Read Silimo Peragenebesi 16 Bible Online

Peragenebesi 16 - Silimo bible

Peragenebesi 16

¹Paulus lak o eba en o Derbe wegesarik e, pobuk o Listra wegesa. O Listra eba ap mesik onuk Timotius, Yesus iak wesi aʼge oruakma wegesa. Ia asogoat Yesus iak demat oluk wesi aʼge, ebe Yahudi aʼge. Aʼgeat de, aik nak e, Yunani aʼge.

²Allah eiyagai o Listra aʼge emin, o Ikonium aʼge emin, ʼberlegat en e, “Timotius ebabut op o,” oluk obok op ogu legesa.

³Holuk e, at Paulus en Timotius ebe woluk laigoluk e, is aphwami Yahudi aʼge o da ya eba welegesa aʼge ʼberlek en e, “Timotius aik ebe Yunani aʼge,” oluk enaluk welegesa ai en e, agap eʼgerlimu aʼge ʼbalegei.

⁴Agap eʼgerlimu aʼge asogo ʼbalegeitik, ebe eminat o da ya wagalat e, wene is ap Yesus en enebe yoʼgo onoboluk peragenebesi aʼge emin, Allah eiyagai tenentarok welegesa aʼge emin, enemin en o Yerusalem welat wene hwaligisa aʼge ano, Allah eiyagai en tenak welat hegitsogo togu lemagoluk moʼgulentil wegesa.

⁵Moʼgulentil wegesema re, is Allah eiyagai Yesus iak demat oluk wegesa aʼge enede hurle agokhwe, aphwami logon Yesus iak wouwogoluk hwedik-hwadik ʼgogwiam, enebe aʼbigat aga legesa.

⁶Asogo agokhwe re, Allah Arogun en, “Wene o propinsi Asia eba moʼgulentagup erlak o,” oluk enede ʼgagalegeimu re, is o Frigia Galatia oʼgwe eba ʼburl posogo waga legesarik,

⁷o Misia wegesarik, eba en e, o Bitinia louwogoluk tigisa aʼgeat de, Allah Arogun en, “O eba lagup erlak o,” oluk enede ʼgagalegei.

⁸Asogo enede ʼgagalegeimu re, o Misia doʼgo o kota Troas wegesa.

⁹Wegesarik welat e, hubaʼgo at Paulus abi ʼgelaʼge disogo hesi. Ap o Makedonia aʼge mesik edik welat e, “Hat en nis aphwami Makedonia aʼge yema letnenta suk o,” oluk iak ningsogoat moʼgulosoma abi ʼgelaʼge hesi.

¹⁰Abi ʼgelaʼge asogo hesimu, nis en e, disogo ege, “Wene op wene is aphwami eba aʼge moʼgulentai louwagoluk, Allah en yoʼgo nenebesi hegi o,” oluk egerik e, o Makedonia liplau mogoluk tige.

¹¹Asogo egesarik e, o Troas eba en ik oloʼgwe so pam toluk ʼbekhit e, ik eʼgenma o onuk Samotrake liplau wegerik, loruk oʼgwe ik esaʼgo yu akhit oʼgwe o Neapolis liplau wege.

¹²Liplau wegerik o eba en e, o kota Filipi wege. O propinsi Makedonia eba o kota Filipi onuk lok aʼge oruakhwe, is ap o Roma aʼge en wosu egesarik welegesema eba wege ai o. O eba wegerik e, agauwa weiyat welegerik,

¹³agauwa Allah paget weat welat, seʼban uogoluk, o kota ʼgoduk emde ʼbelakma eba en libegerik e, ik esaʼgoma eba aphwami Yahudi aʼge seʼban ogumu ebale mesik wolom hwi a, oluk legerik palo tige. Eba hwami odoktak oruakma nenebe huregerik e, enemin weneane ogulat wene moʼgulentige.

¹⁴Hwami wene moʼgulentige aʼge eria de, hwe mesik e, o Tiatira wagarik welago aʼge. Sum kain il wibeʼgen ʼbelak aʼge ʼgelaʼge is logon enebam oʼgo logat ʼbalise laga aʼge, onuk Lidia ai en Allah iak wesirik Yahudi aʼge ʼgelaʼge oruakma, wene Paulus en osokhwe opsogo wouwagoluk, nonue ʼgain Onuk Logo aʼge en ogola ʼgagalegeimu wesi.

