Read Silimo Roma 16 Bible Online

Roma 16 - Silimo bible

Roma 16

¹Hwe nenerei onuk Febe ai ebe henaluksogo moʼgulhentaik. At ebabut opma re, Allah eiyagai o Kengkrea aʼge lerentasu aʼge heneʼbek waga ai,

²his nonue ʼgain Onuk Logo aʼge emin hwedik welat, Allah eiyagai en wo hegitsogoat, at ebe wagup en moʼgulhentegis o. At en aʼge di aʼge yu aʼge erlak holuk e, his en aʼge logon wogogu lomup o. At en e, aphwami aʼbigat lerentasulat, an nebe emin letniasulat, taga lagarikmu re, his en at ebe womup o.

³Ye, mesik e, hwe Priskila ogun Akwila eʼbirek emin Kristus Yesus paget togu legerik wegesa aʼge eriano Paulus en hau wathenebegei oluk moʼgulontomup o.

⁴Is an delnobuogoluk lagaimu, warenebelip ai re, “Nede o,” oluk an en nak hau warenebise legi puk. Is aphwami Allah eiyagai oʼborl oʼgwe aʼge emin, enebe ʼberlegat enemin enat hau waronobogu lege o.

⁵Allah eiyagai is Priskila Akwila eʼbirek onowi pam odoktogwi aʼge eneminat, “Paulus lak en hau wathenebigisa o,” oluk moʼgulontomubat o. Ye, mesik e, ap Epenetus nede hwedik aʼge ai, “At en hau wathebegei o,” oluk moʼgulomubat o. O Asia etleba re, at ai naduk ede Kristus ebam heʼberik pesimu en de, is pema pobuk heʼberik pegesa ani o.

⁶Hwe Maria his henebaget set aʼbik taga laga ano, “At en hau wathebegei o,” oluk moʼgulomubat o.

⁷At Andronikus, Yunias eʼbirek, “At en hau wathenebegei o,” oluk moʼgulontomubat o. Is e, an nemin nenaʼgul mesigat aʼge neneʼgik herle nemin werak welegerigat o. Ye, aphwami aʼbigat ʼgelaʼge Kristus en yoʼgo onoboluk peragonobou waga aʼgeat de, ononuk oruak aʼge ʼgelaʼge re, isat o. Is naduk enede Kristus ebam heʼberik pegesarikmu en de, an pobuk heʼberik pegi.

⁸Ye, mesik e, an nare Ampliatus neʼbirek nonue ʼgain Onuk Logo aʼge emin hwedik welege ai en, ebe nede o. “At en hau wathebegei,” oluk moʼgulomubat o.

⁹At Urbanus ai eminat Kristus paget togu lege aʼge ai emin, Stakhis nede hwedik aʼge ai emin, “At en hau wathenebegei,” oluk moʼgulontomubat o.

¹⁰At Apeles Kristus eʼbirek hwedik welat ebabut heʼbisogo tiso aʼge nenalukmu re, “At en hau wathebegei o,” oluk moʼgulogulat, Aristobulus eiyagai ebano ogo, “At en hau wathenebegei o,” oluk moʼgulontogulat, ibat o.

¹¹At Herodion ap nenaʼgul onuk mesigat aʼge ai, “At en hau wathebegei o,” oluk moʼgulomubat o. Ye, Narkisus eiyagai nonue ʼgain Onuk Logo aʼge emin hwedik aʼge ai, “At en hau wathenebegei o,” oluk moʼgulontomubat o.

¹²Ye, logon e, hwami Trifena Trifosa eʼbirek nonue ʼgain Onuk Logo aʼge iabuk annisogo lethogwi aʼge ebano, “At en hau wathenebegei o,” oluk moʼgulentasulat, hwe Persis naduk nonue ʼgain Onuk Logo aʼge iabuk set aʼbigat degeliso aʼge ai nede, “At en hau wathebegei o,” oluk moʼgulogulat, ibat o.

¹³At Rufus ai nonue ʼgain Onuk Logo aʼge en yoʼgo pesimu erliktogwi. At ia ai, an nia ʼgelaʼgeat o. Emalik eʼbiregat, “At en hau wathenebegei o,” oluk moʼgulontomubat o.

¹⁴At Asinkritus emin, Flegon emin, Hermes emin, Patrobas emin, Hermas emin, nenarilak nonorokhwi Allah eiyagai logon is enemin welagai aʼge ʼberlegat enemin en, “At en hau wathenebegei o,” oluk moʼgulontomubat o.

