Read Silimo Roma 7 Bible Online

Roma 7 - Silimo bible

Roma 7

¹Narilak norokhwi. Allah en e, “Disogo tip, asogo tip,” oluk nenesaʼgo weregei wene ai, aphwami enebe enelaluk welat wene ano tenakpoluk welat hegitsogo togwi erlak holuk wene enebam ago yo. Aʼge re, enebe waragai holuk, wene enebam ago erlak oluk heneperlak no? Erlak o. Henaluk aʼgeat moʼgulhentasu legi o.

²Is hwami onogunlak wogo aʼge re, onogunlak enebe enelaluk oruakhwe, wene Allah en nenesaʼgo weregei wene ai pam, enemin herle hettak ʼgelaʼge opsogo welago erlak holuk, wene enebam om o. Aʼge re, onogunlak waragaiam nak e, herle hettak aʼge ʼgelaʼge ano hebilago holuk, wene enebam po erlak.

³Hwe mesik en e, ogun elaluk oruakhweat de, ap mu aʼge wasu holuk, aphwami en e, “ʼBabiat ʼgelaʼge wesi o,” oluk obok wiagat u o. Aʼge re, ogun ebe warago holuk e, wene Allah en nenesaʼgo weregei wene ai pam herle hettak ʼgelaʼge welegesa ai, arat hebilaga o, oluk, ap mesik elirat wo yo. Wasuam e, “ʼBabiat ʼgelaʼge wesi o,” oluk u mia o.

⁴Ai ʼgelaʼge re, narilak norokhwi. His naduk e, hwami onogunlak enemin herle hettak ʼgelaʼge welagai ege ai ʼgelaʼge, wene Allah en nenesaʼgo weregei wene ano pam hettak oruakma, at Kristus ebe werigisema waraga ai, eminat waragalat, herle ʼgelaʼge hettak welegep aʼge ai arat hebilaga ai o. Ai en e, hwami onogunlak waragaiam e, mesik elit wogonobu ai ʼgelaʼge, his Allah paget opsogo togu lemagoluk, at Yesus waragarikmu Allah en elalugap pesi aʼge ano en wokhenebegeimu welegep o.

⁵Naduk e, nis nenebabut e, aphwami enebabut nonotogat welege. Asogo welat, wene Allah en nenesaʼgo weregei wene ano oruak en, nenebam aganhan agoam e, neneʼgik nonoyuk nenebe ebesik en wiak togwiam ologun pam e, modok waraga lege ai o.

⁶Naduk e, wene Allah en nenesaʼgo weregei wene ano pam herle werak ʼgelaʼge welege aʼge, Kristus waragalat nis eminat warege ai pam, Allah en herle hebilnenebegeimu welege o. Yogodak e, Allah eragam aʼge welat, wene at en nenesaʼgo weregei aʼge pelal wogo aʼge nenil nak ʼgwelakhogulat, togu lege ai ʼgelaʼge re, togu lege erlak. We, Allah Arogun en nenebabut ʼget aʼge taknenebasukhwe, togu lege o.

⁷Ai holuk e, nis en noʼgosogo ul. Wene Allah en nenesaʼgo weregei wene ai wiak u no? Modok erlak o. Aʼge re, wene asogo nenesaʼgo werak erlak wellepma re, wiak togwi aʼge ai noʼgosogo hwe, neperlagat welle o. Allah en e, wene nenesaʼgo weregei aʼge ai weriselat e, “Aphwami logon enaʼge aʼge, Nagai o, oluk honogola epagup o,” [16] oluk elip erlak wellepma re, aphwami logon enaʼge aʼge, Nagai o, epasu legi ai pobirak erlakma en, neperlagat welle o.

⁸Ai enat, wene Allah en nenesaʼgo weregei wene ai pam, wiak aʼge en e, an wiak tuagoluk, “Di aʼge yu aʼge aphwami enaʼge aʼge, hogola en, hagai hemen o,” oluk nogola ʼgagalise laga o. Wene Allah en nenesaʼgo ai werak erlakma wiak tu aʼge, wongat welege o.

