Read Silimo Peragenebesi 2 Bible Online

Peragenebesi 2 - Silimo bible

Peragenebesi 2

¹Aphwami Yahudi aʼge seni Paskah noʼgu legesarik agauwa 50 welegesarik e, hari Pentakosta welat, is aphwami enede Yesus ebam heʼberik welegesa aʼge enebe ʼberlegat mesikmu odoktak oruakma,

²erianoat, yasobu anni wiak punhau wagalat iak oso ai ʼgelaʼge, Allah ʼbogorl pam en ʼbelakpou wagama re, is aphwami o pam hweriogo welegesa aʼge ebano ʼberlegat iak enesaʼgo hweligisa.

³Enesaʼgo hweligisarik enil ʼgwelakhegesa ʼgal e, odouk magale abuk ʼbelak aʼge en pema melanghai lasulat, pema melanghau wagalat, tago ai ʼgelaʼge, enebe loʼbok enebam dadain lasukhwe enil hegesa.

⁴Enil asogo hogukhwe, Allah Arogun is ʼberlegat onogola ʼbetesogo ʼgwegei. ʼGwegeitik, Allah Arogun en, “At ai iak disogo ese lemak o,” oluk epesi hegitsogoat, is aphwami muon eniak pam degenik lek yegenik lek uagoluk moʼgulentasukhwe elalinat il laga legesa o.

⁵O ai erlige re, aphwami Yahudi aʼge Allah iak hologo togu legesa aʼge, o di owi yu owi ʼberlek en o Yerusalem nak odoktu egesarik welegesa.

⁶Oruakma re, iak egei aʼge ano enesaʼgo hweligisarik aphwami enebe aʼbigat odoktu egesa. Odoktu egesarik oruakma, is Yesus osi ebano en is aphwami o di owi yu owi en wegesa aʼge ebano eniak loʼbok ogukhwe, enesaʼgo hweligisarik yuk egesa.

⁷Yuk egesarik erliktugulat e, “Is wene moʼgulnontogwi aʼge yema enebe ʼberlegat e, onowi o Galilea erlak no? O Galilea aʼgeat o.

⁸Aʼgeat de, noʼgot agama en nis aphwami nonowi dagege aʼge neniak loʼbok ogwiam nenesaʼgo hologu lege epegep.

⁹Nis nenebe re, nonowi o Partia aʼge emin, Media aʼge emin, Elam aʼge emin, Mesopotamia aʼge emin, Yudea aʼge emin, Kapadokia aʼge emin, Pontus aʼge emin, Asia aʼge emin,

¹⁰Frigia aʼge emin, Pamfilia aʼge emin, Mesir aʼge emin, o Libia Kirene hegit etleba aʼge emin, o Roma etleba legerik nenebe o poluk ʼgelaʼgeat welegerik wege aʼge emin, nenemin welege ai o.

¹¹Nis pema akhit demat Yahudi aʼge, ye, is pema we aʼge en nin Yahudi aʼge neneʼbek ʼgu otluk Allah iak wegesarik welegeat o. Ye, aphwami o Kreta aʼge emin, Arab aʼge emin nenemin oruakma, is yu en Allah anni pam elalin tiso aʼge moʼgulnentasuam, nonuʼgwarek neniak loʼbok nenesaʼgo hologu lege yu i o,” oluk,

¹²enede nalagama is-is nak en erliktugulat e, “Ai aga ai re, ebe noʼgosogo hwe,” oluk egesa.

¹³Aʼgeat de, is nin pema en e, “Erlak o. Is yema anggur eʼgen aʼbosu neʼgesarik en enede ʼbalegesarik ogwi o,” oluk eneida togu legesa.

¹⁴Eniak asogo ogukhwe re, at Petrus ano Yesus osi enebe 11 ebano enemin welat, peiyalogo inaga. Inagarik e, iak loksogoat disogo moʼgulentesi, “His Yahudi aʼge emin, his logon yogodak ya o Yerusalem welegep aʼge ʼberlegat emin, narilak norokhwi. An wene ik aʼge yu henaluk orogup en e, henesaʼgo hwelip o.

¹⁵Yogodak hubet jam 9 agama welege ya i o. Aʼge re, jam eria ʼgelaʼge pam anggur eʼgen aʼbosu noluk enede ʼbalagai erlakma no oluk e, his en, Is yema re, anggur eʼgen aʼbosu noluk enede ʼbalegesarik ogwi, oluk opogu legep ai re, erlakmayat o.

¹⁶We, at Yoel Allah iak moʼgulentasu laga aʼge Allah en moʼgulesimu egei ʼgelaʼgeat aga o.

¹⁷At en e, disogo egei, At Allah en eselat e, O ologun pam an Narogun ai, loksogo aphwami ʼberlegat enebam ʼbelakpou weik o. ʼBelakpou wagoam e, henemalik logomalik et, hwelani et, is en an niak aphwami moʼgulontogulat, honosi souwe aʼge en enabi ʼgelaʼge hogulat, henaiklak sebal aʼge en enabi hogulat, togu lema o.