¹⁵Wene asogo wesimu re, at ebe emin, is aphwami at owi pam mesikmu welegesa aʼge emin, ik olomu ʼbelabenebigisa. ʼBelabenebigisema, at Lidia en e, “An nebaget his honogola en, At ede nonue ʼgain Onuk Logo aʼge ebam demat heʼberik pesi hegi, oluk honogola epagup holuk e, an nemin wolomul en, nemin louwok o,” oluk iak ningsogoat moʼgulnentesimu re, eminat lege.

¹⁶O eba legerik welat, agauwa mesik erlige, o seʼban ogu legesema ano lagaimu re, hwele aphwami eneragam aʼge mesik muʼgat ebabut wiak aʼge ebam louktak oruakma re, hin ebam wogu legesa aʼge oruakma emin sarlok tige. Hwele ai, aphwami en hin ebam wogwiam, at en wene pobuk om aʼge moʼgulentasuam e, oʼgo wogogu legesa. Asogo wogogwiam, at en e, uelak aʼbigat saburentasu laga.

¹⁷Nis Paulus emin lagaiam e, at hwele ai neneʼberligat lasu laga. Lasulat e, iak loksogoat aphwami disogo moʼgulentasu laga, “Is ap yu enebe Allah ʼgain Onuk Logo aʼge eragam welagai aʼge en wene henebe delhonobu wene moʼgulhontouwogoluk wegesa o,” oluk moʼgulentesi.

¹⁸At hwele ano pobuk hwedik-hwadigat iak asogoat ese laga. Eselat, iak Paulus ebam derlelise lagama re, at orogole edenogo muʼgat ebabut wiak aʼge ai disogo moʼgulesi, “Muʼgat hebabut wiak aʼge yu. Hwele yu ogola welegen aʼge ai, henokho liborogun en, Yesus Kristus onuk ʼbalogo moʼgulhese legi o,” oluk moʼgulesimu re, erianoat ogola en henokho libaga.

¹⁹Asogo henokho libagama, uelak ebano en enil holuk e, “Nis oʼgo sabutnentasu aʼge ano erlak aga ai nenebit o,” oluk, at Paulus Silas eʼbirek enebe tenagonoboluk e, eneʼgik lisogo o selimu aphwami odoktugu legesema eba ʼgaindek pemerintah aʼge eneʼbek wogonoboluk legesa.

²⁰Wogonoboluk legesarik e, enebe is ap onuelak pemerintah aʼge eneʼgik pam onoboluk en disogo egesa, “Is ap Yahudi aʼge ya en, o nis oruakma yema orogole wiagarogwi o.

²¹Nis aphwami o Roma aʼge en togwi erlak aʼge togu lemagoluk moʼgulnontogwi ai en, wene ai wo modok mia o,” oluk moʼgulentigisema re,

²²is aphwami esan ebano enebe inegesarik e, Paulus lak waronobuogoluk tigisa. Asogo togukhwe re, is pemerintah aʼge en, at Paulus Silas eʼbirek onosum derlep-derlapsogo noʼgorligisarik e, onosi en ʼgoʼbu waronobuagoluk moʼgulentigisa.

²³Asogo moʼgulentigisema ʼgoʼbu logat waronoboluk e, o eneʼgik herle wusogo onobogumu ʼgwelebak enebegisa. ʼGwelabonobogulat e, ap mesik herle werak ʼgwelagentarok welago aʼge ai ningsogo tenentarok welemagoluk ʼgomo tigisa.

²⁴Asogo ʼgomo tigisema re, enebe o ʼburl ogorlirakma ebano ʼgwelebak onoboluk onoyuk e lok aʼge pam herle ningsogo hettak enebesi.

²⁵Asogo enebesimu welat, o hup ede ʼburl is aphwami logon eneʼgik herle werak welegesa aʼge enesaʼgo hwelak oruakhwe, Paulus Silas eʼbirek en seʼban ogulat, Allah erliktuogoluk weni worogulat, tigisa.

²⁶Asogo togumu, mesik erligeat mouk lok aʼge erlanghasuam e, o lok werikmu welegesema ano o waʼgi delak aʼge erlang-perlanghasulat, ʼgoduk lerak aʼge ʼberlegat hut-hat eselat, aphwami ʼberlegat eneʼgik herle werak welegesa aʼge ebano hebileselat, tegei.

