Read Silimo Roma 6 Bible Online

Roma 6 - Silimo bible

Roma 6

¹Ai holuk e, nis en noʼgosogo ul. Allah ebabut op ai en, loksogo edeapnenebise lemagoluk e, nis en wiak togwi modok wolom no?

²Modok mia o. Nis wiak togu lege ai paget e, arat waregerik e, pobuk wiak togulom no? Mia o.

³Nis Kristus Yesus emin hwedik tuogoluk ik olomu ʼbige aʼge yu re, at ebe waraga ʼgelaʼgeat, ik olomu ʼbelapnonobogwiam e, emin hwedigat welege, ai heneperlak no?

⁴Ik olomu ʼbelapnonobogulat e, at ebe werak sebeligisa ʼgelaʼge, nis at emin hwedigat oruakma wusogo nenebegesa o. Ye, at Kristus waragarikmu en, aik anni aʼbik erliktogwi aʼge ano en elalugaptegei ʼgelaʼge, nis yogodak nenelalugapnenebesimu nenebabut muat ʼget togu lomok o.

⁵At waraga ʼgelaʼge, nis emin hwedigat welat warege holuk e, at elaluk aga ʼgelaʼge, nis asogoat nenelaluk wolomul o.

⁶Nis nenebabut nonotogat welat wiak togu lege aʼge ai mabenap pouwagoluk e, Yesus e pam edikpoluk eminat watnenebigisa ai en, nis nenebabut naduk aʼge ai eragam aʼge wolom mia o, oluk nenaluk.

⁷Aphwami wiak togulomtik waragaiam e, wene enebam aʼge erlak ago.

⁸“Nis e, Kristus emin hwedigat warege holuk, emin hwedigat nenelaluk wolomul ani o,” oluk nenede at ebam heʼberik welege.

⁹At Kristus arat waragarikmu re, Allah en elalugaptegeimu no oluk e, pobuk warema erlak ani, oluk e, nenalugat o. Holuk e, waragai edip ai re, pobuk at eragam Yesus ebe po modok mia o.

¹⁰At Kristus waraga ai re, wiak togwi ai paget mesik erligeat waraga ai arat o. Pobuk elaluk agarik elaluk welago ai, Allah pagerat elaluk welago yo.

¹¹Ai ʼgelaʼge re, his henede en e, “Wiak togulom aʼge paget weragat welat, Kristus Yesus emin hwedik welat e, Allah pagerat nenelaluk wolomul o,” oluk henede opogu lomup o.

¹²Nenebe waraga lege aʼge yu oruakma, wiak togwi aʼge ai anni emano oluk e, eragam ʼgugulat wolorogup o. Wiak tuagoluk honogola ʼgagalu ago holuk e, wiak aʼge ai iak henesaʼgo hologup o.

¹³Heneʼgik honoyuk henebe pam welago aʼge logon emin ʼberlek e, wiak aʼge esegen uwaʼgun ʼgelaʼge agalat e, wiak togu lemagoluk, at wogogu lorogup no yo. Henebe werak ʼgelaʼge oruakma Allah en henelalugaphenebegeimu henelaluk welat tu hegitsogoat, henebe ebesigat Allah wogomis o. Heneʼgik honoyuk henebe pam welago aʼge emin logon ʼberlek e, at esegen uwaʼgun ʼgelaʼge agalat e, hegitsogo togu lemagoluk Allah wogemis o.

¹⁴His e, wene Allah en nenesaʼgo weregei wene ano pam heʼberik welegep erlak. We, Allah ebabut op en edeapnenebiso ai pam heʼberik welegep ai en e, wiak aʼge eragam wolom mia o.

¹⁵Holuk e, wene ai ologun pam e, noʼgosogo u no? Nis nenebe wene Allah en nenesaʼgo weregei wene ano pam heʼberik welege erlak. We, Allah ebabut op en edeapnenebiso ai pam heʼberik welege ai en e, wiak togulom no? Modok erlak o.

¹⁶His e, ap mesik eragam aʼge agalat e, iak hwelak wolomogoluk, eragam ʼgoluk welat, at iak hologu legep holuk e, at eragam aʼgeat welege o, oluk heneperlak no? Wiak togwi aʼge ai eragam ʼgoluk e, ologun pam e, waragai ai o. Aʼgeat de, at Allah iak hologo welat e, at eragam ʼgolukmu re, ologun pam at en wene nenebam aʼge noʼgorlogo wokholuk pobuk at emin togolik hwedik taknenebasu ai o.

¹⁷His naduk e, wiak togwi aʼge ai eragam ʼgoluk oruakma, pobuk, wene moʼgulhontogwiam, wene ai henedemu wegep ai en e, Allah hau woruok o.

¹⁸His e, wiak togwi aʼge ai en tenhentarok oruakma, Allah en herle hebilogo honoboluk, at ebaget hegitsogo togu lemagoluk, eragam henebesimu welegep o.

¹⁹His henebabut e, wene moʼgulhentegis ai pobitu mia ʼgelaʼge en, pobi togup en e, aphwami eneragam aʼge welat togwi aʼge enebam elitsogo moʼgulhentasu legi ai o. His naduk e, heneʼgik honoyuk henebe pam welago aʼge logon emin ʼberlek e, wiak aʼge eragam aʼge ʼgelaʼge wogotluk, yogunat togulat, henesaʼgo werak erlakma en di wiak yu wiak togulat, togu legep ai o. Ai ʼgelaʼge re, yogodak his heneʼgik honoyuk henebe pam welago aʼge logon emin ʼberlek e, Allah uʼgwarek paget poluk hegitsogo togu lomogoluk, at wogogu lemis o.

²⁰His naduk e, wiak tugu legep aʼge eragam welat e. Allah ogola agai epasu aʼge hegitsogo tu mia welegep o.

²¹Aʼge re, asogo togu legep ai paget, noʼgwe aʼge saburigep no. Naduk togu legep aʼge ai paget, yogodak heneʼgerli ago ai o. Asogo togu loroguptik e, ologun pam e, enebe modok waragai aiat o.

²²Aʼge re, his wiak togukhwe, wiak aʼge en tenhentarok oruakma, Allah en herle hebilogo lebikhenebesimu re, yogodak ya re, at eragam ʼgoluk welegep ai o. Welat e, henebe at ebaget poluk welegep ai en, saburigep o. Asogo woloroguptik e, ologun pam henelaluk modok wolorogubat o.

²³Wiak togwi ai oʼgo re, waragaiat o. Ye, nonue ʼgain Onuk Logo aʼge Yesus Kristus emin hwedik oruakma re, Allah ebabut op en oʼgo erlagat nenelaluk modok welemagoluk taknenebasu ai o.