Read Silimo Peragenebesi 3 Bible Online

Peragenebesi 3 - Silimo bible

Peragenebesi 3

¹Agauwa mesik erlige re, jam 3 pam, mo hweya lai laigoluk tisokhwe, Petrus Yohanes emin, aphwami Allah owi werikmu en seʼban ogu legesa ʼgelaʼgeat uogoluk tugumu, eneʼbek ligegesa.

²Ligegesa ʼgal e, ap mesik ia ogola en oyuk modok soborak aʼgeat dagagarik welaga aʼge, ʼgoduk emde ʼbelakma onuk ʼBogunwiak oluk ogu legesema ebano pou wegesarik oruakma hegesa. Aphwami en ap ai agauwa mesik mo u erlakma en nin hwedik nan hwedik aphwami logon Allah owi werikmu ʼgogukhwe re, di aʼge yu aʼge ʼgonu tise lemagoluk, ʼgoduk emde ʼbelakma eba e yesogo pou waga legesa.

³O ai erlige pegesema hweriogo oruakma re, Petrus Yohanes eʼbirek Allah owi werikmu ʼguogoluk tugumu, il yerontoluk e, is en di aʼge yu aʼge logon wogemagoluk ʼgonu moʼgulentesi.

⁴ʼGonu moʼgulentesimu re, is eʼbirek en enil putsogo yethogulat e, at Petrus en e, “Hil yetnentemen o,” oluk moʼgulesi.

⁵Moʼgulesimu re, at ap ano ogola en e, “Is en di aʼge yu aʼge logon woknema hegi,” oluk il enebam welaga.

⁶Il enebam oruakma re, at Petrus en e, disogo moʼgulesi, “Uang emas emin, perak emin, an neʼgikmu modok erlak ai o. We, an oruak aʼge mesik wokheik o. Ai re, hebe inotluk ebela noso lorogun en, Yesus Kristus owi Nazaret aʼge onuk ʼbalogo moʼgulhegis o,” oluk moʼgulesi.

⁷Asogo moʼgulesirik e, eʼgik ʼbekhit akhit tenakho edikpesi. Edikpesimu re, ap ano oyuk soborakma re, oyuk emin, oyuk il emin, erianoat anni aga.

⁸Anni agarik e, siaksogo inotluk ebela nese lagarik e, Petrus Yohanes emin Allah owi werikmu ʼgwigisa. ʼGugulat e, ap ano Allah erliktagalat, da hogut ya hogut, til ʼgwegei.

⁹Asogo ʼgwisokhwe re, aphwami ʼberlek en enil hegesa.

¹⁰Enil hegesarik e, at ebe enak aʼge pobi tigisarik, “Allah owi werikmu ʼgoduk onuk ʼBogunwiak emde ʼbelakma odipmu de ebela pam eriano hweriogo welat e, di aʼge yu aʼge wogogu lemagoluk ʼgonu ese laga aʼge ano ebe yu. Eige! Noʼgosogo op aga. Nonogorlok e,” oluk erliktigisa.

¹¹Ap ano Petrus Yohanes emin eneʼberlik modok nese lagarik Allah owi werikmu en liplau wegesarik e, o sorloʼbon onuk Salomo osorloʼbonma oluk ogu legesema ano liplau wagokhwe re, aphwami ʼberlek en erliktil pungtak modok eneʼbek odoktigisa.

¹²Odoktigisema re, at Petrus il entesirik e, disogo moʼgulentesi, “His aphwami Israel aʼge yu logwe! Ap yu ebela noso yu re, nis nonuʼgwarek nenanni pam tugulat, nenebabut op en Allah iak hologo togu lege pam, tugulat, tige oluk, his erliktugulat, henil putsogo yetnontugulat, togu legep yema nopaget.

¹³Nenaik Allah ai, Abraham emin, Ishak emin, Yakub emin, neneʼbalak logon emin, enaik Allah ai enat, omlogo Yesus logo pesi ai o. Aʼge re, his en e, is pema en woruagoluk eneʼgikmu pegepma re, at Pilatus en eʼgik herle hebilogo lebikpaigoluk tisoma, his en e, Ap ai nenebit o, oluk egep ani o.

