Read Silimo 1 Korintus 10 Bible Online

1 Korintus 10 - Silimo bible

1 Korintus 10

¹Narilak norokhwi. Wene yu re, heneperlak wolom ai nebit o. Neneʼbalak ʼberlek e, at Musa en wogonoboluk o hena ai ogola ʼgoluk, ik laut lok yeʼgelak ai ebagase ʼbalogo liplau wegesa.

²Is en e, Musa eʼberlik noʼgu lomul o, oluk ik olomu ʼbu ʼgelaʼge re, o hena ai ogola ʼgogulat, ik laut yeʼgelak ai ebagase ʼbalogo libagalat, tigisa ai o.

³Asogo tigisarik, soʼboru noʼgwi ʼgelaʼge, at Allah en mesigat aʼge ʼgelaʼge elalinat wogentasukhwe, enebe ʼberlek noʼgulat,

⁴ik noʼgwi ʼgelaʼge, mesigat aʼge ʼgelaʼge elalinat wogentasukhwe, enebe ʼberlegat noʼgulat, togu legesa. Ik ai re, helep Allah en pesi aʼge, emin modok denagalat, ogola en libagoam noʼgu legesa ai. Helep ai ebe re, Kristus at o.

⁵Asogo aʼgeat de, is logon enebe aʼbigat Allah ebam lioksogo welegesa erlak ai en e, o leimu aphwami erlakma eba warenebegeimu werak da ʼgaboktak ya ʼgaboktak laga ai.

⁶Asogo aga ai re, is wiak aʼge enagaisogo togulat e, ap is aʼge logon enede dogwi asua ebam heʼberik poluk erliktogulat, togu legesa ai en aga ai. Is asogo togu legesa ai ʼgelaʼge, nis asogo togu lomulno oluk, pobi togulat nenesaʼgo werise lemagoluk wene ʼberlegat asogo aga ai o. Is asogo togu legesa oluk, Allah iak pelal disogo wogo oruak, “Is aphwami enaʼgul onuk ai aʼge en, seni nouwogoluk huregesarik, pobuk weni worogulat, hwami ʼbabi tenontogulat, tuogoluk inegesa o,” [10] oluk pelal wokho pegesa.

⁸Ye, aphwami is aʼge logon ʼbabi tenontogu legesema, enebe 23.000 modok aʼbigat mesik erlige perlengsogoat waretil legesa ai ʼgelaʼge, nis asogo watnonobuano oluk, asogo togulom modok mia o.

⁹Ye, aphwami is aʼge logon en e, “Nenaik ʼgain Onuk Logo aʼge olot het oruak no?” oluk ede walsogo togu legesema, herlegetie iak en lebilenebegeimu re, waretil legesa ai ʼgelaʼge, nis watnonobuano oluk asogo tu modok mia o.

¹⁰Ye, aphwami is aʼge logon en nenebit-nenabit ogu legesema re, malaikat ʼbogorl pam aʼge warenebiso aʼge Allah en perakpou wagama, aphwami enebe aʼbigat warenebegei ai ʼgelaʼge, nis watnonobuano oluk, nenebit-nenabit u modok erlak o.

¹¹Is asogo tagenebesimu enebam aga aʼge ano ʼberlegat e, is aphwami logon pobi togu lemagolugat aga ai o. Asogo tagenebesi o, oluk pelal wokho pegesa ai, nis yogodak o ologun pam lau wege aʼge yu, nenesaʼgo worogu lemagolugat pelal wokho pegesa.

¹²Ai en e, hat mesik hogola en, “An nede hurle o, edik welegi o,” oluk epasu legen holuk e, ʼbule ʼbogunno oluk hebabut heberlogo wolomup o.

¹³His wiak tuagoluk honogola ʼgagaliogoluk wagoam ebabut hogu legep ai re, nis aphwami ʼberlegat nonogola ʼgagaliogoluk wagoma hogwi ʼgelaʼgeat hogu legep o. Aʼgeat de, Allah en obok moʼgulnentesi hegitsogoat tagoma re, wiak tuagoluk honogola ʼgagaliogoluk wagoam e, his en henede sebelu mia aʼgeat de, Allah en ukhonobo erlakma en tenhentarok welema o. Honogola asogo ʼgagalisokhwe, henede sebeluagoluk, Allah en wene hegitsogo moʼgulhontouwa aʼge oruak o.

¹⁴Ai en e, narilak norokhwi. Henebe nede o. Dogwi asua ai wusogo enede ebam heʼberik poluk erliktogwi ai aʼge, ukpoluk hweiye liplau manis o.

¹⁵Wene egi ai re, his henede oruak aʼge oluk moʼgulhentasu legi. Holuk e, an wene ik aʼge yu re, honuʼgwarek honogola en pobi tit o.

