Read Silimo Roma 15 Bible Online

Roma 15 - Silimo bible

Roma 15

¹Nis logon, nenede Allah pam hurlesogo heʼberik welege aʼge en, nonuʼgwarek nenebaget nak nonogola opsogo tu erlakma en, we, is logon enede owan oborlogouk oruak aʼge ai, lerontogulom o.

²Allah iak pam wene disogo oluk pelal wokho pegesa, “Hat Allah wene yakhegisa aʼge re, an nebam aga o,” [52] oluk pelal wokho pegesa hegitsogoat, at Kristus en e, uʼgwarek ebaget ogola agai hasu leigoluk taga laga erlak. Ai en, nis nenebe loʼbok en e, nenarilak nonorokhwi enede Allah pam heʼberik poluk enede hurle emarik op emagoluk, onogola opsogo togu lomok o.

⁴Allah iak pelal wogo ai pam e, nenepe mosogo welat, nonogola op agalat, togu lege ai en e, “Op ema o,” oluk Allah pam eberak welemagoluk, nisat nenesaʼgo wusogo Allah iak pam pageat pelal wokho pegesa ai o.

⁵His henede, heniak, mesigat welat, nonue ʼgain Onuk Logo aʼge aik Allah aiat erliktogu lorogup en e, at Allah aphwami enebabut enepe mosogo welemagoluk tagenebasulat, onogola obabenebiselat, tago aʼge ai enat, his ʼberlegat henede mesigat, at Kristus Yesus ebabut ʼgelaʼge takhonobouwak o.

⁷Aphwami en at Allah erliktogu lemagoluk, at Kristus en his henebe wokhenebegei ʼgelaʼge, his pema en is logon wogonobogulat, is pema en his logon wokhonobogulat, his-his wok-wok togu lomup o.

⁸Wene ai paget mesik moʼgulhentaik. At Kristus wagarik e, is enagap eneʼgerlimu aʼge ʼbelak Yahudi aʼge ebano eneragam ʼgwegei o. Asogo ʼgwegei ai re, Allah en e, “An en disogo tagenebaik o,” oluk neneʼbalak obok moʼgulentasu laga aʼge ano demat agalat,

⁹ye, is aphwami oʼborl oʼgwe aʼge en Allah en edeabenebesi ai en erliktogulat, tuagoluk, Yahudi aʼge eneragam ʼgwegei ai o. Wene ai paget Allah iak pam pelal disogo oluk wokho pegesema oruak, “Ai en e, an is aphwami oʼborl oʼgwe aʼge eneʼgerlak oʼgwe welat, hat erlikhebiselat, weni weriselat horogole wasulat, taga leik o,” [53] oluk egeimu pelal wokho pegesa.

¹⁰Mesik disogo egeimu pelal wogo oruagat, “His aphwami oʼborl oʼgwe aʼge is Allah eiyagai at en poligenebesi aʼge enemin honogola henagai hogu lomup o,” [54] oluk egeimu pelal wokho pegesayat.

¹¹Ye, mesik e, wene disogo egei, “His aphwami oʼborl oʼgwe aʼge ʼberlegat nonue ʼgain Onuk Logo aʼge erliktogulat, henaʼgul onuk loʼbok en at erliktogulat, togu lomup o,” [55] oluk egesema pelal wokho pegesayat.

¹²Ye, mesik e, at Yesaya en e, disogo oluk pelal wokho pesiat, “E morik pogwiam e, edip pam en esemis libago ʼgelaʼge, at Isai en dogoʼgwe aʼge mesik enam ema o. Enam agoam e, is aphwami oʼborl oʼgwe aʼge at eragam welat, at en obapnonobua, oluk at ebam eberak welema ani o,” [56] oluk pelal wokho pesi.

¹³“Pobuk op ema o,” oluk nonogola nenagai hogu lege ai, edip at Allah enat taknenebasu o. His asogo honogola henagai loksogo hogu lemagoluk Allah Arogun anni pam takhonobouwak o. Asogo takhonobouwagoluk e, henede at ebam heʼberik pegep ai pam eberak poluk oruakma, at en honogola henagai aʼbik hogu lemagoluk takhenebasulat, henede haʼbugaphenebasulat, tuak o.

¹⁴Narilak norokhwi. His henebabut op modok welat, di wene yu wene henaluk modogatma re, his-his nak henesaʼgo wat-wat tu elirat welegep ai, an naluk o.

¹⁵Asogo aʼgeat de, at Allah ebabut op en an yoʼgo nebesi ano pam, wene mesik ai suesiʼga ya pam nogorlok erlaksogo ebethentegis ai o.

