Read Silimo Peragenebesi 7 Bible Online

Peragenebesi 7 - Silimo bible

Peragenebesi 7

¹At Stefanus wene asogo ebam pegesema, at ap Allah eiye aʼge onue ʼgain ano en e, “Wene ai demat ogwi a? Eniak esei ya,” oluk moʼgulesi.

²Moʼgulesimu, at Stefanus en e, disogo moʼgulentesi, “Naiklak, nue, nari wa. Wene ik aʼge yu, henesaʼgo opsogo hwelit o. Nenaʼbu Abraham ano o Haran deksogo owan wom erlak, o Mesopotamia oruakma, Allah, erliktogwi aʼge ano orogolema inaga.

³Orogolema inagalat e, O hat welegenma yema emin, hue hari enebe emin, ugonoboluk e, libemen o. Liborogun holuk e, o an en moʼgulheikmu eba lu o, [12] oluk moʼgulesi.

⁴Moʼgulesimu re, o aphwami Kasdim aʼge onowi pam ukpoluk, o Haran deksogo waga. Wagarik oruakma, aik waragama re, o eba ukpoluk Allah en o poluk hokhomsogo o his yogodak welegepma yema pou waga ai o.

⁵Asogo pou waga aʼgeat de, at en e, O yema eiye harat o, oluk hwiagum erlagat. Ye, ʼgwiang weisogo logon hwiagum erlagat, welat e, O yema pobuk hat eiye agalat, hat en dogoʼgwe aʼge eiye agalat, togup o, oluk at omlogo dagom erlak oruakhweat wene wusogo obok moʼgulesi ai o.

⁶Obok asogo moʼgulesi aʼgeat de, disogo moʼgulesiat, Hat en dogoʼgwe aʼge ai aphwami onowi pam loluk ap ʼbok ʼgelaʼge welema o. Asogo oruakma aphwami eba aʼge en eneragam aʼge ʼgelaʼge tagonoboluk e, o mo ligom ʼbugom osokhwe 400 tahun mep sisoluksogo tagonobogu lema o.

⁷Aʼge re, is aphwami onowirak aʼge en eneragam aʼge ʼgelaʼge onoboluk tenentarok welema aʼge ai, an en wene enebam poluk wiagabenebaik o. Wiagabenebaikmu re, hat en dogoʼgwe aʼge ai o eba en liplau wemarik e, o yema welat, an erliknobogu lema o, [13] oluk Allah enat moʼgulesi.

⁸Asogo moʼgulesirik e, An wene wusogo wokhenebegis aʼge ai, enagat welemagoluk enagap eneʼgerlimu aʼge ʼbalonobogu lomup o, oluk moʼgulesi. Asogo moʼgulesimu, Abraham en omlogo Ishak deregeitik e, agauwa sabiren welagarik e, agauwa sirak aʼge pam agap eʼgerlimu aʼge ano asogoat ʼbalegei o. Ye, pobuk Ishak en omlogo Yakub dakhwerlesirik e, asogoat agap eʼgerlimu aʼge ʼbalegeiyat. Ye, Yakub en e, is nis neneʼbalak enebe 12 ebano dagonoboluk e, asogoat enagap eneʼgerlimu aʼge ʼbalonobogu legesa.

⁹Neneʼbalak ebano onot Yusuf pam ʼbou togu legesarik e, ebe o Mesir woluk legesarik eneragam aʼge welemagoluk, ap logon pam oʼgo wegesa. Aʼge re, aphwami logon en at ebe nin hwedik nan hwedik wiagap pouwogoluk togwiam e, Allah emin welat di wene yu wene ebam lau wagoam deliso modok welaga.

¹⁰Asogo deliselat oruakma, ap ʼgain Firaun o Mesir aʼge onue ʼgain onuk logo aʼge ano en e, Ap yu ebabut op o. Ede modok ʼgagalak o, oluk ebe ebam liok egeitik e, disogo moʼgulesi, O Mesir yema emin, an nowi emin, neiyagai emin, hat en tenentarok welat, an en aʼge di aʼge yu aʼge ʼberlegat hat heʼgik pam welemak o, oluk ebe gubernur welemagoluk edikpesi.