¹⁶Aʼbosu noʼgulat e, Allah hau wusogo noʼgu lege ai, Kristus emep enamogo werigisa aʼge ai emin hwedik welege oluk noʼgu lege erlak no? Ye, soʼboru ʼgusogo noʼgu lege ai, Kristus ebe emin hwedik welat nenebe mesigat welege o, oluk, ʼgusogo noʼgu lege erlak no?

¹⁷Nis nenebe ʼberlek en e, soʼboru mesigat aʼge ʼgusogo noʼgu lege ai ʼgelaʼge nenebe aʼbik aʼgeat de, mesigat o.

¹⁸His en e, is aphwami enaʼgul onuk Yahudi aʼge en togwi aʼge, pobi tit o. Is en e, Allah uam warotluk heberik pema is noʼgulat, heberik pema odouk narlogumu ebalema narlogulat, Allah emin hwedik welagai ani oluk, heneperlak no?

¹⁹Holuk e, no ik. Dogwi asua ai demat aʼge ik? At uam warogwi aʼge ʼgwerik ai demat aʼge ik? Erlak o.

²⁰Wene ai re, ebe yu paget egi. Is ai Allah paget warogwi puk. We, muʼgat ebabut wiak aʼge paget warogwi o. Holuk e, his muʼgat ebabut wiak aʼge ai emin hwedik wolom e, an nebit.

²¹His e, nonue ʼgain Onuk Logo aʼge egeik aʼbosu neʼgak noʼgulat, muʼgat ebabut wiak aʼge egeik neʼgak noʼgulat, tu modok mia o. Ye, nonue ʼgain Onuk Logo aʼge osoʼboru noʼgumu eba en noʼgulat, muʼgat ebabut wiak aʼge osoʼboru noʼgumu eba en noʼgulat, tu modok miayat o.

²²Nonue ʼgain Onuk Logo aʼge olot het emagoluk togu lege ai nogorlok. At emin walhoma re, nis nenanni re, oruak no? Mia o.

²³His logon en e, “Di aʼge yu aʼge ʼberlek asua re, erlak. Op nak o,” oluk egep ai, demat aʼgeat de, di aʼge yu aʼge ʼberlek ai pam en, nenebe op omul erlak o. “Di aʼge yu aʼge ʼberlek e, asua erlak. Op nak o,” oluk elirat u aʼgeat de, ʼberlek ai en e, nenede hurle ema puk.

²⁴Di aʼge yu aʼge honuʼgwarek henebaget logo pogu lorogup o. At e, is aphwami muon enebaget nak e, logo onobogu lomup o.

²⁵Allah iak pelal wokho pogulat e, “ʼGwiang yu emin, di aʼge yu aʼge ʼgwiangma welago aʼge emin, eiye re, nonue ʼgain Onuk Logo aʼgeat o,” [11] oluk pelal wokho pegesa ai en e, di wam yu wam ʼgwerik oʼgo ʼbalogumu eba oruakma, ʼGesogo tigisa aʼge, oluk hin wokholuk e, henede eʼgin emano oluk e, we, oʼgo ʼbalogo no yo.

²⁷Ye, is aphwami logon enede Allah ebam heʼberik po erlak aʼge en soʼboru sakho nouwogoluk yoʼgo honobogwiam, his henede en lolo e, oluk lagup holuk e, di aʼge yu aʼge sakho pouwa aʼge wokhontogwi holuk, henede eʼgin emano oluk e, “Yu an no aʼge a? No puk aʼge a,” oluk, hin enebam wokho erlakma en noat o.

²⁸Asogo aʼgeat de, is logon e, “Yu dogwi asua uam werigisa aʼge ʼgwerik o,” oluk moʼgulhentasu holuk e, at moʼgulhentasu aʼge ai ebe paget, ede paget, nagup o.

²⁹Asogo egi ai re, his honuʼgwarek henede eʼgin om aʼge paget egi puk. At mesik moʼgulhontouwa aʼge ai ede eʼgin om aʼge paget egi o. Aʼge re, his logon en e, “An yogunat no aʼge oruakhweat de, at ai ede eʼgin emano oluk e, an no erlakma en mo u ai nopaget.

³⁰An Allah hau wusogo nasuam e, ai paget nobok nopaget ʼbalu no,” oluk ogu legep ai paget,

³¹an disogo moʼgulhentaik. Soʼboru emin, ik emin, noʼgulat, di bele yu bele togulat, asogo ʼberlegat togulat e, aphwami en Allah erliktuagolugat togu lomup o.

³²Aphwami Allah eiyagai aʼge emin, ye, is Yahudi aʼge ogo, Yunani aʼge ogo, enede Yesus ebam heʼberik erlak aʼge emin, wiak emano oluk henebabut hegitsogo togu lomup o.

³³His henebabut e, an taga legi ʼgelaʼge togu lomup o. An e, di bele yu bele tagalat e, nuʼgwarek obap pagathwerlaigoluk tago erlak. We, aphwami enebe aʼbigat Allah en delenebisoam op emagolugat tago yo.