aphwami esan ebano en sapi arat warontouwagoluk tigisarikmu no oluk e, enede noʼgosogo sebelu ʼgelaʼgeat aga aʼgeat de, wene Paulus lak en asogo egesa pam, waronto erlakma en mo egesa.

¹⁹Asogo agama oruakma re, is aphwami Yahudi aʼge o Antiokhia en, Ikonium en, legesarik e, aphwami esan ebano wene ai ukpoluk is oruak oʼgwe emagoluk onogola ʼgagaligisa. Onogola ʼgagaligisema, is oruak oʼgwe egesarik, Paulus ano ebe helep pam werigisarik ebe modogat werige oluk, lisogo o kota leget abel oʼborl akhit lebikpegesa.

²⁰Asogo lebikpegesa aʼgeat de, is aphwami pema Yesus iak wegesarik welegesa aʼge wegesarik e, eragam waliʼgogo inlau wegesema re, ebe inagarik o kotama ʼgwegei. ʼGwegeirik nogo oluk, hubet oʼgwe Barnabas eʼbirek o Derbe ʼbi legesa.

²¹O Derbe eba wene op wene moʼgulontogwi welat e, aphwami enebe esanat wogenebigisema Yesus iak wegesa. Wegesema onoboluk, is Paulus Barnabas eʼbirek pobuk togolik o Listra en, Ikonium en, ʼbekhit o Pisidia doʼgo o kota Antiokhia liplau wegesa.

²²Naduk ʼgwi lagalat, aphwami Yesus iak moʼgulentil ʼgwi legesema wegesa aʼge pobuk eneʼbek til-til liplau wagalat, enede ago weragonobogulat, enesaʼgo worogulat, til-til liplau wagalat e, disogo moʼgulentegisa, “Wene demat oluk henede Yesus ebam heʼberik pegep aʼge ai, ningsogoat heʼberik wolomup o. Nis pobuk Allah eragam modok wolomogoluk e, nenebam di obotut yu obotut hogu lomultik enat ʼgwi lul ani o,” oluk moʼgulentil entil liplau wegesa.

²³Asogo moʼgulentil liplau wagalat e, o da ya, Allah eiyagai odoktugu legesa aʼge loʼbok, onuelak tenentarok welemagoluk edigonoboluk e, agauwa mesik seʼban uogoluk soʼboru no erlakma en weat welat seʼban disogo ogu legesa, “Yesus nonue. Heiyagai enede hebam heʼberik oruak aʼge yema, tenentarok wolorogun en hat heʼgik pam pege o,” oluk seʼban egesarik liplau wegesa.

²⁴Liplau wagalat, o Pisidia doʼgo en ʼbekhit e, o propinsi Pamfilia ʼbigisa.

²⁵ʼBigisarik, o Pamfilia eba o kota Perga wene moʼgulontoluk e, o kota Atalia ʼbi legesa.

²⁶O Atalia en e, ik oloʼgwe ik so wusogo o Antiokhia togolik legesa. Eba en, asogo til noʼgu lemagoluk pageat is Allah eiyagai en peragonobou wagalat e, “Allah ebabut op ano en wokhonoboluk louwak o,” oluk peragonobou wegesema asogo til noʼgu legesarik e, arat toluk pobuk togolik legesa ai o.

²⁷O Antiokhia legesarik, Allah eiyagai odoktagonoboluk e, disogo moʼgulentigisa, “Nis Allah emin en disogo tige, asogo tige,” oluk wene ʼbeliʼgogo moʼgulontogulat e, disogo moʼgulentigisa, “Is aphwami oʼborl oʼgwe aʼge wene ai demat oluk wouwagoluk, Allah en ʼgoduk hwerik pesimu elit wo aʼge oruak o,” oluk moʼgulentigisa.

²⁸Asogo moʼgulentigisarik e, aphwami Yesus iak wegesa aʼge ebano enemin agauwa aʼbigat welegesa.