Read Silimo Peragenebesi 23 Bible Online

Peragenebesi 23 - Silimo bible

Peragenebesi 23

¹Asogo edikpesimu, at Paulus is ap Yahudi aʼge Allah paget wene edip ʼbeloʼgogu legesa aʼge enebe odoktigisa aʼge ebano, il pusogo enebam pasulat e, “Nue nari o. An Allah il pam, page enat hwerli yogodak hwerli taga legi ai re, Wiak taga legi, oluk nogola wenemennei eberise legi erlak o. We, wene nogola selak, op nak taga legi, oluk epasu legi o,” oluk moʼgulentesirik e, mesik ik ʼgalma re,

²ap Allah eiye aʼge onue ʼgain onuk Ananias en e, is ap logon Paulus eragam welegesa aʼge en emde ʼbaksogo woruagoluk moʼgulentesi.

³Moʼgulentasuam, at Paulus en, ap Allah eiye aʼge ʼgain ano moʼguleselat e, “O hebat wiak aʼgeat de, op oluk aʼbosu ʼgut aʼge worogwi ai ʼgelaʼge, hagap petne nak op ʼgelaʼge welat hede ʼbiren welegen eba re, Allah en hat wathobuayat o. Hat en e, wene Allah en nenesaʼgo weregei wene ano tenak welat, wene ai hegitsogo tu erlakma en de, wene an nebam poluk hosi en an watnobuagoluk moʼgulentigen ai nopaget,” oluk moʼgulesi.

⁴Asogo moʼgulesimu, is ap eba welegesa aʼge en e, “Ap Allah eiye aʼge onue ʼgain yu hogola en mi-miarak poluk wene yagigen ai nogorlok o,” oluk moʼgulegisa.

⁵Asogo moʼgulegisema, at Paulus en e, “I. Narilak. Allah iak pelal wokho pasulat e, Honuelak ʼgaindek tenentarok welagai aʼge ai honogola en mi-miarak poluk wene yagentagup o, [30] oluk pelal wokho pegesema oruak aʼgeat de, at ebe Allah eiye aʼge onue ʼgain oruak oluk an neperlak enat egimu o,” oluk moʼgulentesi.

⁶Pobuk at Paulus en, is ap wene edip ʼbeloʼgogu legesa aʼge ebano enebe pema re, Saduki aʼge eniak wogu legesa aʼge, ye, nin pema re, Farisi aʼge eniak wogu legesa aʼge, oruakma il enak aʼge pobirak onoboluk e, iak loksogoat disogo moʼgulentesi, “Malik logwe. Nue nari o. An nebe Farisi aʼge. Ap Farisi aʼge enat dogoma aʼge welegi. Welat e, aphwami waragai aʼge pobuk Allah en demat enelalugabonobua oluk pobi taga legi ai en wene nebam pegesema yu i o,” oluk moʼgulentesi.

⁷Is Saduki aʼge en e, “Is aphwami waragai aʼge Allah en enelalugabonobua erlak. Malaikat Allah en yoʼgo ʼbelabonobou wago aʼge enebe erlagat. Muʼgat ogo erlagat o,” oluk ogu legesa. Ye, is Farisi eniak wogu legesa aʼge en e, “ʼBerlek eba re, oruak nak o,” oluk ʼbaksogo ogu legesa. Asogo ogu legesa ai en, at Paulus en wene asogo moʼgulentasuam e, is Farisi eniak wogu legesa aʼge emin, Saduki eniak wogu legesa aʼge emin, enemin en is-is eniak sagalholuk, enebe meʼgerigisarik hwerli ʼbal-ʼbal ʼbigisa.

⁸

⁹Eniak asogo logat sagalogulat e, is ap Farisi aʼge Allah iak pelal wogo enaluk aʼge ebano pema akhit inotluk eniak hurle wiak, is Saduki aʼge ebano wene yagontogulat e, disogo moʼgulentigisa, “Nis nonogola en e, ap yu wene ebam pukmuat opogu lege o. At omuʼgat en moʼgulesimu oso hwi a? At e, malaikat Allah en yoʼgo ʼbelagonobou wago aʼge ebano mesik en moʼgulesimu oso hwi a. Asogo demat moʼgulosoam oso aʼgeat wolom o,” oluk,

¹⁰eniak logat sagalogulat e, Paulus ebe pema akhit en lis, pema akhit en lis, woruano oluk, is ap tentara esan logolhogu legesa aʼge onue ʼgain ano en, osi is ap ebano eneʼbek poluk, Paulus ebe eneʼgerlakma en delogo o ningsogo werikmu ebano woluk ʼguagoluk moʼgulentesi.