⁹An naduk e, wene Allah en nenesaʼgo weregei wene ano neperlak welat e, nelaluk obat welegi oluk welegi. Aʼge re, wene nenesaʼgo weregei wene ano naluk agarikmu en e, wiak togwi ai aʼge anni agama,

¹⁰an e, werak aʼge ʼgelaʼge egi o. Allah en e, nelaluk welemagoluk nesaʼgo weregei aʼgeat de, wene ai pam e, waregi aʼge ʼgelaʼge egi ai o.

¹¹Allah en nenesaʼgo weregei wene ai pam e, wiak togwi ai nogola ʼgagalogo re, lalnebegeitik e, nebe watnebegei ai o.

¹²Wene Allah en nenesaʼgo weregei wene ai re, Allah iagat o. “Disogo togup, asogo togup,” oluk nenesaʼgo weregei wene ai ebe loʼbok e, at iagat o. Wene ai hegitsogo op modogat egei o.

¹³Holuk e, wene ai op modok egei aʼge ai en an nebe waregi no? Modok erlak o. Wiak togwi ai enat o. Wiak togwi ai en, op aʼge ai pam wusogo nebesimu re, enagat aga o. Wene Allah en nenesaʼgo weregei ai pam e, enebabut wiak togwi ai modok wiak, oluk enagat aga ai o.

¹⁴Wene Allah en nenesaʼgo weregei wene ai, at Arogun en moʼgulnentesirikmu no oluk e, op modogat o, oluk e, nenaluk o. Aʼge re, an nebabut e, aphwami enebabut onotok ai ʼgelaʼgeat welegi. Wiak togwi ai aʼge en eragam nebaigoluk oʼgo ʼbalogo ʼgelaʼge woknebegeimu welegi o.

¹⁵Ai en e, an nogola en, “Di aʼge yu aʼge opsogo nak tagalle,” oluk nagai epasu legi ano, ebe demat taga legi erlak. Aʼgeat de, nebit epasu legi aʼge anoat tago ai en e, an taga legi aʼge ai nuʼgwarek en pobirak erlak welegi o.

¹⁶An nogola en nagai epasu legi aʼge ano tu erlak. We nebit epasu legi aʼge taga legi ai re, “Wene Allah en nenesaʼgo weregei aʼge aiat op o,” oluk u ʼgelaʼgeat taga legi o.

¹⁷An nebabut asogo taga legi ai re, an en taga legi puk. We, wiak togwi aʼge nogola welat tago yo.

¹⁸Hegitsogo tigoluk nagai epasu legi aʼgeat de, ebe an en tu re, mia o. Ai re, an nebabut e, op aʼge mesik tago puk. We, nebabut aphwami enebabut aʼge notogat welat taga legi, oluk naluk o.

¹⁹Op aʼge tigoluk epasu legi aʼgeat de, ebe demat taga legi erlak o. We, wiak aʼge tigoluk epasu legi erlak aʼgeat de, ai aʼgeat taga legi o.

²⁰Nogola en ogo nagai epasu legi erlak. Nebit epasu legi aʼge taga legi holuk e, an nebe yen taga legi erlak hegi. We, wiak togwi aʼge nogola welago aʼge ai enat tago yo.

²¹An nebabut taga legi egi ai re, disogo hasu legi. Opsogo tigoluk tisoam e, wiak tu aʼge nak taknebasu o.

²²An nogola en e, “Wene Allah en nenesaʼgo weregei aʼge ai op o,” oluk epasu legi aʼgeat de,

²³neʼgik noyuk nebe ebesik e, mu aʼgeat tagalat, wene Allah en nenesaʼgo weregei aʼge ano nogola en op epasu legi aʼge ai sebeligoluk tiso yo. Neʼgik noyuk nebe ebesigat yema wiak nak taga legi ai en e, nebe wiak tuagoluk herle wusogo ʼgelaʼge nebasu ai o.

²⁴An nuʼgwarek nogola re, wene Allah en nenesaʼgo weregei wene ai hwelak weleik epasu legi aʼgeat de, nebabut aphwami enebabut onotogat welat togwi aʼge ano en moʼgulnosoam e, iak hologo welago ai o. Asogo welago ai en, nebe modok watnobua ai re, eige. Sa en delnobua. Nue ʼgain Onuk Logo aʼge Yesus Kristus tegei ai pam delnobua ai en e, “Naik Allah o,” oluk hau werise legi o.