¹⁶An nebe at Kristus Yesus eragam welat aphwami oʼborl oʼgwe aʼge wogonobuagoluk yoʼgo nebesimu, at Allah ogola opsogo Arogun ai pam is enebe Allah akhit enebaigoluk, at iak op wene ai moʼgulentil denaga legi o.

¹⁷Kristus Yesus emin hwedik welat e, Allah paget opsogo taga legi o, oluk nuʼgwarek erlikhorlo elit o.

¹⁸An en wene mu aʼge mesik u re, nogorlok o. We, is aphwami oʼborl oʼgwe aʼge Allah en eragam onobouwagoluk e, at Kristus en yoʼgo noboluk wene eselat, eʼgik en tagalat, til waga aʼge ai nogorlok erlaksogoat ik o.

¹⁹At ebe pobi tuagoluk di bele yu bele tagalat, erliktuagoluk di aʼge yu aʼge walhasulat, annisogoat tegei o. Allah Arogun ano anni pamat tegei ai o. Tagokhweat de, an e, o Yerusalem hwerli en da ʼgwil ya ʼgwil o Ilirikum hwerli eba, at Kristus wene op wene ai dokhumsogo moʼgulentil wegi.

²⁰Wene asogo oluk pelal disogo wokho pegesema oruak, “Is aphwami pema, at obok holu erlak aʼge en enil hogulat, ye, is wene holu erlak aʼge en pobisogo hologulat, tua o,” [57] oluk pelal wokho pegesa hegitsogoat moʼgulentil wagalat, is aphwami pema en e, o waʼgi delakma an en o ebe woru ʼgelaʼge tuano oluk, nede nagai e, aphwami Kristus onuk enesaʼgo owan holu erlakma etleba op wene moʼgulentil weigoluk epasu legi o.

²²Wene asogo moʼgulentil denaga legi ai en, nin hwedik nan hwedigat his ʼgogolhenebil heneʼbek weigoluk tisokhweat de, wom mia ago yo.

²³Aʼge re, an o yema welat tu aʼge arat tegis o. Holuk e, o pageat etleba enat his ʼgogolhenebil weigoluk nede epegirikmu re, yogodak arat weik o.

²⁴Yogodak o Spanyol lasulat, his heneʼbek til-tilat weigoluk nede epasu legi o. His hentau weiktik e, nogola nagai hasulat agauwa wei nak henemin weleiktik e, his en o Spanyol etleba peraknoboma lo epasu legi o.

²⁵Is aphwami o Makedonia aʼge emin, Akhaya aʼge emin en e, is eniak laʼbulogo re, is enaʼge odoksogo is aphwami Allah eiyagai eneʼgikmu erlak aʼge logon o Yerusalem welagai aʼge etleba enebegesa aʼge oruak ai en, yogodak an en woluk lerentaigoluk o Yerusalem laik o.

²⁷Is aphwami Yahudi aʼge en is oʼborl oʼgwe aʼge enebe op emagoluk Allah iak wogentigisarikmu en, is en pobuk togolik di aʼge yu aʼge onogum paget leronto hegitsogoat, asogo eniak laʼbulogo enebegesa.

²⁸Asogo arat enebegesa aʼge ai, an en is Yerusalem aʼge arat wogentai laikmu re, o Spanyol laiyogoluk wagalat, heneʼbek til-til weik o.

²⁹An arat heneʼbek weik holuk e, at Kristus en his henebaget woknesi aʼge ʼberlegat wokhentau weik epegi o.

³⁰Narilak norokhwi. Nonue ʼgain Onuk Logo aʼge Yesus Kristus aiat oluk, nis-nisat nede-hedesogo welemagoluk Allah Arogun en taknenebasu ano pam, an nebaget e, nemin seʼban Allah yoʼgo ningsogo pogu lomogoluk moʼgulhentegis o.

³¹Is aphwami o Yudea aʼge enede Yesus ebam heʼberik po erlak aʼge en nebe eneʼgik tenniouwano oluk, Allah en delnobuagoluk emin, ye, aphwami Allah eiyagai o Yerusalem aʼge enebaget odoksogo pegesa aʼge ai, woluk lerentai lasumu re, opsogo wouwagoluk emin, seʼban opsogo ogu lomup o.

³²O Yerusalem laiktik en, at Allah ogola en op epasu holuk e, an nogola nagai hil hil heneʼbek weik ani o. Weiktik henemin welat e, set hwalik ani o.

³³Allah en aphwami enede haʼbugaptago aʼge ano, his ʼberlegat tenhentarok welemagoluk, eselat, “Demat emak,” u ʼgelaʼge, “Amin,” oluk egi ai.