Read Silimo Peragenebesi 5 Bible Online

Peragenebesi 5 - Silimo bible

Peragenebesi 5

¹At Barnabas en asogo pou waga aʼgeat de, ap mesik onuk Ananias ugwe Safira eʼbirek en onoʼgwiang mesik eiye oruakma is aphwami mu aʼge enebam uang oʼgo wegesa.

²Wegesarik e, Ananias ano ugwe eʼbirek en e, “Disogo tuok,” oluk egesa aʼge ugwe ano alugat oruakhweat de, ogun en uang ebano ado pema onuʼgwarek paget pagathorloluk e, pema nak is ap Yesus en yoʼgo onoboluk peragenebesi aʼge ebano eneʼgigem pou wegesa.

³Pou wagama, at Petrus en e, “Ananias. Iblis en hede ʼgagalegeimu Allah Arogun lalogo ʼgwiang oʼgo wegen aʼge pema meʼgisogo huʼgwarek paget pagathorloluk wegen ai nopaget.

⁴ʼGwiang ai hat en is mu aʼge enebam oʼgo owan wo erlak oruakhwe, hat hoʼgwiang aʼgeat de, is mu aʼge wogentigenma oʼgo pegesa aʼge ai hat en aʼgeat o. Aʼgeat de, asogo hede opoluk tigen ai nopaget. Hiak eseiyat lalogo egen ai, nis aphwami moʼgulnentigen puk. At Allah at laligen ai o,” oluk moʼgulesi.

⁵Asogo moʼgulosokhwe, wene ano, at Ananias esaʼgo hwelegeitik e, omuat erleʼgalogo ʼbulak ti lagarik lebeksogo waraga. Waragama re, is aphwami enebe esanat wene aga aʼge ano, enesaʼgo hweligisarik e, onogorlok aʼbik aga.

⁶Asogo waragama, is ap souwe aʼge ebano ʼgwigisarik e, ebe werak ano sum pam eʼgirlogo woluk libegesarik, ʼgwiang palogo selak pei legesa.

⁷Werak woluk libegesema, 3 jam ʼgelaʼge il weiyat oruakma en, at Ananias ugwe wene aga aʼge ano eperlagat welagarik e, wongsogoat ʼgwegei.

⁸ʼGwegeimu, at Petrus en e, “ʼGwiang his en aʼge ai oʼgo re, yu hwerliat wokhentigisa no? Dokhumsogo moʼgulnemin da,” oluk moʼgulesimu, at en e, “I o. Ai hwerliat woknentigisa o,” oluk moʼgulesi.

⁹Asogo moʼgulesimu, at Petrus en e, “His hogun heʼbiregat, wene? Disogo tuok, oluk egeptik en nenaik ʼgain Onuk Logo aʼge Allah Arogun ebabut ʼbaluogoluk tigep ai nopaget. Hat hogun ebe werak ʼgwiangma sali legesarik, hat ogo asogoat wokhoboluk libomogoluk wagalat, onoyuk oborlogouk odipmu wagai otlu hesaʼgo hwelin o,” oluk moʼgulesi.

¹⁰Asogo moʼgulosokhwe erianoat Safira ano omuat Petrus eragam erleʼgalogo ʼbulak ti lagarik ebe lebeksogoat waraga. Waragarik oruakma, is ap souwe ebano ʼgwigisarik, enil ʼgwelakholuk e, ebe werak ano woluk ogun sali legesema eragam ebano sali legesa.

¹¹Wene asogo agama re, is Allah eiyagai aʼge ʼberlek emin, ye, is aphwami pema enesaʼgo hweligisa aʼge ʼberlek emin, onogorlok aʼbik aga.

¹²Is ap Yesus en enebe yoʼgo onoboluk peragenebesi aʼge ebano aphwami esanat enemin welat e, wene aphwami en pobi tuagoluk elalin tu puk aʼge tagonobogu legesa. Tagonobogulat e, is Allah eiyagai enebe ʼberlegat enede mesigat welat, enebe Allah owi werikmu o sorloʼbon onuk Salomo osorloʼbonma odoktogu legesa.

¹³Odoktogumu re, is aphwami esanat ebano en erligonobogu legesa. Asogo aʼgeat de, is aphwami we aʼge en is eneʼbek ʼgwilo onogorlok welegesa.

¹⁴Oruakhwe re, is Allah eiyagai egesa aʼge oruakma re, is logon ap et, hwami et, onogola en e, “Nonue ʼgain Onuk Logo aʼge demat o,” oluk enede at ebam heʼberik poluk, is enemin laʼbuksogo enebe modok aʼbigat logetil legesa.

¹⁵Asogo logetil legesema re, is aphwami ou wogu legesa aʼge, pema e delak aʼge pam onobogulat, pema erlis demak aʼge pam onobogulat, toluk e, Petrus wagoam arogun enebam hegit ago holuk e, selang uagoluk, ebela pam onobou waga legesa.