¹⁵At Filologus, hwe Yulia eʼbirek, Nereus erei eʼbirek, Olimpas eminat, Allah eiyagai is enemin welagai aʼge ʼberlek eneminat, “At en hau wathenebegei o,” oluk moʼgulontomubat o.

¹⁶Ye, mesik e, henebe Allah eiyagai welegep ai, hau henemde motok hau wat-wat til lu o. Allah eiyagai Kristus osi o da ya odoktogwi aʼge en, “Hau warenebige o,” oluk moʼgulnegisema re, moʼgulhentegisat o.

¹⁷Narilak norokhwi. Henede ʼgagalogo re, wene mesik yu niak ningsogo moʼgulhentaik o. Is aphwami logon pobuk wemarik e, wene naduk moʼgulhentigisema wegep aʼge ukpoluk e, henebe meʼgisogo honobogulat, honogola wiagaphonobogulat, togwi holuk e, henebabut heberlogo welat, eniak henesaʼgo hologwi erlak, ukpoluk ʼgwi-ʼgwani laga lomup o.

¹⁸Is ai re, nonue ʼgain Onuk Logo aʼge Kristus eragam welat, at ebaget togwi puk. We, onuʼgwarek onogola enagai aʼge togwi ai o. Asogo togulat e, eniak op ogulat, eniak sakhosogo ogulat, togulat e, is aphwami muon enebabut, “I o,” nak ogwi aʼge ai lalonobogwi o.

¹⁹Aʼge re, his Allah iak hwelak poluk togu legep aʼge ai re, is aphwami ʼberlek en henebabut enagat ʼbalogwi ai en e, an nogola nagai hasu legi o. His op wene paget honogola ʼgagalak welat, wene wiak aʼge paget heneperlaksogo welat, tu re, op o. An nogola nagaiat.

²⁰At Allah aphwami enede haʼbugaptiso aʼge ano en, at Iblis ai honoyuk en al ʼbesilogo ukpouwagoluk perleneat heneragam pouma aʼge oruak ani o. Nonue ʼgain Onuk Logo aʼge Yesus ebabut op ano en tenhentarok welemak o.

²¹At Timotius an nare neʼbirek Allah paget togu lege aʼge ano en, “Hau warenebegis o,” oluk moʼgulnesimu en moʼgulhentegis o. Ap nis aʼge Lukius emin, Yason emin, Sosipater emin, yema en, “Is hau warenebige o,” oluk moʼgulnegisema en moʼgulhentegisat o.

²²An Tertius Paulus iak osokhwe pelal yu wegi aʼge en, nonue ʼgain Onuk Logo aʼge emin hwedik welat hau wathenebegis o.

²³At Gayus en an nebe woknebiselat, Allah eiyagai ʼberlegat at owi pam odogenebise lemagoluk wogenebiselat, tegei aʼge ai en hau wathenebegeiyat o. At Erastus o kota yema paget uang pogwiam tenak welago aʼge en hau wathenebegeiyat o. Ye, nenari Kwartus en hau wathenebegeiyat o. [

²⁴Nonue ʼgain Onuk Logo aʼge Yesus Kristus ebabut op ano en, tenhentarok welemak, oluk, “Demat emak o,” u ʼgelaʼge, “Amin,” egi ai o.]

²⁵Allah erliktogu lomok o! An en op wene Yesus Kristus tegei wene moʼgulhentegis ʼgelaʼge, at Allah anni aʼbik ano en henede hurleaphenebasulom elirat o. Wene Allah ogola wene ai, page enat hisogo welaga aʼge re, yogodak Allah en selakma pesi.

²⁶Ai re, is ap at iak moʼgulontogu legesa aʼge ebano en pelal wokho re, selakma pegesema oruakma an en moʼgulhentegis ai o. Di aphwami yu aphwami enaʼgul onuk loʼbok ʼberlegat wene ai enesaʼgo hologulat enede Yesus ebam heʼberik poluk iak hologo togu lemagoluk, at Allah otok modok welago aʼge ano enat, “Wene yu aphwami enaluk emak o,” oluk egei.

²⁷At Allah emategat ede modok ʼgagalak welago yo. At Yesus Kristus tegei ai paget Allah erliktogwi modok wolomok o, oluk, “Demat emak o,” oluk u ʼgelaʼge, “Amin,” egi ai.