Read Silimo Peragenebesi 22 Bible Online

Peragenebesi 22 - Silimo bible

Peragenebesi 22

¹“Nue nari. Wene yu an nebam pukmu o, oluk nuʼgwarek nebe erlele wokho moʼgulhentaikmu re, henesaʼgo opsogo hwelip o,” oluk osoam,

²is en e, “Nis aphwami Ibrani aʼge neniak pam moʼgulnentasu,” oluk eniak modok erlik-erlak egesa. Eniak erlik-erlak egesema re, at en e, disogo moʼgulentesi,

³“An e, ap Yahudi aʼge, nebe o propinsi Kilikia o kota Tarsus dagegi aʼgeat de, o Yerusalem yema en yoʼgulnebigisema narlue egi o. Narlue egimu, ap ʼgain Gamaliel en wene Allah en neneʼbalak enesaʼgo weregei wene ano dokhumsogo moʼgulnese laga. Moʼgulnosoam, an en his yogodak Allah paget henannisogo togu legep ai ʼgelaʼgeat taga legi ani o.

⁴Tagalat e, aphwami Yesus iak wegesarik eʼberlik disogo laga legesa aʼge warenebigoluk mugonoboluk lasulat logon warenebigeat. Is logon hwami et, ap et, eneʼgik herle wusogo wogonoboluk, o eneʼgik herle wusogo onobogumu eba enebasu legiat o.

⁵Asogo taga legi ai, ap Allah eiye aʼge onue ʼgain ebe emin, enarluedek emin, enemin ʼberlek en surat wokho nenarilak Yahudi aʼge o Damsyik aʼge eneʼbek woluk louwagoluk woknegisa. Woknegisema, is aphwami Yesus iak wik-wok eʼberlik laga legesa aʼge o eba oruakma eneʼgik herle wusogo wogonoboluk, o Yerusalem yema onobou wagoam, wene enebam pasulat, enebe warenebiselat, tuagoluk peraknebegesarikmu no oluk e, is enaluk. Holuk, is enat, Demat egei, oluk moʼgulhonto aʼge oruak o,” oluk moʼgulentesi.

⁶“An o kota Damsyik horoksogo laik ʼgalma re, o erlige ʼburl mesik erligeat ʼbogorl pam en amulit modok aʼbik aʼge an neragam yosu ʼbu aga.

⁷Yosu ʼbu agoam e, an nebe ʼgwiangma erleʼgalogo ʼbou tegis. ʼBou tegismu, at mesik en e, iak moʼgulneselat e, Saulus. Saulus. Anat di obotut yu obotut taknebaigoluk muknoboluk nese legen ai nopaget, oluk moʼgulnesi.

⁸Asogo moʼgulnesimu, an en e, Eige. Nue o. Hat hebe sa, oluk moʼgulegismu, at en e, An Yesus, nowi Nazaret aʼge, di obotut yu obotut taknebanogoluk muknoboluk nese legen aʼge anoat o, oluk moʼgulnesi.

⁹Asogo moʼgulnosoam e, is ap an nemin lege aʼge en, amulit ai enil hegesa aʼgeat de, iak an moʼgulnesi aʼge ano, enesaʼgo holu erlak.

¹⁰Enesaʼgo asogo hwelak erlak oruakhwe, an en e, Nue. An noʼgosogo tik, oluk moʼgulosoam, at en e, Hebe inoroguntik e, o Damsyik ʼgwin o. ʼGoguntik oruakma re, hat en Allah ogola agai aʼge ʼberlegat togun aʼge paget ap mesik en moʼgulhema ani o, oluk moʼgulnesi.

¹¹Asogo moʼgulnesimu, amulit ano en nil saga-ʼbaga oluk hik egei. Hik egeimu re, is ap nemin lege aʼge ebano en neʼgik ten-ten o Damsyik woknoboluk ʼgwigisa.

¹²ʼGwigisema, o Damsyik eba ap mesik onuk Ananias welaga. Wene Allah en nenesaʼgo weregei wene ano tenak welat hegitsogo tisoam, is aphwami Yahudi aʼge o Damsyik aʼge ʼberlek en hau doʼgoksogo worogu legesa.

¹³At ebe an neʼbek wagarik, neragam edik welat e, Saulus, nare. Hil dek ino, oluk moʼgulnosoam, erianoat an nil dek egeimu re, at ebe dokhumsogo hegi o.

¹⁴Hasuam, at en e, At Allah neneʼbalak en erliktogu legesa aʼge ano en e, at ogola epasu aʼge haluk agalat, at omlogo ebabut hegit aʼge Yesus ai hil hasulat, at iak emde pam en osokhwe hesaʼgo hweliselat, tinogoluk, hebe polikhebegeirik yoʼgo hebesi ai.

¹⁵Holuk e, hil hasulat, hesaʼgo hweliselat, tigen aʼge ai re, aphwami ʼberlegat ʼbaksogo moʼgulentasu lomup o.

¹⁶Aʼge re, hat yogodak aregenat wolorogun no yo. Hebe inoroguntik e, hat wiak taga legen aʼge Allah en emethebiselat, is muon en ik olomu ʼbelaphobogulat, tuagoluk e, Yesus onuk ʼbalogo Allah yoʼgo pemen o, oluk moʼgulnesi o,” oluk moʼgulentesi.