¹¹Edikpesimu, oruakhwe re, o Mesir eba emin, o Kanaan yema emin, soʼboru obuk logat agama wiagat welegesa. Wiagat welat e, neneʼbalak ebano soʼboru ʼgeba heratu ʼgelaʼgeat, weat welegesa.

¹²Weat oruakma re, aphwami logon en, O Mesir eba nak e, soʼboru gandum eʼgen oruak o, oluk ogwiam e, at Yakub esaʼgo hwelegeitik, at eiyagai nis neneʼbalak ebano en logon wouwagoluk peragenebesi. Naduk asogo peragenebesirik,

¹³pobuk peragenebesimu re, at Yusuf ano en e, An ano nebe yuat o, oluk uelak ebano hwiagentesi. Hwiagentasuam Firaun ano en e, Yusuf arilak enemin dogo aʼge yema hegi, oluk alugat aga.

¹⁴Asogo moʼgulentesirik, at Yusuf en e, aik Yakub emin, aphwami at eiyagai aʼge ʼberlek enebe 75 emin, enemin wemagoluk wene wusogo perakpou waga.

¹⁵Wene wusogo perakpou wagama re, is Yakub lak o poluk hokhomsogo o Mesir ʼbigisa. Eba ʼbigisarik welat e, at ebe emin, neneʼbalak emin, ebayat waretil legesa.

¹⁶Waretil legesema re, naduk at Abraham o Sikhem welat, owik aphwami Hemor aʼge enebam oʼgo ʼbalegeimu enebe werak aʼge togolik wogonoboluk wegesa.

¹⁷Pobuk e, Allah en pageat Abraham ebam wene obok moʼgulesi aʼge ano ebe om hegitsogo horogat agokhwe re, aphwami nis aʼge enebe o Mesir eba aʼbigat yarluk egesa.

¹⁸Asogo aʼbik yarluk egesema re, ap mesik mu aʼge en e, Yusuf ebe eperlakma re, o Mesir eba ʼgain agarik tenentarok welaga.

¹⁹Welat e, aphwami nis aʼge neneʼbalak ebano lalenebiselat, di obotut yu obotut tagenebasulat, taga laga. Asogo tagalat enemalik ʼget dogo aʼge enelaluk welemano oluk, Waremagoluk parema lebigenebemit, oluk iak ningsogoat moʼgulentasu laga.

²⁰Asogo tagenebasu laga eria hegit e, at Musa ebe malik op modok aʼge dagagama re, dugwi henagan aik owi pam tenakho welegesa.

²¹Tenak welegesarik, pobuk lebikpegesema, at ʼgain Piraun agalogo en ebe ano wesirik, at uʼgwarek emalik ʼgelaʼgeat yoʼgolegei.

²²Yoʼgolegeimu re, is aphwami o Mesir aʼge di wene yu wene enaluk welegesa aʼge ebano, at en modogat moʼgulegei. Moʼgulegeitik, at en iak pam opsogo nak eselat, eʼgik pam di aʼge yu aʼge opsogo nak tiselat, tagalat e, ebe ʼgainat aga.

²³ʼGainat agarik at Musa ebe umur mo ligom, ʼbugom osokhwe 40 tahun aga. Agama, at en e, Aphwami Israel an ap ʼbelak aʼge ebano logon entai laik, oluk ede epesi.

²⁴Ede epesirik eneʼbek laga ʼgal e, ap Mesir aʼge mesik en ap Israel aʼge mesik ʼgoʼbu werisokhwe il hesi. Il holuk e, at oruak oʼgwe ano akhit agarik erlele wokho, ap Mesir aʼge ano ebe ʼbeʼgi weregei.

²⁵Weriselat ogola en e, Is aphwami an ʼbelak aʼge onogola en e, Allah en at yoʼgo pesimu, at en woknoboluk libema o, oluk pobi nobua o, oluk epesi aʼgeat de, is en asogo pobitu erlak welegesa.

