Read Silimo Roma 8 Bible Online

Roma 8 - Silimo bible

Roma 8

¹Yogodak nis Kristus Yesus emin hwedik welege aʼge Allah en wene nenebam poluk wiagapnonobua erlak o.

²An naduk e, wiak tugulomtik ologun pam enebe modok waragai ai aʼge en herle wusogo ʼgelaʼge tenniarok welaga. Asogo oruakma, pobuk Allah Arogun en Kristus Yesus emin hwedik taknenebasulat nenelalugapnenebiso aʼge ano en herle hebilogo nebesimu welegi o.

³Naduk e, wene Allah en nenesaʼgo weregei wene ano, nis aphwami nenebabut maben ai en e, obapnonobu mia aga. Mia agama re, nis aphwami nenebabut wiak togwi oruakma, Allah uʼgwarek omlogo nis aphwami ʼgelaʼge agarik, nis wiak togu lege aʼge ai wene ebam poluk mabenap pouwagolugat perakpou wagama mabenap pesi ai.

⁴Naduk e, nis hegitsogo togu lemagoluk, wene Allah en nenesaʼgo weregei aʼgeat de, wiak togu lege ani o. Wiak togu legerikmu re, pobuk nis aphwami enebabut wogwi erlak welat Allah Arogun ebabut wokho hegitsogo togu lege aʼge at en egei ʼgelaʼgeat togu lemagoluk, wiak togwi ai arat mabenap pesi ai o.

⁵Is logon en aphwami enebabut onotogat welat togwi aʼge enebabut wogwi aʼge ai, onogola re, wene aphwami aʼgeat ebam eberogwi o. Ye, is logon en Allah Arogun ebabut wogwi aʼge re, onogola wene at aʼgeat ebam eberogwi o.

⁶Aphwami enebabut onotogat welat togwi aʼge ebam eberogu lema holuk, ologun pam e, enebe modok warema ai o. Aʼgeat de, Allah Arogun en onogola ʼgagalisoam togwi aʼge ebam eberogu lema holuk, enede haʼbuksogo enelaluk modok welema aiat o.

⁷Aphwami enebabut onotogat welat togwi aʼge ano pam eberogulat, Allah eragam ʼgoluk iak hologo wolom mia en hologo welagai erlak ai en, at emin hwerlirak welagai o.

⁸Aphwami enebabut onotogat welat togwi aʼge ai togwi modok welat, Allah ede opsogo tu mia welagai ai o.

⁹Asogo aʼgeat de, his nak e, Allah Arogun demat honogola oruak holuk e, henebabut aphwami enebabut onotogat welat togwi ʼgelaʼge togwi erlak o. We, Allah Arogun ebabut wokho togu legep ai o. Ye, ap sa en Kristus Arogun ogola erlak holuk e, at ai ebe Kristus aʼge erlak o.

¹⁰Asogo aʼgeat de, his Kristus honogola oruak holuk e, henebabut wiak togu legep ai en, henebe henagap aʼge yu warorogup aʼgeat de, Allah en wene henebam aʼge noʼgorlogo wokholuk pobuk togolik emin hwedik takhenebesi ai en, at Arogun en henelalugaphonobua ai o.

¹¹At Allah en e, Kristus Yesus waragoam elalugap pesimu re, at Arogun honogola welat e, henebe henagap waraga legep aʼge yu henelalugaphonobuayat o. Ai re, at Arogun en Kristus ebe waragarik elalugap pesi ano honogola welago ai en henelalugaphonobua o.

¹²Narilak norokhwi. Nis en togulom aʼge oruak o. Ai re, nenebabut aphwami enebabut onotogat welat togwi ʼgelaʼge togulom oluk egi puk. Erlak o.

¹³His henebabut aphwami henebabut honotogat welat togu lorogup holuk e, henebe modok warorogup ai o. Aʼge re, henebabut asogo tu ʼgelaʼge takhenebasuam, Allah Arogun yoʼgo poluk, at anni pam werak pogu lorogup holuk e, henelaluk modok wolorogup o.

¹⁴Allah en Arogun wokhentasu ai re, aphwami enebe is logon eneragam aʼge welat enebabut onogorloktak welat togwi ai ʼgelaʼge, takhonobogu lemagoluk wokhentasu puk. We, at Allah uʼgwarek eiyagai takhenebasulat, yoʼgulhonobuagoluk wokhentasu o. Ai en e, is aphwami Allah Arogun en wogonoboluk noso aʼge, enebe loʼbok e, enebe Allah eiyagaiat oruak o. Asogo welat nenebe Allah Arogun pam heʼberik poluk welat e, disogo ogu lege, “Naik Allah, naik Allah,” oluk neniak ʼbaksogo ogu lege ai o.