¹⁶Asogo tugukhwe re, is aphwami onowi o Yerusalem esaʼgoʼgwe aʼge etleba en wagalat, is pema ou wogu legesa aʼge emin, muʼgat enebabut wiak aʼge onogola ʼgoluk welat enede ʼbalaga legesa aʼge emin, wogonoboluk eneʼbek waga legesayat. Wogonoboluk wagaiam e, enebe ʼberlegat obabonobogu legesa.

¹⁷Asogo tagenebegesema, ologun pam e, is ap Allah eiye onue ʼgain aʼge osi enebe ʼberlegat enemin, is ai re, aphwami Saduki aʼge eniak wogu legesa aʼge, Yesus en is enebe yoʼgo onoboluk peragenebesi aʼge ebano asogo togwiam enebam ʼbou togu legesa. Asogo ʼbou togu legesarik, enebe tenagonoboluk e, o aphwami eneʼgik herle wusogo onobogumu ebano enebegesa.

¹⁸

¹⁹Onobogwiam oruakma re, malaikat nonue ʼgain Onuk Logo aʼge en yoʼgo ʼbelagonobou wago aʼge ebano mesik hubaʼgo ʼbu agarik e, o aphwami eneʼgik herle werak onobogumu ebano, ʼgoduk lerak aʼge husogo-hasogo poluk enebe wogonoboluk liplau waga.

²⁰Wogonoboluk liplau wagarik, at en moʼgulentasulat e, “His henebe Allah owi werikmu lu o. Eba ʼgwilaguptik edik welat e, wene op wene henebe henelaluk welat ʼget mu aʼgeat tugulom wene ai ʼberlegat moʼgulentai lu o,” oluk moʼgulentesi.

²¹Asogo moʼgulentesimu re, enesaʼgo holholuk, o dakha osokhwe, Allah owi werikmu ʼgwigisarik wene moʼgulontogu legesa. Asogo moʼgulontogukhwe re, is ap Allah eiye aʼge onue ʼgain ano osi enemin en ap enarluedek Israel aʼge wene edip ʼbeloʼgogu legesa aʼge ʼberlegat, yoʼgo enebegesarik enebe odoktak poluk, onosi logon en e, is Yesus en yoʼgo onoboluk peragenebesi aʼge eneʼgik herle werak enebegesa aʼge ano wogonoboluk wemagoluk, o enebegesema ano peragenebegesa.

²²Asogo peragenebegesema, is ebano legesema re, is ap Yesus en yoʼgo onoboluk peragenebesi aʼge ebano eneʼgik herle wusogo onobogumu ebano enebe erlakma. Enebe erlak en togolik wegesarik e, is ap ebano disogo moʼgulentigisa,

²³“O aphwami eneʼgik herle werak onobogumu ano, ʼgoduk ningsogo lerak oruakhwe, herle werak aʼge enebe lebemano oluk, ap ʼgoduk pam ʼgagalak welagai aʼge ebano enebe oruakma lege o. Legerik, nenebe ʼgwige ʼgal e, olema is ap ebano enebe erlakma o,” oluk moʼgulentigisa.

²⁴Moʼgulentigisema re, is ap Allah owi werik ʼgwelakharok welegesa aʼge ebano emin, Allah eiye aʼge onuelak ʼgaindek ebano enemin en e, “Is ap Yesus en yoʼgo onoboluk peragenebesi aʼge ebano noʼgosogo agama en egesa,” oluk enede nalagarik, “Pobuk noʼgosogo ema logwe,” oluk enede perik welegesa.

²⁵Asogo enede perik oruakma, ap mesik wagarik e, “Malik logwe. His ap eneʼgik herle wusogo enebegep aʼge ebano re, Allah owi werikmu edik welat, aphwami aʼbigat wene moʼgulontogwi o,” oluk moʼgulentesi.

²⁶Asogo moʼgulentasu lagama re, at ap ʼgain Allah owi werik ʼgwelakharok welaga aʼge ano osi enemin legesarik e, is ap Yesus en yoʼgo onoboluk peragenebesi aʼge ebano wogonoboluk wegesa. Aʼge re, wogonoboluk womogoluk onogola en e, “Aphwami esan en Yesus osi erlele wokho nis helep pam watnonobuano,” oluk onogorlok en eniak ningsogoat wogonoboluk wom erlak. We, lioksogo wogonoboluk wegesa.

²⁷Wogonoboluk wegesarik, ap wene edip ʼbeloʼgogu legesa aʼge ebano ʼburl eneʼgerlakma edigenebegesa. Asogo onoboluk e, at ap Allah eiye aʼge onue ʼgain ano en e, wene disogo moʼgulentesi,

²⁸“His en ap ai onuk ʼbalogo re, wene moʼgulentagup o, oluk nis en henesaʼgo opsogo werige aʼge anoat de, his en wene ai wiyalogo moʼgulontogu legepma re, aphwami o Yerusalem aʼge yema ʼberlegat enaluk aga ai re, at ap ai werigisa pam, wene nis nenebam pouwogoluk ogu legep hegi o,” oluk moʼgulentigisa.