¹⁴At e, Allah en perakpou wagama ebabut hegitsogo nak taga laga aʼgeat de, his en Pilatus moʼgulogulat e, Ap ai ebe nenebit o. Ap mesik apware aʼge, aiat eʼgik herle hebilogo woknentemen o, oluk ʼgonu moʼguligep ebano re.

¹⁵Nenelalugapnenebiso aʼge edip ebe at aʼgeat de, his en werigepma Allah en e, ebe elalugaptegeimu, nis nenil demat hegerik en moʼgulhontogu lege o.

¹⁶Ap oyuk soborak welaga aʼge yu en e, Yesus ai demat, oluk onuk ʼbalogo, ede at ebam heʼberik pesi ai pam, ap yu henil hogu legepma re, ebe henaluk aʼge anoat anni aga yu i o. Ede asogo Yesus ebam heʼberik pesi ai pam, his henil pamat modok obaptegeimu yu i o.

¹⁷Aʼge re, narilak norokhwi. His honuelak ʼgaindek enemin Yesus paget tigep ai, heneperlak welat tigep ai, an naluk o.

¹⁸Pageat Allah en e, An en delhenebik aʼge Kristus heneʼbek perakpou weik ai, ebe di obotut yu obotut ebam poluk woruayat ani o, oluk obok moʼgulnentesi aʼge ai, ebe is ap at iak moʼgulontogu legesa aʼge ebano enebe ʼberlek en ogu legesa ai hegitsogo emagoluk aga ai o.

¹⁹Ai en e, his wiak togu legep aʼge ai, nenaik ʼgain Onuk Logo aʼge Allah en erlagapsogo ukpoluk, henede paget henil eʼgatsogo takhonobou wagalat, at en e, Kristus henebe delhenebiso aʼge heneʼbek perakpou weik, oluk obok moʼgulentesi ano ebe Yesus aiat pobuk heneʼbek perakpou wagalat, tuagoluk e, henebabut heberlotluk honolukhwe Allah wogemis o.

²¹Yogodak ya re, Yesus ebe ʼbogorl pam wolom ʼgelaʼgeat welema o. Welemarik en, hwerli Allah en di aʼge yu aʼge ʼberlegat ʼget aʼge agauwak heleʼgua ai hwerli en de, ʼbuma o, oluk pageat is ap enebe Allah paget welat at iak moʼgulontogu legesa aʼge ebano en egesa hegitsogoat ema o.

²²Ye, at Musa en e, disogo moʼgulentesi, Nenaik ʼgain Onuk Logo aʼge Allah iak moʼgulhentasu lemagoluk, ap his aʼge mesik an ediknebesi ai ʼgelaʼge, pobuk edikpaik ani o. Edikpaikmu re, at en di wene yu wene moʼgulhontouwa aʼge aiat henesaʼgo modok opsogo holugulom o.

²³Ap sa en wene at en moʼgulhontouwa aʼge ai, esaʼgo hweliso erlak holuk e, at Allah en, at eiyagai eneʼgerlakma en degelogo lebigonoboluk wiagap pouwa o, [8] oluk moʼgulentesi.

²⁴Is ap naduk Allah iak moʼgulontogu legesa aʼge ebano, hwerli at Samuel ai hwerli en e, is pobuk Allah iak moʼgulontogu legesa aʼge eneminat, enebe ʼberlek en e, wene nis o yogodak ya welat togu lege aʼge paget ogu legesa.

²⁵Allah en wene wusogo obok moʼgulnentesi aʼge is ap nadugat at iak moʼgulontogu legesa aʼge ebano en moʼgulontogu legesa ai, his henebagerat o. Ye, Allah en nis neneʼbalak wene wusogo wogenebegei ai, his henebagerat o. At Allah en Abraham moʼguleselat e, Hat en dogoʼgwe aʼge ai pam aphwami ʼgwiangma aʼge yema di aphwami yu aphwami enaʼgul onuk loʼbok obabenebik o, [9] oluk wene wusogo obok moʼgulentesi.

²⁶Allah en e, wene ai wusogo obok moʼgulentesi ʼgelaʼge, his wiak togu legep aʼge henebe loʼbok honoʼborl akhit ukpouwagoluk at uʼgwarek eragam aʼge ebe obaphonobua aʼge his naduk heneʼbek ʼbelakpou waga ai o,” oluk enesaʼgo weregei.