¹¹Asogo moʼgulentesimu woluk ʼgwigisema re, o ai erlige hubaʼgo, nonue ʼgain Onuk Logo aʼge Paulus eragam inla ʼgoluk e, disogo moʼgulesi, “Hat en e, wene an nebaget o Yerusalem yema ʼbaksogo moʼgulentigen ai ʼgelaʼge, pobuk o Roma eba asogoat ʼbaksogo moʼgulentai lagun ai en e, hede haʼbuksogo wolomup o,” oluk moʼgulesi.

¹²Loruk oʼgwe ap Yahudi aʼge enebe logon odoktak poluk e, Paulus ebe woruogoluk obok ogulat e, disogo egesa, “Nis en Paulus ebe woru erlak welat e, ik emin, soʼboru emin, no erlak wolomultik en, arat werak poluk en nouwok o,” oluk hoʼbuk ʼbalogo wene ʼbaligisa.

¹³Obok asogo egesa ai re, ap enebe 40, logon eneminat welat en de, egesa.

¹⁴Asogo egesarik, ap Allah eiye onuelak ʼgaindek ebano emin, enarluedek ebano emin, eneʼbek legesarik e, disogo moʼgulentigisa, “At Paulus ebe owan woru erlak welat, di aʼge yu aʼge nul erlak, oluk, hoʼbuk ʼbaligerik en wege.

¹⁵Holuk e, his ap wene edip ʼbeloʼgogwi aʼge enemin en e, at tentara onue ʼgain ano en, Paulus ebe heneʼbek woluk wemagoluk surat disogo oluk wokho perakpomup o, Nis en Paulus emdema seʼgeksogo wouwagoluk ebe neneʼbek woluk worogun en ʼgonu moʼgulhogu lege o, oluk perakpomup o. Asogo perakpagupmu, at en demat oluk heneʼbek woluk weigoluk wagoma, nis Paulus ebe woruogoluk ebela pam hou salultik wolomul ani o,” oluk

¹⁶obok asogo ʼbalogwiam, at Paulus erei en dogo aʼge omlogo mesik eba welat esaʼgo hwelegei. Esaʼgo holholuk, o ningsogo werikmu ano lagarik e, Paulus hosoʼbi moʼguloso ʼgwegei.

¹⁷Hosoʼbi moʼguloso ʼgwegeimu, at Paulus en ap tentara aʼge ʼgain mesik ebe worlhesirik e, disogo moʼgulesi, “Nue. Ap souwe aʼge yu en, honue ʼgain ano wene mesik moʼgulom aʼge oruak o. Holuk e, hat en at eʼbek woluk lak o,” oluk moʼgulesi.

¹⁸Asogo moʼgulesimu, at en ap souwe aʼge ano woluk e, ap tentara onue ʼgain ano eʼbek lagarik disogo moʼgulesi, “Paulus eʼgik herle werak oruak aʼge ano en worlniesirik e, Malik yu en wene at en mesik moʼgulom aʼge oruak o, oluk heʼbek woluk wemagoluk yoʼgo nebesimu woluk wegi ai o,” oluk moʼgulesi.

¹⁹Asogo moʼgulesimu, ap tentara onue ʼgain ano en malik ano eʼgik tin-ten woluk enematekma legesarik disogo moʼgulesi, “Wene no wene moʼgulneigoluk wegen. Moʼgulnemin da,” oluk hin wokhesi.

²⁰Hin wokhasuam, at en e, “Is ap Yahudi aʼge eniak laʼbulogo ogulat e, eniak eseiyat Paulus emdema seʼgeksogo wouwogoluk ʼgelaʼge, hat loruk oʼgwe en ebe woluk, is ap wene edip ʼbeloʼgogwi aʼge odoktak oruakma eneʼbek lagun en ʼgonu moʼgulhomul egesa ai o.

²¹Aʼge re, hat e, wene is egesa aʼge ai, hwelak poluk togun o. Ap enebe 40 aʼge logon eneminat, welat en Paulus ebe woruogoluk obok ʼbaligisarik hou selak wolomul egesa o. Is en e, Paulus ebe woru erlak welat, soʼboru emin, ik emin, no erlakma en wolomultik e, arat werak poluk en de, nul ani o, oluk hoʼbuk ʼbaligisarik oruak o. Asogo welat, yogodak is en e, Wene at en oʼgo noʼgosogo moʼgulnontouwa, oluk yethiarok oruak o,” oluk moʼgulesi.