¹⁵

¹⁶Asogo ogu lege ai re, at Allah Arogun en, “Henebe Allah eiyagai o,” oluk moʼgulnentasuam, nis nenedemu en ogu lege ai o.

¹⁷Nis nenebe Allah eiyagai holuk e, at Kristus di obotut yu obotut hesi ʼgelaʼge, hul holuk, Allah en nis Kristus eminat erliknonobua ai en e, Allah en di aʼge yu aʼge at eiyagai wogentaigoluk obok moʼgulentesi aʼge ai, at Kristus eminat woknontoma, eiye wolomul o.

¹⁸Nis o yogodak welege ya pam e, di obotut yu obotut hogu lege ai, weiyat ʼgelaʼge o. Aʼge re, pobuk, Allah en nenebe ʼget mu aʼge taknenebasuam e, erliknonobua ai nak e, logat o. Holuk e, emin walhoma re, emin hegit erlak, oluk nogola epasu legi o.

¹⁹ʼBogorl ʼgwiang di aʼge yu aʼge Allah en walhesi aʼge yema en e, “Allah eiyagai enebe muat tagenebasuam selakma erligonobua ai metne erlige ema,” oluk, alik worogwi.

²⁰ʼBogorl ʼgwiang di aʼge yu aʼge ʼberlek omuat almasogo weleigoluk opoluk en, alemat agarik welago puk. We, at Allah en e, “Pobuk obaptik en e, we lodu paget asogo welemak o,” oluk ede epesi hegitsogo oruak o.

²¹Asogo oruak aʼgeat de, pobuk Allah en obap pouwa aʼge oruagat o. Ai erlige re, aphwami wiaksogo herle werak oruakma, herle hebilogo delenebiso ʼgelaʼge, ʼbogorl ʼgwiang di aʼge yu aʼge ʼberlegat alemerak pasu aʼge en anni pam tenentarok oruakma, Allah en herle hebelik poluk delogo onobouwa o. Asogo onobouwa ai, at eiyagai enebe ʼget mu aʼge heliʼgogo enebasuam erligonobua ai ʼgelaʼge, ʼbogorl ʼgwiang di aʼge yu aʼge asogoat ʼget mu aʼge heliʼgogo enebasuam erliktuayat o.

²²Hwami en, enemalik dagonobogulat e, onoʼborl nonouk wiaksogo togulat enede oborlogouk oso ʼgelaʼge, ʼbogorl ʼgwiang di aʼge yu aʼge Allah en walhesi aʼge yema ʼberlek o page enat nonouk tagalat enede oborlogouk ogwiat o.

²³ʼBogorl ʼgwiang di aʼge yu aʼge ai nak nonouk tagalat, enede oborlogouk ogwi puk. Allah en e, “Henebe an neiyagai. Arat wokhenebegis o,” oluk nenebe nenagap nenede ʼberlegat obapnonobua aʼge owan oruakhwe, soʼboru aʼgulakma naduk dorogwi ʼgelaʼge, at Arogun naduk woknentesi aʼgeat de, ebe pobuk taknonobouwa aʼge ai yetharok welat e, nonouk togulat nenede oborlogouk togu lege.

²⁴Asogo taknonobouwa o, oluk opogumu re, Allah en delnenebegeimu welege. Aʼge re, ap sa ʼgelaʼge en, “Pobuk disogo ema o,” oluk ede epasu oruakma, ebe arat agoam il holugat de, pobuk ede epasuat wolom no? Asogo mesik welagai erlak ai en e, nis en, “Pobuk disogo ema o,” oluk opogu lege aʼge ai, ebe arat agoam e, nenil hege holuk e, nenede eberogwi modogat wolomul erlak o.

²⁵Aʼge re, nenede en, “Pobuk demat disogo ema o,” oluk opogu lege aʼge nenil hogwi erlak welat nenepe mosogo yetharok welege.

²⁶Asogo yetharok welat e, nis nenebe mabenat oruakma re, Allah Arogun en letnentasu o. Nis Allah yoʼgo pouwogoluk neniak noʼgosogo ul oluk neneperlak oruakma re, Allah Arogun en aphwami eniak pam u puk aʼge, ede oborlogouk eselat Allah yoʼgo pasu.

