Read Silimo 1 Korintus 1 Bible Online

1 Korintus 1 - Silimo bible

1 Korintus 1

¹His Allah eiyagai o Korintus odoktugu legep aʼge, narilak norokhwi. An Paulus Allah ede epesi ano pam, Kristus Yesus en yoʼgo noboluk peraknobou waga aʼge ano, nenare Sostenes neʼbirek en, wene yu pelal wokho heneʼbek perakpou wege ai o. His o Korintus aʼge Allah en yoʼgo henebesimu nonue Kristus Yesus emin hwedik oruakma, Allah en, “Is yu an neiyagai o,” oluk henebe at uʼgwarek ebaget pagathwerlesimu welegep o. Asogo welat e, aphwami o di owi yu owi eba en, is emin, nis emin, nonue ʼgain Onuk Logo aʼge Yesus Kristus onuk ʼbalogwi aʼge henemin ʼberlegat wene yu pelal wokho heneʼbek perakpou wege ai o.

³Nenaik Allah, nonue ʼgain Onuk Logo aʼge Yesus Kristus eʼbirek enebabut op ano en, op aʼge wokhontogulat, henede haʼbugaphonobogulat, togu lemak o.

⁴Allah ebabut op en, Kristus Yesus ebam pegilsogo, op aʼge wokhentasu ai en, nin hwedik nan hwedik hau weriso modok welago yo.

⁵His Kristus emin hwedik oruakma Allah en henebe ʼgainaphenebesimu welegep. Asogo welat, di wene yu wene Allah iak ai edip henaluk modok egeptik e, wene op modok moʼgulontogu legep ai o.

⁶Wene ai re, Kristus tegei wene moʼgulhentegis aʼge, honogola wegeptik e, henede hurleap pegep o.

⁷Henede asogo hurleap poluk, nonue ʼgain Onuk Logo aʼge Yesus Kristus selakmayat wema oluk, yetharok welat e, Allah en woknentasu aʼge ai, mesik wo erlakma en welegep puk. We, ʼberlegat wegeptik welegep o.

⁸Pobuk e, o ologun pam nonue ʼgain Onuk Logo aʼge Yesus Kristus wema ai erlige, his wiak oruakma hentaumano oluk, at Kristus enat henede hurleaphenebasu lema o.

⁹At Allah en omlogo nonue ʼgain Onuk Logo aʼge Yesus Kristus emin hwedik wolorogup en yoʼgo henebesi ai o. Asogo, at ebabut heʼberik aʼge en yoʼgo henebesi ai en e, demat ema oluk henede mennei daksogoat wolom o.

¹⁰Asogo aʼgeat de, narilak norokhwi. Nonue ʼgain Onuk Logo aʼge Yesus Kristus onuk pam, wene mesik henesaʼgo werik o. His ʼberlek henebe meʼgeru erlakma en, hau werak welat e, heniak mesigat nak ogulat, henede mesigat welat, honogola en wene mesigat eberogulat, togu lomup o.

¹¹Narilak norokhwi. Wene asogo egi ai re, aphwami hwe Kloe oruakma en wegesarik e, disogo egesema en, “Is-isat wene ʼbalogwi o,” oluk ʼbaksogoat moʼgulnosu wegesema en moʼgulhentegis o.

¹²Wene ebe re, disogo ogu legep ai paget egi o. Hat mesik en e, “An Paulus akhit aʼge o,” eselat e, hat mesik en e, “An Apolos akhit aʼge o,” eselat, hat mesik en e, “An Kepas akhit aʼge o,” eselat, hat mesik en e, “An Kristus akhit aʼge o,” eselat, heniak hun domok ogu legep ai en egi o.

¹³At Kristus ai ebe meʼgisogo mumu agama en a? Ye, at e, his henebaget an Paulus nebe e pam ediknoboluk watnebigisema en a? Ye, at e, an Paulus nonuk ʼbalogo ik olomu ʼbelaphenebigisema en a.

¹⁴Erlak o. An en e, his logon ik olomu ʼbelaphenebegis erlak ebano re. We, at Krispus emin, Gayus emin, eʼbirek eria nak e, ik olomu ʼbelabenebegis ebano yo, oluk, Allah hau werise legi o.

¹⁵Aphwami en e, “Paulus uʼgwarek onuk ʼbalogo ik olomu ʼbelabenebegei,” oluk uano oluk e, enebe eria nagat ʼbelabenebegis ai o.

¹⁶I! Yekha! An en Stefanus eiyagai enemin ik olomu ʼbelabenebegismuat hegi o. Asogo aʼgeat de, is ado ʼbelabenebegis de a? Erlak a. An neperlak o.

¹⁷At Kristus en e, an en aphwami ik olomu ʼbelabenebise lemagoluk peraknobou waga puk. Erlak o. We, Allah iak op wene ai moʼgulentil denaga lemagoluk peraknobou waga o. At ebe e pam edikpoluk werigisa ano alemat emano oluk e, an aphwami onowene aʼge ʼgagalogo ogwi ai ʼgelaʼge ese lemagoluk peraknobou waga erlak o.