²⁶Pobitu erlak welat e, loruk oʼgwe ap enebe ʼbiren Israel aʼge eʼbirek yeik pogumu, il entesirik laʼbulik enebaigoluk, disogo moʼgulentesi, Narilak. His e, hot eminat de, nopaget yeik pogu legep, oluk moʼgulentesi.

²⁷Aʼge re, at ot ʼgoʼbu weriselat, at Musa ebe perlikho esaʼgo akhit pei lasulat e, disogo moʼgulesi, Hat nis nonue ʼgain welat wene enebam pasulat, noʼgorliselat, taga lemagoluk, sa en edikhebesimu.

²⁸Sono ap Mesir aʼge werigen ai ʼgelaʼge an watnebigoluk taga legen a, [14] oluk moʼgulesi.

²⁹Asogo moʼgulese lagama, wene ai esaʼgo hwelegeitik e, hweiye libagarik e, o poluk hokhomsogo o Midian eba lagarik welaga. Welat e, eiyagai enebe ʼbiren dagenebegei.

³⁰Eba modok welat, pobuk 40 tahun welaga. Oruakma re, malaikat Allah en yoʼgo ʼbelagonobou wago aʼge ebano mesik Musa en il houwagoluk, o leimu aphwami enebe erlakma dom Sinai edipmu eba ʼbu agarik e, e hourak aʼge pam en, odouk magale ʼgwialisoma orogolema inagama il hesi.

³¹Hesirik e, erliktagalat, il dokhumsogo ʼgwelakhaigoluk ebe horoksogo lasuam e, nenaik ʼgain Onuk Logo aʼge en e, disogo osoma esaʼgo hwelegei,

³²Hat heʼbalak Abraham emin, Ishak emin, Yakub emin, enaik Allah anat o, [15] oluk moʼgulesimu, at Musa en ebe il pobisogo hai lo ogorlok aga.

³³Ogorlok agama, nenaik ʼgain Onuk Logo aʼge ano en e, mesik disogo moʼgulesi, ʼGwiang hat hebe edik welegenma eria, an nuʼgwarek noʼgwiang o. Holuk e, hoyuk sepatu ʼbuktak aʼge eba noʼgorlogo pemen o.

³⁴An neiyagai aphwami o Mesir aʼge en di obotut yu obotut tagenebasukhwe nil entasulat, enede oborlogouk ogukhwe nesaʼgo hweliselat, tise legirik e, an en delenebigoluk nebe ʼbu egi o. Holuk e, an en hat yogodak o Mesir perakhebaik en suk o, [16] oluk moʼgulesi.

³⁵Pageat is aphwami Israel aʼge en e, Hat nis nonue ʼgain welat wene enebam pasulat, noʼgorliselat, taga lemagoluk, sa en edikhebesimu. Nenebit o, [17] oluk wene yagegisa ano re, at Musa at o. Asogo wene yagegisa aʼgeat de, malaikat Allah en yoʼgo ʼbelagonobou wago aʼge ebano, at Musa il houwagoluk mesik ʼbelakpou wagama re, e hourakma en selakma agama il hesi aʼge anoat, onue ʼgain welat delonobuagoluk yoʼgo poluk perakpesi ai o.

³⁶Yoʼgo poluk perakpesimu re, aphwami Israel aʼge enebe wogonoboluk liplau waga ai, at Musa enat o. Wogonoboluk liplau wagalat e, o Mesir eba emin, ik yeʼgelak aʼge onuk Laut Merah ai emin, o leimu aphwami erlakma eba, o mo ligom ʼbugom osokhwe 40 tahun welat emin, is aphwami en wene pobi tuagoluk mesik elalin tu puk aʼge til waga ai, at Musa enat o.

³⁷Ye, aphwami Israel aʼge moʼgulentasulat e, Allah en ap at iak moʼgulhentasu lemagoluk, ap his aʼge mesik an ediknebesi ai ʼgelaʼge, pobuk edikpouwa ani o, [18] oluk moʼgulentesi ai, at Musa enat o.