²⁹Asogo moʼgulontogu legesema, is Petrus lak, Yesus en yoʼgo onoboluk peragenebesi aʼge ebano en e, “Nis e, aphwami aʼge eniak hologo tu erlak, Allah iak aiat hologo tu o.

³⁰His en Yesus ebe tenak pegeptik e pam edikpoluk werigep ano, neneʼbalak en at Allah eragam ʼgoluk erliktogu legesa aʼge ano enat togolik elalugaptegeimu oruak o.

³¹Elalugaptegeimu oruak ai, aphwami Israel aʼge wiak togwi aʼge ai ukpoluk enebabut heberlumu re, Allah en, wiak togwi aʼge ai erlagapsogo ukpouwagoluk, Yesus ebe elalugaptegeitik e, at ebe nonue ʼgain Onuk Logo aʼge welat delnenebise lemagoluk eʼgik ʼbekhit akhit eragam edikpesimu oruak ai o.

³²Asogo tegei oluk nis nenil dokhumsogo hegerik e, Demat, oluk moʼgulhontogu lege o. Aphwami Allah iak hologo togu lege aʼge, at Arogun woknentasu ai nenemin enat wene ai moʼgulhontogu lege o,” oluk moʼgulentesi.

³³Asogo moʼgulentesimu re, is onolot het aʼbik agarik e, ap Yesus en yoʼgo onoboluk peragenebesi aʼge ebano waronobuogoluk tigisa.

³⁴Waronobuogoluk tigisa aʼgeat de, ap mesik is ap Farisi aʼge onowene tenak welat, is enemin wene edip ʼbeloʼgogu legesa aʼge onuk Gamaliel. At ai wene Allah en nenesaʼgo weregei wene ano moʼgulentasuam, aphwami ʼberlek en, “At op o,” oluk hau doʼgoksogo worogu legesa aʼge. At ai inagarik e, disogo moʼgulentesi, “Ap eneʼgik herle werak aʼge yu, lodu nak odipmu welemagoluk lebigenebemit o,” oluk moʼgulentesi.

³⁵Asogo moʼgulentesimu lebigenebegesema re, at en wene disogo moʼgulentesi, “His ap Israel aʼge narilak. Ap ai noʼgosogo tagonobul epegep. Henede opsogo eberak poluk en tu o.

³⁶Nadugat, ap mesik onuk Teudas inagarik e, ʼGain anat o, oluk egeimu, ap esanat enebe 400 ʼgelaʼge at eragam ʼgwigisarik eʼberlik denaga legesa. Asogo aʼgeat de, at ebe werigisema, osi at eragam ʼgwigisarik eʼberlik denaga legesa aʼge ebano ʼbullak-hallak libegesema re, at en, Disogo tuok, oluk ese laga aʼge wene ano erlagat aga.

³⁷Erlak agama re, pobuk ʼgaindek pemerintah aʼge en aphwami enebe wenakho ononuk ʼbaluogoluk togwiam e, ap mesik owi o Galilea aʼge, onuk Yudas inaga. Inagarik e, aphwami esanat enede ʼgagalegeimu re, at eragam ʼgwigisarik eʼberlik denaga legesa. Aʼge re, at ebe werigisayat. Werigisema, osi eragam ʼgwigisarik eʼberlik denaga legesa aʼge ʼbullak-hallak libegesa ai o.

³⁸Holuk e, wene yogodak yu paget e, an en wene mesik henesaʼgo werik. His en ap ai disogo yusogo mesik tagenebagup. Wene is en moʼgulontogulat tagonobogwi ai, edip is aphwami en holuk e, wene ai erlak ema o. Aʼgeat de, wene ai edip Allah at holuk e, his en is mabenabonobo aʼgeat de, mia ema o. Asogo mia agoam e, his en Allah emin weim obu ʼgelaʼge emano oluk e, ugenebemit o,” oluk enede sebelegei.

³⁹

⁴⁰Enede sebelegeimu, is ap Yesus en yoʼgo onoboluk peragenebesi aʼge ebano worlontogwiam ʼgwigisema re, ʼgoʼbu warenebegisarik en, “Yesus ano onuk ʼbalogo, wene pobuk asogo moʼgulontogu lorogup o,” oluk enesaʼgo wusogo lebigenebegesa.

⁴¹Lebigenebegesema, is ap wene edip ʼbeloʼgogu legesa aʼge ebano ugonoboluk libegesarik e, is-is nak ogulat e, “Allah en e, His Yesus onuk paget aphwami en, His wiak, oluk wene yakhontoma re, elit, oluk ogola epesi hegitsogoat wene yaknentigisa ai op o,” oluk onogola enagai hil hil libegesa.

⁴²Libegesarik, is ano en Allah owi werikmu ʼgugulat, aphwami onowi loʼgwe ʼgugulat, tugulat e, “Allah en e, Ap mesik en aphwami delhonobuagoluk yoʼgo poluk perakpou weik, egei ano, ebe Yesus aiat o,” oluk Yesus en tegei aʼge wene, op wene ano mo u erlakma en hwedik-hwadigat moʼgulentil denaga legesa.