²⁷Asogo tegeimu, at ap herle werak tenentarok welaga aʼge ano elaluk agarik e, o aphwami eneʼgik herle wusogo onobogumu ano ʼgoduk modok hwerik oruakma il yethesi. Il yetholuk e, is eneʼgik herle werak aʼge ebano enebe libegesa oluk, ogorlok agarik uʼgwarek en werigoluk ʼgarok auwak oʼgwe aʼge lisogo wesi.

²⁸Wesirik uʼgwarek en weriogoluk tisoma, at Paulus iak loksogoat disogo moʼgulesi, “Hebe huʼgwarek en worogun no yo. Nis nenebe ʼberlek welege nak ai o,” oluk moʼgulesi.

²⁹Asogo moʼgulesimu re, esaga ʼgonu oluk e, pungtak uak erlik-erlik eneʼbek ʼgwegeitik e, is Paulus Silas eʼbirek eneragam sakhunsogo ʼbou tegei.

³⁰Pobuk, at ʼgain ano inagarik, enebe wogonoboluk liplau wagarik e, disogo moʼgulentesi, “Nuelak. An nebe delnobuagoluk, nebabut noʼgosogo tik o,” oluk moʼgulentesimu re,

³¹is en e, “Hede nonue ʼgain Onuk Logo aʼge Yesus ebam heʼberik pagun holuk nak e, hat hebe emin, heiyagai emin, henebe ʼberlegat delhonobua o,” oluk moʼgulegisa.

³²Asogo moʼgulegisarik, wene nonue ʼgain Onuk Logo aʼge iak ano, at ebe emin, eiyagai enebe ʼberlegat emin, moʼgulentigisa.

³³Moʼgulentigisema re, o hup ai erlige, enebe wogonoboluk e, ʼgoʼbu warenebegisa aʼge ebano emesogo enebesimu re, at ʼgain ebe emin, eiyagai emin, mesik erligeat ik olomu ʼbelabenebigisa.

³⁴Ik olomu ʼbelabenebigisema, at Paulus Silas eʼbirek at ʼgain ano en owi pam wogonoboluk lagarik e, soʼboru wogentesi. Wogentesirik, at eiyagai enemin ʼberlek en enede Allah pam heʼberik pegesarikmu no oluk e, onogola enagai hegesa.

³⁵Agauwa loruk oʼgwe re, is ʼgaindek pemerintah aʼge ebano en onosi polisi aʼge yoʼgo onobogulat e, disogo moʼgulentigisa, “Ap herle werak tenentarok oruak aʼge en is herle werak aʼge ebano herle hebilogo lebigonobouwagoluk moʼgulesi lit o,” oluk peragenebegesa.

³⁶Asogo peragenebegesema legesarik ap herle werak tenentarok welaga aʼge ano moʼgulegisema re, at en e, Paulus disogo moʼgulesi, “Is ap ʼgaindek ebano en e, his herle hebilogo lebikhonobouwagoluk yoʼgo peragonobou wegesema yu i o. Holuk e, henebe liboroguptik e, henede opsogo lu o,” oluk moʼgulesi.

³⁷Asogo moʼgulesi aʼgeat de, at Paulus en disogo moʼgulentesi, “Nis nenebe o Roma nonowirak aʼgeat de, wene nenebam erlakmayat, ʼgoʼbu watnenebigisarik e, neneʼgik herle wusogo o eneʼgik herle wusogo onobogumu ebano aphwami enilemat ʼgwelaknonobou wegesarigat de, yogodak hisakho lebiknonobouwagoluk egesa ai nopaget. Is onuʼgwarek enebe wemarik en lebiknonobouwak o,” oluk egei.

³⁸Asogo moʼgulentesimu, is yoʼgo wegesa aʼge ebano en e, onuelak ʼgaindek ebano eneʼbek legesarik disogo moʼgulentigisa, “Is Paulus lak enebe o Roma onowirak aʼgeat o,” oluk moʼgulontogwiam enesaʼgo hweligisarik onogorlok aga.

³⁹Onogorlok agama, enebe togolik wegesarik en, “Narilak. Nis dagan tigema o,” oluk Paulus Silas eʼbirek hau wusogo o eneʼgik herle wusogo onobogumu en lebigonobou wagalat e, disogo moʼgulentigisa, “Henebe o kota yema wolorogup no yo. Momu lit o,” oluk eniak sakhosogoat moʼgulentigisa.

⁴⁰Asogo moʼgulentigisema, o eneʼgik herle weragonobogumu eba en e, hwe Lidia owi pam legesa. Legesarik, o pam ebano Allah eiyagai aʼge enemin sarlo tigisarik e, enede sebelholuk wegesa.