Read Silimo Peragenebesi 19 Bible Online

Peragenebesi 19 - Silimo bible

Peragenebesi 19

¹At Apolos o Korintus ebayat oruakhwe, at Paulus ano o propinsi Galatia emin, Fergia emin, erabu akhit lagak-pagak til waga lagarik, o kota Efesus waga. Wagarik, aphwami Yesus iak wegesa aʼge logon oruakma eneʼbek ʼgwegei.

²Eneʼbek ʼgwegeirik disogo moʼgulentesi, “His henede Yesus ebam heʼberik pegep aʼge ai re, Allah Arogun wegeptik welegep a? Erlak a,” oluk moʼgulentesi. Asogo moʼgulentesimu, is en e, “Allah Arogun oruak oluk ogwiam, nenesaʼgo holu erlaktik en de, wo erlak welege o,” oluk moʼgulegisa.

³Asogo moʼgulegisema, at Paulus en moʼgulentasulat e, “Holuk e, his ik olomu ʼbelaphenebigisa ai, wene no wene moʼguligepma en ʼbelaphenebigisa,” oluk moʼgulentesimu, is en e, “Yohanes en ik olomu ʼbelabenebise laga aʼge ano wene moʼguligema ik olomu ʼbelapnenebigisa o,” oluk moʼgulegisa.

⁴Asogo moʼgulegisema, at Paulus en e, “Yohanes en ik olomu ʼbelabenebise laga ai, is aphwami en, Wiak togu lege aʼge arat ukpegerik nenebabut heberlige o, oluk ogwi holuk nak ik olomu ʼbelabenebise laga. Asogo ʼbelabenebiselat e, disogo moʼgulentasu laga, An neʼberlik ap mesik wema. Wago holuk henede at ebam heʼberik poluk wolomup o, oluk ebe Yesus ai pagerat moʼgulentasu laga ai o,” oluk moʼgulentesi.

⁵Asogo moʼgulentesimu is enesaʼgo hweligisema re, nonue ʼgain Onuk Logo aʼge Yesus onuk ʼbalogo pobuk ik olomu ʼbelabenebigisayat.

⁶ʼBelabenebigisema, at Paulus en eʼgik enaʼgul sebelisoam e, Allah Arogun enebam ʼbu agama, is en e, wene is muon eniak eneperlak aʼge pam elalinat ogulat, Allah iak is logon moʼgulontogulat, togu legesa.

⁷Is asogo togu legesa ai re, ap enebe 12 ʼgelaʼge en togu legesa.

⁸Asogo tigisema re, at Paulus o aphwami Yahudi aʼge seʼban ogu legesema eba ʼgwegeirik ogorlok erlaksogo welat e, wene Allah en eragam enebasu wene ano pobirak poluk wouwagoluk, onogola ʼgagalogo, wene at en moʼgulentasulat, is en oʼgo at moʼgulogulat, togulat e, dugwi henagan welaga.

⁹Welat, asogo moʼgulentasu laga aʼgeat de, is ai pema akhit enede ning agalat, wene ai onogola mi-miarak poluk e, aphwami logon esan enilemat, Yesus eʼberlik lagai wene ai obok wiak ʼbaligisa. Obok wiak ʼbaligisema, at Paulus, is ugonoboluk, is pema akhit Yesus iak wegesa aʼge nak wogonoboluk libaga. Wogonoboluk libagarik e, o lok werikmu ap Tiranus en di wene yu wene moʼgulentasu lagama ai ʼgwegeitik e, nin hwedik nan hwedik agauwa mesik mo u erlakma en wene at en moʼgulentasulat, is en oʼgo moʼgulogulat, togu legesa.

¹⁰Asogo oso modok 2 tahun oruakma en, is aphwami o propinsi Asia eba, Yahudi aʼge et, Yunani aʼge et, ʼberlek wene nonue ʼgain Onuk Logo aʼge iak ano enesaʼgo hweligisa.

¹¹At Paulus en aphwami elalin tu puk aʼge tagenebasu laga ai, ebe re, Allah enat tagenebasu laga.

¹²Tagenebasuam e, sum at Paulus erlegisak horaga laga aʼge de a, osum ebe aʼge orogole wiak emano oluk oʼborl oʼgwe ʼbuktaga laga aʼge de a, aphwami en woluk, is ou wogu legesa aʼge eneʼbek woluk lagaiam e, ou op agalat, muʼgat enebabut wiak aʼge onogola ʼgwegeirik welaga aʼge henokho libagalat, togu legesa.

¹³Asogo togukhwe, is aphwami Yahudi aʼge ado enebe asuagun welat, muʼgat enebabut wiak aʼge aphwami onogola ʼgwegeirik oruakma henokho lebigenebil noʼgu legesa aʼge en e, nonue ʼgain Onuk Logo aʼge Yesus onuk ʼbalogo lebigonobouwogoluk walhegesayat. Walhogulat, is en, muʼgat ebabut wiak aʼge moʼgulogulat e, “At Yesus, Paulus en moʼgulentil noso aʼge ai onuk ʼbalholuk, henokho liplai lak o, oluk moʼgulhogu lege o,” oluk moʼgulegisa.