²⁷Asogo yoʼgo pasumu re, at Allah en nonogola modok ʼbenerisoma no oluk e, at uʼgwarek ogola epasu aʼge hegitsogo, at Arogun en at eiyagai enebaget yoʼgo pasumu pobi tiso yo.

²⁸At Allah ede opoluk nis yoʼgo nenebesirik, nis at ebe nenede welege aʼge, at emin welat, di aʼge yu aʼge op nak emagoluk, taknenebasu nenaluk o.

²⁹Page enat, at Allah en nis nenebe aluk welat, at omlogo ʼgelaʼge emagoluk poliknenebesi o. At Yesus ebe malik naduk aʼge, osi aʼbigat at emin welemagoluk poliknenebesi ai.

³⁰Nadugat Allah en nenebe poliknenebesi aʼge nak, yoʼgo nenebesi. Asogo yoʼgo nenebesi aʼge, wene nenebam aʼge noʼgorlogo wokholuk, pobuk emin togolik hwedik taknenebesimu welege. Nenebe asogo hwedik taknenebesi aʼge, at ebe erliktogwi modok welagai aʼge ai ʼgelaʼge emagoluk woknenebegei.

³¹Wene ʼberlek ai paget, nis noʼgosogo ul. Allah nis oruak oʼgwe ago holuk, sa en mabenapnonobo no. Mia o.

³²At uʼgwarek omlogo ede om erlakma en, nis ʼberlegat nenebaget waremagoluk perakpou waga. At ebabut op en asogo woknentesirik e, di aʼge yu aʼge ebam louksogo woknontouwa erlak no? Woknontouwayat o.

³³Allah en nenebe pulogo woknenebegei aʼge, wene nenebam aʼge noʼgorlogo wokholukmu re, pobuk wene nenebam sa en po no. Mia o.

³⁴Ye, wene nenebam poluk e, sa en wiagapnonobu no. At Kristus Yesus waragama Allah en elalugaptegeimu re, ʼbogorl pam ligagarik, at eʼgik ʼbekhit akhit ʼgain eragam welat e, nis nenebaget Allah yoʼgo pasu o.

³⁵At Kristus nenebe ede en emin hwedik oruakma re, sa en daktak nonobo no. Di obotut yu obotut taknenebasulat, eʼgin aʼge nenebam pasulat, tuema en de, ai en daktak nonobo no? Mia o. Aphwami en e, “Henebe Allah eiyagai o,” oluk wiagapnonobu ai en daktak nonobo no? Soʼboru obuk agalat, nonosum di aʼge yu aʼge nenerlagaik agalat, tuema en de, ai en daktak nonobo no? Yuk ogulat, nenebe watnonobogulat, tuema en de, ai en daktak nonobo no? Mia o.

³⁶Wene ai hegitsogo Allah iak pam pelal wogulat, disogo egesa, “Hat hebaget e, aphwami en erlige hwedik, hup hwedik, watnonobuogoluk taknonobogwi modok oruak o. Aphwami en domba wam woruogoluk obok ʼbalogwi ai ʼgelaʼge, nonobok ʼbalogwi modogat oruak o,” [17] oluk pelal wokho pegesema oruak.

³⁷Asogo aʼgeat de, Allah nenebe ede en nonue ʼgain Onuk Logo aʼge Kristus Yesus woknentesimu ebe waraga ai pam emin hwedik oruakma nenebe waromma emin, nenelaluk wolomma emin, ai en daktak nonobo mia o. Malaikat ʼbogorl pam yoʼgo noʼgwi aʼge eba logon emin, ʼbogorl pam enanni oruak aʼge eba logon emin en, daktak nonobo miayat o. Di aʼge yu aʼge yogodak ago aʼge emin, pobuk ema aʼge emin, eba en daktak nonobo miayat o. Ye, anni oruak aʼge eba logon emin en, daktak nonobo miayat o. Ye, di aʼge yu aʼge ʼbogorl pam welago aʼge emin, opma ogodima welago aʼge emin en, daktak nonobo miayat o. Ye, Allah en walhesi aʼge mu aʼge mesik en daktak nonobo miayat o. At Allah en nenebe edeapnenebesimu, Kristus Yesus tegei ai pam, ʼberlegat asogo wiagapnenebasuam nis daktak nonobo mia o. We, aphwami wolloʼgen dagalogo waronoboluk enanni agai ʼgelaʼge, nenanni aga lege oluk nak e, pobi taga legi o.