Read Silimo Peragenebesi 25 Bible Online

Peragenebesi 25 - Silimo bible

Peragenebesi 25

¹ʼGain Festus ano edikpegesema, o Kaisarea eba wagarik e, agauwa henagan welagarik, o Yerusalem laga.

²Lagarik oruakma, is ap Allah eiye aʼge onuelak ʼgaindek ebano emin, ap Yahudi aʼge onuelak ʼgaindek ononuk oruak aʼge logon emin, enemin eʼbek ʼgwigisarik e, wene Paulus ebam pogu legesa aʼge ano moʼgulegisa. Moʼgulogulat e, ede ʼgi-ʼgagalsogoat tigisa.

³Asogo moʼgulegisa ai re, at ʼgain ano osi en Paulus ebe woluk o Yerusalem womogoluk wagaimu, ebela pam en woruogoluk obok eniak mesigat laʼbulogo egesarik at moʼgulogulat e, “Hat hebabut op en, nis nenede opsogo Paulus ebe o Yerusalem yema perakpou manup o,” oluk eniak sakhosogo ʼgonu moʼgulegisa ai o.

⁴Asogo moʼgulegisa aʼgeat de, at Festus en e, “At Paulus eʼgik herle werak o Kaisarea ebayat welemak. Oruakma re, an yema wolom erlakma en perleneat laik o.

⁵At en tu puk aʼge mesik tiso holuk, his ap ʼgaindek aʼge yema en wene ebam pagup en e, neneminat louwok o,” oluk moʼgulentesi.

⁶Asogo moʼgulentesirik, agauwa 8 aʼge en de a? 10 aʼge en de a. Enemin o Yerusalem welegesarik en, o Kaisarea waga. Wagarik, hubet oʼgwe re, o aphwami wene enebam pogulat, noʼgorlogulat, togu legesema eba hutla ʼgoluk, osi en Paulus ebe woluk wemagoluk moʼgulentesi.

⁷Moʼgulentesimu legesarik ebe woluk wegesema re, is ap Yahudi aʼge o Yerusalem en wegesa aʼge ebano Paulus ebe waliʼgik poluk, di wene yu wene eʼgin aʼge aʼbigat ebam pegesa. Asogo aʼgeat de, at wiak mesik tu erlakma no oluk e, “Demat wiak disogo tagoma nenil hege o,” oluk moʼgulom aʼge erlak aga.

⁸Asogo erlak agama, at Paulus en uʼgwarek ebe erlele wokho disogo moʼgulesi, “Wene Allah en nis aphwami Yahudi aʼge nenesaʼgo weregei wene ano mesik sagalogo ukpoluk wiak tagalat, o Allah owi werik aʼge ano wiagap tagalat, nonue ʼgain Kaisar o Roma aʼge ano iak sagalogo ukpoluk mesik wiak tagalat, modok tu erlak o,” oluk moʼgulesi.

⁹Asogo moʼgulesimu, at Festus en e, aphwami Yahudi aʼge onogola opsogo oluk, Paulus disogo moʼgulesi, “O Yerusalem eba en wene yu paget an nilem wene edip heratogumu, demat holuk an en ologun werik en e, nemin lul a? Hebit a,” oluk moʼgulesi.

¹⁰Moʼgulesimu, at Paulus en e, “An yogodak e, wene enebam pogulat, noʼgorlogulat, tugumu yema, nonue ʼgain Kaisar Roma aʼge eʼgik pam welegi. Holuk e, wene nebam pegesa aʼge yu, at oruakma eba enat wene edip herasogo ologun woruak o. An en is aphwami Yahudi aʼge wiak mesik tagonobo erlak ano, hat halugat o.

¹¹An en mesik tu puk aʼge tagalat, wiak togwiam enebe modok waronobogwi aʼge tagalat, demat telimu re, Watnobu hegirat o. Watnebit, oluk eli. Aʼge re, is ap yema en wene nebam erlakmayat pogwi ai en, is logon en, is ap yema onogola opsogo oluk, an nebe is eneʼgik pam nobo mia o. We, nue Kaisar enat wene ai edip herasogo ologun woruak o,” oluk moʼgulesi.

¹²Moʼgulesimu, ap mesik at ʼgain Festus emin welat, “Disogo tuok, yusogo tuok,” oluk emin ogu gesa aʼge emin en e, “Disogo tuok o,” egesarik en Paulus disogo moʼgulesi, “Hat en e, Wene yu, ap Kaisar en edip herasogo ologun woruak o, oluk egen ai en, Kaisar eʼbek perakhebaigat o,” oluk moʼgulesi.

¹³Asogo egesarik e, agauwa weiyat oruakma en, ap ʼgain onuk logo aʼge Agripa erei Bernike eminat, at ʼgain Festus hau woruogoluk eʼbek o Kaisarea wegesa.

¹⁴Wegesarik agauwa logon enemin eba oruakma, at Festus ano en e, wene Paulus paget Agripa disogo moʼgulesi, “ʼGain Feliks en ap mesik eʼgik herle wusogo perakpesi aʼge yema oruak o.