¹⁴Asogo togulat, ap Yahudi aʼge ebe ap Allah eiye aʼge onue ʼgain onuk Skewa ai, eiyagai ap enebe sabiren welegesa aʼge en asogoat walhegesa.

¹⁵Walhogwiam, at muʼgat ebabut wiak aʼge ano en e, “Yesus ai ebe, an naluk. Ye, Paulus ai ebe, obok hwelise legi aʼgeat. Aʼge re, his yema salak hwe. An neperlak o,” oluk moʼgulentesirik en,

¹⁶ap muʼgat ebabut wiak aʼge ogola ʼgoluk welaga aʼge ano enebam ʼgolokho sagarli oluk anni agarik e, is mabenabenebesi. Mi-maben tagenebasulat e, onosum derlep-derlapsogo ʼgoʼbu mep dialogo warenebegei. Warenebegeimu re, at owi pam en enageʼgolom hweiye ʼbogoligisa.

¹⁷Hweiye ʼbogoligisema re, aphwami en, “Is asogo tigisa o,” oluk egesema, is aphwami Yahudi aʼge emin, Yunani aʼge emin, o kota Efesus welegesa aʼge ʼberlegat enesaʼgo hweligisa. Hweligisarik e, onogorlok agarik, Yesus onuk ebenagaikmu erliktogu legesa.

¹⁸Ye, is aphwami enede Yesus ebam heʼberik pegesa aʼge enebe wegesarik e, wiak togu legesa aʼge aphwami esan enilem ʼbaktogu legesa.

¹⁹Ye, is ap asuagun welat asuasogo togu legesa aʼge enebe esan enat ontuesiʼga asua aʼge uang perak lok aʼge 50.000 ʼgelaʼge pam oʼgo ʼbaligisarik tenak welegesa aʼge odoksogo aphwami ʼberlegat enilem odouk narligisayat.

²⁰Asogo tigisema re, nonue ʼgain Onuk Logo aʼge iak ai lok agalat, anni agalat, taga laga.

²¹Asogo tigisema, at Paulus ogola en epasulat e, “O propinsi Makedonia laiktik en de, o propinsi Akhaya wotluk e, ʼbekhit, o Yerusalem laik o,” oluk ogola epesirik, “Laiktik, pobuk togolik wotluk e, o kota Roma nil hai laigat o,” oluk egei.

²²Asogo oluk e, at eragam aʼge enebe ʼbiren, Timotius o, Erastus o, eʼbirek o propinsi Makedonia peragonobou wagarik, at omu nak o propinsi Asia welaga.

²³Eria erlige re, o kota Efesus eba ap mesik onuk Demetrius. Di aʼge yu aʼge perak aʼge heleʼgise laga. Heleʼgiselat dogwi asua ebe hwe aʼge onuk Artemis. Ebe owi aʼge lok eba werik oruakhwe, perak aʼge logon wei-wei aʼge aʼbigat heliʼgogo pasu laga. Asogo heliʼgogo pasuam, aphwami en oʼgo pogu legesema, is Demetrius osi onobogun wiak heleʼgogu legesa aʼge eneminat loksogo sabuthorlogu legesa ai en, aphwami Yesus iak wik-wok eʼberlik lagai wene ai paget o Efesus eba eniak loksogoat sagaligisa.

²⁴

²⁵Asogo aga ai, at Demetrius en, osi emin, is pema perak aʼge asogo onobogun wiak heleʼgogu legesa aʼge emin, yoʼgo enebesi. Yoʼgo enebesimu odoktigisema, at en e, “Narilak. Nis asogo togu lege ai pam obat sabuthorlogu lege o, oluk henaluk.

²⁶Aʼge re, yogodak at Paulus ai tiso aʼge, henil domok hogulat, henesaʼgo hologulat, togu legep. At en e, Aphwami eneʼgik en dogwi asua heleʼgogwi ai re, ebe walhebak aʼge puk o, oluk moʼgulentasuam, aphwami esan ebano en e, Wene ai demat, oluk wegesa ai, horok o kota Efesus yema aʼge nak puk. O propinsi Asia ʼberlegat ʼgelaʼge wegesemayat o.

²⁷Ai en, nis asogo togu lege aʼge yu nonobok wiak ʼbalua o. Aʼge re, nis nonobok nak wiak ʼbalua puk. Neneʼbia logo aʼge Artemis owi lok werik yu re, erlak aʼgeat opogulat, Artemis aphwami o propinsi Asia aʼge ʼberlek emin, o di owi yu owi ʼberlek emin, eneminat, at eragam ʼgoluk welat erliktogwi aʼge erlagapsogo ukpouwa ai o,” oluk moʼgulentesi.