¹⁸Is aphwami nalema aʼge en e, disogo ogwi, “Yesus e pam edikpoluk werigisa wene ai re, aphwami uo aʼge en ogwi ʼgelaʼge ogwi o,” oluk ogwi ai o. Asogo aʼgeat de, at Allah en e, “Aphwami enede ʼgagalak aʼge en wene ʼgagalogo ogwi ai, an en ing-dingtak paik o. Ye, aphwami wene edip enaluk aʼge ai, eneperlagapsogo nelakpaik o,” [1] oluk egeimu re, pelal wokho pegesema oruak ai en e, nis delnenebiso aʼge en e, “Wene ai re, Allah anni aiat o,” oluk ogu lege o.

²⁰Aphwami enede ʼgagalak aʼge ai emin, aphwami di wene yu wene edip enaluk aʼge ai emin, aphwami wene sorok ogulat eniak anni agai aʼge ai emin, we, ʼburlat oruak o. At Allah en e, “Aphwami onowene enede ʼgagalogo ogwi aʼge ai re, aphwami enede ebis aʼge en ogwi ʼgelaʼge ogwi o,” oluk egei erlak no?

²¹At Allah ede modok ʼgagalak ai en e, disogo egei, “Aphwami ʼgwiangma aʼge en, onuʼgwarek onowene ʼgagalogo ogwi ai en e, an nebe enaluk om mia o. We, is logon en e, wene dem wene moʼgulentil noʼgwiam e, is aphwami ʼgwiangma aʼge en opogulat e, Wene ai aphwami uo aʼge en ogwi ʼgelaʼge ogwi, oluk ogukhweat de, is nin pema en e, Wene ai demat o, oluk opouwa aʼge holuk e, an en delenebigat o,” oluk ebam liok egeitik uʼgwarek enat egei.

²²Is aphwami Yahudi aʼge en ogulat e, “Wene pobi tul en, elalin aʼge mesik tin da,” ogulat, is aphwami Yunani aʼge en e, “Wene henede ʼgagalogo mesik moʼgulnentemit da,” ogulat, ogwi aʼgeat de,

²³nis nak e, Kristus e pam edikpoluk werigisa wene anoat moʼgulontogu lege. Moʼgulontogwiam e, is aphwami Yahudi aʼge en, “Wene ai wiak,” oluk ʼgoboksogo ukpogulat, ye, is aphwami oʼborl oʼgwe aʼge en e, “Wene ai, aphwami uo aʼge en ogwi ʼgelaʼge ogwi o,” oluk ukpogulat, ogwi ai o.

²⁴Asogo aʼgeat de, is aphwami Yahudi aʼge et, Yunani aʼge et, Allah en yoʼgo enebesi aʼge en e, “Allah anni Kristus ebe aiat o. Ye, Allah owene ʼgagalak wene, Kristus ebe aiat o,” oluk pobi togwi o.

²⁵At Allah owene aʼgeat de, is aphwami ʼgwiangma aʼge en e, “Wene ai, aphwami uo aʼge en ogwi ʼgelaʼge o,” oluk ogwi aʼgeat de, at Allah ede modok ʼgagalak o. Nis aphwami nonowene aʼge nonogola ʼgagalak ogu lege ai, nenede ebis aʼge en ogu lege o. Is aphwami ʼgwiangma aʼge en e, “At Allah maben,” opogwi aʼgeat de, at anni aʼbik o. Ye, nis aphwami en e, “Nenanni aʼbik o,” opogu lege aʼgeat de, maben o.

²⁶Narilak norokhwi. Henebe noʼgosogo oruakma Allah en yoʼgo henebesi no. Henede eberit o. Aphwami his aʼge onogola ʼgagalak aʼge emin, enanni oruak aʼge emin, ʼgaindek ononuk oruak aʼge emin, enebe aʼbigat yoʼgo enebesi puk. Erlak o.

²⁷At Allah ede enat e, is aphwami ʼgwiangma aʼge enede ʼgagalak aʼge ai, eneʼgerli werigoluk e, aphwami enebabut ing-dingtak aʼgeat pulogo yoʼgo enebesi. Aphwami enanni oruak aʼge ai, eneʼgerli werigoluk e, is maben aʼge pulogo yoʼgo enebesi ai o.

²⁸At Allah ede enat e, aphwami ʼgwiangma aʼge en erliktogulat logo pogwi aʼge ai, erlagap paigoluk e, is aphwami ʼgwiangma aʼge enede en e, “Is ai enebe re, uo aʼge, enebit aʼge, ononuk erlak aʼge,” oluk opogwi aʼge ai, Allah en pulogo yoʼgo enebesi o.

²⁹Ai en e, nis aphwami nonuʼgwarek en Allah ilem erlikhorlo mia o.

³⁰At Allah enat his Kristus Yesus emin hwedik welemagoluk henebesimu welegep ai. Wene nenede ʼgagalogo wolom ʼgelaʼge re, Yesus ebeat woknentesi. Asogo woknentesimu, at en e, Allah emin pobuk togolik laʼbulogo nenebasulat, nenebe Allah paget nenebasulat, delnenebiselat, tago yo.

³¹Ai enat e, Allah iak pelal wokho pogulat e, “Aphwami en di paget yu paget erliktuogoluk holuk e, nonue ʼgain Onuk Logo aʼge tegei ai paget erliktu o,” [2] oluk egesema pelal wokho pegesa.