¹⁵Oruakhwe, an o Yerusalem legimu, is ap Yahudi aʼge Allah eiye aʼge onuelak ʼgaindek emin, enarluedek emin, enemin neʼbek wegesarik e, an en ap ai wene ebam poluk ebe woruagoluk moʼgulnegisa.

¹⁶Moʼgulnegisa aʼge re, an en oʼgo disogo moʼgulentegis, Nis aphwami Roma aʼge en togwi re, ap mesik wene ebam pogwiam, is wene ebam po aʼge oruak en ap ano ebe moʼgulogwiam, at en oʼgo is moʼgulentasu erlakma re, enebe waronobuagoluk ebe wogonto mia o, oluk moʼgulentegis.

¹⁷Asogo moʼgulentegistik, enebe nemin yema wegerik, agauwa wolom erlakma enat, loruk oʼgwe nosi en ap ano o aphwami wene enebam pogulat, noʼgorlogulat, togumu ebano woluk wemagoluk moʼgulentegis.

¹⁸Asogo moʼgulentegismu, legesarik ebe woluk wegesema, at ebe ʼburl edikpoluk, is ap ebano inotluk e, modok wiak tegei aʼge wene ebam pouwa epegi aʼge re, asogo ebam po erlak.

¹⁹We, is en enaik Allah pam heʼberik welat eniak hun domok ogwi aʼge paget wene mesik ebam pogulat, ap mesik onuk Yesus ai, ebe waraga aʼgeat de, at Paulus en e, Pobuk togolik elaluk agarik oruak o, oluk iak ningsogo oso ai en wene ebam pogulat, tigisa o.

²⁰Wene asogo ebam pegesa aʼge ano, an wene ai paget pobi tu erlak. Nede ing-ding egeimu re, an en Paulus disogo moʼgulegis, O Yerusalem loluk en e, wene yu edip herasogo, an ologun werik en e, lul a? Hebit a, oluk moʼgulegis.

²¹Moʼgulegismu, at Paulus en e, Wene yu at Kaisar enedip herasogo ologun woruagoluk neʼgik herle wusogoat uknobomup o, oluk egeimu, an en nosi disogo moʼgulentegis, ʼGain Kaisar eʼbek perakpo ʼgelaʼge ago holuk e, perakpaikmu re, eʼgik herle weragat tenak wolomup o, oluk moʼgulentegismu oruak o,” oluk moʼgulesi.

²²Asogo moʼgulesimu, at Agripa en e, “Ap ai iak an nesaʼgo domok holu nagai yo,” oluk moʼgulesimu, at Festus en e, “Holuk e, loruk en de, iak hesaʼgo hologun o,” oluk moʼgulesi.

²³Moʼgulesimu, loruk oʼgwe ap Agripa o, hwe Bernike o, eʼbirek erligonobogukhwe, is ap tentara onuelak ʼgaindek emin, ap o eba aʼge ononuk oruak aʼge emin, enemin o wene enebam pogulat, noʼgorlogulat, togumu ebano ʼgwigisa. ʼGwigisema, at Festus en e, osi en Paulus ebe woluk wemagoluk moʼgulentesi.

²⁴Moʼgulentesimu legesarik ebe woluk wegesema, at Festus en e, “Agripa nue. Ye, his ap logon neneʼbek ʼgu egep aʼge yema heneminat, narilak norokhwi wa o. Ap henil hegep aʼge yu re, is aphwami Yahudi aʼge o Yerusalem en, yema en, enebe ʼberlek en e, an moʼgulnogulat e, Ap yu elaluk wolom puk. Woruat o, oluk eniak loksogoat ogwi o.

²⁵Is en asogo ogwi aʼgeat de, an en wene ai edip herategis aʼge re, at en demat wiak mesik tisoma, wene enebam poluk enebe waronobogwi hegitsogo mesik tegei erlakma hegi o. Aʼgeat de, at uʼgwarek en e, Wene yu ʼgain Kaisar en edip herasogo ologun woruak, oluk egeimu, Kaisar eʼbek perakpaigoluk tegis ai o.

²⁶Aʼge re, wene at ebam pegesa aʼge ai edip heratogukhwe, an en pobi tu erlakma en we, nede ing-ding egeimu wene ai paget pelal wokho nonue ʼgain Kaisar eʼbek noʼgosogo perakpo ʼgelaʼgeat agama ai o. Narilak norokhwi. His ʼberlek henemin, nonue ʼgain logo aʼge Agripa emin, henemin en wene Paulus ebam pegesa aʼge ai, edip heratogumu, an pobirak poluk pelal seʼgeksogo wokho perakpaigoluk nede epegirik en at ebe heneʼbek woluk wegi yu i o.

²⁷Asogo tegis ai re, wene edip herasogo en de, Disogo tegeimu, oluk pelal seʼgeksogo wogo erlakma, at eʼgik herle wusogo perakpo re, mia epegirik en at ebe woluk wegi ai o,” oluk moʼgulentesi.