²⁸Moʼgulentesimu onolot het aʼbik agarik e, “Nis aphwami o Efesus aʼge neneʼbia Artemis lok aiat o,” oluk eniak loksogoat ogwi modok welegesa.

²⁹Asogo ogwi welat, eniak sagalogumu, aphwami o kota Efesus eba aʼge pungtak odoktu wagalat e, ap o propinsi Makedonia aʼge enebe biren, Paulus emin noʼgu legesa aʼge, ononuk Gayus o, Aristarkhus o, enebe tenagonoboluk heleʼga lok wogoma wogonoboluk ʼgwigisa.

³⁰Wogonoboluk ʼgwigisema, Paulus ebe pobuk eneʼberlik aphwami enebe esanat odoktakma eba ʼgwigoluk tegei aʼgeat de, is aphwami Yesus iak wegesa aʼge en, “Hat e, ʼgogun o,” oluk wene ʼbaligisa.

³¹Ye, ap ʼgaindek o propinsi Asia aʼge logon Paulus emin hwedik welegesa aʼge en e, “Heleʼga wogoma eba horogole po ʼgogun o,” oluk, is pema en ede sebeluagoluk wene wusogo eʼbegat perakpegesa.

³²Ye, aphwami odoktigisa aʼge ebano, enebe lok oʼgwe wene ebe eneperlak at odoktu egesa ai en e, “Nopaget odoktu ege logwe,” oluk is pema en eniak disogo ogulat, is nin pema en yusogo ogulat, eniak loksogoat sagaligisa.

³³Is eniak asogo sagalogukhwe, is ap Yahudi aʼge en e, ap Aleksander aphwami esan enilem edikpou wegesema re, is aphwami esan ebano en e, “Wene edip, arat hegi o,” oluk enede epegesa. Asogo opogukhwe, at Aleksander en e, “An wene nebam pukmu o,” oluk aphwami ebano moʼgulentaigoluk eʼgik walok pam moʼgulentesi aʼgeat de, is onogola en e,

³⁴“Ap yu Yahudi aʼge o,” oluk ebe pobirak poluk e, eniak laʼbulogo, loksogoat disogo egesa, “Nis aphwami o Efesus aʼge yema ebe logo re, neneʼbia Artemis aiat o,” oluk eniak hwedik-hwedigat 2 jam ʼgelaʼge ogwi modok welegesa.

³⁵Asogo ogu legesema re, at ap wene hwalugumu pelal wasu laga aʼge en, is aphwami esan ebano eniak erlagaptegei. Erlagaptoluk e, disogo moʼgulentesi, “His aphwami o Efesus aʼge yu logwe. Neneʼbia Artemis lok owi werik aʼge ai emin, hwe ogut walsogo ebe ʼgelaʼge heleʼgik aʼge ʼbogorl pam en ʼbu aga aʼge ai emin, nis aphwami o Efesus aʼge yema tenak welege aʼge re, sa eperlak no. Aphwami o di owi yu owi ʼberlegat enaluk nak.

³⁶Aphwami nin pema en, Wene ai erlak aʼgeat o, oluk sagalu mia. Holuk e, his yema en henede erlak ʼgelaʼge disogo yusogo mesik togwi erlak welat, honoborlogouk erlaksogoat wolomup o.

³⁷Is ap yu en, di aʼge yu aʼge neneʼbia dogwi asua owi pam aʼge mesik eneʼgik abusak wa ʼgwilo erlagat, dogwi asua ebe ai ogo obok ʼbalu erlagat, oruakhweat de, wogonoboluk wegep yema re!

³⁸At ap Demetrius ebe emin, osi onobogun wiak heleʼgogwi aʼge emin, enemin en e, wene ap mesik ebam po aʼge oruak holuk e, agauwa mesik erlige wene enebam pogulat, noʼgorlogulat, togwi aʼge pam en, is gubernurlak enil pam wene enebam po aʼge oruak o. Holuk e, at mesik en wene at agaikhe pam pasulat, at mesik en wene at agaikhe pam pasulat, eba enat u aʼge oruak o.

³⁹Henebe odoktu egeptik heniak loksogoat sagaligep yu, is pema en, No wene paget odoktu egeptik ogu legep, oluk wene henebam pogwi holuk e, his en noʼgosogo ogup. Wene edip erlakma yema re! Is en e, Wiak tuagoluk enede edikpogu legep, oluk wene henebam po yo. Ai en e, his en mesik tuagoluk epegep holuk e, aphwami ʼberlegat yoʼgo onoboluk odoktak poluk e, wene enebam pogulat, noʼgorlogulat, togwi ai erlige wene hegirap po yo,” oluk moʼgulentesi.

⁴⁰

⁴¹Asogo moʼgulentesirik e, aphwami odoktigisa aʼge ebano ʼbogulogo peragenebesi.