Read Silimo Peragenebesi 18 Bible Online

Peragenebesi 18 - Silimo bible

Peragenebesi 18

¹Asogo toluk e, at Paulus o kota Atena eba ukpoluk o kota Korintus waga.

²Ebe owan wom erlak oruakhwe, ap ʼgain Klaudius en e, “Aphwami Yahudi aʼge enebe o kota Roma welema erlak. Modogat ʼbok lebemak o,” oluk wene ʼbalegeimu re, ap Yahudi aʼge mesik onuk Akwila. Ebe o Pontus eba en dagaga aʼge. Ugwe onuk Priskila eʼbiregat, o Italia en is naduk o Korintus ʼgerat legesarik oruakma, at Paulus pobuk wagarik entau waga ai o.

³Is Akwila Priskila eʼbiregat eneʼgik oʼgo paget e, o sum owi aʼge egesogu legesa. At Paulus eʼgik oʼgo paget asogoat egesise laga ai en e, is eneʼbek wagarik welat, eneminat egesogu legesa.

⁴Asogo enemin egesiso welat, nin hwedik nan hwedik Allah paget agauwa weat welat seʼban uogoluk tugumu, o aphwami Yahudi aʼge seʼban ogu legesema eba ʼgwegeirik e, is aphwami Yahudi aʼge et, Yunani aʼge et, Yesus iak wouwagoluk enede ʼgagalise laga.

⁵Enede ʼgagalisokhwe re, is Silas Timotius eʼbirek o Makedonia en wegesema re, at Paulus mu aʼge mesik tu erlak, we, wene aiat moʼgulentasu modok welaga. Is aphwami Yahudi aʼge disogo moʼgulentesi, “Allah en e, Kristus perakpou weigoluk obok moʼgulnentesi ano ebe re, ebe Yesus waga aiat o. An naluk o,” oluk ʼbaksogo moʼgulentasu laga.

⁶Asogo moʼgulentasukhwe re, is en e, “Wiagat ese legen o,” oluk obok wiak ʼbalogu legesema re, at Paulus en e, “An wene nebam erlak o,” oluk u ʼgelaʼge, osum oʼborl oʼgwe aʼge ollong hosogo ʼbelakpasulat e, disogo moʼgulentesi, “His honuʼgwarek en nalorogup holuk e, heneba loʼbogat o. An nebam erlak o. Hwerli yogodak hwerli en, an aphwami oʼborl oʼgwe aʼge wene moʼgulentai laik o,” oluk moʼgulentesirik e,

⁷is o eba ukpoluk libegesarik e, ap oʼborl oʼgwe aʼge Allah iak wesi aʼge onuk Titius Yustus ai owi pam laga. At owi ai re, o is aphwami Yahudi aʼge seʼban ogu legesema eba eragamat werik welaga.

⁸Ap Krispus, o aphwami Yahudi aʼge seʼban ogu legesema eba ʼgain eiye welaga aʼge ebe emin, eiyagai emin, “Wene ai demat o,” oluk enede nonue ʼgain Onuk Logo aʼge ebam heʼberik pegesa. Heʼberik pegesema re, is aphwami o kota Korintus aʼge logon enebe esanat wene holholuk e, “Demat o,” oluk wogu legesema re, enemin ik olomu ʼbelabenebigisa.

⁹Asogo tigisema re, agauwa mesik o hubaʼgo nonue ʼgain Onuk Logo aʼge en Paulus abi ʼgelaʼge pam wene disogo moʼgulesi, “Hogorlok hagun o. An pekhiarok modogat welegi o. O yema an neiyagai enebe aʼbigat oruakma re, aphwami logon en wiagaphobuogoluk disogo yusogo logon takhobouwa erlak o. Holuk e, mo u erlakma en wene moʼgulentasu modogat wolomup o,” oluk moʼgulesi.

¹¹Asogo moʼgulesi ai, satu tahun welagarik en, dugwi hebarlik pam enemin Paulus ebe o eba mo egeitik welat, Allah iak moʼgulentasu welaga.

¹²O propinsi Akhaya eba ap ʼgain Galio gubernur welemagoluk edikpogwiam oruakma re, is aphwami Yahudi aʼge enebe odoktak poluk, Paulus ebe woruogoluk tenak pegesarik e, emdema wouwagoluk ap wene enebam pogulat, noʼgorlogulat, togwi aʼge eneʼbek woluk legesa.

¹³Ebe woluk legesarik, wene ebam pogulat e, disogo egesa, “Ap yu en e, wene Allah en nenesaʼgo weregei wene ano ukpoluk, Allah ebe nak erliktogulat e, mu aʼge togu lemagoluk enede ʼgagaliso aʼge woluk wege o,” oluk moʼgulentigisa.

¹⁴Asogo egesema, at Paulus en wene oʼgo ik ʼgalma re, at Galio en aphwami Yahudi aʼge moʼgulentasulat e, “His aphwami Yahudi aʼge yu logwe. Wene ebam pegeptik woluk wegep yu re, nis pemerintah Roma aʼge neniak sagalogo poluk wiak logat telipmu en woluk welepma re. Obat moʼgulnosu egep, oluk, his en ogukhwe nesaʼgo hwelak welle o.