³⁸Ye, neneʼbalak enemin o leimu aphwami erlakma eba odoktak oruakma, dom Sinai ai edipmu malaikat Allah en yoʼgo ʼbelagonobou wago aʼge ebano mesik eʼbek ʼbu agarik e, eʼbirek weneane egesa ai, at Musa at o. Neneʼbalak ebano eneminat oruakma, at Allah en, wene nenelaluk wolomul wene ai, nia moʼgulnontouwagoluk moʼgulesi ai, at Musa at o.

³⁹Asogo moʼgulesi aʼgeat de, neneʼbalak ebano en, at iak hologo wolom e, enebit welegesa. Asogo welat e, ebe ukpegesarik, O Mesir eba togolik lo aʼge, oluk enede lagama welegesa.

⁴⁰Enede asogo lagama welat e, at Harun ano disogo moʼgulegisa, At Musa o Mesir en woknonoboluk liplau waga ano, noʼgosogo agama hwe. Nis neneperlak o, ai en, nis togolik woknonoboluk o Mesir louwagoluk, Allah ebe ʼgelaʼge ebalema dogwi asua mesik utnentemen o, [19] oluk moʼgulegisa.

⁴¹Asogo moʼgulegisarik, o ai erlige wam sapi emalik aʼge ogut walsogo dogwi werigisa. Werik poluk e, ensapi wusogo poluk, is en e, Neneʼgik pam werik pege yu op o, oluk, onogola enagai aʼbik hogu legesa.

⁴²Asogo togu legesema re, at Allah en oʼborl wogentesirik, ʼBogorl pam aʼge mo emin, dugwi emin, hwesagal aʼbik eba emin, erliktogu lemak o, oluk enebe ugenebesi. Asogo tegei ai, is ap Allah iak moʼgulontogu legesa aʼge en disogo egesa hegitsogoat tegei, Allah en e, His aphwami Israel aʼge yu logwe. Mo ligom ʼbugom osokhwe, 40 tahun o leimu aphwami erlakma eba welat e, wam sapi worogulat, odouk narlugulat, togu legep ai re, an nebaget pogulat, watnugulat, togu legep no? Erlak o.

⁴³O sum owi ano, henaik Molokh owi emin, hwesagal ʼgelaʼge ano, henaik Refan ogosagal emin, da pil ya pil, woluk denaga legep ai. Asogo woluk denagalat, his at eragam ʼguogoluk ogut walsogo werigep ai en, henebe o Babel abel akhit perakhenebaik o, [20] oluk Allah en egeimu, pelal wokho pegesa ai ʼgelaʼge tegei o.

⁴⁴At Allah en Musa moʼguleselat e, An nebe nemin welege o, oluk nowi o sum aʼge disogo werip, oluk elit aʼge waltak pesimu, il hesirik e, o ebe asogoat weregei. Weregeimu neneʼbalak ebano o sum owi aʼge aiat tenak welat o leimu aphwami erlakma denagalat da wetil, ya wetil, wetil denaga legesa.

⁴⁵Asogo wetil denaga legesarik, is en dogoʼgwe aʼge Yosua emin en o sum owi werik aʼge ano moluksogo woluk e, aphwami nis nonowi pam yema oruakma Allah en mukho lebigenebesimu onoʼgwiang sebelu ʼgu otluk, o sum owi ano wosu ʼgu egesa. Wosu ʼgu egesa ai erlige o sum owi aiat werik, welagarik e, hwerli Daud elaluk welaga ai hwerli werik welaga.

⁴⁶Ye, Daud ebabut taga laga ai, Allah ebam lobuk egeimu, at en Allah disogo moʼgulesi, Yakub aik Allah harat o. Howi mesik wusogo hebaik, oluk moʼgulesi.

⁴⁷Asogo moʼgulesi aʼgeat de, Allah owi ebe omlogo Salomo en werik ebesi ai o.