¹⁸Ai erlige re, an neragam aʼge, ap et, hwami et, an Narogun loksogo enebam ʼbelakpou weik o. ʼBelakpou wagoam e, is en an niak moʼgulontogu lema o.

¹⁹Ye, aphwami en erliktogu lemagoluk, elalin aʼge logon ʼbogorl pam erabu en tagalat, wene pobi tuagoluk ʼgwiangma yema tagalat, tagalat e, di aʼge yu aʼge pam, mep emin, odouk magale emin, ageromtom odouk hobu ʼgelaʼge emin, tua.

²⁰An henaik ʼgain Nonuk Logo aʼge en loksogo tagoam aphwami en erliknobugukhwe weik ai erlige owan wom erlak oruakhwe re, o mo orogole muat hik eselat, dugwi orogole mep agalat, ai naduk tua o.

²¹Asogo agokhwe re, his aphwami en an henaik ʼgain Nonuk Logo aʼge nonuk ʼbalogo yoʼgo nebagup aʼge enebe loʼbok delenebik o, [3] oluk Yoel en egei ai.

²²Aʼge re, his Israel aʼge narilak norokhwi. An niak ik aʼge yu hwelit o. Yesus owi Nazaret aʼge ano Allah en yoʼgo pesimu, nenemin welat, wene pobi tuagoluk elalin tu puk aʼge Allah en eʼgik annisogo taga laga ai re, ebe Yesus enat taga laga o. Holuk e, Yesus Allah en perakpou wagama, oluk enagat aga ai re, henaluk o.

²³Aʼge re, at Allah aluk welat, ogola en e, Asogo tuak o, oluk epesi ano pamat, Yesus ebe heneʼgik pam pesimu, his en ap enebabut wiak aʼge eneʼgik wokho, at ebe e pam edikpoluk werigep ai o.

²⁴Werigepma, at ebe nonouk tagalat waraga aʼgeat de, aphwami eneʼgik herle wusogo onobugumu welagai ai ʼgelaʼge, at asogo modok werak wolom puk ai en, eneʼgik herle hebilogo lebigonobogwi ai ʼgelaʼge, Allah en elalugap pesi ai o.

²⁵At Yesus paget Daud en disogo egei, An di aʼge yu aʼge en noborlogouk niouwano oluk naik ʼgain Onuk Logo aʼge ebe neragam oruakma, nin hwedik nan hwedik nil hasu modok welago yo.

²⁶Ye, ai en, nogola nagai hasulat, niak pam erliktagalat, oso yo. An watnobumu nebe werak pobuk op eik ani, oluk nogola en mennei ʼgaroksogo weleik o.

²⁷Asogo weleik ai re, an nebe aphwami warotluk lagaimu eba modok welemagoluk, hat en uknebasulat, An hat homlogo hede hwedik aʼge nebe yu muk emagoluk ʼbullak nebasulat, togun erlak ai enat o.

²⁸Hat en ebela nenelaluk wolomul ai aʼge moʼgulneselat, hat hebe nemin modok welege ai en onogola enagai opogwi aʼge nogola ʼbetesogo wokneselat, tise legen o, [4] oluk Daud en Yesus ebaget egei ai.

²⁹Aʼge re, narilak norokhwi. At neneʼba Daud obok ʼbaksogo moʼgulhentaik. At ebe waragama, nis welegema yemayat ʼgwiang delogo sebeligisa aʼge, ebale naduk welagarik yogodak ogo oruak ai.

³⁰At Daud ebe Allah iak moʼgulentasu laga aʼge ano en e, Allah en hoʼbuk ʼbalogo wene disogo oluk obok moʼgulesi aʼge alugat welaga, Hat ʼgain welegen ai ʼgelaʼge welemagoluk, ap hat en dogoʼgwe aʼge mesik hebalema edikpaik o, [5] oluk obok moʼgulesi.

³¹Asogo obok moʼgulesi aʼge ano ebe owan edikpo erlak oruakhwe, at Daud Allah en tua aʼge aluk welat e, Kristus waromma, Allah en elalugap pouwa o, oluk wene at en disogo egei, Allah en at ebe aphwami warotluk lagaimu eba modok welemagoluk ukpouwa erlak o. Ye, at ebe muk emarik, erlak emagoluk ukpouwa erlagat o, [6] oluk egei.

³²Asogo egei hegitsogoat, at Yesus Allah enat elalugaptegeimu, nis ya ʼberlegat nenil hegerik nenalugat welege ai o.