¹⁷Asogo moʼgulentesirik, mesik disogo moʼgulentesi, “Asogo moʼgulnesimu, an pobuk o Yerusalem wegirik e, Allah owi werikmu en seʼban osoma, at Arogun nogola ʼgwegeimu nabi ʼgelaʼge pam hegi.

¹⁸Nabi ʼgelaʼge pam, nonue ʼgain Onuk Logo aʼge en e, Hat en, hil an niegen aʼge ai emin, hesaʼgo hweligen aʼge ai emin, aphwami o yema aʼge ʼbaksogo moʼgulentasuam, hiak enesaʼgo holua modok erlak o. Holuk e, o Yerusalem yema en perlene libemen o, oluk moʼgulnesimu, nabi ʼgelaʼge pam hegi o.

¹⁹Asogo moʼgulnesimu, an en e, Nue. An o seʼabn ogwiʼgwe da ʼgwil ya ʼgwil lasulat e, aphwami enede hat hebam heʼberik welegesa aʼge, eneʼgik herle weriselat, ʼgoʼbu warenebiselat, til denaga legi ano, is modok enaluk o.

²⁰At Stefanus, wene hat hebaget ʼbaksogo aphwami moʼgulentasu laga aʼge ano ebe worogumu, an nebe eba edik welat, Hwein! Obat werigisa, oluk, is ap werigisa aʼge onosum noʼgorlak pekharok welegi ano, is enalugat o, oluk moʼgulentegis.

²¹Asogo moʼgulosoam, nonue ʼgain Onuk Logo aʼge en e, Is aphwami oʼborl oʼgwe aʼge walekma eba eneʼbek perakhebaikmu re, lak o, oluk moʼgulnesi,” oluk moʼgulentesi.

²²Paulus en asogo moʼgulentil wagokhwe, is ebano obat enesaʼgo hwelak welegesarigat de, hwerli eria pam osoam eniak loksogoat disogo egesa, “Ap ebabut degenik aʼge, ʼgwiangma yema elaluk wolom e, mia. Woruok o!” oluk

²³onuʼgwarek onosum noʼgorlogo hwikhai lagalat, ʼgwiang ulage yegelogo hwikhai ligagalat, tigisa.

²⁴Asogo togwiam e, ap tentara Roma aʼge esan logolhogu legesa aʼge onue ʼgain ano en, osi moʼgulentasulat e, “Paulus ebe o ningsogo werikmu ai woluk ʼgoluk, aphwami Yahudi aʼge en eniak loksogo wene ebam pogwi ai, wene edip noʼgosogo tegeimu en oluk ʼgoʼbu wusogo wene edip hera tip o,” oluk moʼgulentesi.

²⁵Asogo moʼgulentesimu, is en ebe ʼgoʼbu woruogoluk herle wusogo pegesema, at Paulus en e, ap tentara aʼge ʼgain mesik eba edik oruakma disogo moʼgulesi, “His en, ap mesik o Roma owirak aʼgeat de, wene ebam po erlakma en ʼgoʼbu naduk woru no?” oluk moʼgulesi.

²⁶Asogo moʼgulosoam, ʼgain ano en yoʼgo ap tentara esan logolhogu legesa aʼge onue ʼgain ano eʼbek lagarik e, “Hat noʼgosogo tigoluk egen aʼge no. Ap yu ebe o Roma owirak aʼgeat o,” oluk moʼgulesi.

²⁷Moʼgulesimu, ap tentara aʼge ʼgain ano Paulus eʼbek wagarik e, “Hat hebe o Roma howirak aʼge a? Moʼgulnemin da,” oluk moʼgulesimu, at en e, “Ye, an nowirak aʼgeat o,” oluk moʼgulesi.

²⁸Asogo moʼgulesimu, ap tentara aʼge onue ʼgain ano en e, “An oʼgo loksogoat ʼbalogo re, nowirak aʼge egirik welegi o,” oluk moʼgulesimu, at Paulus en e, “An o Roma nowirak dagegi aʼgeat o,” oluk moʼgulesi.

²⁹Asogo moʼgulesimu re, is en at ʼgoʼbu woruogoluk tigisa aʼge ebano en perleneat heksogo mo egesa. Asogo mo egesema, ap ʼgain ano ogola en e, “Paulus ebe o Roma owirak aʼge oruakhweat, eʼgik herle weregismu yu re, nogorlok e,” oluk ogorlok aʼbik aga.

³⁰Loruk oʼgwe, is ap tentara aʼge esan logolhogu legesa aʼge onue ʼgain ano en e, “Is aphwami Yahudi aʼge en ap yu wene no aʼge ebam pogwi. Wene pobisogo naluk om aʼge,” oluk wene edip heratuogoluk, is ap Allah eiye onuelak ʼgaindek ebano emin, ap Yahudi aʼge Allah paget wene edip ʼbeloʼgogu legesa aʼge ebano emin, odoktuagoluk yoʼgo enebesimu odoktigisema re, at Paulus eʼgik herle hebilogo poluk is eneʼbek woluk lagarik e, onorogolema edikpesi.