⁴⁸Asogo aʼgeat de, at ap Allah iak moʼgulentasu laga aʼge mesik en wene disogo egei, Nenaik Allah ʼgain Onuk Logo aʼge en e, ʼGain anat welat e, nebe naloʼgwe ʼbogorl pamat hweriogo welegi o, Ye, noyuk lekho ʼgwiang pamat poluk welegi o. Holuk e, his en o noʼgorak aʼge werik nobo yo. An nebe set hwalogo re, o ʼgeba wolom epegep. Mia o. Di aʼge yu aʼge ʼberlek eba, an enat walhegi erlak no? [21] oluk Allah en egeimu, pelal wokho pesi ai en, at Allah modok ʼgain Onuk Logo aʼge ai, o aphwami eneʼgik en worogwi aʼge pam wolom e, mia o.

⁴⁹

⁵⁰

⁵¹His aphwami yema henebabut modok wiak henesaʼgo modok holu puk, henagap heneʼgerlimu aʼge ʼbelak welarat de, henede dagelak erlak welat henesaʼgo werak erlak togu legep yema re! Heneʼbalak en, Allah Arogun iak ai nenebit, oluk ogu legesa hegitsogoat, his is enebabut wokho togu legep yema re!

⁵²Is ap Allah iak moʼgulontogu legesa aʼge ebano, heneʼbalak en enebe wiagabonobu erlakma en mesik welegesa no? Wiagabonobogu legesa nak ebano re. Is Allah iak moʼgulontogu legesa aʼge en e, Allah eragam aʼge ebabut hegitsogo tua aʼge ai pobuk wema o, oluk ebe owan wom erlak oruakhwe, obok naduk ogu legesa aʼge enebe heneʼbalak enat waronobogu legesa ai o. Pobuk, is en obok naduk egesa aʼge ai ebe wagama re, his enat at ebe woruagoluk yoʼgo lagalat, ebe worogulat, tigep ani o.

⁵³Ye, is malaikat Allah en yoʼgo ʼbelagonobou wago aʼge ebano en wene Allah en nenesaʼgo weregei wene ai, hisat wokhentigisa aʼgeat de, henesaʼgo hologo tu henebirat welegep ai o,” oluk moʼgulentesi.

⁵⁴At Stefanus en wene asogo moʼgulentasu lagama, is enesaʼgo hweligisarik e, onolot het otluk, eniak hedin hogulat ebe woruogoluk tigisa.

⁵⁵Woruogoluk tugukhweat de, at Stefanus Allah Arogun ogola ʼbeterak welat, il ʼbogorl pam likhesi ʼgal e, at Yesus Allah ebe erliktogwi aʼge ano eʼbirek eʼgik ʼbekhit akhit eragam edik oruakma il ligentesi.

⁵⁶Il ligontoluk, at en e, “Yethemit! ʼBogorl hialegeimu re, at abat daklau waga aʼge ano, Allah eʼbirek eʼgik ʼbekhit akhit eragam edik oruakma nil yerentegis o,” oluk moʼgulentesi.

⁵⁷Asogo moʼgulentesimu, is ebano eniak amitmit sup oluk, eneʼgik enesaʼgo dopnosogo, pungtak mesik erligeat eʼbek hopha ʼgwigisa.

⁵⁸Eʼbek hopha ʼgoluk, o kota en leget oʼborloma haʼboksogo lebikpoluk e, helep en werigisa. Ebe woruogoluk e, is at iak osokhwe enesaʼgo hweligisarik, wene ebam poluk welegesa aʼge ebano onosum oʼborl oʼgwe aʼge noʼgorlogo re, ap souwe aʼge onuk Saulus eragam pegesa.

⁵⁹Poluk e, ebe helep en worogukhwe, at Stefanus ano Yesus onuk ʼbaliselat e, “Yesus nue. Narogun hat en woknebi suk o,” oluk egei.

⁶⁰Asogo eselat, odogorlu pam yagutsogo huraga. Huragarik, iak loksogo re, disogo egei, “Nue. Ap an wiagapnebigisa aʼge yema, wene enebam pagun o,” oluk moʼgulesirik ebe arat waraga.