²²Asogo moʼgulesimu, at tentara aʼge onue ʼgain ano en e, malik ano disogo moʼgulesi, “Hat en e, wene ano arat ʼbaksogo at moʼgulegis, oluk, is mu aʼge logon moʼgulentagun o,” oluk esaʼgo wusogo togolik perakpesi.

²³Asogo tegeitik, ap tentara esan logolhogu legesa aʼge onue ʼgain ano en e, ap ʼgaindek at eragam welegesa aʼge enebe ʼbiren worlentesirik e, disogo moʼgulentesi, “His en ap tentara aʼge enebe 200 emin, wam kuda pam enebe hweriogo welat weim obogwi aʼge enebe 70 emin, segen waʼgun pam waronobogwi aʼge enebe 200 emin, enemin esanat odoktak onoboluk e, yogodak hubaʼgo jam 9 o Kaisarea lagup aʼge pulogo onobomup o.

²⁴Pulogo onoboluk, at Paulus ebe delogo wam kuda oʼborl pam hweriogo poluk, ap ʼgain Feliks gubernur ano eʼbek woluk lagup en e, wam kuda at ebaget mesik pomubat o,” oluk moʼgulentesi.

²⁵Asogo moʼgulentesirik, surat disogo oluk ʼbalogo pesi,

²⁶“ʼGain gubernur Feliks nue. An Klaudius Lisias en surat yu ʼbalogo heʼbek perakpou wegi ai o.

²⁷Ap ai ap Yahudi aʼge en tenak poluk worua ʼgalma re, aphwami en, At ebe o Roma owirak aʼge, oluk moʼgulnegisema, an en nosi tentara aʼge yoʼgo enebegirik wogonoboluk legirik ebe delegis o.

²⁸Ebe delegistik, Noʼgosogo tegeimu en wene ebam pogwi, oluk naluk emagoluk aʼge Allah paget wene edip ʼbeloʼgogwi aʼge eneʼbek woluk legi.

²⁹Woluk legirik, edip palo tige aʼge re, at ebe woru ʼgelaʼge mesik tu erlagat. Ye, eʼgik herle woru ʼgelaʼge ogo, mesik tu erlagat hegi o. We, wene is en ebam pegesa ai re, is aphwami Yahudi en togwi aʼge pagerat ebam pegesema o.

³⁰Aʼge re, aphwami en, Ap Yahudi aʼge en Paulus ebe woruogoluk obok ʼbaligisema o, oluk hosoʼbi moʼgulnosu egesema en, ebe hat heʼbek perakpou wegi ai o. Perakpou wegirik e, pobuk is ap wene ebam pogwi aʼge ai, hat hilem umagoluk enesaʼgo wusogo perakpou wegi ai o,” oluk at Feliks en surat ʼbalegei.

³¹ʼBalegeimu re, osi tentara aʼge ebano en Paulus ebe woluk wemagoluk yoʼgo enebesi ʼgelaʼgeat woluk wegesa. O ai erlige hubaʼgoat, Paulus woluk e, o Antipatris wegesa.

³²Woluk wegesarik e, is wam kuda oʼborl pam wom erlak aʼge en, “His wam kuda oʼborl pam wegep aʼge holuk, Paulus ebe woluk lit o,” oluk peragonoboluk e, is togolik o kota Yerusalem o ningsogo werikmu ano legesa.

³³Legesema, is woluk wegesa aʼge ebano o Kaisarea wegesarik e, surat ʼbelak aʼge ano ap ʼgain gubernur wogotluk e, Paulus ebe ano ogo wogegisa.

³⁴Asogo wogegisema, surat ʼbelak aʼge ano onuk moʼgulegeitik e, Paulus ebam hin wokhasulat, “Hat howi re, o ʼgeba no,” oluk hin wokhesimu, at en e, “An nowi o propinsi Kilikia aʼge o,” oluk moʼgulesi.

³⁵Asogo moʼgulesimu, at en e, “Holuk e, ap wene hebam pogwi aʼge ai enebe pobuk wagai holuk en de, hemdema waik ani o,” oluk moʼgulesirik, at osi en, Paulus ebe o lok at Herodes weregeimu ebano ʼgwelakpoluk tenak welemagoluk moʼgulentesi.