Read Silimo Roma 4 Bible Online

Roma 4 - Silimo bible

Roma 4

¹Holuk e, nis aphwami Yahudi aʼge en neneʼba Abraham ebabut taga laga aʼge paget obok noʼgosogo ul.

²At uʼgwarek en mesik op tegei pam, Allah en, “Wene hebam aʼge noʼgorlogo wokhegirik, togolik an nemin hwedik takhebegi o,” oluk moʼguletlipmu re, uʼgwarek en erlikhwerlelep o. Aʼge re, at Allah ilem erlikhorlo mia welaga ai.

³Allah iak pelal wokho pegesa ai pam noʼgosogo egesa no. Disogo egesa erlak no? Abraham ede Allah ebam heʼberik pesimu re, at Allah en e, “Hat hebabut hegitsogo tagalom ʼgelaʼge, hede nebam heʼberik pegenma, wene hebam aʼge noʼgorlogo wokhegirik, togolik nemin hwedik takhebegi aiat o,” [9] oluk moʼgulesimu, pelal wokho pegesa.

⁴Aphwami en di yabuk yu yabuk togwiam, eneʼgik oʼgo wogontogwi ai re, ap yoʼgo pogwi aʼge enebabut op en weat wogontogwi puk. We, eneʼgik oʼgo wogonto ʼgelaʼgeat wogontogwi ai o.

⁵Asogo aʼgeat de, aphwami logon en Allah ede opsogo di aʼge yu aʼge togwi erlak welarat de, onogola en e, “Is aphwami logon en Allah ebe onogola en mi-miarak pogu legesa aʼgeat de, at en e, is wene enebam aʼge elirat noʼgorlogo erlagap poluk pobuk togolik at emin hwedik tagenebasu o,” oluk enede at ebam heʼberik pogwiam e, at en e, “Henebabut hegitsogo togulom ʼgelaʼge re, henede an nebam heʼberik pegepma wene henebam aʼge noʼgorlogo wokhegirik, togolik nemin hwedik takhenebegi aiat o,” oluk moʼgulentasuat.

⁶At Allah en asogo tagenebasu oluk, at Daud en disogo egei, “Aphwami en e, Allah ogola opsogo logon tu erlakmayat de, wene enebam aʼge noʼgorlogo wokholuk, emin togolik hwedik tagenebasu, oluk, onogola enagai houwak o,” oluk egeitik pelal disogo wokho pesi,

⁷“Is aphwami enesaʼgo werak erlak welat dagan togwi aʼge, Allah en erlagapsogo ukpasulat, wiak togwi aʼge, sebelogo ukpasulat, tegei aʼge onogola enagai houwak o.

⁸Ye, is aphwami logon wiak togwi aʼge paget, nenaik ʼgain Allah Onuk Logo aʼge en wene eʼgen poluk wene enebam pasu erlak aʼge onogola enagai houwak o,” [10] oluk egeimu pelal wokho pegesema oruak.

⁹“Onogola enagai houwak o,” oluk egei ai re, is aphwami enagap eneʼgerlimu aʼge ʼbelak aʼge enebaget nak egei ya? At e, is enagap eneʼgerlimu aʼge ʼbelak erlak aʼge paget eminat egei ya. Naduk wene disogo ege epegi, Abraham ede Allah ebam heʼberik pesimu re, at en e, “Hat hebabut hegitsogo tagalom ʼgelaʼge, hede nebam heʼberik pegenma re, wene hebam aʼge noʼgorlogo wokhegirik, togolik nemin hwedik takhebegi aiat o,” [11] oluk moʼgulesi.

¹⁰Asogo moʼgulesi ai re, at Abraham ebe noʼgosogo oruakma. Agap eʼgerlimu aʼge ʼbelakma ya? At e, ʼbelak erlakma ya. Ai re, agap eʼgerlimu aʼge ʼbelakma puk. Owan ʼbelak erlakmayat o.

¹¹Agap eʼgerlimu aʼge asogo owan ʼbelak erlak welat ede Allah ebam heʼberik pesimu re, at Allah en e, “Wene hebam aʼge noʼgorlogo wokhegirik, togolik nemin hwedik takhebegi o,” [12] oluk moʼgulesi. Asogo tegeimu moʼgulesi ai, enede weʼgerlogo welemagoluk, “Hagap heʼgerlimu aʼge ʼbalin o,” oluk moʼgulesimu ʼbalegeimu re, ebabut enagat aga ai. Ai en e, aphwami enagap eneʼgerlimu aʼge asogo ʼbelak erlak welat, enede Allah pam heʼberik pogwi aʼge ʼberlegat, enaik e, Abraham at o. Is asogo enede Allah pam heʼberik pogwiam e, at en e, “Henebabut hegitsogo togulom ʼgelaʼge henede nebam heʼberik pegepma re, wene henebam aʼge noʼgorlogo wokhegirik togolik nemin hwedik takhenebegi ai arat o,” oluk moʼgulentasuat ai o.

¹²Neneʼba Abraham ai agap eʼgerlimu aʼge ano ʼbelak erlak welat, ede Allah pam heʼberik pesi ʼgelaʼge, nis nenagap neneʼgerlimu aʼge asogo nak ʼbelak holuk, neneʼba Abraham u mia o. At e, Abraham ebabut wokho nenede asogo Allah pam heʼberik pege aʼge holuk en de, neneʼba Abraham at u o.