³³At ebe Allah en elalugaptegeitik, eragam ʼgain welemagoluk edikpesimu oruak o. Welat e, Allah en, Narogun wokhentaik, oluk obok woknentesi ʼgelaʼgeat Yesus wogesimu, at en loksogoat nis nenebam ʼbelakpou wagama re, nis tugukhwe henil nontogulat, henesaʼgo holugulat, togu legep ai o.

³⁴Aʼge re, at Daud ebe ʼbogorl pam ligom erlak. Aʼgeat de, at en disogo egei, Nenaik ʼgain Onuk Logo aʼge en e, an nue ʼgain Onuk Logo aʼge moʼguleselat e, Aphwami hat heselei aʼge ebano, hoyuk en al ʼbesilogo enebagun en, an en owan heʼbek onobuom erlak oruakhwe, hat an neragam neʼgik ʼbekhit akhit hebe ʼgain hweriogo welerinok, oluk at Allah en moʼgulesi, [7] oluk, at daud uʼgwarek en egei ai o.

³⁵

³⁶At Yesus ebe re, his en e pam edikpoluk werigepma, at Allah en, Honue ʼgain Onuk Logo aʼge Kristus ebe yuat o, oluk edikpesi o. Holuk e, his aphwami Israel aʼge ʼberlek en e, Wene ai demat, oluk henaluksogo wolomup o,” oluk moʼgulentesi.

³⁷Asogo moʼgulentesimu, enesaʼgo hweligisarik, wene ai pam enede perik welat e, is en Petrus emin, is logon Yesus en yoʼgo onoboluk peragenebesi aʼge emin, moʼgulontogulat e, “Narilak o. Nis nenebabut noʼgosogo tul,” oluk moʼgulentigisa.

³⁸Asogo moʼgulentigisema, at Petrus en e, “His wiak togu legep aʼge ai ukpoluk henebabut heberlemis o. Asogo heberlomma re, wiak togu legep aʼge ai, Allah en erlagapsogo ukpouwagoluk henebe loʼbok Yesus Kristus onuk ʼbalogo ik olomu ʼbelaphonobuak o. Asogo tumu re, Allah Arogun ai wokhontouwa o.

³⁹At Allah en, Narogun wokhentaik, oluk wene wusogo obok moʼgulnentesi ai re, his henebe emin, heneiyagai emin, is logon onowi walek aʼge eba emin, henebe nenaik ʼgain Onuk Logo aʼge Allah en, Manis o, oluk worlhentasu aʼge ʼberlek enebaget wene hisat wene wusogo obok moʼgulhentesi o,” oluk moʼgulentesi.

⁴⁰Wene ebe asogo yat wiak eselat e, “Aphwami enebabut dagan til lagai aʼge yema, Allah en wene enebam pouwa aʼge ai, ukpoluk honuʼgwarek en delhorlomup o,” oluk enesaʼgo weregei.

⁴¹Asogo enesaʼgo weregeimu re, is wene wegesa aʼge ik olomu ʼbelabenebigisa. Ai erlige enebe 3.000 ʼgelaʼge ik olomu ʼbigisarik e, pobuk enemin laʼbulogo welegesa.

⁴²Enemin laʼbulogo obat welat e, is ap Yesus en yoʼgo onoboluk peragenebesi aʼge ebano en wene moʼgulontogwiam hwedik-hwadigat enesaʼgo holugulat, soʼboru enemin ʼgusogo noʼgulat, seʼban enemin ogulat, togu legesa.

⁴³Aphwami en wene pobi tuagoluk, is ap Yesus en enebe yoʼgo onoboluk peragenebesi aʼge ebano en elalin tu puk aʼge aʼbigat tugukhwe re, aphwami enebe loʼbok onogorlok aga laga.

⁴⁴Is aphwami logon wene demat oluk wegesa aʼge emin enebe mesik aʼge ʼgelaʼge opsogo welat, enaʼge di aʼge yu aʼge paget, “Nis nenemin mesigarat nenaʼge o,” oluk laʼbuksogo tenak welegesa.

⁴⁵Asogo welat e, is pema en, onoʼgwiang emin, enaʼge emin, oʼgo uang wik-wok e, uang ai is Allah eiyagai aʼge ebano enebe loʼbok soʼburontogulat, is nin enaʼge erlak aʼge elirat soʼburontogu legesa.

⁴⁶Asogo tugulat e, agauwa mesik pam mo u erlakma en hwedik-hwadigat Allah owi werikmu odoktugulat, onogola enagai hogulat, enede sebelogoat onowi loʼgwe soʼboru enemin ʼgusogo noʼgulat, togu legesa.

⁴⁷Asogo tugulat, is en Allah erliktogwi oruakma, is aphwami ʼberlek en, “Is op o,” oluk erligonobogu legesa. Erligonobogukhwe oruakma re, nonue ʼgain Onuk Logo aʼge en e, agauwa mesik mo u erlakma en, aphwami logon delogo Allah eiyagai enemin mesigat laʼbulogo enebasu laga.