¹⁵Aʼge re, wene yu his heniak paget, ononuk paget, his togu legep aʼge paget, ebam poluk woluk wegeptikmu re, his heneba loʼbok en hegirap tip o. Wene ategenik aʼge, an en hegirap tu re, erlak o. Nebit o,” oluk moʼgulentesi.

¹⁶Asogo moʼgulentesirik e, o wene enebam pogulat, noʼgorlogulat, tugumu eba en mukho lebigenebesi.

¹⁷Lebigenebasuam e, is aphwami logon ʼberlegat en e, ap onuk Sostenes, o aphwami Yahudi aʼge seʼban ogumu eba eiye ʼgain welaga aʼge ano, ebe tenak poluk e, o wene enebam pogulat, noʼgorlogulat, togu legesema eba ebe ʼgoʼbu werigisa. Asogo worogukhweat de, at Galio ano en e, erlele wo erlak ebakhenneat mo egei.

¹⁸At Paulus agauwa esanat Allah eiyagai o kota Korintus aʼge enemin eba welegesarik en e, pobuk is o eba hau wusogo onoboluk, hwe Priskila ogun Akwila eʼbirek eneminat wogonoboluk e, ik oloʼgwe ik so pam toluk o Siria louwogoluk tigisa. Tigisarik, o kota Kengkrea legesarik eba welat, “An Allah emin hwedik welege, oluk nasu yit-yat hwerli ai hwerli welemagoluk ukpaik o,” oluk ukpesirik welaga aʼge, “Hwerli yu hwerli arat o,” oluk perlengsogo ʼbalegei.

¹⁹Asu asogo ʼbalegeitik, o eba en o Efesus legesa. Legesarik e, is Akwila Priskila eʼbirek eba onoboluk e, o aphwami Yahudi aʼge seʼban ogumu eba ʼgwegeitik e, is Yahudi aʼge eba welegesa aʼge, wene at en enede ʼgagalogo moʼgulentasuam e, is en oʼgo moʼgulogulat, is en at moʼgulogwiam, at en oʼgo moʼgulentasulat, togu legesa.

²⁰Asogo togu legesarik, is en e, “Hat yema agauwa esanat nenemin wolomultik en de, lanok o,” oluk tenak pouwogoluk tigisa aʼgeat de, at en e, “Nebit o,” egei.

²¹Asogo egeitigat de, laiogoluk tagalat, disogo moʼgulentesi, “His egep ai Allah en op oluk epasu holuk e, an pobuk heneʼbek weik o,” oluk o Efesus eba en ik oloʼgwe ik so pam o Kaisarea laga.

²²O Kaisarea lagarik e, Allah eiyagai o Yerusalem aʼge hau warenebi lagarik e, pobuk togolik o Antiokhia waga.

²³O Antiokhia wagarik welagarik en e, pobuk o propinsi Galatia emin, Frigia emin, wagalat e, eba is aphwami Yesus iak wegesa aʼge enede ago warenebil nese laga.

²⁴Ap Yahudi aʼge mesik onuk Apolos. Ebe o Aleksandria dagaga aʼge, o Efesus wagarik welaga. Iak yaʼgorak welat e, Allah iak pelal wogo aʼge ano aluk modok welaga.

²⁵Oruakma re, is pema en e, nonue ʼgain Onuk Logo aʼge eʼberlik lagai wene ai moʼgulegisema wik-wok e, ik olomu ʼbelabonobogwi wene ai, Yohanes en ik olomu ʼbelabenebise laga wene ai nak aluk welaga. Asogo aʼgeat de, Yesus iak annisogo moʼgulentasulat, hegitsogo moʼgulentasulat e, taga laga.

²⁶Yesus iak wesirik e, o is aphwami Yahudi aʼge seʼban ogu legesema ebano ʼgoluk, ogorlok erlak welat, wene ʼbaksogo moʼgulentasu laga. Moʼgulentasuam e, is hwe Priskila ogun Akwila eʼbirek enesaʼgo hweligisarik e, ebe woluk onowi pam legesarik e, Allah en at eʼberlik laga lemagoluk ogola epasu aʼge wene ai dokhumsogo moʼgulogu legesa.

²⁷Moʼgulogu legesema re, o Akhaya weigoluk egeimu, Allah eiyagai o Efesus aʼge en, wene pelal wokho is o Akhaya aʼge Yesus iak wegesa aʼge eneʼbek perakpogulat e, disogo egesa, “Apolos heneʼbek waga ai opsogo wemit o,” oluk pelal wokho wogigisema woluk laga. Lagarik e, is aphwami o Akhaya aʼge Allah ebabut op en wene demat oluk wegesa aʼge logat lerentasu laga.

²⁸Lerentasulat e, is Yahudi aʼge enemin aphwami enilem wene ʼbalogulat e, at iak yaʼgorak ai en e, is eniak mabenap poluk, at iak anni agarik e, Allah iak pelal wogo aʼge ano pam moʼgulentasulat e, “Allah en e, Kristus perakpou weigoluk obok moʼgulnentesi ano, ebe Yesus perakpou waga aiat o,” oluk ʼbaksogo moʼgulentasu laga.