¹³At Allah en e, Abraham disogo moʼgulesi, “ʼGwiangma o di owi yu owi ʼberlegat e, hat emin, hat en dogoʼgwe aʼge emin, henemin eiye orogup ani o,” oluk obok moʼgulentesi. Asogo moʼgulentesi ai re, wene at en nenesaʼgo weregei wene ano hwelak poluk hegitsogo togu legesa pam moʼgulentesi puk. Erlak o. We, at ede Allah ebam heʼberik pesimu, at Allah en eselat e, “Wene hebam aʼge noʼgorlogo wokhegirik, togolik nemin hwedik takhebegi o,” oluk moʼgulesi ai en o ʼgwiang obok moʼgulentesi ai o.

¹⁴Aphwami wene Allah en nenesaʼgo weregei wene ai enesaʼgo hwelak poluk hegitsogo togwi aʼge nak Allah en obok egei aʼge ai eiye agallepma re, nenede Allah pam we ʼburlat heʼberik pogullo yo. Ye, obok moʼgulentesi aʼge ai ogo erlak elebat o.

¹⁵Wene Allah en nenesaʼgo weregei wene ai pam e, Allah olot het nenebam pasu. Wene nenesaʼgo weregei ai werak erlak wellepma re, wene sagalogo wiak togwi ai o, oluk elip erlagat o.

¹⁶Holuk e, Allah ebabut op en weat woknentasu, oluk uagoluk e, nenede at ebam heʼberik pogwiam obok egei aʼge ai, woknentasu ai o. Nis at en dogoʼgwe aʼge wene Allah en nenesaʼgo weregei aʼge ai hwelak poluk hegitsogo togulat, nenede Allah pam heʼberik pogu lege aʼge nak woknentasu puk. We, Abraham is muon logon enemin ʼberlegat nenaigatma re, is ai at Abraham ede Allah pam heʼberik pesi ai ʼgelaʼge, enede Allah pam heʼberik pogwi aʼge ogo wogentasuat o.

¹⁷Wene ai paget Allah en Abraham disogo moʼgulesi, “Di aphwami yu aphwami enaʼgul onuk aʼbigat enaik e, hat edikhebegi o,” [13] oluk moʼgulesimu pelal wokho pegesa. Asogo moʼgulesimu re, at Abraham ogola en e, “At Allah re, aphwami werak aʼge enelalugabenebiselat, ye, di aʼge yu aʼge erlak aʼge iak pam oruagaptagalat, tiso aʼge en obok moʼgulnesi ai demat moʼgulnesi o,” oluk ede ebam heʼberik pesi ai o.

¹⁸At Abraham en e, “An en dogoʼgwe aʼge asogoat ema o,” oluk ede opo pukmu en de, “Demat ema o,” oluk ede Allah pam heʼberik poluk modok taga laga ai pam, Allah en e, “Hat en dogoʼgwe aʼge modok aʼbik disogo ema o,” [14] oluk obok moʼgulesi hegitsogoat, di aphwami yu aphwami enaʼgul onuk aʼbigat enaik Abraham at aga o.

¹⁹Ap Abraham uʼgwarek en e, “An nebe 100 tahun ʼgelaʼge welegirikmu re, nanni erlak agarik, neiyagai dagonobu modok mia egi o. Ye, nugwe Sara ebe ogo re, abeliat o,” oluk aluk welaga aʼgeat de, ede Allah pam heʼberik pesi aʼge ano, ede ʼbuk om erlak heʼberik modogat welaga.

²⁰Abraham ede Allah pam asogo heʼberik modogat welat, “Allah en obok moʼgulnesi aʼge ano, demat ema ya? Sogwi ema ya,” oluk wenemennei eberu erlakma en welaga. Asogo ede Allah pam heʼberik poluk welaga ai pam anniap pesimu Allah erliktaga laga.

²¹Asogo erliktagalat e, “Allah re, di aʼge yu aʼge tu elit nakma no oluk e, obok moʼgulnesi ai, demat ema o,” oluk wenemennei daksogoat welaga.

²²Asogo taga laga ai pam, Allah en e, “Hebabut hegitsogo wolom ʼgelaʼge, hede nebam heʼberik pegenma, Wene hebam aʼge noʼgorlogo wokhegirik togolik nemin hwedik takhebegi ai o,” [15] oluk moʼgulesi.

²³At Allah en e, “Wene hebam aʼge noʼgorlogo wokhegirik togolik nemin hwedik takhebegi o,” oluk moʼgulesimu re, pelal wokho pegesema oruak ai re, at Abraham paget nak puk.

²⁴Nis nenemin nenebagerat moʼgulnentesi o. Holuk, nis ogo re, nenede nenaik Allah nonue ʼgain Onuk Logo aʼge Yesus waragama en elalugaptegei aʼge ano ebam heʼberik pogu lege ai en, at en e, “Henebabut hegitsogo togulom ʼgelaʼge, henede nebam heʼberik pegepma, wene henebam aʼge noʼgorlogo wokhegirik togolik henemin hwedik takhenebegi aiat o,” oluk moʼgulnentasuat o.

²⁵At Allah en e, nis at iak sagalogo ukpoluk wiak togu lege ai en e, Yesus ebe aphwami en woruagoluk ʼbelakpou wagoam ebe werigisema re, pobuk, “Wene his henebam aʼge noʼgorlogo wokhegi o,” oluk, at emin togolik hwedik taknenebaigoluk elalugap pesi ai o.